أفكار ومقترحات وملاحظات للحد من الحوادث في مصر

[مصراوي جدا]

انا حبيت افتح موضوع جديد يخصص لكل اللي عنده فكرة او مقترح او ملاحظة تقلل من الحوادث اللي ملت الشوارع في مصر نتيجة التهور والسرعة واللامبالاه بتاعة معظم الناس للأسف

(احنا شفنا في موضوع هنا في المنتدى

http://www.nilemotors.net/Nile/showthread.php?t=16441

تحذير الحكومة الأمريكية للأمريكان من القيادة في مصر أو ركوب مواصلاتها)

انا هابدأ ببعض المقترحات للأخوة السائقين في شوارع المحروسة.


(1) أول حاجة هي عدم الركن على الشمال تحت أي ظرف من الظروف

يعني لو سايق ولقيت كاوتش العربية نام ولا ضرب ولا العربية بطلت ولا سخنت ولا أي موقف لازم بمنتهى السرعة والحرص تحاول تركن على اليمين مش تستسهل وتقف على الشمال لأنك سايق في الحارة الشمال . وتذكر الحارة الشمال مخصصة للسرعات العالية مش للوقوف


يعني فيه موضوع جديد (حادث الدائري )

http://www.nilemotors.net/Nile/showthread.php?t=16453

عن حادثة في الطريق الدائري وفيها اتوبيس وكام عربية مفرومين في بعض ولاحظت ان ده على الشمال والظاهر ان عربية كانت راكنة على الشمال لسبب ما وجاء الباقي مسرعين وخبطوا فيها واحد تلو الآخر واكيد بدون ما يلحقوا يدوسوا فرامل اساسا


للأسف بنلاقي احيانا وفي طرق سريعة واحد راكن علىالشمال علشان كاوتش نام منه والظاهر خاف على الكاوتش يمشي عليه شوية لما يروح لليمين ألا يتقطع الكاوتش فقال اركن على الشمال واغيره وهو كده مش واخد باله انه بيعرض حياته وحياة العشرات غيره لخطر الموت


(2) ثاني حاجه حوادث خبط المشاه
طبعا بيكون فيها عوامل مختلفة بس انا عايز اقول اننا لازم نستفيد من الثواني الغالية أوي اللي بيكون السائق شايف الماشي عايز يعدي الشارع ومش عارف هو هيعدي ولا لأ ، وكل واحد منهم مش عارف التاني ناوي يعمل ايه

اقتراحي هنا ان السائق يستخدم لغة الاشارة البسيطة لافهام الماشي من بعيد انه بيسمح له يعدي بسرعة او يشاور له انه يقف – اعتقد المشاورة دي مهمة جدا


(3) فيه طبعا حوادث بتحصل نتيجة ان راكب ينزل من الاتوبيس ويعدي من قدامه وييجي السائق بعربيته من على شمال الاتوبيس فيفاجأ بالماشي يظهر له فجأة من أمام الاتوبيس علشان كده انا عايز كل واحد يكون متوقع ظهور هذه المفاجأه ومستعد لها


(4) بشكل عام يا ريت كل واحد سايق عربيته في شوارع المحروسة يحط في اعتباره ان 90% من اللي بيسوقوا حواليه ممكن يفاجأوه بأخطاء في أي لحظة ولازم يكون مستعد لها يعني مثلا

(أ.) واحد على يمينك وامامه عربية وانت في الشمال وامامك مفتوح طبعا المفروض ان الافندي اللي على يمينك هينتظر لما انت تدخل ويقوم داخل وراك انما اللي بيحصل عندنا انه بيكون حريص جدا انه يسبقك وياخد غرزة قبلك – فلازم الأول تتوقع ده وبعد كده تشتمه متشتموش ده موضوعك بس المهم متحصلش حادثة

(ب.)أو قدامك اي وسيلة نقل عام (اتوبيس – ميكروباص – ميني باص – تاكسي ) يبقى لازم تتوقع انه في أي لحظة هيقف علشان فيه زبون نازل او طالع فلازم تستعد للتصرف الجميل ده منه

(ت.)كذلك اوعى تمشي ورا عربية نص نقل او ميكروباص وانت مش شايف الشارع قدامك لأن ممكن يكون ماشي بسرعة وانت معتقد الشارع مفتوح وفجأه البيه يفرمل علشان الشارع واقف وتخبط فيه


