حد لاحظ زيادة فى فواتير فودافون؟

[Hossam_Hassan]

النهاردة اتصلت علشان اشوف فاتورة يوليو، لقيت رقم مبالغ فى قوى، يعنى تقريبا 3 أضعاف العادى بتاعى، دخلت على النت، مالقتش تفاصيل، بل لقيت فاتورة يونيو اللى دفعها من شهر نازلة على انها ما ادفعتش، كلمت خدمة الفواتير على 881 و قالولى انهم تفاصيل الفواتير هتظهر بالليل و انهم جالهم شكاوى كتير من اجمالى فواتير يوليو، بس للأسف مش هيقدروا يناقشوها غير لما تفاصيل الفواتير تظهر.

ياريت لو حد حصل عنده نفس الحكاية، يقول علشان الواحد يبقى عارف ايه الموضوع، لأنى بصراحة قربت اجيب اخرى مع فودافون، لأن اسعارهم بجد بقت مستفزة و مبقتش تستاهل.

[iBiZa]

انا جايالى مظبوطة كالعادة.

عندى Call Duration و الدنيا دايما مظبوطة.

[TAG_Turbo0]

لأ عادى مفيش زباده بالنسبة ليا

[El Prince]

انا جاتلى فاتورة يوليو ضعف الاستهلاك الشهرى المعتاد !!!
بس انا زودت استخدام النت من الموبايل الشهر ده شوية ... هل ده ممكن يأئر للضعف ؟

[aliabutaleb]

بس انا زودت استخدام النت من الموبايل الشهر ده شوية ... هل ده ممكن يأئر للضعف ؟

بشكل عام أكيد طبعاً يأثر لأن فيه فرق محترم بين المكالمة الصوتية واستخدام الانترنت من الموبايل

[zakiali]

.


انا عندي خط فودافون بيزنس مفتوح وخارب بيتي الصراحه لكن بحكم عملي مقدرش استغني عنه وبصراحه دلوقتي بعد العروض اللي نزلت علي الكروت الدقيقه بقت في الكارت ب 20 قرش وانا في الخط بتاعي الدقيقه بـ 35 قرش في وقت الذروه ضيف عليها الضريبه تبقي 40 قرش + نصيب الدقيقه في الاشتراك الشهري كمان يبقي تمن دقيقه البيزنس ضعف تمن دقيقه الكارت .. وده ظلم بجد لأن مفيش اي عروض بتنزل علي خطوط الفواتير وكل العروض نازله علي الكارت بس . حاجه تغيظ .









.

[Casio2000]

طب ليه ماتغيرش للكارت ؟

[Hossam_Hassan]

اخيرا ظهرت تفاصيل الفاتورة و لقيت عليا 325 جنيه تحت بند "اضافة و الغاء خواص"، ده حسب تعبير موظف خدمة العملاء و عمل طلب مراجعة و هتظهر النتيجة فى خلال يومين

[Karim_Monir]

انا بيزنس واشتركت في العرض بتاع نص الرصيد مجانا
يعني انا مشترك بوكية 660
باخد 330 دقيقة مجانا

[Mustafa_Farouk]

يا جماعة مفيش أحسن من إتصالات في موضوع الفواتير، عشان أنا مجرب فودافون ٥ سنين تقريباً فاتورة وكانت بتجي أرقام غريبة مع اني كل اللي بعملو اتصل واقفل بس.
بجد إسأل عن إتصالات اوبشن، أكيد حيكون أحسن. أنا مع إتصالات حوالي سنة والشبكة مش وحشة أوي، بعض الاماكن مش بتلقت كويس بس هما شغالين على موضع التغطية.

[M_HaFeZ]

حصل ان السنه اللى فاتت نظام الفوانير فى فودافون ضرب ...
فكل الناس عندنا فى الشركه لخبطت معاهم الفواتير
بالاضافه ان خاصيه اهم خمسه برضوا اول ماشتغلت ضربت عند كل الناس وعلى اساسه اضافوا لناس كتير اوى رصيد 20 جنيه تعويضا على اللى حصل ..

