رايح اخطب واحده...اسمع اللى حصل واضحك :)))))))))

[ahmad--ezzat]

فى صالون احدى الاسر المصريه نجد المشهد التقليدى شاب مرتبك يتحدث مع رب الاسرة والام وبنتها بيتصنتوا من ورا الباب المقفول"

منور يا ابنى
- ده نورك يا عمى
- اشرب النعناع اللى انت عاوزه
- ميرسى
- كنت عاوزنى فى ايه باه؟
- يا عمى انا يسعدنى ويشرفنى انى اتقدم واطلب ايد بنتك سوسو
- والله يا عصام يبنى ده انا اتشرف بس انا معرفش حاجه عنك
- ازاى يا عمى؟ انت مش بتدخل على النت؟ دى قايمه بكل اسماء المواقع اللى انا فيها ممكن حضرتك تسال عنى
- يعنى اسال عليك فى الاماكن دى؟
- طبعا وانا معروف جدا هناك ودى data مبتكذبش اسال بس عن سكوربيون
- مين؟
- سكوربيون ........ انا.... ده مفيش حد على النت ميعرفنيش
- طب يبنى شغلتك ايه؟
- يا عمى انا web designer
- ايوه يعنى بتشتغل ايه؟
- بصمم مواقع على الانترنت
- والله كويس جدا كمبيوتر يعنى
- تقدر تقول كده
- طيب حلو اوى مهندس كمبيوتر شغلانه مشرفه طب ماقلتش ليه كده من الاول؟
- اصلى مش مهندس اصلا انا دكتور اسنان
- الله ............ .طب ما علينا بتشتغل فين؟
- على الكمبيوتر بتاعى
- ايوه يعنى فى شركة ايه؟
- لا تبع نفسى
- وماله الشغل الحر مفيش احسن منه طيب شركتك فين ولا فاتح محل؟
- لا فى البيت عندى عادى
- طيب بتقبض كام؟
- لا يا عمى انا مش بقبض انا بتعامل بالموقع مع كل واحد لوحده يعنى مفيش اسعار ثابته
- طب اخر موقع اخدت فيه كام؟
- لا اخر موقع ده كان لواحد صاحبى عملتهوله مجامله
- لا حول ولا قوة الا بالله............ طيب معندكش اى املاك اراضى عمارات اى حاجه يعنى؟
- اه طبعا عندى
- ايوه .......... عندك ايه؟
- منتدى يا عمى
- ده ايه ده بأه ان شاء الله؟
- ده برده على النت بس عندى فيه دلوقتى عشرين الف عضو يا عمى
- ما شاء الله طب والعضو بيدفع كام عضويه فى السنه بأه؟
- لا مش بيدفعوا ده انا اللى نفسى ادى الناس فلوس عشان تشترك
- لا حول ولا قوة الا بالله طب ليه يبنى الغرامه دى وعامله ليه؟
- منا هكسب من الاعلانات يا عمى انت مش معايا ولا ايه؟
- حلو اوى المنتدى بتاعك ده يشيل كام اعلان؟
- ممكن لحد عشرين
- طب وبعت الواحد بكام؟
- لا لسه محدش اعلن عندى لسه
- طب يبنى عايش منين ولا بتصرف منين ولا حتى هتعيش بنتى منين؟
- منين ايه بس يا عمى ده انا معايا فيزا محدش فى بنها عاملها
- يبنى فيزا ايه بس بقولك هتجيب فلوس منين؟
- من شغلتى والمواقع اللى انا بعملها
- وهى فين دى؟
- منا مديلك لسته بيها هتستعبط؟
- لا يبنى انا مجوزش بنتى لواحد شغلته فى الهوا كده
- هوا ايه بس يا عمى كل المواقع دى على هوستات وواخده رانك كمان انت عارف انا فى خلال سنتين بس......
- ولاااااااه
- نعم
- انت عارف لو غمضت عينى وفتحتها ولقيتك قدامى هعمل فيك ايه؟
- ايه؟
- امشى اخرج بره
"يخرج سكور بره جرى"
- ادى يا ست سوسو جايبالى واحد نصاب والله لاكسرلك الكمبيوتر اللى انتى قاعدالى عليه ليل نهار ده وهتتجوزى الواد حسن النجار اهو واد كسيب واحنا عارفين دكانه فين وبيكسب كام وعايش منين..........عيال نصابه

