Mobinil

[Dream286]

نسيت اوضح حاجة معلش

لتجديد الخط

6 شهور ب 75 جنيه
12 شهر ب 90 جنيه
24 شهر ب 110 جنيه

ممكن برضو لو مش عايز تجدد
حول خطك لنظام الاشتراك الشهري ( ستار )
اقل اشتراك
25 جنيه شهريا تحصل بالمقابل على 100 دقيقة لأي محمول
بعد انتهاء ال 100 دقيقة
الدقيقة لاي محمول ب 30 قرش
لموبينيل ب 20 قرش
التحويل مجاني لهذا النظام

المطلوب :
بطاقة شخصية ( الرقم القومي )
+ حاجة واحدة من الحاجات دي
رخصة قيادة
جواز سفر
وصل نور حديث من اخر تلات شهور بإسمك او بإسم الوالد
وصل تليفون حديث *************

[Mohd_Adel_Amin]

شكرا ليك يا باشا ... وأهلا بيك وربنا يتمملك بخير .. الرينو عربية هتعيش معاك العمر كله ان شاء الله...

انا عندي سؤال بخصوص الانترنت .. انا كنت اشتركت في الخدمة ووافقت على الرسائل اللي جتلي بعد ما اتصل .. والجهاز نوكيا 6300 .. بيدخل نت بس مش بيرضى يفتح اي برنامج شات (بيقولي ازبط الإعدادات بتاعة الشبكة) ..
فالحقيقة مش عارف ده عيب من الشبكة والا من الجهاز؟؟
اتمنى انك تفيدني

[Dream286]

استاذي الفاضل : أمير
اشكرك على مشاركتك واعتذر بشدة على التأخير في الرد

انا كنت زمان الو و بعدين حوالت البريمو من كام سنه, و دلوقتي بقي اشتراكي المفروض خلص( بس لسه بتكلم عادي متقولهمش بقي) , انا عايز اجدد الاشتراك بس مش عارف اكتر حاجه مناسبه ايه, انا في المتوسط بشحن بكارت 100 كل شهر تقريبا و مكالماتي الدولي مش كتير انما من ان لاخر بتكلم 4 او 5 دقائق

انت كدة في المعدل المتوسط يعني ممكن يناسبك الكرت او البريمو او ستار
ساعتها هتبقي تفضيلات شخصية ليك
انا عن نفسي برشح لك ستار للاسباب الاتية
اولا سعر الدقيقة اوفر والاشتراك اللي هتدفعه هتسترده دقايق
مش مرتبط بكروت يعني مش هتسمع عبارة نفاذ الرصيد اللي انا شخصيا كانت بتجيب لي اكتئاب مزمن
خدمات مجانية زي خدمة اظهار رقم الطالب المتطورة ( كيب بلاس ) والاتصال بخدمة العملاء مجانا والاستعلام عن الفواتير مجانا وبيكون ليك اولوية في خدمات موبينيل المجانية عموما

ازاي لما سعر الدقيقه 30 قرش او 20 قرش اجي اشوف رصيدي كام دايما بتبقي في كسور عشريه, و الواحد طبعا مش بيدقق قوي كده انه يقعد يحسبها, بس الموضوع الصراحه مستفز لأن الكسور دي دايما موجوده و دايما بالسلب, ايه تعليق سيادتك عن الموضوع ده؟

للدرجادي
بص انا مش عارف هي الكسور دي معناها ايه لكن هي ممكن تفسرها لو انت على نظام الوهات لان المحاسبة بالثانية او لو انت استخدمت الانترنت
وعموما لو شاكك في نظام المحاسبة
جرب استخدام الكود دا
#100#3#
شباك مية شباك تلاتة شباك بالترتيب
واعمل مكالمة واحسبها واتصل بالكود دا تاني
شوف الرصيد قبل وبعد المكالمة هتلاقي العملية مظبوطة ولو في حاجة غلط ارجع لخدمة العملاء على طول متتاخرش

عندنا مكتب فيه كذا موبيل متوسط قيمه الكروت اللي بنشتريها بتوصل من 900 ال 1000 في الشهر, عايز انسب نظام معاكو لخط نتكلم منه دولي كتير و خطين تانيين او تلاته مثلا مكالمات موبيل محلي, و طبعا المكتب ليه سجل تجاري و كافه الاوراق القانونيه

