ياخبر ابيض بالألوان، دا انت تروح تبدلها بموبايل نوكيا فنلندى وتدفع عليها فرق :) :) :) :) :) :)
بهزر طبعا لكن هى فعلا العربية محتاجة شوية شغل
1- بالنسبة للسمكرى انا عندى واحد فى مدينة نصر ممتاز وجنبه فرن البوية والكهربائى يظبطولك كل اللى انت عايزه ، لو مدينة نصر مناسبة ليك قوللى وانا اديلك بيانات الإتصال بيه واربط لك معاه معاد يعمل لك مقايسة ويقول لك ايه الأحسن سمكرة وللا غيار
2- بالنسبة للrpm على الخامس فهو طبيعته كدة فى الشاهين 3300 على 100 كيلومتر/ساعة على الخامس، وهى نظامها كدة والموتور مش بيجراله حاجة من السواقة بالطريقة دى، لكن موضوع 200 فى العداد ده شيله من دماغك خالص، هى اخرها 150 ، وممكن تيجيب 160 فى ظروف استثنائية لو الهواء فى ظهرك او واخد منزل، بالنسبة لموضوع السحب الضعيب فغالبا ده نتيجة السواقة الحريمى لفترة طويلة ، العلاج الناحج لهذة المشكلة هو طقم بوجيهات جديدة و علبة منظف كاربراتير على تفويلة بنزين ومشوار طوالى لحد الرست هاوس كدة او الإسماعيلية وترجع ، هتلاقى العربية نعمت وفاقت وبقت اخر جمال
3-بالنسبة للفلاتر فأسعارها معقولة، هو فيه فلتر بنزين روسى بلاستيك شفاف ب 5 جنيه، بس الإيطالى افضل منه طبعا
4-واضح طبعا ان العربية متغيرلهاش زيت لمدة 30 ألف كيلومتر مثلا وللا حاجة، عموما انصحك تتابع مستوى الزيت الحالى ، لو نقص لحد نصف المقياس مثلا او اقل فى خلال 3000 كيلومتر انصحك تكشف على كبس الموتور ولو لقيت الموتور خفيف شوية بسبب عدم غيار الزيت يبقى عليك انك تنتقل لاستعمال زيت ثقيل وليكن شل إكس 100 مثلا، لو الزيت لم ينقص منك والموتور سليم يبقى عليك بالشل هيليكس الجركن الأصفر او توتال كوارتز 5000 ، نصيحة اخرى لتلافى آثار عدم غيار الزيت، اضبط تاكيهات العربية وخلى عامل التاكيهات يبصلك على ركب الكامة ركبة ركبة (هم 8 ركب) وبص معاه عليهم وخليك يلفهم قدامك بحيث تشوف الركبة بالكامل، لو فيه اى واحدة فيها آثار تآكل (عادة بيكون عند قمة الركبة وبيكون على شكل تكحيت فى قمة الركبة) غير عمود الكامة ، تمنه 250 جنيه التركى الجديد او الإيطالى ال128 او الريجاتا المستعمل، وانصحك بالإيطالى بس تتأكد بعينك وبالقياس انه مافيهوش اى تآكل سواء فى الركب او الجلب الدائرية
5- بالنسبة للزوايا فهى فيها خدع كتير جدا لأن ساعات الطريق بيكون فيه هواء يضرب العربية من الجنب اليمين فتحدف شمال او العكس بالعكس وميكونش فيها مشكلة زوايا اصلا، بس انا هقترح عليك اقتراح بسيط جدا، بعمله آخر لما بغلب مع بتوع الزوايا، هات متر وقيس المسافة بين الفردتين الأماميتين من امام الفردتين ومن خلفهما لو المسافة مظبوطة يبقى معندكش مشكلة زوايا، بس عموما العربية عاملة كام الف؟ ، لو عاملة فى حدود ال 50 ألف او اكتر اكشف على المقصات او قصر على نفسك وغيرهم، افضل الأنواع الموجودة فى السوق هو الألمانى ويوجد منه نوع اسمه مايلى ونوع اسمه كونترول، وفيه نوع اسمه اوكاب ايطالى مش بطال
6- الفتيس بقى يا سيدى هو اكبر فاتوحة انا شايفها فى اللى انت قلته دا كله، لو الوححححححححححححححححححح دى مقبولة ومش عالية ومش مميزة بشدة فدى طبيعة الشاهين ماتشغلش بالك بيها، لكن لو الوححححححححححححح دى عالية لدرجة انها مغطية على صوت الموتور مثلا يبقى دى بلية الدريك بايظة ولازم يتفك الفتيس كله علشان تغيرها، ونفس الحال بالنسبة للغيار اللى بينط، ده برميل غيار(ترس) متاكل ولازم تفك الفتيس علشان تغيره
7- حكاية الدوارة هتبان معاك صح لما تنضف الكاربراتير وتطلع مشوار طوالى بالعربية، بس عموما بالنسبة لشاهين 2004 بالذات فهى الكاربتير بتاعها مختلف عن باقى موديلات الشاهين من يوم ما نزلت ، لان فى السنة دى الشركة الأم كانت ابتدت تعملها برشاشات وهنا فى مصر كانوا لسة بيعملوها بكاربراتير، فنظرا لأن الشركة الأم مكانتش بتورد لها الكاربراتير الويبر الللى طول عمره بينزل فيها الموديل ده بالذات نزل بكاربراتير لادا وعيبه انه مافيهوش سخان اوتوماتيك فلازم تسايسها فى البرد، دور من غير ما تدوس بنزين واول ما تحس انها هتلقط معاك شعرلها بنزين، ومتدوسش جامد، بعد ما موسم البرد بيخلص بتدور عادى طول السنة
8- بالنسبة للشد او البيع ده قرارك، لكن الفكرة هتبيعها بكام وتجيب غبرها بكام، انا شخصيا لو لقيت مصاريف شدها على تمنها مستعملة تقرب معايا من تمن عربية فيرنا جديدة هفكر فى الغيار، لو المشوار بعيد هخليها واشدها، بس عموما بص على موضوع اسعار قطع غيار الشاهين المنشور فى منتدى الفيات وكون فكرة عامة عن ميزانيتك، بالإضافة طبعا الى مصاريف السمكرة والدهان وشد الصالون لو العملية محتاجة
المفضلات