مساعدة في الشراء من موقع امازون

[Amr_tika88]

انا معايا فيزا انترنت و في حاجات شوفتها علي موقع امازون وعايز اشتريها بس مش عارف اشتريها ازاي ده غير ان في حاجات بتبقي مطلوبه في الابليكشن انا مش فاهمها وازاي اخلي الحاجات دي تتشحن بال DHL or armex

[AhMeD EzZ]

لازم يكون ليك عنوان في امريكا و دي خدمة بيقدمها اراميكس و dhl بحوالي 200 جنيه

[Amr_tika88]

طيب ازاي اقدر اشترك في الخدمة دي واعرف هتحاسب ازاي وايهم افضل ارامكس او dhl وياريت لو حد ليه تجربة في الموضوع ده يفيدنا بيها

[Amr_tika88]

محدش جرب يشتري من الانترنت قبل كده

[matrix_it]

اسال برضه على الجمارك بتاعت الحاجات دى الاول

[ehab]

شوف الموضوعين دول
و لو عرفت تشتري قولي لاني عايز حاجات من النت

http://www.nilemotors.net/Nile/12947-a.html

http://www.nilemotors.net/Nile/24932-a.html

[Amr_tika88]

عموما ممكن نزبطها هنا في المنتدي بس ياريت لو حد استعمل من قريب امازون عشان انا مستغلي ادفع ٢٠٠ جنيه اول مرة خصوصا اني مش بشتري كتيير

[beautiful0mind]

لو سمحت بعد اذنك لو حضرتك نويت تجيب ممكن تشتريلى دبله من الموقع وادفع لحضرتك مصاريف الشحن وتكلفتها كاملة ,, لو مش يضايق حضرتك ممكن تراسلنى على الخاص

[Mahmoud Nagieb]

انا لسة شارى حاجة من امريكا وجاتلى ارامكس على مصر ..... شوف حضرتك ايه استفسراتك وانا تحت امرك

[Amr_tika88]

انا نفسي اشتري ساعة و سيديهات من امازون
اسعار الجمارك هتكون قد ايه وهل ينفع بدل ما ادفع ٢٠٠ جنيه مقابل العنوان ادفع جزء كل مره اشتري فيها وكل كيلو بيتحسب بكام؟

[Mahmoud Nagieb]

انا نفسي اشتري ساعة و سيديهات من امازون
اسعار الجمارك هتكون قد ايه وهل ينفع بدل ما ادفع 200 جنيه مقابل العنوان ادفع جزء كل مره اشتري فيها وكل كيلو بيتحسب بكام؟

بص حضرتك الحاجات اللى زى الساعات ده تقريبا بيبقى عليها جمارك عالية نوعا ما .. ده غير 10% ضريبة مبيعات

انا شايف انك تجيبها من هنا احسن ... الا بقى لو سألت على جماركها وحسبتها + الضريبة والشحن وطلعت ارخص من هنا

عموما خدمة shop and ship من ارامكس بتحسب اول نص كيلو ب 68 حنيه وبعد كده كل نص كيلو بيتحسب ب 48 جنيه ... وبيبقى عندك عنوان فى امريكا وانجلترا والصين ... والشحنة بتوصلك فى خلال اسبوع او 10 ايام عمل

ورسوم فتح الحساب على فكرة تقريبا 320 جنيه مش 200 جنيه ... وده بتتدفع مرة واحدة بس

[ehab]

لو سمحت بعد اذنك لو حضرتك نويت تجيب ممكن تشتريلى دبله من الموقع وادفع لحضرتك مصاريف الشحن وتكلفتها كاملة ,, لو مش يضايق حضرتك ممكن تراسلنى على الخاص

دا نفس الي انا عايز اجيبه

[hamada_amg]

بسم الله الرحمن الرحيم

بصوا يا شباب انا هاشرحلكم الفكره المبسطه عشان تقدر تشترى من امازون او اى موقع تاني بخدمه ارامكس او DHL

اولا كلامى هيكون على ارامكس عشان انا مشترك معاهم فى الخدمه و جربت قبل كده اشترى حاجات كتيره و الحمد لله كله تمام

و الاختلافات بين امازون و ال DHL مش كبيره بتفرق بس فى بعض التكاليف او الشحن

الفكره باختصار ان المواقع الامريكيه و البريطانيه بتمنع انها تبعت حاجات لمصر و ده لاسباب كتيره احنا فى غنى عنها المهم

