محطة وطنية الجديدة في مدينة نصر نصابين

[dragonsmith]

السلام عليكم،

احذروا محطة وطنية الجديدة في شارع زاكر حسين اللي في الحي السابع في مدينة نصر...فعلا نصابين.

اللي حصللي اني روحت افول عندهم النهاردة و اول ما وقفت جنب الطرمبة لقيت تحذير غريب مطبوع على ورقة و ملزوق. الورقة بتحذر العملاء من الغش في العدادات، استغربت اوي لأن كل محطات وطنية سمعتها ممتازة. المهم العامل فول و أخذت الباقي و ملحقتش اشوف المؤشر لأن شخصية ظريفة نصابة برضه من حاجة اسمها شبكة العمل الدولية الهاني بعرض عجيب عن معطر مجاني و معرفش ايه تاني. المهم سبته لاني عارف انه نصب و مشيت.

بعد ما وصلت مشواري عيني جت على مؤشر البنزين لقيته ناقص ربع التانك! ذهلت طبعا لأن العربية كانت مشيت 20 كم بس بعد التفويلة! (أنا متعود أصفر الtrip computer بعد التفويل).

خلصت المشوار اللي عندي و قلت هرجعلهم أطين يومهم. بكلم مراتي في التليفون، اكتشفت انها فولت من عندهم امبارح برضه و لما وصلت البيت اكتشفت ان ناقص 10 جنيه من الباقي.

دماغي شاطت أكتر و رجعت المحطة أشوف المدير بتاعهم (أنا مقتنع ان الكلام مع العمال مش هيجيب نتيجة) بس للأسف مكانش موجود....قال ايه بيصلي المغرب في جامع السلام القريب من المحطة. فعلا كنت مستعجل عشان عندي ضيوف في البيت فرجعت و ناوي أروح بكره ابهدلهم.

الخلاصة، واضح ان في مشاكل كتير بتحصل عندهم عشان كده معلقين التحذير على الطرمبات. اللي يضطر يمون من عندهم ياخد باله كويس يا جماعة.

أما عن شبكة العمل الدولية بقى فدول بيبقوا منتشرين في المولات. انا قابلتهم بنفسي في كارفور دندي مول و هايبر وان و موجودين في اماكن تانية كمان. بيختاروا الناس اللي مشتريين حاجات كتير و يغروهم بهدايا مجانية مقابل 50 جنيه عشان يضمنوا جدية الحضور و بيستردها الضحية لما يروح يحضر ندوة هما عاملينها في عمارة بتاعتهم في شارع الثورة في مصر الجديدة.
الندوات بقى بتبقى عن عقود لرحلات عمرة لمدة 3 سنين بنفس السعر أو حاجات تانية مشابهة. كل عروضهم نصب في نصب و بيغروا الناس بسحوبات على عربيات و الهدايا الفورية الرديئة. للأمانة هما بيردوا ال 50 جنيه اللي بياخدوها ما عدا ذلك نصابين رسمي و اسلوبهم في التسويق سخيف....من نوعية تعاقد النهاردة بخصم 30% و بكره السعر يرجع زي الأول. الكلام ده اكدهولي 5 من قرايبي و اصحابي فانا متأكد منه 100%.

شكرا.

[tutankhamoun]

شكرا ياباشا على التحذير
و أحب أني أضيف إن الواحد يكون مصحصح في أي محطة بنزين و يبص على العدد لترات البنزين اللي اندفع عليهم فلوس قبل ما يمشي

و بالنسبة لبتوع شبكة العمل الدولية
نصابين رسمي نظمي عزمي و أوع حد يديهم فلوس لأنه من الأخر تضييع وقت