ســــــــــؤال مهم عن التأجيل للجيش

[dr_abooody]

السلام عليكم

انا كبير اخواتي (عائل اسرة ) و والدي متوفى

بس الفرق بيني و بين اخويا الاصغر منى حوالي سنة بالظبط

هل الاعفاء هتكون لحد ما هو يخلص الكلية و لا بياخد اعفاء 3 سنين

و السؤال الاهم هل لو اخذت اعفاء مؤقت لمدة 3سنين و بعد كدا خلصت ال3 سنين هل بدخل الكشف الطبي و لا مش بيراعوا العملية دة و بيكون عايز يدخلك الجيش ما انت مأجل بقى ؟؟؟

و لا لو عندى عذر طبي ادخل بية من اول مرة و اخد اعفاء نهائي بدل ما اعد ااجل ؟؟؟

[dr_abooody]

اية رايكم يا شباب

[أحمد كمال]

السلام عليكم

انا كبير اخواتي (عائل اسرة ) و والدي متوفى

بس الفرق بيني و بين اخويا الاصغر منى حوالي سنة بالظبط

هل الاعفاء هتكون لحد ما هو يخلص الكلية و لا بياخد اعفاء 3 سنين

و السؤال الاهم هل لو اخذت اعفاء مؤقت لمدة 3سنين و بعد كدا خلصت ال3 سنين هل بدخل الكشف الطبي و لا مش بيراعوا العملية دة و بيكون عايز يدخلك الجيش ما انت مأجل بقى ؟؟؟

و لا لو عندى عذر طبي ادخل بية من اول مرة و اخد اعفاء نهائي بدل ما اعد ااجل ؟؟؟

1- لحد ما يخلص الكلية

2- في كل الحالات بتخش الكشف الطبي قبل ما تخش الجيش

3- لو عندك عذر قدم دلوقتي و خلص نفسك بس لو انت ضامن ان العذر ده يطلعك

[speed4speed]

لو عملت كشف عيله حتلبس اخوك فى الجيش 100* 100
لو العزر بتاعك يطلعك من الجيش حيعملولك كومسيون طبى و حتطلع من هناك او متطلعش دا بيرجعلهم هم او الكوسه الى داخله فى الموضوع
لو اخدت 3 سنين فى الغالب بتاخد النهائيه علطول بعدها
لو اخدت الشهاده غير لائق طبيا ( انا سمعت انها حتقرفك شويه فى الشغل)
انت حتاخد نموزج 110 كشف كومسيون و حتبان النتيجه بعدها لو اخدت تأجيل مبترحش و لو دخلت يبقى تروح تكشف

[أحمد كمال]

لو عملت كشف عيله حتلبس اخوك فى الجيش 100* 100

مش صحيح ... و اصلا لازم و انت بتقدم ورقك تقدم كشف عيلة ...... مش بمزاجك تقدمه و لا لأ

و اخوه لما يتخرج برضه لازم و هو بيقدم ورقه يقدم كشف عيلة ...... يعني مفيش علاقة بين كشف العيلة و التلبيس

لو العزر بتاعك يطلعك من الجيش حيعملولك كومسيون طبى و حتطلع من هناك او متطلعش دا بيرجعلهم هم او الكوسه الى داخله فى الموضوع

بالظبط ....... انت و ظروفك

لو اخدت 3 سنين فى الغالب بتاخد النهائيه علطول بعدها

ماعادش ..... كان زمان ...... اعرف ناس اخدت 3 او 5 و بعدها دخلوهم الجيش ... بعد ما كبروا و اتجوزوا و خلفوا و خللوا في شغلهم كمان :(

لو اخدت الشهاده غير لائق طبيا ( انا سمعت انها حتقرفك شويه فى الشغل)

مش في كل التشخيصات و لا في كل الشركات ...... و اصلا اغلب الشركات بتاخد الشهادة منك كمسوغ تعيين يعني بعد ما تكون قابلت او امتحنت و اتقبلت و كشفت طبي بتاع الشركة و اتعينت بتقدم الورقة مع اوراق تانية زي شهادة الجامعة ......

[Terrible_DaRsH]

انا يا جماعة مليش جيش , بس منفض خالص سمعت ان فى اجرائات بتتعمل فى الجامعة و كده ..!

[أحمد كمال]

انا يا جماعة مليش جيش , بس منفض خالص سمعت ان فى اجرائات بتتعمل فى الجامعة و كده ..!

لو ما عملتش الاجراءات هيحطوا السيخ المحمي في صرصور ودنك

انت وحيد صح؟ والدك فوق ولا تحت الستين؟

[Terrible_DaRsH]

لو ما عملتش الاجراءات هيحطوا السيخ المحمي في صرصور ودنك

انت وحيد صح؟ والدك فوق ولا تحت الستين؟

انا وحيد فعلا :)

والدى متوفى رحمه الله عليه و غفرانه .

[أحمد كمال]

انا وحيد فعلا :)

والدى متوفى رحمه الله عليه و غفرانه .

