ليه الناس بتعمل كدا...حاجة تقرف

[icehearted girl]

انا مضيقة اوي...ومخنوقة اوي اوي


النهاردة علي الساعه 4 كدا بعد مخلصنا الدرس...قررت الانتقام من نفسي والقيام بمهمة انتحارية


الاوهي اني اوصل اتنين زمايلي ساكنين فلهرم


يعني عادة بعدي من كوبري عباس والف يمين مالنفق وادخل البحر الاعظم

بس طبعا النهاردة مششيت من ميدان الجيزة...وأجاركم الله العربية عطلت في حتة لو


رميتو فيها ابره مش هتوصل الارض من كتر التكدس والزحمة


وهي مش عاوزة تدور ولا تتع تع ابدا من مكانها


مش دا اللي فارسني عادي انا اتعودت خلاص واكتسبت مناعة من المواقف دي


اللي فارسني رد فعل الناس هم ليهم حق يتنرفزوا لاني موقفه تلت الطريق بس انا ممكن اعمل


ايه انا مشغله الانتظار وحطيت لنيلة المثلث وفتحة الكبوت بحاول اشوف في ايه وبرده


هما جيين يستنوا ورايا...هم صحيح ليهم حق الدنيا كانت زحمة جدا بس يبقي تطاول وبشتايم

كمان؟؟


والله متتخيلوش في واحد كان عامل ازاي كل اللي قدرت اعمله اني دعيت ان بنته تبقي

واقفة محتاسة زي كدا وتلاقي واحد يتصرف معاها كدا


المهم الناس لامبالاة متناهيه قعدت ازق العربية واركن يمين الناس بترمي عليه ونا بزق


راجل ابن حلال نزل وفضل يوقفلي الطريق لحد مزقيت العربية جنب الرصيف ورحت

جبت ميكانيكي شافهالي


بس روحت مضايقة جدا عارفين ليه؟؟...


ساعات كتير اخواتي الولاد بيكونوا فنفس الموقف ولا حد بيقدر يفتح بقه معاهم وبيبقوا متأكدين


ان في مشكلة بجد... مش بيتدلعوا

انما لو تسمعوا التعليقات..اللي يقولي يخـــــــ....... اللي اداكي رخصة مش فاهمه ايه العلاقة يعني


واللي يقولي... البطارية نايمة بيألف سعادته


وكل حد عمال يفتي وكلام في غاية السخافة انا خدت عليه خلاص


بس ليه بيفرقوا في المعاملة مابين ولد اللي فلموقف دا او بنت


انا احيانا بلاقي اخواتي واقفين فلزحمة وجالهم تليفون مثلا يستنوا لحد ميخلصوه

واللي وراهم اخرهم يكلكسولهم وبس...لأيه بقي بيتصرفوا مع البنات كدا؟

[OlaOsman]

للأسف يا آيس احنا يا بنات بنتعامل في الشارع بعدائية بتزيد كل يوم

بس هانعمل ايه؟ مش هانقدر نغير حاجة.. أمر واقع و لازم نتعامل معاه.

[Ahmed Samy]

و الرجالة و حياتك بيتشتمو

كله بيتشتم

[tabeb]

مابقاش فيه حد بيطيق حد النهاردة
كذا مرة الاقي حد بيلف مثلا الاقيه بيقولي شكرا ياذوق
مااستوعبتش ده غير لما شفت الناس بتتعامل ازاي بقلة ذوق في المواقف دي
خليكي كووول يادوك ولايهمك من الناس دول وعاملي الناس زي ماتحبي الناس يعاملوكي مهما حصل

[akramayad]

الله يكون في عونك ، معلش ، ادعي ربنا ما يحوجك لحد أبداً ولا يحطك في المواقف دي مرة تانية .

[Strong]

عادي حتى لو مش زحمة هيحصل كده بغض النظر عن اللي سايق

لازم الواحد يكون بارد وميهموش رد فعل غيره واللي مش عاجبه يخبط راسه في الحيط

أنا هاضايق نفسي على ناس مش متضايقة علشاني ليه

وبعدين العربية مش واقفة على راس حد فيهم دي في الشارع

[Fadi Ezzat]

هتخدى من دة كتير فى البلد دى سواء ولد او بنت
انا اساسا حاسس ان البلد دى مبقاش فيها اخلاق خالص
انا كنت ماشى عادى والطريق واقف فكنت واقف عادى جدا والاقى واحد بتاع شاهين خبطنى من ورا
فوقفت انا عارف طبعا انى مفيش حاجة فى الاكصدام لانة جامد ومتاكد منة المهم
استنيت الراجل يعتذر معتذرش وراح جرى من جمبى وقرص على عربيتة اوى
طبعا مسبتوش طرت ورا وحلفت انى لازم اخبطة فى حاجة او اخبطة
فى الاخر لبستة فى صندوق زبالة وسبتة ومشيت

