العربيه قلت بأصلها معايا - المره الاولى

[Mostafa]

صباح الفل يا رجاله. من نص ساعه، لاحظوا انها دلوقتى 2 بالليل. قلت انزل احط بنزين فى العربيه وارجع على طول عشان ما اتعطلش الصبح وانا رايح الشغل.
اولا العربيه فيات سيينا HL 1600 عشان تعليمات الساده المشرفين
العربيه عندى المفروض انى بفتح اول تكه فى الكونتاكت،لمبه الانجكشن بتنور،بسمع صوت طلمبه البنزين،لمبه الانجكشن بتطفى،بعدها بدور العربيه.
طلعت بالعربيه مفيش 200 متر وبعدين هوب لمبه الانجكشن نورت وبعدين طفت وراحت العربيه مبطله.
جيت افتح الكونتاكت تانى،ولا لمبه الانجكشن نورت ولا سمعت صوت الطلمبه ولا العربيه عاوزه تدور.
لاحظوا ان لمبه البنزين كانت منوره.
حاولت ادورها كتير بس العربيه مغمى عليها بعيد عنكوا.
انا بقول يا اما طلمبه البنزين قطعت يا اما الانجكشن اتسد. ايه رأيكوا فى الموضوع ده.افيدونا افادكم الله.

[CryptonX]

حصل معايا نفس الشيء , سيارتي فيات باليو 1300 ( اخت السيينا الصغيرة )

وللأسف كانت الطلمبة ! و السبب كان بنزين مغشوش و بنزين 90 ! و ترك التانك يفضى على الآخر ( على كلام المهندس بتاع الصيانة )

طلمبة البنزين بتاعتي ب 1250 جنيه من التوكيل , بتاعت حضرتك ب 900 من التوكيل ..

معرفش موجودة برة ولا لأ .

[Mostafa]

انا شاكك 90% انها الطلمبه. انا غلطت لما سبتها تفضى كده بس هنعمل ايه امر الله. طلمبه البنزين بتاعتى موجوده عند الكيلانى واعتقد فى حدود 450 وهيا نفسها بالظبط اللى فى التوكيل. انا لسه هصحى الصبح اشوف هشيلها ولا هعمل فيها ايه ربنا يسهل بقى

[Mostafa]

على فكره يا أ كريم انا قريت الموضوع بتاعك اللى كتبته لما الطلمبه عندك باظت . هوا مختلف شويه عن عندى . لان عندى لمبه الانجكشن مش بتنور والعربيه قاطعه خالص مش راضيه تدور. اعتقد عندك كانت بتدور وتبطل

[modux]

حصل معايا الموضوع قبل كده و كانت فعلا طلمبة بنزين
جبتها مش بوش اللي في شارع دمشق ب 950
بضمان سنة

:neutral: :neutral:

[Abdallah]

اعتقد ان دى طلمبة البنزين عطلت او سلك من اسلاكها فصل او العربية شطبت بنزين خالص.

[badblood]

يمكن طلمبة الله اعلم
بس لوكده ولو حتجيب واحده جديدة اصنصحك بطلمبه بوش الماني عفيه وزي الفل

[Mostafa]

خلاص يا رجاله الموضوع خلص. وطلع اقرب ما يكون للى توقعه الباشمعندس عبد الله. (اللى شكلى معاه وحش قوى اليومين دول بس ان شاء الله هاقابله هاقبله) . الموضوع وما فيه ان فيوز فصل. اه والله الفيلم ده كله طلع فيوز. العربيه فيها علبه فيوزات جنب البطاريه فيها فيوز للانجكشن وفيوز لطلمبه البنزين. الفيوز بتاع الانجكشن كان متشعر وفصل.يلا اهى تعويره والسلام ، دفعت 130 للونش اللى شال العربيه. و70 ثمن فيوزات جديده و ضبط العربيه على الكمبيوتر ومصنعيه واكراميه والذى منه. (يعنى شيل العربيه اغلى من الموضوع كله)
المشكله انى عمرى ما توقعت انها تكون مشكله كهرباء على اعتبار ان كل كهرباء العربيه كانت شغاله زى الفل والفرق الوحيد انه لا لمبه الانجكشن كانت بتنور ولا الطلمبه كانت بتشتغل.
الحمد لله كله فدا الوطن

[Santino]

طيب و عرفت السبب اللي خلي الفيوز يضرب ؟ لازم تعرف إيه اللي حرقه علشان الموضوع ما يتكررش , لأن كده إنت حليت المشكلة اللي باينه ادامك لكن ماحليتش أصلها .

