القرية الذكية في المكان الغبي

[kh_talaat]

القرية الذكية في المكان الغبي

كلنا او معظمنا عاصر بداية ظهور ما يسمى بالقرية الذكية smart village والتي انشئت عام 2001 و هي عبارة عن تجمع لشركات الاتصالات وتكنولوجيا المعلومات والمؤسسات الحكومية المرتبطة بتلك الصناعة.

- وتحتوي حاليا القرية على أكثر من 100 مقر شركة و 12 ألف عامل ومن المخطط ان يصل 80 ألف عامل بعام 2014

- وتتفاخر الحكومة المصرية دوما بهذه القريه ويوجد بها مكتب للدكتور احمد نظيف رئيس الوزراء


لكن ترى ... هل انشئت هذه القرية في المكان الصحيح ؟؟

- هل ساعدت هذة القرية على التخفيف من عبء الأزدحام المروي والتكدس السكاني في العاصمة المصرية ؟؟

- هل ساعدت هذه القرية الشباب المصري على بناء مجتمعات جديدة خارج قاهرة المعز والتي اصبحت عبارة عن اتوبيس نقل عام كبير يعج بركابه


وللأجابه على هذه الأسئله يكفيك زيارة واحدة للقرية الذكية ومحاوله العودة لمنزلك بعد انتهاء العمل الرسمي في معظم شركات القريه يعني من الساعه الرابعه الى السادسه مساء

- والطبيعي انك اول طريق سوف تفكر أن تستخدمه هو محور 26 يوليو فستجد به كل ما لذ وطاب من الزحام والتكدس الرهيب الي يصل احيانا الى الشلل التام الى ان ينقلك المحور الى المهندسين وهذه مشكله اخرى !!!

تعالوا نتخيل موقع بديل للقرية الذكية بعيدا عن مصالحنا الشخصية كمقيمين داخل القاهرة

- انا عن نفسي اتخيل لو كان مكان القرية الذكية في قلب الصعيد وليكن مثلا محافظة اسيوط (على اساس انها عاصمة الصعيد )

- او في سيناء ( الأمتداد الأستراتيجي لمصر)

- او على بحيرة السد العالي في اسوان

فكلها مناطق تندر لسكانها وبها مساحات شاسعه بعيدا عن القاهرة وضجيجها ومدنها الجديدة التي تصب في النهاية داخل القاهرة وتشل حركتها


مع العلم ان مصر بلد مساحتها مليون كم مربع المساحة المأهوله بالسكان لا تتعدى 4 % من مساحتها

ومع ذلك نعاني من أعلى كثافة سكانية في العالم !!!!


تري ... هل انشئت القرية في مكانها الصحيح ؟؟؟ دعوة للحوار الجاد

[viper911s]

ومن امتا كان فى تخطيط فى مصر يا باشا
هى ماشية حلو كدة جميلة
حاول تحبها كدة وتاقلم نفسك
الحياة جميلة والزحام الجامد دة فرصة للتأمل
والتعارف على الناس
وكمان الاستمتاع بالمناظر الجميلة فى الطريق

[kh_talaat]

ومن امتا كان فى تخطيط فى مصر يا باشا
هى ماشية حلو كدة جميلة
حاول تحبها كدة وتاقلم نفسك
الحياة جميلة والزحام الجامد دة فرصة للتأمل
والتعارف على الناس
وكمان الاستمتاع بالمناظر الجميلة فى الطريق

أكيد عندك حق ... عشان كدة انا بقول تعالوا نتخيل مكان تاني للقرية .... خيال مش اكتر

على الأقل الواحد ينفس عن غيظة من أسلوب التخطيط الفاشل في البلد

[ehabradwan]

لا واللي ينقطك المكان الاغبى اللي هيعملوا فيه منطقة التكنولوجيا دي اللي هي مفروض امتداد للسمارت بس في شركات it اعتقد
ادام اتصالات اللي في المعادي !!! الحتة دي زحمة موت من غير حاجة

[Samir Elshahawy]

الاكثر من ذلك ...

لو فكرت تروح الاسكندرية بعد الساعة السابعة صباحا ستجد ان الطريق متوقف من بعد منزل الطريق الدائري (أول طريق الواحات) و حتي بوابات طريق القاهرة / الاسكندرية الصحراوي

السبب ..
هو كم السيارات المهول المتجه الي القرية الذكية (في المكان الغبي) و خاصة أن المدخل الوحيد لها قبل بوابة الطريق مباشرة لدرجة أني في بعض الاحيان أتوقف قبل البوابات لمدة من 15 الي 30 دقيقة

فعلا ... قرية المفترض أنها ذكية في مكان غبي

[alaasaid]

للاسف كل حاجة فى مصر بدون تخطيط و عشوائية و بتم لمصلحة ناس معينة و مش مصلحة البلد , و انا متأكد خلال سنتين هيفكروا ينقوا مكانها تانى

[marsguy]

أنا بادعي على اللي إختار المكان ده فعلاً

بجد أنا صحتي باظت وبقيت صديق دائم للدكاتره ومراكز التحاليل والآشعه من ساعة أما رحت القريه!