[m000dy]

الواحد يجيب لاهل بيته عربيه ويعلمهم السواقه ويقولها اخبطى ولا يهمك وانا اصلح
والواحد يكع فلوس بس حرمته ماتتهانش
طب حتى والواحده راكبه عربيه بتتهان
بس ماننكرش ان ده سببه ان الاغلبيه العظمى من الستات ادت الناس فكره ان الستات مالهمش فى السواقه من كتر البلاوى اللى بيعملوها وتلاقى الواحده من دول نازله من العربيه بعد ماتسببت فى كارثه وبراءة الاطفال فى عينيها لا واللى يغيظ تلاقيها بتعيط وهى اللى داخله فى الراجل من ورا ومخرشماه وتروح تعيط لجوزها وكمان تشتكى للجيران واحتمال تتشحتف فتصعب على الناس فى التوكيل يصلحوهالها ببلاش
ومين الغلطان فى الاخر ( الفاعل مجهول )
همه دول الستات فى مصر
بس ماقصدكيش لحسن تزعلى
وهو كده بلدنا بتاخد العاطل مع الباطل
عموما انا ليا رأى فى الموضوع ده بالنسبه للستات
الست ياتركب عربيه زيرو ياماتركبش
واكيد انتى فاهمه كلامى وهاتفهميه اكتر مع كل موقف وبهدله هاتبهدلهالك
ثم ان الفيات مش للستات ياخوننا ومليون مره نقول الكلام ده
اللى بيكره مراته يشتريلها فيات وهى هايبقى عندها من المشاكل والهم اللى يشغلها عنه فيريح دماغه والواحد يبقى قاعد فى البيت يلاقى مراته داخله عليه بتقوله ششششششش ماتقولش حاجه انا مصدعه ومتبهدله من الصبح مع العربيه عند الميكانيكيه وتخش تنام ( طبعا ده بالنسبه للواحد حلم وبيتحقق ان مايلقيش اللى يصدعه اما يرجع البيت )
والله المقروض الرجاله تعمل تمثال للعربيه دى

[Lord_Fouad]

انا مضيقة اوي...ومخنوقة اوي اوي

النهاردة علي الساعه 4 كدا بعد مخلصنا الدرس...قررت الانتقام من نفسي والقيام بمهمة انتحارية

الاوهي اني اوصل اتنين زمايلي ساكنين فلهرم

يعني عادة بعدي من كوبري عباس والف يمين مالنفق وادخل البحر الاعظم

بس طبعا النهاردة مششيت من ميدان الجيزة...وأجاركم الله العربية عطلت في حتة لو

رميتو فيها ابره مش هتوصل الارض من كتر التكدس والزحمة

وهي مش عاوزة تدور ولا تتع تع ابدا من مكانها

مش دا اللي فارسني عادي انا اتعودت خلاص واكتسبت مناعة من المواقف دي

اللي فارسني رد فعل الناس هم ليهم حق يتنرفزوا لاني موقفه تلت الطريق بس انا ممكن اعمل

ايه انا مشغله الانتظار وحطيت لنيلة المثلث وفتحة الكبوت بحاول اشوف في ايه وبرده

هما جيين يستنوا ورايا...هم صحيح ليهم حق الدنيا كانت زحمة جدا بس يبقي تطاول وبشتايم

كمان؟؟

والله متتخيلوش في واحد كان عامل ازاي كل اللي قدرت اعمله اني دعيت ان بنته تبقي

واقفة محتاسة زي كدا وتلاقي واحد يتصرف معاها كدا

المهم الناس لامبالاة متناهيه قعدت ازق العربية واركن يمين الناس بترمي عليه ونا بزق

راجل ابن حلال نزل وفضل يوقفلي الطريق لحد مزقيت العربية جنب الرصيف ورحت

جبت ميكانيكي شافهالي

بس روحت مضايقة جدا عارفين ليه؟؟...