وده ان يدل على ان اللى شغالين فى فودافون ناس مش اد كده خالص
لما شركه بالحجم ده واللى شغالين فيها مش عارفين يظبطو النظام بتاعهم ولا يظبطوا ال Database والشغل عليها فى نظام اهم خمسه .. يبقى يروحوا يلعبوا فى الطين احسن

انا فودافون بيزنس كنترول بقالى 4 سنين دلوقتى ..
بجد يعنى اكتر شركه عروضها فشنك فى مصر .. واكتر شركه بتضحك على الناس هى فودافون
انا ايام ماكنت موبينيل كنترول برضوا كان كل فتره يبعتولى دقائق مجانيه والكلام ده سنه 2003 يعنى مش علشان عروض 2008 ده غير ان الاستعلام على الرصيد مجانا

اتفرجوا على موبينيل او اتصالات وشوفوا العروض
تكلم كل افراد الشبكه دائما ب 20 قرش .. ضعف الرصيد اللى شغال فى اتصالات

والبهوات بتوع فودافون كالعاده اخر ناس تنزل العروض واول ناس تلغيه زى الزياده نص الرصيد اللى خلصت من اكتر من شهر !!

بجد يعنى نصب ..
وبالنسبه لموضوع البيزنس ..
انا كنترول باجيب الكارت 25 ب 25 وال 50 ب 50 والدقيقه ب 30 قرش
نفسى افهم ايه فائده البيزنس الفاتوره .. الدقيقه 30 قرش + ضريبه + اشتراك شهرى

يعنى اى حد بياخد سعر احسن منهم
الكلام ده كان مقبول لما كانت الدقيقه ب 175 قرش وب 150 قرش البيزنس كان ب 30 واشتراك يعنى فى حدود 45 قرش

انما اللى بيحصل ده اسمه تهريج من كل الشركات من ناحيه
وفودافون لوحدها من ناحيه تانيه فى كل عروضها واللى بتعمله

[Hossam_Hassan]

معلش نسيت اقولكم على اللى حصل علشان تعرفوا التهييس على اصوله.

بعد ما عملت 3 طلبات مراجعة و كمية مكالمات جابتلى صداع لكل ادارات الشركة و بعد عدد من التبريرات الساذجة، اخر كلام قالوه ان الزيادة اللى فى الفاتورة دى بتاعة مكالمات اتعملت فى شهر 6 و مانزلتش على الفاتورة، فنزلناها على شهر 7، و لأنى عارف مكالماتى و عندى برنامج على الموبايل بيحسب كل مليم، دخلت فيهم شمال و قولتلهم مش دافع ولا مليم من المبلغ ده وبينى و بينكم جهاز تنظيم الأتصالات و جهاز حماية المستهلك، بعد يومين اتكلموا و اعتذروا و شالوا المبلغ من الفاتورة.

[Powert]

انا اخر يوم استعملت عن الفاتورة عن طريق *888*1 لاقتها 112 جنية

تاني يوم طلعت الفاتور ب 165 وهتصل بيهم دلوقتي اتخانق معاهم شكرها يا حسام

لان كنت شاكك ان في حاجة غلط وقولت يمكن انا اللي غلطان

[M_HaFeZ]

معلش نسيت اقولكم على اللى حصل علشان تعرفوا التهييس على اصوله.

بعد ما عملت 3 طلبات مراجعة و كمية مكالمات جابتلى صداع لكل ادارات الشركة و بعد عدد من التبريرات الساذجة، اخر كلام قالوه ان الزيادة اللى فى الفاتورة دى بتاعة مكالمات اتعملت فى شهر 6 و مانزلتش على الفاتورة، فنزلناها على شهر 7، و لأنى عارف مكالماتى و عندى برنامج على الموبايل بيحسب كل مليم، دخلت فيهم شمال و قولتلهم مش دافع ولا مليم من المبلغ ده وبينى و بينكم جهاز تنظيم الأتصالات و جهاز حماية المستهلك، بعد يومين اتكلموا و اعتذروا و شالوا المبلغ من الفاتورة.

ممكن اسم البرنامج ياحسام بيه ..
وياريت لو فى لينك ليه

[Powert]

سؤال لو سمحتم

انا لما بتصل ب *888*1# بيبعدولي فاتوة مضاف عليها اخر مكالمة عملتها + مضاف عليها 15 % ضريبة

السؤال هل بيضاف عليها خدمة تحويل الرصيد اللي عملتها ولا دي بتطلع مع الفاتورة الشهرية