يا جماعه حرام إن الواحد يشتفل 8 ساعات ويقعد 4 ساعات ونصف في الطريق كل يوم!

سنة 2001 وما قبلها أيام أما كان موقع ا لقريه لسه قيد الدراسه كان في أماكن كتير أنسب.

[wael3m]

بص يامان هو احنا دايما فاشلين فى التخطيط العمرانى داخل مصر
من حوالى كدا 60 سنة بس خارج مصر ماشاء الله ومدن كتيير فى الخليج تشهد بكدا
يبقى العيب فين ؟؟ العيب فى العسكريين اللى بيطلعوا معاش وبيمسكوا وظائف مدنية
مع كامل احترامى لكل العسكريين بس انا شايف ان أغلبهم مش بينفع فى الوظائف الادارية
هما داخل الجيش أكيد حاجة كويسة اوى وكمان لو دخلوا معركة هيعرفوا يخططوا لها كويس
لانهم خبرة مثلا 30 سنة او اكتر بس يجى بقى يمسك وظائف ادارية زى رئيس مجلس مدينة
او محافظ او وزير تلاقى الدنيا خربت :b4_556:
هو المفروض لما اخطط لمدينة اعمل حساب حاجتين
التوسع المستقبلى للمدينة و كمان وسيلة مواصلات سريعة زى قطار او مترو يربطها ببقية المدن التانية
علشان اقدر اخلى المدينة دى فى المستقبل وسيلة جذب سريع للسكان

خد عندك مثلا 6 اكتوبر شوف قعدت قد ايه على ما اتعمرت ( فاكرها لما روحت هناك اول مرة سنة 87 )
تقريبا فاضية ودلوقتى بيقولوا عايزين يعملوا مترو من محطة الجيزة يربط 6 أكتوبر طيب ما كان من الاول

فعلا محتاجين التغيير فى النظام علشان نعرف نتقدم ونبقى زى الدول المتقدمة
وانا متأكد من كدا فى ظرف 10 سنين شرط ان النظام يتغير

[زينة الله]

القرية الذكية في المكان الغبي

كلنا او معظمنا عاصر بداية ظهور ما يسمى بالقرية الذكية smart village والتي انشئت عام 2001 و هي عبارة عن تجمع لشركات الاتصالات وتكنولوجيا المعلومات والمؤسسات الحكومية المرتبطة بتلك الصناعة.

- وتحتوي حاليا القرية على أكثر من 100 مقر شركة و 12 ألف عامل ومن المخطط ان يصل 80 ألف عامل بعام 2014

- وتتفاخر الحكومة المصرية دوما بهذه القريه ويوجد بها مكتب للدكتور احمد نظيف رئيس الوزراء


لكن ترى ... هل انشئت هذه القرية في المكان الصحيح ؟؟

- هل ساعدت هذة القرية على التخفيف من عبء الأزدحام المروي والتكدس السكاني في العاصمة المصرية ؟؟

- هل ساعدت هذه القرية الشباب المصري على بناء مجتمعات جديدة خارج قاهرة المعز والتي اصبحت عبارة عن اتوبيس نقل عام كبير يعج بركابه

اعتقد الحل أنه العاملين بالقرية الذكية يسكنوا فى 6 أكتوبر جنب شغلهم
و الموضوع دا فعلا لفت نظرى لما لقيت اللى شاغلين فى الدقى أو الجيزة عموما ساكنين فى مصر الجديدة ومدينة نصر أو حتى القليوبية واللى شغالين فى مدينة نصر ساكنين فى الجيزة و تبقى شوارع القاهرة كحلبة المصارعة أو أرض المعركة فى ساعتى الذروة الصباحية والمسائية فضلا عن مواطنى الاقاليم المضطريين للحضور للعاصمة لتخليص مصالحهم من الوزارات و المصالح المركزية

القرية الذكية في المكان الغبي

تعالوا نتخيل موقع بديل للقرية الذكية بعيدا عن مصالحنا الشخصية كمقيمين داخل القاهرة

- انا عن نفسي اتخيل لو كان مكان القرية الذكية في قلب الصعيد وليكن مثلا محافظة اسيوط (على اساس انها عاصمة الصعيد )

- او في سيناء ( الأمتداد الأستراتيجي لمصر)