ساعات كتير اخواتي الولاد بيكونوا فنفس الموقف ولا حد بيقدر يفتح بقه معاهم وبيبقوا متأكدين

ان في مشكلة بجد... مش بيتدلعوا

انما لو تسمعوا التعليقات..اللي يقولي يخـــــــ....... اللي اداكي رخصة مش فاهمه ايه العلاقة يعني

واللي يقولي... البطارية نايمة بيألف سعادته

وكل حد عمال يفتي وكلام في غاية السخافة انا خدت عليه خلاص

بس ليه بيفرقوا في المعاملة مابين ولد اللي فلموقف دا او بنت

انا احيانا بلاقي اخواتي واقفين فلزحمة وجالهم تليفون مثلا يستنوا لحد ميخلصوه

واللي وراهم اخرهم يكلكسولهم وبس...لأيه بقي بيتصرفوا مع البنات كدا؟

قدامك حل من اتنين
الاول: تتنرفزي و تردي الإساءة بإساءة، و كدة تتدخلي دوامة الشتايم و مش بعيد تتهوري على حد او حد يتهور عليكي و هتخسري كتيييييييير اوي
الثاني: تحافظي على برود اعصابك و تردي الإساءة بابتسامة او مترديش خالص .. كدة تتجنبي اي مشاكل في موقف هو اصلا مشكلة و تحافظي على موودك
و لازم تأقلمي نفسك على الحياة في مصر و التعامل مع مساوئها .. او .. انتي عارفة بقى

[M.Osman]

انا متفق مع الدكتور احمد

كله بيتشتم بصراحة

انا مرة ماشي بالليل في شارع مظلم و منور نور العربية (طبيعي مانا ماشي في ظلمة و مكنش النور العالي ولا حاجة)

لقيت واحد جاهل ابن تيت بيقوللي اطفي النور يلاااااا ..!!!
صوته بسم الله ماشاء الله... كان عالي جدا لدرجة اني سمعته و انا قافل الإزاز

ربنا يعينك على عربيتك (هو دا اللي بقوله لو شفت حد عربيته عطلانة في الطريق)

[R A N A]

بصي هو انا ساعات بحس ان في حالة شحن غريبة من الرجال تجاه البنات بالذات لو سايقة يعني كتير ببقي سايقة عربيتي والاقي جنبي مثلا شاب بعربيته احسن انه بيبصلي بتحدي اولسان حالة بيقول برده انا راجل اقوي منك وبسوق احسن منك وانتي مهما ركبتي عربيات عمرك ماتكوني متفوقة في السواقة زيي وساعات يكسر عليا او يحاول يسبقني (رغم اني مبكونش بشد معاه اصلا ) .
وفي ناس مجرد ماتلاقي البنت غلطت اي غلطة بسيطة في السواقة يفضلوا يشيلوا ويحطوا عليها لمجرد انها بنت مع ان نفس الخطأ ده لو كان صدر من ولد كان عدي عادي جدا وياعم هو مين فينا مبينساش ومين فينا مبيغلطش لكن بنت بقي اه ماهما البنات اصلا مش فالحين في حاجة ابدا ونازلين يزاحمونا حتى في السواقة.
بس الصراحة يعني مش كل الناس بتفكر كدة يعني انا عربيتي عطلت مني كذا مرة منهم مرتين تقريبا او 3 ناس نزلوا يساعدوني وكانوا رجالة الصراحة وساعدوني لوجه الله وحده.
وفي طبعا مرات تانية الناس كان هاين عليها تمسك دماغي تحطها في الكابوت من كتر الغيظ عشان انا عطلتهم عن مهامهم الفظيعة اللي رايحينها بسبب عربيتي اللي عطلت في وسط الطريق.
انتي عارفة انا ايه اكتر حاجة بتكون موتراني لما عربيتي بتقف مني في الطريق او لما بكون بركن ركنة صعبة اني الاقي حد ورايا بيراقبني او متعطل بسببي بقعد اقول مش مهم العربية تتصلح او مش مهم الكرنة دي تروح واقعد الف ساعة عشان الاقي ركنة غيرها بس المهم اللي ورايا ده يعدي واخلص منه عشان يبطل زن وكلاكسات وبرطمة ولوم فيا .
فكرتيني مرة وانا ماشية بعربيتي القديمة كان عداد البنزين مخرف وانا للأسف مكنتش حاسبة استهلاك البنزين المهم وانا ماشية في شارع يدوب حارتين فجأة العربية الواطية عملتها معايا ووقفت ادور فيها وهي دماغها و100 جزمة متدورش طبعا اول حاجة عملتها شغلت الفلاشر لحد ماشوف هي وقفت ليه (وطبعا لإن خبرتي في العربيات كانت زيرو فمكنتش عارفة العطل منين بالظبط) روحت عملت تليفون عشان استنجد بحد واعرف العطل منين واللي ورايا بقي مش عاتق كلاكسات كلاكسات لحد مانزلت في وسط الشارع حطيت ايدي على دماغي وشاورت علي العربية وقلتله اعمل ايه طيب عطلت اعمل ايييييييييييه راح لما شاف رد فعلي قام ضحك لإنه مكنش متوقع مني رد الفعل التلقائي اللي انا عملته ده
وضحك ومشي .
مختصر القول الناس الكويسة موجودة والناس الوحشة برده موجودة بس للأسف عشان الوحش بقي كتير فبقي ظاهر زيادة عن اللزوم.
يالا تعيشي وتاخدي غيرها يا ايس وبعد كدة لما عربيتك تعطل اجري واحد يقف جنبيها عشان يتشتم بدالك