يبقى طلع الشهادة من دلوقتي و خلص نفسك

تروح مكتب التجنيد في القسم التابع ليك تاخد منهم البطاقة العسكرية بتاعتك (المفروض انك بتقدمها لكليتك تعمل لك بيها التاجيل ..... كبر و ما توديهالهمش عشان تعمل بيها الاعفاء)

و من السجل المدني تطلع قيد عائلي للوالد و قيد عائلي للوالدة و شهادات ميلاد اخواتك ولاد او بنات ان وجدوا

و تجيب مستخرج من شهادة وفاة الوالد

و تاخد عمك او خالك معاك التجنيد في الحلمية او الهايكستب ايهما اقرب لك

تقدم الاوراق و تاخد اعفاء نهائي من الجيش بصفتك الابن الوحيد لأبيك المتوفي

و تاخد الاعفاء

طلع منها مستخرج رسمي اصلي

و سلم نسخه منها للكلية و خلي معاك نسخه

و خلاويص !

[Terrible_DaRsH]

اشكرك بشدة , ده طلع موال , انا كنت فاكر انى هاخد ورقة من القسم على التجنيد و اروح انام بقي :)

طب لو معملتش انا الكلام ده , ممكن ادخل الجيش بالغلط و لا ايه !

[أحمد كمال]

اشكرك بشدة , ده طلع موال , انا كنت فاكر انى هاخد ورقة من القسم على التجنيد و اروح انام بقي :)

طب لو معملتش انا الكلام ده , ممكن ادخل الجيش بالغلط و لا ايه !

لو ما عملتش الكلام ده مش هتعرف تشتغل في اي شركة حكومة او خاصة لان كلهم بيطلبوا ورق الجيش

غير انك هتبقى عرضة للقبض عليك و الحبس في السجن الحربي لحد ما حد من اهلك يطلع الاعفاء بالنيابة عنك

[Terrible_DaRsH]

عرضة للحبس !!

لا و على ايه , من بكره هعمل الاقرار الضريبي :) قصدى ورق الجيش ..

اشكرك .

[maka]

انا يا جماعة مليش جيش , بس منفض خالص سمعت ان فى اجرائات بتتعمل فى الجامعة و كده ..!

انا لسه عامل الحوار ده وااقولك الورق المطلوب

1- قيد عائلى حديث ختمه واضح - لو الختم مش واضح هيرجعك تختمه تانى -

2- شهادات ميلاد للاخوة - ان وجد -

3- شهادات وفاة للمتوفيين

4- بطاقة ال 6 جند

5- صورة من بطاقة والدك وصورة من بطاقتك

6- وثيقة زواج والديك - بيبص فيها ويرجعهالك -

7- تصور رقم 1 و 2 و3 علشان بياخد الاصل و الصور

لو سنك اقل من ال 21 هتحتاج ضامن و لو لا هتروح بنفسك

[speed4speed]

مش صحيح ... و اصلا لازم و انت بتقدم ورقك تقدم كشف عيلة ...... مش بمزاجك تقدمه و لا لأ

هو الوضع دا شبيه بوضعى تماما
انا والدى متوفى و اخويا الاكبر منى مقدمش كشف عيله
واحد معرفه فى التجنيد قاله متقدمش كشف العيله ( عائل الاسره ) الا لو دفعتك لبسة و لو قدمه كنت حدخل انا حتى لو كانت دفعتى اخدة ارجاء

و اخوه لما يتخرج برضه لازم و هو بيقدم ورقه يقدم كشف عيلة ...... يعني مفيش علاقة بين كشف العيلة و التلبيس

دلوقتى لازم يقدم قيد عائلى مع الورق و كشف العيله دا للعائل فقط

ماعادش ..... كان زمان ...... اعرف ناس اخدت 3 او 5 و بعدها دخلوهم الجيش ... بعد ما كبروا و اتجوزوا و خلفوا و خللوا في شغلهم كمان :(

فعلا بتحصل بس فى ظروف نادره

مش في كل التشخيصات و لا في كل الشركات ...... و اصلا اغلب الشركات بتاخد الشهادة منك كمسوغ تعيين يعني بعد ما تكون قابلت او امتحنت و اتقبلت و كشفت طبي بتاع الشركة و اتعينت بتقدم الورقة مع اوراق تانية زي شهادة الجامعة ......

كلام سليم

[Terrible_DaRsH]

انا لسه عامل الحوار ده وااقولك الورق المطلوب

1- قيد عائلى حديث ختمه واضح - لو الختم مش واضح هيرجعك تختمه تانى -

2- شهادات ميلاد للاخوة - ان وجد -

3- شهادات وفاة للمتوفيين

4- بطاقة ال 6 جند

5- صورة من بطاقة والدك وصورة من بطاقتك

6- وثيقة زواج والديك - بيبص فيها ويرجعهالك -

7- تصور رقم 1 و 2 و3 علشان بياخد الاصل و الصور

لو سنك اقل من ال 21 هتحتاج ضامن و لو لا هتروح بنفسك

شكراً جزيلااا ..

اولا شهادة الوفاة مكان بطاقة الوالد , دى تمام .

صور 1 و 2 و 3 مش فاهمها , يعنى هتصور الاول و اروح ولا هتصور هناك و لا ايه ؟

قيد عائلي بيتجاب منين و بطاقة 6 جند دى بجيبها من التجنيد هناك صح ؟