- او على بحيرة السد العالي في اسوان

بالنسبة لسيناء كان فى مشروع مواز لمشروع القرية الذكية فى امتداد محافظة الاسماعيلية فى سيناء واسمه وادى التكنولوجيا لو كان حد سمع عنه و بردوا مخطط أنه يحتوى مجموعة من المصانع الالكترونيات و شركات الاتصالات و تكنولوجيا المعلومات لكن المشروع تجمد تماما من سنوات طويلة مش عارفة ليه ؟ ناس قالوا هما يحبوا القرية الذكية اكتر و بالفعل هو المشروع اللى كمل و ناس قالوا زيه زى باقى المشاريع فى أرض سيناء كلها بتقف لاسباب تييييييييييييييت و انتوا فاهمين بقى

أما بحيرة السد العالى فى أسوان كان الأولى فى هذه المنطقة تنمية المشروعات الخاصة بالثروة السمكية و خصوصا أن البحيرة تعج بالاسماك لدرجة توحش هذه الاسماك و وجود حوالى 120 الف تمساح تتغذى عليها وشوف أزمة اللحمة والدجاج و الاسماك وحيدة الجنس المهرمنه و المرباه على مياة الصرف الصحى واحنا عندنا بحيرة زى دى نقية و بها هذه الثروة السمكية و كمان التماسيح ممكن نستغل جلودها وهى أغلى الجلود ، المهم عشان ما طويلش عليك فعلا سمعت أن الحكومة سمحت لشركات انها تستغل الثروة السمكية هناك وتصطاد كميات أكبر لمصلحة الناس بدلا من الصيادين البسطاء بادواتهم البسيطة ،المهم الشركات دى عملت ايه ؟؟...قال ايه اكتفت بشراء السمك من الصيادين واعادة بيعه بالغلى و الكوى للناس

فكلها مناطق تندر لسكانها وبها مساحات شاسعه بعيدا عن القاهرة وضجيجها ومدنها الجديدة التي تصب في النهاية داخل القاهرة وتشل حركتها


مع العلم ان مصر بلد مساحتها مليون كم مربع المساحة المأهوله بالسكان لا تتعدى 4 % من مساحتها

ومع ذلك نعاني من أعلى كثافة سكانية في العالم !!!!


تري ... هل انشئت القرية في مكانها الصحيح ؟؟؟ دعوة للحوار الجاد

فعلا معاك حق انا شايفة أن التوسعات حول القاهرة تصيبها بالترهل ولا تبنى مجتمعات مستقلة بل توسعات أيضا تعتمد كليا على الخدمات والمرافق القديمة بالقاهرة و بكدة يبقى محلناش مشكلة التكدس بل على العكس بنزودها

و تقبل تحياتى

[kh_talaat]

الاكثر من ذلك ...

لو فكرت تروح الاسكندرية بعد الساعة السابعة صباحا ستجد ان الطريق متوقف من بعد منزل الطريق الدائري (أول طريق الواحات) و حتي بوابات طريق القاهرة / الاسكندرية الصحراوي

السبب ..
هو كم السيارات المهول المتجه الي القرية الذكية (في المكان الغبي) و خاصة أن المدخل الوحيد لها قبل بوابة الطريق مباشرة لدرجة أني في بعض الاحيان أتوقف قبل البوابات لمدة من 15 الي 30 دقيقة

فعلا اكبر كارثه للقرية الذكية ان ملهاش غير مدخل واحد من الطريق الصحراوي وهذا يدل على العشوايئة الكاملة في اتخاذ القرار والبعد عن بديهيات التخطيط

أنا بادعي على اللي إختار المكان ده فعلاً

بجد أنا صحتي باظت وبقيت صديق دائم للدكاتره ومراكز التحاليل والآشعه من ساعة أما رحت القريه!

يا جماعه حرام إن الواحد يشتفل 8 ساعات ويقعد 4 ساعات ونصف في الطريق كل يوم!

سنة 2001 وما قبلها أيام أما كان موقع ا لقريه لسه قيد الدراسه كان في أماكن كتير أنسب.

والله يا فندم مش لوحدك فيه ناس كتير اعصابها تعبت فعلا من التكدس الرهيب على المحور بسبب مكان القرية دة وحسبنا الله ونعم الوكيل

فعلا محتاجين التغيير فى النظام علشان نعرف نتقدم ونبقى زى الدول المتقدمة
وانا متأكد من كدا فى ظرف 10 سنين شرط ان النظام يتغير

فعلا مفيش حل غير كدة .... الحكومة الفاشلة بتورث فشلها للحكومة التالية وهكذا .....