طبعا نظام ستار افضل الانظمة ممكن تشوف نظام ستار 4000
اشتراك شهري 900 جنيه بتاخد 4000 دقيقة
هتلاقي سعر الدقيقة بعد الضريبة يعمل فرق كويس
وفي 400 رسالة مجانية وفي رقم تقدر تكلمه مجانا اي وقت لو حابب
وفي الاقل شوية ستار 2000 اشتراك 500 جنيه وفيه برضو 400 رسالة ورقم مجاني بس سعر الدقيقة في 4000 ارخص شوية
وتطلب تشغيل خدمة الدولي على الخط دا لو حابب بس هتدفع تأمين الف جنيه تقدر تسترده بعد فترة من التعامل مع الشركة او الغاء خاصية الدولي
وممكن لو حابب تاخد اكتر من خط بإسم الشركة دا متاح وممكن تستفيد ان المكالمات بين الخطوط دي في الشركة بتكون بسعر اقل 15 قرش للدقيقة بدل 20 قرش

لو امكن انك توضحلنا الخدمات اللي موبينيل بتقدمها مع شرحها كامله, زي مثلا كليب بلس و ماشابه من خدمات

في خدمات مهمة زي
1 - Clip +
خدمة اظهار رقم الطالب المتطورة
لو حد اتصل بيك والموبايل مغلق او غير متاح بتجيلك رسالة اول ما بتشغله
او لو عايز اي حد يتصل بيك يسمع غير متاح وتجيلك رسالة وفي نفس الوقت انت تقدر تعمل مكالماتك عادي
دي متوفرة مجانا في خطوط ستار

انا هتوقف هنا معلش وهرجع بعد الفاصل ظروف طارئة بس

[amir]

متشكر ليك قوي و في انتظار عودتك و ربنا يجازيك خير عنا كلنا

[iunknown]

دريم
انا بحاول اكلم خدمة العملاء طول اليوم مافيش رد


انتوا اجازة ولا ايه

[Dream286]

عوده

اكمل الخدمات المشهورة الاول

- خدمة الدفع المباشر عن طريق الانترنت دي ببساطة تسمح ليك انك تدفع فاتورتك عن طريق بطاقة الائتمان الخاصة بيك
- خدمة موبيلست عن طريق الاتصال بشباك مية شباك
جربوها هتلاقوا ان فيها تسهيلات كتير
يعني تشحن وتحول رصيد من خلالها وتبعت رسايل كلمني شكرا وتستعلم عن الرصيد بطرق اسهل فعلا من الطرق العادية
- خدمة موبينيل لايف اعتقد الكل عارفها
-خدمة الرسالة الصوتيه تقدر تبعت رسالة صوتيه بدل اس ام اس
دي بتتصل بالرقم عادي بس قبل الرقم حط علامة النجمة *
هتقدر تبعت له رسالة صوتيه بسعر الرسالة العادية
- خدمة الكول تون اعتقد الكل عارفها ان اللي يتصل بيك يسمع اغنية بدل الجرس العادي ودي عن طريق الاتصال برقم 9999
- خدمة الترجمة الفورية
لو واقفة ادامك كلمة ومش عارف معناها ابعت الكلمة في رسالة قصيرة لرقم 1001 وهيجيلك المعنى فورا في رسالة وممكن تبعت عربي او انجليزي
سعر الرسالة خمسين قرش لعملاء الو وتلاتين قرش لعملاء ستار وبريمو

بصراحة انا مش حاضر في ذهني كل الخدمات بس دي اشهرهم لكن ان شاء الله لما ارجع الشغل بعد العيد اقلب في صفحة الخدمات وافتكر ايه اللي ناقص

[Dream286]

استاذ kodak_

اشكرك على مساهمتك الكريمة
واحب الفت انتباه حضرتك ان تجديد الست شهور ب 75 جنيه

الاستاذ(ة) upnemo

شكرا لمساهمتك وتشجيعك

استاذ
MEDO_AHMED2

تابع لنا الموضوع بتاع البلد وقولي ايه الاخبار

استاذي العزيز theking2690

بصراحة فرحت جدا بردك ربنا يطمنك
موضوع التلاتة جيجا دا لسة طبعا عشان اول عرض لكن ان شاء الله في المستقبل تتنوع عروض الثري جي
ومتنساش ان الميجا الزيادة بربع جنيه بدل خمسة جنيه ودا يدي برضو حرية اكتر في التصفح

