شخصيات الميكروباص ( منقول )

[م.احمد زكريا]

مجرد ما تركب ميكروباص تحس انك في فيلم من افلام الهسس اللي هي زي الطائرة المفقودة كل واحد جوة بشخصية وحكاية ولكن مع الفارق شويتين !
الميكروباص فيه كل الانواع اكتر من الطيارة كمان واكتر من الباخرة لان في شخص زيادة في الميكروباص وهو بتاع "وطي الكاسيت يا اسطي" .

.........

الشخصية الاولي: الست التخينة اللي واخدة مكانين :

ودي بتلاقيها في كل ميكروباص ويبقي حظه وحش قوي اللي يركب جنبها بجد لانها بتكون كتلة لحم متوهجة وممكن دراعها يكون قد جسمك
وياسلام بقي لو السواق ركب اربعات ورا تبقي مجزرة..وافضل مكان ليها جنب القزاز بلاش تقعد في النص عشان النفس وكمية الاكسجين المستهلكة في هذه الصفيحة الميكروباصية هيقل.



الشخصية التانية: "وطي الكاسيت يا اسطي" :

وده بيكون لما بسبب ديني او بسبب انه مصدع شوية وتعبان ومرهق من اليوم فمش فايق لام الاغاني اللي مشغلها السواق وطبعا بتكون اغاني عن الفقر والغلب والقرف بتاع الحياة
عشان السواق يتمزج او بتكون اغاني عن المخدرات بانواعها او السكر والعربدة ساعات يعني اكيد مش هيفتحلك سيلين ديون .



الشخصية التالتة: "علي الكاسيت يا اسطي " :

وده طبعا بيكون عايز يعلي عشان بيألس علي ذوق السواق ويقعد يضحك علي اغانيه الهبلة او انه فعلا بيحب هذا النوع المتسرطن من الاغاني او انه عايز يهيس مع هذه الاغاني بس
وغالبا بيكون معاه شلة كبيرة في الميكروباص بيشتغلوا السواق ويقولوله "ذوقك عالي يا اسطي" ويرد يقول "الله يكرمك "



الشخصية الرابعة : اسطورة الشاب ذو السماعات في الودان :

بيكون قاعد جنبك وحاطط السماعات في ودانه طول الطريق تقريبا وحتي ميسمعش اللي بينادي علي الاجرة اصلا الا اما حد يخبط عليه وبيشيل السماعات وهو مستاء جدا
كأنه بيقول للي جنبه "عايز ايه اخلص ! " واول ميدفع الاجرة يجري علي السماعات بسرعة "اديني الحقنة بسرعة ارجوك انا عايزة الجرعة "
وبيكون لبعض الناس والاطفال زي ما بيقول احمد خالد توفيق "اسطورة الرجل ذو السماعات في الودان "



الشخصية الخامسة: الراجل العرقان بالقوي يا ابة يا ابة :

وده بيكون عرقان لوحده من غير ما الشمس تلمسه اصلا وكأن جسمه بيتحجج اصلا وكانه هدية قرف للي جنبه بعتهاله الحر والدنيا مع بعض
وتلاقي الفلوس ملزقة مطرح ايده عرق ومش هاكلمك بقي علي الريحة عشان لو بتاكل وانت بتقرا دلوقتي ولا حاجة



الشخصية السادسة : براحة شوية يا اسطي :

وبيكون متوتر طول الطريق من السرعة حتي ولو علي 90 بس ويقعد يهز في رجله كأن هو اللي سايق وطول الطريق استر يا رب استر يا رب
يخلي اللي جنبه يتشاهد اساسا ويقع يتهز مكانه كأنه لابس نظارات ثري دي وبيشوف فيلم ويوطي ويقوم وينزل ويطلع ويقرفك في عيشتك



الشخصية السابعة : بسرعة شوية يا اسطي :

وطبعا بيرد الاسطي عليه "هي الدنيا هتطير ؟ " وده بيكون متوتر جدا زي اللي فات بس بيبص في الساعة كل 3 دقايق بيكون ميعاده فات
او محاضرته فاتت من فترة وهو قاعد علي اعصابه ومش طايق شخصية "براحة شوية يا اسطي"
وغالبا ما يحدث الصراع الكوني بي شخصيتين "بالراحة شوية يا اسطي" و "بسرعة شوية يا اسطي "
وتكون النتيجة ان الاسطي بيقفش علي الاتنين



الشخصية التامنة : الدحاحة جدا :

بتتهز طول الطريق وهي بتسمع المنهج كله كأننا في كتاب مش تعليم جامعي خالص وتروح تقفل الامتحان في خمس دقايق
ولا تهتم بالجو المحيط حتي ولو في طائر رخ فوق الميكروباص او سوبر مان بيسلم علي بطريق ع الطريق هي مش هتنتبه برضه ولا تستغرب
لان الدح واخد مكانه معاهاقوي والكتاب اهم صديق ليها دلوقتي