[Samah AbdAllah]

تجاهلى كل من يتخطى حدود الادب
لو شغلتى نفسك بالنس دمك هيتحرق على طول

[karaktar]

بصراحة مع احترامى لسواقة النساء الى ان معظمهم مالهومش فيها طبعاً الكلام ده بعد عدة تجارب
هاحكيلكو حاجه تغيظ مرة كنت بالعربية مع والدتى ماشى فى شارع جانبى والشارع اساساً مش مستحمل ديق جداً ابصلك واحدة واقفه اصادى ولا مبالاه ازمر ازمر مش نافع الهانم عايزه تركن وايه صف تانى وااشارع شبه مسدود صف رايح وصف جاى طبعاً سدت الحارة بتاعتى ولازم استنى طابور العربيات اللى مقابل ليه عشان يخلص واعدى وده للأسف اللى حصل الاقيلك الانسة نازله من العربية بقولها ينفع الكلام ده ترد تقولى وانا اعملك ايه يعنى وسابتنى اكلم نفسى ولا هيه هنا وسابت العربية

[محمد محمد]

رد فعل طبيعي وعادي طبعا من الناس وطبعا هو رد سلبي ومتنتظريش غير كده لأن الناس اتعودت علي كده الا من رحم ربي والناس دلوقتي بتفر من المسئولية فرارها من الأسد حضرتك اكيد بتقرئي الجرائد تلاقي ذبح رجل اما اعين المارة سرقة احد الأشخاص امام اعين المارة اغتصاب فتاة امام ذهوول المارة وكل ده بيحصل بسبب ان الناس بتعلق اخطائها علي شماعة الغير كذلك حضرتك كنت في موقف طبيعي وعادي ممكن يحصل لأي حد وعملتي اللي عليكي وحطيطي المثلث الناس بقي ماشية علي مقولة بنقولهم ثور يقولوا احلبوه .

[KSA2011]

ربنا يكون فى عونك بجد موقف بشع
بس بالنسبه لموضوع الشتيمه الواحد ساعتها غالبا الواجد ما يبقاش مركز
بس الى مستغرب ليه فين شهامه الناس انه حد ينزل يساعدك ! وانت قلتى فتحتى الكبوت !! يا فرحتى !! هتصلحيها يعنى هههه
المشكله فى النظام الى مخلى طريق مقفول بالكامل ! فى اى بلد محترمه بيبقى لازم فيه حاره او حارتين فاضيين من الطريق عشان الى عايز يجرى والى عايز يمشى براحته والى عايز يقف لظروف
انا شايف انه بالعكس فيه احترام شويه للست عن الراجل فى السواقه
يعنى اادام عينى بنتين سايقين عربيه سوبارو امبريزا هاتش باك الاكصدام الادمانى فجاه وقع لقيت اكتر من 50 شاب جم منين الله اعلم وكلهم بيشتالوا الاكصدام وبيعملوه وكانهم بيستباركوا بيه منظر يضحك
هى راكبه العربيه ولا فى دماغها
بعدها بشوى ابن عمى كان بيطلع العربيه واحنا راكنين واذ هى واقفه انتظار ورانا فقلتلها ترجع ورا شوى رجعت 3 سم فهو رجع بالطول لقيناها يتزعقله وبتشتمه وكان هينزل يموتها يومها لولا انى منعته
المهم كبرى دماغك على الاخر و وقفى العربيه فى اى مكان انت عايزاه ويوم ما تقفل معاكى وتحسى الدنيا مطينه بطين اقفلى العربيه وسيبيها فى مكانها او عشان الامان اركنيها فى نص الطريق وقضى مشاويرك عادى وشوفى ميكانيكى براحتك خالص واذا كان الوقت اتاخر سيبيها لبكره عادى ههه
روقى مفيش حاجه تستاهل
انا السواقه علمتنى حاجه بعد الاشكال الز..... الى الواحد بيقابلها انه طالما الحمد لله الواحد وصل البيت سليم و العربيه يعنى معايا على الاقل طظ فى اى حاجه بعد كده وانسى كل الى حصل مهما كان
انت لسه زعلانه ؟
مش ممكن
روحى ذاكرى ال Labour و ال Mechanisms بتاعتها وعيشى هههه فى اسهل حاجه فى سنه 6 هههه
كل سنه وحضرتك طيبه