استاذ هشام
مرحبا بيك - تقدر فعلا تعرف انت شحنت بكام من ساعة ما شغلت الخط عن طريق الاتصال بخدمة العملاء وعموما انا ممكن اساعدك ابعت لي الرقم اللي عايز تستعلم عنه في رسالة خاصة بس بعد العيد لأن انا اجازة فترة العيد وانا هقدر اشوف اجمالي الشحن ليه بكام

استاذي الكريم Human
انا مستعد ابعت لحضرتك القرد بس هتستضيف الشعب الشوموبنجي دا عندك طول فترة استضافتك للقرد

بعدين رحت فودافون و بعدين اتجننت و بقيت اتصالات

جولة في التلات ملاعب الخضراء والبرتقالي والحمراء
على فكرة انا للعلم بالشئ معجب جدا بشبكة اتصالات في حاجات كتيرة اوي ومنها توفير خدمات مجانية جديدة كانت مش متاحة لعملاء الكارت واضافة معنى اقوى للتنافس في سوق المحمول بمصر
كمان شبكة بتحاول اثبات نفسها وسط الاتنين العمالقة القدام للمحمول في مصر وخصوصا ان اتصالات شبكة مش صغيرة بالعكس دي شبكة دولية اثبتت نجاحها في الدول التانية
وكمان بتدي تغطية اوسع للمحمول في مصر
انت ممكن تكون في مكان فيه تغطية فودافون وموبينيل للاسف مش كاملة لكن تلاقي اتصالات كاملة معنى كدة ان لو معاك التلات شرايح للتلات شبكات في جيبك يبقى نسبة الامان اعلى خصوصا لو انت على الطريق
وربنا يستر من مسئولي موبينيل لو شافوني وانا بشجع اللعبة الحلوة

[Dream286]

استاذ mohd_adelamin
ممكن توضح لي اكتر بعد اذنك ببرامج الشات الموجودة عندك ؟
هل تقصد انك حاطط الماسنجر على الموبايل ؟
هو مبدأيا لو خدمة التصفح سليمة يبقى الخدمة مفهاش اي مشكلة
وعموما انا اقولك حاجة كويسة
لو حابب تدخل ياهو او هوت ميل او مواقع الدردشة المشهورة
ممكن ببساطة جدا من غير تحميل اي برنامج
تدخل على سايت اسمه
m.ebuddy.com
من على الموبايل تكتب السايت دا
تختار ياهو او هوت ميل او البرنامج اللي عايزه
وبتكتب اليوزر والباسورد وبتلاقي نفسك دخلت على الحساب بتاعك
بس هو محدود الامكانيات يعني مش هتقدر تضيف مثلا صديق جديد
اتمنى اني اكون جاوبت في النقطة اللي حضرتك تقصدها
وفي انتظار استفساراتك القادمة

استاذ iunknown
خدمة العملاء شغالة 24 ساعة في اليوم 7 ايام في الاسبوع
في نقطة احيانا بيكون في ضغط شديد على خدمة العملاء ( زي اليومين دول ربنا فعلا يكون في عون الموظفين اللي شغالين دلوقتي محدش يحس بيهم غير اللي شغال معاهم بجد ) وممكن المكالمة متجمعش لكن دا نادر الى حد كبير
جرب تتصل برقم 110 من اي خط موبينيل وانتظر الرسالة الصوتية لما تخلص
او من اي خط ارضي 16110 بسعر المكالمة العادية
ولو في استسفار انا ممكن اساعدك فيه او لو حابب تاخد اكشن على الخط ممكن تبعت لي رسالة خاصة وانا حكلم خدمة العملاء بالنيابة عنك

تحياتي للجميع وبعتذر جدا على التأخير في الردود المرة دي بس عشان عيد بقه وكل سنة وانتم طيبين
وبعدين فين يا جماعة ال 17 مليون عميل
انا في انتظار كل استفساراتكم في اي وقت

نقطة مهمة جدا
ممكن يا جماعة اكون سهوا لا تعمدا اني ما اجاوبش على استسفار او سؤال وما اخدش بالي ياريت محدش يزعل مني وياريت ينبهني في رسالةخاصة اني مجاوبتش

[amir]

نقطة مهمة جدا
ممكن يا جماعة اكون سهوا لا تعمدا اني ما اجاوبش على استسفار او سؤال وما اخدش بالي ياريت محدش يزعل مني وياريت ينبهني في رسالةخاصة اني مجاوبتش