فعلا معاك حق انا شايفة أن التوسعات حول القاهرة تصيبها بالترهل ولا تبنى مجتمعات مستقلة بل توسعات أيضا تعتمد كليا على الخدمات والمرافق القديمة بالقاهرة و بكدة يبقى محلناش مشكلة التكدس بل على العكس بنزودها

و تقبل تحياتى

شكرا ليكي يا فندم على المشاركة الإيجابية دي


لكن يا جماعة محدش جاوب على سؤالي .... لو حضرتك مسئول او على الأقل مواطن ايجابي في هذة البلد تفتكر اية افضل مكان لأنشاء القرية الذكية ؟؟؟

[زينة الله]

لكن يا جماعة محدش جاوب على سؤالي .... لو حضرتك مسئول او على الأقل مواطن ايجابي في هذة البلد تفتكر اية افضل مكان لأنشاء القرية الذكية ؟؟؟

شوف أحنا عايزين نعمل مجمتع جديد يبقى مكان بعيد عن أى مدينة كبيرة و نعمل له شبكة طرق و مواصلات زى محافظات القناة (الاسماعيلية و بورسعيد) اللى تم انشاءها مع حفر القناة ( 1859- 1869 ) وهى من احدث المدن واصبحت محافظات مستقلة فى الستينات بامتداتها الصحراوية و الزراعية والسياحية و بصراحة اهدى وانظف من القاهرة الكبرى بمحافظتها ومن الاسكندرية صحيح مافيش شركات كبيرة بمرتبات كبيرة زى العاصمة ، بس بردوا عمرك ما بيضعش فى المواصلات و التلوث البيئى و كل مكان له ميزة نسبية وله عيب .

واقترح مثلا الوادى الجديد لما له من امتداد بطول محافظات الصعيد واخف كثافة من الصعيد و فى نفس الوقت قريب منهم لتوفير الوظائف للشباب
و كان نفسى أقول مرسى مطروح لان لها امتداد صحراوى كبير جدا لكن حقول الالغام و صعوبة حل مشكلتها حتعقد الموضوع زيادة و الحكاية مش ناقصة
و بردوا كان نفسى اقول سيناء بس الدواعى الامنية حتقد الموضوع و ممكن تجهضه زى ما فعلا بنشوف

المهم بقى اننا نلاقى الشباب اللى يرضى يسيب العاصمة و يعيش فى هذه المدن جنب شغله زى ما عمرنا مدن القناة ، لكن مشكلتنا الاكبر فى اننا عايزين نلزق فى القاهرة باى صورة أو أقرب مكان لها

[Dojuar]

ممكن في 6 اكتوبر بعد نزلة الدائري نواحي دريم بارك كده - بس هتبقى ابعد طبعا عن المكان القديم

او في التجمعات و القاهرة الجديدة بس بضمان ايقاف نمو اي تجمعات سكنية نواحيها و ده في رأيي افضل مكان

[alaasaid]

السلام عليكم ,

بغض النظر عن المكان لازم يكون فى شروط عشان تعمل حاجة زى القرية الذكية:-

- يكون ليها على الاقل طريقين مختلفين يمكن توصل منهم المكان
- يكون فيها بوابات دخول تتناسب مع عدد العاملين فى المكان مش كل الناس تدخل من باب واحد وتفضل واقفة ورا بعضها سنة
- يكون فى مكان انتظار سيارات كافى للعاملين و الزوار كمان
- يكون فى مكان للتوسعات المستقبلية
- يكون بعيد عن المساكن عشان المناطق الادارية بتكون عاملة زحمة و ازعاج للسكان
- يكون فى مطاعم عشان محدش يخرج برة المكان و يعمل زحمة بالخارج

دة اللى جه على بالى دلوقتى و اكيد الناس المتخصصة عندها معلومات كاملة بس للاسف فى مصر اخر ناس الحكومة بتاخد رأيهم هما الناس المتخصصة .

[kh_talaat]

شوف أحنا عايزين نعمل مجمتع جديد يبقى مكان بعيد عن أى مدينة كبيرة و نعمل له شبكة طرق و مواصلات زى محافظات القناة (الاسماعيلية و بورسعيد) اللى تم انشاءها مع حفر القناة ( 1859- 1869 ) وهى من احدث المدن واصبحت محافظات مستقلة فى الستينات بامتداتها الصحراوية و الزراعية والسياحية و بصراحة اهدى وانظف من القاهرة الكبرى بمحافظتها ومن الاسكندرية صحيح مافيش شركات كبيرة بمرتبات كبيرة زى العاصمة ، بس بردوا عمرك ما بيضعش فى المواصلات و التلوث البيئى و كل مكان له ميزة نسبية وله عيب .

الله ينور عليكي

هو دة فعلا كان قصدي من الموضوع وهو انشاء القرية الذكية في مجتمع جديد ، مكان ليس على اطراف االعاصمة ولا يصب في النهاية في القاهرة

[ahmed4000]

طيب لوو حبينا نبص للموضوع من الجانب الاخر

وده سؤال كل واحد يساله لنفسه

لو القرية الذكية اتعملت فى الصعيد او فى الصحراء او فى السد العالى؟

ياترى حتروح تشتغل فيها؟