اغرب موقف حصلك بالعربية

[MoToRiZeR]

من حوالي اسبوع كدة حصلي موقف غريب جدا .. و بعد ما خلص الصراحة قعدت اضحك

كنت طالع الدائري من طلعة امبابة\روض الفرج .. و الحتة اللي قبل الطلعة تقريبا منطقة زراعية
فا و انا ماشي في امان الله .. لقيت حمارين بيجروا ورا بعض .. حمارين حقيقيين .. لوحديهم ! و عكس اتجاهي .. و جايين ناحيتي !!

قلت يا نهار اسود !! هيطلعوا فوق العربية ولا هيخبطوها ..
بعدين واحد فيهم لحق الحمار التاني .. و خبطه براسه (بالروصية كدة) و تقريبا مسكوا في خناق بعض .. ادام العربية .. و انا مرعوب عالعربية طبعا .. اصل دول لو خبطوها هنزل اعمل معاهم ايه !؟

رحت قافل الازاز بسرعة و قعدت اضرب كلاكس .. الصراحة الحمارين كانوا ذوق و بعدوا .. و كملوا جري ورا بعض برده بس مع العربيات اللي ورايا

و انا مشيت جري مش مصدق اللي حصل .. حمارين ماشيين لوحديهم كدة !!
كويس انهم مطلعوش يكملوا خناق عالدائري !

ايه المواقف الغريبة اللي حصلتلكم من هذا القبيل