الشخصية التاسعة : راجل بيشتم في الحكومة :

وبيكون ماسك جرنان وتانيه مرتين كده ومركز علي مقالة معينة ويبدأ الحوار بضحكة سخرية وكلمة "شفت "
ويديك صواريخ عن الحكومة بتاعتنا ويطلع عنيهم شتايم



الشخصية العاشرة : الواد اللي عايز يتخانق:

ده مجرد ما تبصله ممكن يقولك "ايه في حاجة ولا ايه ؟ اصلك بتبصلي يعني قوي "
وده الاحسن تتجنبه



الشخصية الحادية عشر: الراجل اللي في حاله:

وده بيقعد جنب القزاز دايما ويبص برة الميكروباص
ومالوش دعوة باللي جوة الا ساعة لم الاجرة



الشخصية الثانية عشر : فيلسوف الميكروباص :

وده بيقعد جنب السواق يقعد يناقشه في مشاكل الحياة او يفتي في حاجات عن المرور والرخص والكمين وكده
واي قصص واي كلام بيتقال يا عم الحاج قدام واغلبها بتكون فشر واولها بيكون " انا قريبي لواء سابق وبيحكي ويقول ...."
وكلام من النوع ده

الشخصية الثالثة عشر : الشاب الصايع
وده بيحاول يقعد جنب أي بنت عشان يزنقها في القعدة وغالبا ما بتقوله بعد اذنك اتاخر شوية لو هي محترمة
ولو هي مدردحة وبلدي هتشبشبله و هتردح لأمه في المكروباز لو حاول يلمسها في أي ملف حتى
وغالبا ما بتحصل خناقة والشاب الصايع بياخد علقة متينة من ركاب المكروباظ

الشخصية الرابعة عشر: الست اللي دافعة فلوس لولادها

ودي بتكون دافعة نفر او نفرين لولادها الصغيرين عشان ميقعدوش على رجلها مع ان العيل فيهم أصلا حجمه ممكن تحطه في جيبك مثلا
وغالبا ما بيطلع حد كبير في الميكروباظ نفسه يقعد لو مفيش مكان
و دائما الست دي بتتخانق لو حد قالها خلي الراجل أو الست الكبيرة دي تقعد مكان الواد...بحجة انها دافعاله نفر كامل

الشخصية الخامسة عشر: الراكب اللي بيتخانق عالأجرة

وده بيكون بسبب ان السواق مغلي ربع جنيه بحجة ان مفيش مواصلات كتير
وانا بحمل كدة وهي دي أجرتي..وغالبا ما تحدث خناقة كبيرة بسبب الربع جنيه الذي أتضطر ان ادفعه انا(شديد) من جيبي عشان السواق يمشي من بعد ما وقف العرابية عشان خاطر النص جنيه

الشخصية السادسة عشر: الراجل اللي بيدخن ويحط صباعه في مناخيره

وده اكتر شخصية مستفزة في الميكروباص يبقى نفسك تفتح الباب وترميه منه و في الغالب مش بيسمع كلام حد لما يقوله اطفي السيجارة

الشخصية السابعة عشر: الراجل اللي بيعطس ويكح من غير ما يحط ايده على بقه

وده زيه زي الزفت اللي فات


يا ترى قابلت كام واحد منهم

[medociv]

لذيذ اوي ودمه خفيف الموضوع ده
في شخصية كمان اللي بيقلد ويعوم على عوم سواق الميكروبص
يعني السواق يشوف واحد بتاع ملاكي يقوم يقول : اه مهو امك جايبهالك ..... يقوم الراكب يقول نفس الكلام
او يبقى السواق كسر على حد مثلا يعني هو اللي غلطان يقوم الراكب ده شاتم هو كمان في العربية التانية...!!!!

[Ahmed A Rahman]

رجعتني لايام الكلية ثاني ايام الواحد مكانش متخيل انه حييجي اليوم اللي يبقى عنده عربية واكتر ويبقى مشترك في منتدى سيارات

على فكرة انا كنت الراجل اللي قاعد على جنب وببص بره وماليش دعوة باللي جوا

[elbeheri]

فكرتني بايام زمان اما الواحد كان بيركب اتوبيس النقل العام :
كنت تلاقى واحد واقف جنب السواق يتكلم معاه ويوافقه فى كل حاجة يقولها السواق عشان لما الراجل ده ييجى ينزل يقف له السواق من غير محطة ويقوله مع السلامة يا باشا

[mrmohamedragab]

like +1111111111111111111

[tarekzein]

الشخصية الحادية عشر: الراجل اللي في حاله:

ههههههههههه

ده أنا زمااااااااااااااااااااااااااااان

[enayat]