مش لازم تعتذر ده تفضل منك و مجهود تشكر عليه مش مفروض عليك
انت عايز تفيد اخواتك في المنتدي
بس انت واحد بس و اخواتك كتير قوي
ربنا يعينك

[Mohd_Adel_Amin]

استاذ mohd_adelamin
ممكن توضح لي اكتر بعد اذنك ببرامج الشات الموجودة عندك ؟
هل تقصد انك حاطط الماسنجر على الموبايل ؟
هو مبدأيا لو خدمة التصفح سليمة يبقى الخدمة مفهاش اي مشكلة
وعموما انا اقولك حاجة كويسة
لو حابب تدخل ياهو او هوت ميل او مواقع الدردشة المشهورة
ممكن ببساطة جدا من غير تحميل اي برنامج
تدخل على سايت اسمه
m.ebuddy.com
من على الموبايل تكتب السايت دا
تختار ياهو او هوت ميل او البرنامج اللي عايزه
وبتكتب اليوزر والباسورد وبتلاقي نفسك دخلت على الحساب بتاعك
بس هو محدود الامكانيات يعني مش هتقدر تضيف مثلا صديق جديد
اتمنى اني اكون جاوبت في النقطة اللي حضرتك تقصدها
وفي انتظار استفساراتك القادمة

ده فعلا اللي بعمله علشان ادخل الشات.... بس المشكلة الرئيسية عندي اني افتح الايميل .. حاولت ادخل موقع ياهوو وافتح صندوق البريد بتاعي بيطلعلي رسالة (No gateway reply)

معلش يا باشا استحملنا شوية .. وفي انتظار تعليقك على المشكلة

[mohamed_88sk]

كل سنه وحضراتكم طيبين يا أحلى ناس

استاذ دريم ,,
كل سنه وحضرتك طيب اخي الكريم
ازيك؟ عساك بخير بإذن الله


أنا بستخدم ال ebuddy messanger and mig33 messanger
عالموبيل كنت عاوز اعرف أيه تكلفتهم , على خط ألو ..
وايه تكلفتهم على الخطوط التانيه.
والتصفح للنت كمان والMMS إن أمكن ,,

صحيح أيه أخبار الرقم اللي قلت لحضرتك عليه يارب تكون قدرت تحصله .. معلش بتعبك معايا .. أسف بجد.

[aif]

اساتذ dream 286 ......
شكرا لردودك ولصبرك علي الاسئلة والاستفسارات ....
ربنا يكرمك ويجزيك خير
فعلا ردودك فيها معلومات جديدة ومفيدة جدا
شكرا مرة اخري

[Dream286]

د/أمير اشكرك كثيرا على اطراءك واذا كان بعض الاعضاء استفادوا من الموضوع ثق تماما اني استفدت اكتر واحد وربنا يكتر من اخواتنا يارب

عزيزي mohd_adelamin
فعلا مش بتقدر في اجهزة الموبايل العادية انك تقرأ الميل بتاعك للاسف لأن الجهاز نفسه مش بيدعم دا الانترنت نفسه ملهوش دعوة

استاذي mohamed_88sk
بالنسبة للخدمة هي بتكلفك نفس تكلفة التصفح العادية
يعني اول خمسة ميجا بايت بجنيه واي ميجابايت زيادة بخمسة جنيه
بيكون في عداد (للكيلوبايت مش للميجا ) اعلى الشاشة تقدر تعرف منه قيمة الاستهلاك وعموما اطمن التصفح العادي مش بيكلف كتير بعكس الداونلود

بالنسبة لخدمة الرسائل المصورة MMS تكلفة الرسالة 95 قرش
بحد اقصى 500 كيلوبايت
ومتنساش تشوف صندوق الرسايل الخاصة النهاردة عشان هبعت لك رد على الرقم بتاعك

عزيزي aif
شكرا ليك على اهتمامك واتمنى اني اكون عند حسن ظنك
وبانتظار مشاركتك الجاية

[HeMa_LanCeR]

استاذ Dream286 حضرتك تستحق اقصي درجات التقدير والأحترام

شكرا جدا لحضرتك

بجد مجهود رائع

[mohamed_88sk]

جزاك الله كل خير أستاذ دريم ,,
بجد نصايح غاليه قوي ..