يوم الحشر فالمترو ( ولا اى اندهاش )

[BESO516]

مساء الخير على الجميع

امبارح اتجننت وقررت اروح الشغل بالمترو لأنى كان عندى مأموريه فرمسيس فلازم انجزها وقولت مفيش غير المترو وانا بقالى 5 سنين معتمد عالعربيه ( لحد مابقيت شبه الدولاب ) ونسيت المترو بمحطاته بركابه مع انى كان اعتمادى عليه 8 سنين متواصله بس كاانت ايام !!!

المهم ركبت من محطه ميدان الجيش ( الخط الثالث ) بجد حاجه تفرح تخلى الواحد يحس انه فاوروبا بدون مبالغه والله فعلا حاجه روعه روعه من حيث النظافه / النظام / المنظر العام كله يديك امل

بس ياخساره الرحله مكملتش حولت نزلت محطه العتبه ( الخط الثانى ) وكانت الزحمه فيها طبيعيه عادى يعنى زحمه بس المعتاده ومنها لمحطه الشهداء ( رمسيس ) خلصت والدنيا عادى وتمام وانجزت المهمه اللى رايح عشانها بنجاح وقولت ارجع على السيده زينب ازور بيت العائله ( وكان اغبى قرار اخدته )

خدت المترو من محطه الشهداء والزحمه بجد وبدون مبالغه لاتوصف فعلا فعلا الشعب كله قرر يركب المترو
سألت واحد كان واقف قصادى قولتله ايه كل ده ؟؟
قالى اصل مفيش ميكروبظات عشان الجاز واللى موجود بيغلى الأجره الضعف منهم لله !!!

المهم جه المترو وقفت قدام السهم اللى المفروض بيقول ان الباب ده صعود فقط لقيت حوالى من 30 الى 40 شخص نازلين بقوه دفع ذاتيه ولسه منزلوش لقيت اللى زقنى من ورا دخلت برده بنفس قوه الدفع اللى الناس خرجت بيها وعيينك ماتشوف الا النور
الباب مش راضى يقفل بسبب الزحمه الرهيبه ومسك الناس للباب وكان فى واحده ست اتحشرت بين الرصيف والباب لولا الناس مسكت الباب كانت حصلت كارثه

ومن هنا تبدأ المواقف المثيره للشفقه والكوميديا مع بعض :

# نازل المحطه الجايه يابرنس؟
لا مش نازل طب ماتركن على جنب بدل ماانت واقف كده

# يااستاذى فى باب للنزول من هنا
ياعم خليها على الله هو احنا فين .... دى مصر يابا !!!!

مجموعه ستات حوالى 3 او 4
واحده منهم لو سمحت متلزقش كده اتاخر شويه
ياستى مانتى شايفه الناس كلها فوق بعضها اعملك ايه يعنى
( وخدلك فاصل من الشرشحه والتهزيق للراجل اللى واقف )

الموقف استفذنى اتدخلت وقولتلها : ياحاجه فى عربيه سيدات بس عشان متشتكيش كده وتبقى براحتك ؟؟

والرد كان : وانت مالك انت ياعم !!!

وهنا كله اتدخل والدنيا ولعت بدون داعى والحمدلله
وصلت بالسلامه بدون خساير غير انى قليت من نفسى جامد وخارج غير ماركبت خالص متبهدل بهدله مايعلم بيها الا ربنا
وكان هاين عليا ابوس كاوتش عربيتى عجله عجله بسبب اللى شوفته

بس فى كام سؤال محيرنى اوى اوى بصراحه :

# فى حوالى 3 او 4 عربيات مخصصه للسيدات ليه بقى الزنقه فوسط الرجاله ؟؟؟

# ليه الفرق اللى مابين السما والأرض بين الخط التالت و الأول فى النظافه والنظام عشان يعنى ده معمول مؤخرا والتانى قديم ؟؟ يمكن

# ليه محدش مستحمل حد وردود الناس مع بعض ناشفه ومفيش ود ولا جدعنه ولا اى حاجه من بتوع زمان ؟؟

# مفيش حمايه مابين الرصيف والمترو لأن ممكن حد فى الزحام ده يروح فداهيه ويقع بسبب التدافع والزحمه واظن اتكررت كتير الفتره الأخيره ؟؟


بس للأمانه فى ايجابيات كتير الواحد شافها بس تحس انها خساره فالشعب ده

- نظام الدخول والخروج لشباك التذاكر ( ولا حد بيعمل بيه )

- نظام السلالم الكهربائيه فأغلب المحطات ( مكنش موجود قبل كده )

- اسهم وارشادات للصعود والنزول واماكن عربيات السيدات ( تحس ان الناس مكسله تقرا وتنفذ )

واسف على الأطاله

[Imhotep]

زى ما انت قلت ولا اى اندهاش. . . بس على فكرة الزحمة دى مش عندنا بس لان فى اليابان عاملين موظفين شغلانتهم يزقوا و يحشروا الناس فى المترو :-)

[greenday]