انا كمان كنت الشخصية الي بتقعد جمب الشباك وماليش دعوة باي شيء يحدث داخل الميكروباص اللهم الا اذا حصلت خناقة ادخل اتفرج بس بدون ابداء اي رأي او مفترحات لاي طرف من اطراف الخناقة

[tifalol]

انا كمان الشخص الي في حاله
بس هي الناس كلها في حالها اومال فين باقي 17 شخصيه ؟؟؟؟؟؟

[mido51eg]

انا برضه كنت الشخصية رقم 11

[matrix_it]

انا برده كنت فى حالى لحد ما مرة السواق استصيع نفسه و غلى الاجرة ربع جنيه , انا الربع جنيه دة مايفرقش معايا بس لقيت اللى ورايا واللى جمبى بيزعقولو جامد قولت مابدهاش قمت داخل فى الخناقة
لقيت الركاب كلهم معايا و حاجة اخر مرجلة
من ساعتها قررت انى مسكتش على حاجة ولو ربع جنيه

[saadelden]

الشخصية الرابعة : اسطورة الشاب ذو السماعات في الودان :

بيكون قاعد جنبك وحاطط السماعات في ودانه طول الطريق تقريبا وحتي ميسمعش اللي بينادي علي الاجرة اصلا الا اما حد يخبط عليه وبيشيل السماعات وهو مستاء جدا
كأنه بيقول للي جنبه "عايز ايه اخلص ! " واول ميدفع الاجرة يجري علي السماعات بسرعة "اديني الحقنة بسرعة ارجوك انا عايزة الجرعة "
وبيكون لبعض الناس والاطفال زي ما بيقول احمد خالد توفيق "اسطورة الرجل ذو السماعات في الودان "

دا انا :d
انا لفيت مواصلات مصر كلها من اول التوكتوك لحااااد الطياره و دايمان هيدفوني معايا
ماعادا لو سايق العربيه مابلبسوش بس ببقى معلقه بردو

علي فكره فيه كمان شخصيه الصعيدي الي مش عارف حاجه من البلد و ماشي بيتفاجئ بكل حاجه و دي طبعا تشوفها ف المترو كتير اوي و ف مكروباصات المنيب :d

انا عدت عليا معظم الشخصيات دي بالذات بتوع "بيقولك" :d بقابلهم كتير الصبح

[SYD]

في كمان شخصية رخمة اووووووووووووووووووي

شخص تلاقيه يا أما قاعد جمب السواق (لازق فيه) او قاعد علي اول كنبة ومطلع دماغه من الشباك
بتحس انه يا أما صاحب العربية او شغال عليها

تلاقيه بيلم الأجرة ، محابي جدا مع السواق (بيدافع عنه وبيتكلم عن لسانه) ، يرد علي اي سؤال يتسأل واكيد عنده الرد الصح الذي لا صواب معه ولا يحتمل الخطأ

الشخص دة لو انا قاعد وراه ببقي نفسي اديله علي قفاه

شكرا علي الموضوع التحفة

والله المستعان
،
،

[Samah AbdAllah]

هههههههههههه
انا الشخصية المتوترة اللى حاسة ان الميكروباص هيخبط فى اى حاجة خصوصا لو النصيب رمانى قدام جنب السواق:))

[pro_samir]

حلوه .. ربنا ما يحوجنا للميكروباص

انا 2 و 11

وأحيانا كنت ببقي 15 وحصلت مره ان السواق قال قبل ما يطلع وانا بتكلم في التليفون مخدتش بالي وكان هيرجع من نص الطريق بس الناس شهدت معاه انه قال وكان شكلي زباله ، مش قصة فلوس طبعا بس مبحبش الاستغلال

وفي شخصية اللي بيركب من الطريق ويقف موطي لازق فيك يقرفك في عيشتك وممكن بقه في ودانك مباشرة ويقوم مزعق مره واحده علي جنب ياسطي

وفي الرغايين بتوع الكنبه اللي وراك دول اعوذ بالله منهم

[SYD]

في كمان شخصيتين نسينا نقولهم

1- شخصية "يا عدوي"
ودة الي بيبقي راكب ورا في اخر كنبة ولما حد ينزل او يطلع بيتولي غلق الباب عن طريق الدفع وعشان يثبت ويظهر قوته بيقفله والميكروباص طالع عشان يبقي في عزم

2- شخصية "انا اهم واحد"
ودة الي بيتكلم في الموبايل بصوت عالي وطبعا بيبقي بيناقش قضية شغل وفي فلوس رايحة وفلوس جاية ومش بيسيب الموبايل من اول لما يركب لحد لما ينزل وغالبا بيدفع الأجرة وهو بيتكلم وبياخد الباقي وهو بيتكلم واساسا بيشاور وهو بيتكلم