[eng_mkhalaf]

طيب و عرفت السبب اللي خلي الفيوز يضرب ؟ لازم تعرف إيه اللي حرقه علشان الموضوع ما يتكررش , لأن كده إنت حليت المشكلة اللي باينه ادامك لكن ماحليتش أصلها .

+1

[Mostafa]

انا مقلتش ان الفيوز ضرب ولا حاجه . انا كنت بقول فصل بس . الفيوز مضربش بس هوا كان متشعر واتحرك من مكانه فراحت فاصله كهربا. بس

[Adham]

معلش, الحمد لله انها كانت بسيطة و جت على قد كدة

حانشوفك بقى يوم الجمعه ياو حش في الربوة بس هات معاك علبة فيوزات احتياطي :D

[Santino]

طيب الحمد لله إنها جت علي أد كده ,
هو حضرتك وديتها التوكيل و للا إتصلحت فين ؟؟ أصل إنت بتقول إنها إتظبطت بالكمبيوتر , يعني في التوكيل و للا في حد تاني بره التوكيل بيظبط بالكمبيوتر ؟؟ معلش سؤال كمان , العربية بتتحسن لما تتظبط بالكمبيوتر ؟

[Mostafa]

لا انا بعتبر التوكيل ده زى اى حرامى غسيل فمش بتعامل معاه الا فى الشديد القوى . فيه مركز قرب المطار متخصص فيات بس وصاحبه كان مهندس فى التوكيل وعنده كل حاجه وكل اللى شغالين معاه كانوا فى التوكيل. عنده كل قطع الغيار والروافع وعنده الكمبيوتر بتاع العربيه وده طبعا كسر لاحتكار التوكيل للموضوع ده . الناس هناك طبعا كأنك فى التوكيل بالضبط من ناحيه الشغل والكفاءه لكن مع الفرق الرهيب فى الاسعار. كل اسعاره بسعر المحلات التجاريه بره واصليه طبعا . ساعات بتبقى اغلى حاجه بسيطه لكن انت ممكن تجيب حاجاتك بنفسك محدش هناك هيقولك لا.
الكمبيوتر مهمته يكتشف اعطال العربيه هوا بيقولك فيه مشكله فى كذا وكذا وكذا بحيث تقدر تظبط الحاجه اللى فيها مشكله وغير كده بيعمل ضبط لللاعددات بتاعه كنترول العربيه فبالتالى بتتضبط فى كل حاجه خصوصا استهلاك البنزين.
كفايه اقولك انى اول ما اشتريت العربيه كان فيها مشكله وكانت ساعات بتبطل لوحدها لما اجى افصل الغيار عشان اهدى بالعربيه.رحت التوكيل كشف عليها بالكمبيوتر وقالولى الthrotle body عاوز يتغير . كام يا عم 3700 غير المصنعيه.
رحت للمركز ده سألته عليه قاللى 2000 جنيه بس انت عايز تغيره ليه قلتله عشان كذا وكذا قاللى متستعجلش استنى نفكه وننضفه الاول وبعدين نشوف وقد كان . فكوه ونضفوه بالاسبراى وكان بينزل طين قدامى. وبعدها ركبناه والحمد لله المشكله اختفت تماما ربنا يديمها علينا وفى الاخر اخد كام ؟ 20 جنيه مصنعيه + 40 جنيه ضبط الكمبيوتر ودمتم

[Mostafa]

يا ادهم باشا معلش بقى اعفينى من المقابله الجايه . رايح ازور رجاله العيله اللى دخلوا كليه الشرطه . اصلهم يا عينى وحشونى وبيقولوا عليهم متبهدلين فهروح اشوفهم اللى عاوز شيكولاته اجيبله واللى عاوز لبان وكده فمعلش اعفينى بقى من المره دى المقابله الجايه باذن الله و ان شاء الله هبقى اجيبلك معايا دسته فيوزات ومن افخم الفولتات