ههههههههههههههههههههههه ايه ياريس ده فكرتنى باجمل ايام حياتى وانا فى الجامعة كنت بركب المترو بشكل يومى وياسلام لما يكون عليا امتحان بس على فكرة المترو برغم عيوبه افضل مليون مرة من ركوب اتوبيس لان الأتوبيس بطئ جدا وزحمة جدا وخناقات بالعبيط انا تقريبا مافيش مرة ركبت اتوبيس الا ولازم اتفرج على خناقة بين الركاب وبعض او بين الكمسرى والسواق مع احد الركاب بس على الأقل المترو المحطة مبتخدش دقيقتين وحتى لو زحمة قوى ومش قادر فانت ممكن تنزل وتستنى اللى بعضه فالأمور مش وحشة قوى كده وعلى فكرة عدد العربيات المخصصة للسيدات فى المترو اتنين بس وبيبقوا زحمة جدا فى اوقات ذهاب وعودة الموظفين والطلبة عشان كده هتلاقى بعض السيدات بتفضل تركب فى العربيات العادية

[RIDER 2050]

حضرتك النضافه والنظام الى ف الخط التالت ده بس عشان لسه جديد وفرحانين بيه :d
استنى بس عليه كام سنه كده وهيبقى زى اخواته
ملاحظه عجيبه : الالوان اللى ف الخط لتاالت دى عجيبه جدا اصفر فاقع احمر فاقع اخضر حاسس ان ف عدم تناسق
بس والله الواحد فرحان جدا وفخور بالانجاز ده

[Khaled Online]

ياباشا ده أنا بطلت ألبس كلاسيك من سنتين إلا في المناسبات بسبب اللي ما يتسمى ده! هو أنا بعت اللي ورايا واللي قدامي عشان أجيب عربية ليييييييييييييييييييييييييه؟ هههههههههه

[shaddadfalcon1]

المشكله اننا في مصر بنعمل الحاجه باحسن شكل وبعدين مش بنصونها

يعني دلوقتي القطارات المكيفه بقت فعلا زريبه مع ان العمال موجودين وبياخدو مرتبات بس مش بينضفو حاجه وتلاقي الصراصير ماشيه جنبك والحمامات لو عايز ترجع ممكن تبص عليها

المترو عشان لسه جديد فشكله يفرح بعد كام سنه هتلاقيه بقي زي اخواته عشان مفيش صيانه

[Mr.Lawyer]

ههههههههههه فكرتنى لما كنت رايح احلف اليمين فى النقابه ( نقابه المحامين ) ومتشيك بقا اخر شياكه وجت فى دماغ واحد صحبى قالى يلا نركب مترو ، نزلنا وقطعنا التذاكر ولسه بقف على الرصيف لقيت بشر بالهبل كله لازق فى بعضه ويا سلام بقا اول ما يوصل المترو للرصيف افتكر نظريه نيوتن علاطول وكله بالدفع يا سيدى ، قمت صوتت لصحابى وقلتلهم على جثتى اركب مترو ، مش بعيد اوصل من غير البدله اساسا ـ قمت طالع جرى من المحطه ( من هول الصدمه ) وعلى اول تاكسى ( نقابه المحامين يا اسطى ) والحمد لله عدى اليوم على خير ... ومن ساعتها مش بقرب من المترو خاااااالص

[حماده المصري]

بقالي فتره بستخدم المتور في الاماكن الخبيثه الي مينفعش تتراح بعربيات

قله ادب الحقيقه النظام موجود محدش بيستعمله

نسوات البلد دي محتاجين رجاله تديها على دماغها صح

الحركه دي زباله بتجنن منها ام الدنيا كلها مفيش مكان ل صباع في عربيه رجالي تقوم داخله فيها وحاجه تقرف عارفه انها لو دخلت عربيه الرجاله هيبعدوا عنها شويه مش هيلزقوا فيها وكمان ممكن حد يتشهم معاها ويقوم ويسيبها تقعد

انما لو دخلت عربيه الحريم هتاخد على دماغها

وغيره كتييييييييير

[tutankhamoun]

أي مترو في العالم ..... زحام في اوقات خروج و دخول الموظفين (مترو لندن و مترو باريس كدا - و دول اللي جربتهم ) و مترو طوكيو أسوء من بتاع مصر (بشوف في التليفزيون )

الفرق في الناس ...... الناس هناك منظمين لحد بعيد جدا........... الناس هنا فهلويين لأبعد الحدود .

[tutankhamoun]

و على فكرة ... المترو مازال افضل من السيارة في التنقل داخل البلد

كفاية اني مش بشيل هم البحث عن مكان للركن ..... أو ادفع اجرة ركن في جراج محترم ....... أو ادفع اتاوة لبلطجي علشان أركن في الشارع .... و يا عالم هارجع ألاقي العربية سليمة و لا واخدة بوسة من عربية تانية ........ أو واحد قرر يتعرف على محتوياتها الداخلية و ترجع بقى متلاقيش الزجاج في مكانه .

[kar!m]

بس فى كام سؤال محيرنى اوى اوى بصراحه :

# فى حوالى 3 او 4 عربيات مخصصه للسيدات ليه بقى الزنقه فوسط الرجاله ؟؟؟

أنا بقالي أكتر من 10 سنين نفسي أعرف اجابة السؤال ده.

[shaddadfalcon1]

الستات بتعمل كده غالبا عشان عربيتهم بتبقي زجمه وهما اصلا مش بيطيقو بعض

يعني واحده لو تعبانه وراحت عربية الستات محدش هيعبرها لكن في عربية الرجاله الف مين هيقوم ويقعدها وخصوصا لو حلوه شويه :)