منقول

[Samah AbdAllah]

ههههههههههههههههههههههههههههههههههههههههه
لما اخلص ضحك هبقا افكر فى رد :-))

[ramyhekal]

ههههههههههههههههههههههههههههههههه
بيفكرنى بحلاوه العنتابلى لما قاله عندكو املاك اراضى عقارات
مش عايز اشوف وشك هنا نوهائى

[ahmad--ezzat]

بس انا ملاحظ ان العريس طيب جدا وابو العروسه برضه محترم

نفسى اشوف سوسو ههههههههه

[No Comment]

هههههههههه ... لا حلوة وجديدة .

[yousef1978]

حلوة يا كبير

القصة مش سوسو لحسن تفهمني غلط

[M7amD_7amDy]

مسخررررة

[Ghosts]

نيااااااااااااااااااااااااااااااااااااهههههههههههه هههههه ....

[nonetta]

هوا ممكن يحصل كدة بجد؟
يعني لو اتقدم لبنتك ولا لاختك واحد كدة هتعمل ايه
هههههههه
طيب عايش ازاي دة وبياكل منين ؟
دة اللي تتجوزه تتنقط

[alfath8]

بجد حلوة

[khaled_yassin]

جامدة تنين

[mrwho1982]

في اول الجواز تسمع كلمة

احنا بنشتري راجل

سمعتها مرة في قاعدة جواز بتاعة ابن خالي ............فطست علي نفسي من الضحك ومسكتني هيستريا ضحك وعلشان اسكت نزلت قعدت في العربية

ال نشتري راجل ال يطلع عين العريس ويقوللك بنشتري

نفسي اعرف وظيفة السفرة والنيش

[shadygalal669]

في اول الجواز تسمع كلمة

احنا بنشتري راجل

سمعتها مرة في قاعدة جواز بتاعة ابن خالي ............فطست علي نفسي من الضحك ومسكتني هيستريا ضحك وعلشان اسكت نزلت قعدت في العربية

ال نشتري راجل ال يطلع عين العريس ويقوللك بنشتري

نفسي اعرف وظيفة السفرة والنيش

وظيفة السفره ممكن ناكل عليها لو في عدد ناس كتير شويه عندنا ممكن نعديها

لكن النيش ده قطعة اثاث للمنظره و كمان عشان الزوج يتفرج عليها رايح جاااي رايح جاي

[zago]

في اول الجواز تسمع كلمة

احنا بنشتري راجل

سمعتها مرة في قاعدة جواز بتاعة ابن خالي ............فطست علي نفسي من الضحك ومسكتني هيستريا ضحك وعلشان اسكت نزلت قعدت في العربية

ال نشتري راجل ال يطلع عين العريس ويقوللك بنشتري

نفسي اعرف وظيفة السفرة والنيش

محدش بيششتري راجل
بيشتري السفره والنيش والصالون والانتريه
وبياخد الراجل فوق البيعه



لو حد قالك بيشتري راجل بيع على طول :)

[Ayman_A1]

الراجل والد العروسة دة مش صبور خالص :)
دة حتى مسألهوش على الشقة.. وان كان اعتقد ان رد العريس كان حيقوله أنه حيسكنها فى الـ home page بتاعته.
ولو سالوه على الخلفة والأولاد كان طبعاً حيقوله الدنيا كلها بقت wireless
ولو الراجل وافق، الـ mother board (قصدى الأم) كانت حتضرب على طول وساعتها البنت مش حتعرف حتى تعمل updating للعريس، وبكدة حتبقى محتاجة عريس جديد. :)