جت شركه ارامكس و عملت خدمه اسمها shop and ship و الهدف من الخدمه ده انه بيعملك عنوان وهمى فى امريكا و انجلترا و حاليا الصين كمان
و بكده لما حضرتك تفكر تشترى من اى موقع هتدخل العنوان بتاع امريكا لو كان موقع امريكي مثلا زي امازون فبالتالى الموقع هيقبل العنوان و يرسل الشحنه عليه
و الدفع عن طريق بطاقتك الائتمانيه مفيش مشكله المهم انها فيزا او ماستر كارد

طيب اللى بيحصل كالاتى :

حضرتك بتشترك فى الخدمه ده مدى الحياه يعني بتدفع التكاليف اول مره بس اللى هى حوالى 300 جنيه
ايام ما انا اشتركت من سنه كانت بحوالى 270 جنيه تقريبا
و بعدها الشركه بتديلك التلات عنواين واحد امريكي وواحد بريطانى وواحد صيني

نيجي بقى على الطريقه للشرا

بتدخل على الموقع و ليكن امازون مثلا و تحدد اللى انت عايزه و تعمله شرا
و بتملى الابلكيشن عادي جدا و تحط الفيزا بتاعتك و فى العنوان بتحط العنوان اللى الشركه ادتهولك فى امريكا

و بتمشى الاجراءات عادي جدا و اول ما امازون يقولك ان الشحنه اتسلمت للعنوان بتلاقى ارامكس على الويب عندهم بيقولكم ان فى شحنه ليك فى امريكا و يقولك كمان الجدول بتاعها و هتوصل فى اد ايه
و تفضل متابع غلى ارامكس لحد ما الشحنه توصل لباب بيتك

طيب نيجي بقى للتكاليف

اولا نفرض انك عايز تشترى حاجه ب 100 دولار من امازون
اول هام هتدفع طبعا ال100 دول تمن الحاجه من بطاقتك + مضاريف الشحن من امازون للعنوان بتاعك فى امريكا و ده امازون هتلاقيه محددهالك و قايلك هتتكلف اد ايه

و للعلم بتكون مصاريف بسيطه جدا مش كتيره و لا حاجه يعني الموضوع لا يتعدى تقريبا 5-6 دولار على الشحنه

طبعا الجزء ده انت هتدفعه من الفيزا او الماستر بتاعك لامازون

فى بقى جزء تاني حضرتك هتدفعه لما الشحنه توصل لعدنك فى البيت
اللى هو الجزء الخاص بالشحن فى ارامكس من امريكا لهنا + الجمارك +الضرايب

طيب نمسكهم جزء جزء
الشحن فى ارامكس بيتقاس و يتحسب بالوزن يعني مثلا اول نص كيلو ب 60 جنيه و تاني نص ب 40 لحد عاشر نص

يعني لو حضرتك جايب حاجه وزنها نص كيل او اقل هتدفع شحن 60 جنيه
و لو حاجه مثلا وزنها كيلو او اقل و لكن اكبر من النص كيلو يبقى هتدفع 60+40 يعني 100 جنيه شحن
و هكذا
طبعا للعلم كل حاجه بتشتريها من اى موقع هتلاقى فى المواصفات بتاعتها وزنها اد ايه و وزنها بعد التغليف اد ايه

ندخل على بند الجمارك و الضرايب و دول بيتحسبوا مع بعض فى الجمارك و ارامكس بتجيبلك فاتوره بيهم
و هى بتسلمك الشحنه

الجمارك بتكون نسبه من قيمه الفاتوره الاصليه للشحنه

يعني احنا قيمتنا الاصليه للشحنه كانت 100 دولار و مثلا جماركها 10% يعني جمارك هتبقى 10 دولار

طبعا النسبه بتتحدد على نوع الشحنه اللى انت شاريها
يعني نسبه الاكسسوارات غير نسبه الكمبيوتر غير نسبه البرفانات و هكذا

و ده صوره للتوضيح الجمارك و الضرايب فى المرفقات

و اى سؤال انا فى الخدمه

[mohamed_mohsen]

صوره للجمارك و الضرائب

[A_H_M_A_D]

Edfa3ly.com | Facebook