سؤال مهم بالنسبة لى عن مواتير المياه

[faragebraheem]

لوسمحتم ياجماعه ممكن سؤال مهم انا قرأت كل المكتوب عن مواتير الميا ه هنا بالمنتدى بس ليا سؤال حد سمع عن ماتور برنتو الايطالى السباك بيشكر فيه جدا وبيقول ان الساقية بتاعته نحاس ممكن لو حد يعرف عنه حاجة يقولى ويقول سعره كام ولو انواع المواتير الايطالية وافضلها وسعرها انا كدا بقيت رخم اقوى كفاية اسئلة ايوة نسيت هو لشقة وواحد حصان

[mahamedaraby]

افضل مواتير مياه عن تجربه كذا نوع ايطالى وصينى
هو الكالبيدا بجد افضل موتور ميه

[samcar]

هات "سير" واشترى دماغك - موتور محترم ولشقه مش حتحتاج اكتر من تلات اربع حصان

بس لو اصلى كامل- ما تجيبش بالونه ولا تركبها اصلا- هات الاتووماتك الاصلى له ممكن كده الموتور يعدى الالف ونص بس حتركبه وتنساه

[faragebraheem]

حضرتك بتقول ساير بألف ونصف انا قريت هنا ان كالبيدا بحوالى 1300جنيه وان ساير اقل منه وحضرتك تقصد بالاوتوماتيك اللى هيا المجموعه بتاعه الفلوماك اصل السباك قال لو ركبت الفلوماك يبقى مش هنركب بالونه او اتوماتيك ولو ركبنا البالونة مش هنركب الفلوماك طيب ايهما افضل الفلوماك ولا البالونة انا محتار كمان عايز اروح اجيب الحاجة بنفسى من شارع الجمهورية بس خايف يتنصب عليا وكان السباك لو جبها هيشتغلنى جامد فى السعر وهو بردو بيجيبها من شارع الجمهوريه ياريت تفيدونى

[faragebraheem]

ايه ياجماعه المنتدى الكرام محدش ممكن يفيدنى

[elewey]

عن تجربه وانا من اسكندرية و شغلى فى مرسى مطروح البلد هنا كلها شغاله بمواتير ميه و افضل الانواع هى الكالبيدا و يليها نوع تانى يطالى اسمه لينز

[samcar]

اى نوع ايطالى كويس- بس السير - لو لسه بتنزل مصر - عن تجربه حمار شغل - وتصليح سهل - اى كان اللى عايز السباك يركبه ما تجيبش البلونه- ومفيش اى قلق- بس يكون سباك بيفهم ويضبط ضغط الاتوماتك صح

هات الموتور بمعرفتك- غالبا بيبقى له ضمان- بس سيبه هو يجيب وصلات التركيب والمحابس - علشان ما يبقاش له حجه

شارع الجمهوريه غالى - ممكن تنزل السيتيه حتلاقيه ارخص شويه - عموما توكيل سير فى شارع نجيب الريحانى - متفرع من عماد الدين وتقريا كالبيدا فى نفس المنطقه - ونصيحه ما تسترخصش- هات ماركه معروفه ومن توكيلها لو امكن

[wabdelhalem]

ما هو الافضل بدل البالونه الفولماك و لا بريشر سويتش و السعر

[fepsceasar]

ممكن تشرحولى بديل البالونة ده بالظبط بيعمل ايه وهل ينفع أغير البالونة واحطه على الموتور الموجود ولا لازم من الاول

[faragebraheem]

انا متشكر جدا لكل اللى رد عليا بس بردو الافضل البالونة والاوتوماتيك ولا الفلوماك فقط وياريت حد يفيدنى فى هذا الامر لانى مش فاهمه خالص انا استقريت على الساير ان شاء الله لو الفرق بينه وبين الكالبيدا فى السعر يستاهل ولو السعر مش كبير هجيب الكالبيدا بس حد يشرحلنا موضوع البالونة والفلوماك

[faragebraheem]

كل سنة وانتم طيبين الصيام مأثر على الاعضاء ولا ايه مش قادرين يردو ويفيدونا ههههههههههههههه انا بهزر طبعا

[samcar]

باختصار البلونه معموله اتقليل زمن تشغيل الموتور والمساعده فى رفع المياه بضغط مناسب- للاسف فى مصر البلونه الكفر الداخلى لها دايما بيضرب- وتتملى مياه والموتور فى الحاله دى بيقف ويشتغل مرات متتاليه فى زمن قصير وده بياثر على عمر الموتور- والمياه جوه البلونه بتبقى كريهة الرائحه والطعم - ومش معقول كل شهر حتفك البلونه وتروح تنفخها او تجيب لها كفر داخلى جديد والبالونه بتركب مع الاتوماتك- يعنى الاتوماتك اساسى مش بديل

الاتومتك ببساطه بلف بينضبط على ضغط دخول وخروج معين- لما تضبطه بيديك تصرف معين لضغط معين- والعلاقه عكسيه
يعنى عايزه مياه كتيره يبقى حترفع لادوار قليله عايز ارتفاع كبير كميه المياه حتقل
انسى البلونه خالص لاتصلح فى مصر - وزى ماقلت - اى ماركه محترمه تنفع- نصيحه اشترى الاكثر انتشارا فى منطقتك- علشان المحلات القريبه منك حيكون فيها قطع غيار لها- ولو ان الماركات الكويسه قليله الاعطال

[faragebraheem]

يعنى اركب الماتور ومعاه مجموعه الفلوماك وابعد عن البالونة انا متشكر جدا بس فيه ناس كتير بتقولى البالونة كويسة مش بتخلى الماتور بشتغل على طول بيديك المياه اللى انت عايزها ويفصل ويشتغل كدا يعنى بس لو ركبت الفلوماك الماتور هيفضل شغال طول ما المياه شغالة ولا هيفصل ويسترح كدا يعنى يعنى لو مشغل الغسالة الاوتوماتيك يفضل الماتور شغال طول ما الغسالة شغالة ولالا

[samcar]

اذا كان ضغط المياه فى الشبكه معقول الموتور لو مش ساحب مياه كتيره حيفصل لوحده - الغساله بتسحب المياه مثلا لمده 5 دقايق الموتور لو المياه ضعيفه فى الشبكه حيشتغل طول ما سحب الغساله شغال وبعدين حيفصل لوحده لما سحب الغساله يبطل- ابعد عن البالونه خالص- لو فى حاجه ممكن تبوظ الموتور يبقى نمره واحد البالونه - ثم زى ما قلت - البالونه لازم لها اتوماتك - يعنى كده او كده حتركبه- يبقى ركب الاتوماتك - لو حسيت انه مش مساعد معاك- يبقى زود البالونه- بس اشترى دماغك وهات موتور الباور بتاعه مناسب واتوماتك وانسى

[faragebraheem]

انت مجبتش سيرة الفلوماك خالص بتقول موتور واتوماتيك بس انا فهمت صح ولا غلط واسف لكثرة الاسئلة اصلى عمرى ما اشتريت ماتور مياه ولا اعرف بيشتغل ازاى