يعني مبدأيا دي الأفكار اللي عندي ويا ريت تتوالى الردود اللي فيها مزيدا من المقترحات على نفس المنوال علشان يكون الموضوع مفيد وفيه خبرات كل أساتذة قصدي بهلوانات السواقة في شوارع المحروسة

أولا شكرا لك على الموضوع الجميل والمهم فى نفس الوقت
ثانيا : ممكن أضيف حوادث الطرق السريعه...وهى الاخطر على الاطلاق
من المهم ان نلتزم بالسرعة المحددة على الطرق
إحترام الشبوره ........لان حوادثها رهيبة ولا تقل الحادثه الناتجه عنها عن اربع سيارات
احترام السيارات النقل والترلا...وعدم تخطيها إلا بإذن
احترام الطرق السريعه الفرديه...حوادثها وجها لوجه
وربنا يحفظنا جميعا

[OlaOsman]

مبادرة جميلة اوي منك بجد :)

انا معنديش حاجة أضيفها عشان ماليش خبرة في السواقة، انما داخلة أحيي الفكرة جددددددددا.. لازم يا جماعة نبدأ بنفسنا.. نبدأ من هنا.. احنا مش شوية كأعضاء و المنتدى ما شاء الله عليه إقبال كبير من المهتمين بالسيارات.. فلو كل واحد بدأ بنفسه و يصلح من سلوكياته في الطريق تدريجيا حالنا هاينصلح ان شاء الله :)

[aif]

موضوع هايل
عاوز انبه علي القيادة ليلا .. احيانا في ناس بتمشي ليلا بدون اضاءة الانوار دي كارثة لازم يعرفو ان الانوار مش بس علشان يشوفو لكن برضه علشان الآخرين يشوفوه وانا شفت حوادث بسبب هذا التصرف
في العديد من الدول المتقدمة لازم السيارات تضيء الانوار حتي بالنهار واللي مش بيضيء الانوار بالنهار او بالليل بياخد مخالفة

[مصراوي جدا]

شكرا لكم جميعا وفي انتظار المزيد من المشاركات والأفكار

احب اشكرك على الموضوع الهايل ده
انا احب اضيف نقاط فليلة لأني خبرتي مش كبيرة
اولاً التسامح في القيادة اصبح قليل جداً لأن كل واحد بيسوق فاكر ان اللي بيسوق جنبه ده شوماخر ومش من المفترض انه يغلط ولو غصب عنه فبالتالي تلاقي واحد راح مزنق عليك وممكن يلبسك في الرصيف علشان انت غلط غلطة ممكن متكونش مقصودة او يحس انك سواق جديد فيتعمد مضايقتك علشان يضحك عليك.
انا مرة شوفت شاب لسة جديد في السواقة جالو واحد سايق ترلة من وراه مجرد بس انه حس انه لسة جديد قام مديلوه سرينة من بتوع الترلات اجارك الله. الواد كان هايطير بالعربية.

ثانياً

: اتمنى من المدخنين عدم القاء اعقاب السجائر من شباك السيارة. الله اعلم ممكن تعمل ايه في اللي جاي وراك

ثالثاً : التعاون مع الغير اثناء القيادة خاصة اثناء الخطر لأنك انت ممكن تشوف الخطر اللي هاتتعرضله سيارة اخرى قبل ما صاحبها يشوفه فممكن توسعلو طريق علشان يتفادى الخطر او تحاول تنبيهه للخطر ولو ان ده هاتكون صعبة شوية

اخر نقطة : ان لو انت معاك ولادك في العربية حاول تزرع فيهم اداب القيادة واحترام المرور وتكون ليهم قدوة وماتسمحلوهمشي يرمو حاجة من الشباك حتى تطبق المثل (التعليم في الصغر كالنقش على الحجر

)

بردو المفروض زي ما بيعملو اعلانات كتير على الضرائب واعلانات على قطار الوظائف المفروض يعملوا اعلانات توعية للمرور واداب القيادة على القنوات الفضائية ذات المشاهدة العالية

[مصراوي جدا]

أحد أسباب كتير من الحوادث في مصر : الاطارات

ده موضوع جميل جدا عنها - شكرا يا استاذ magomago على الموضوع


اهمية ضبط ضغط الاطارات....

http://www.nilemotors.net/Nile/showthread.php?t=15833

1. ابتعد تماما عن العناد .. فالعناد في القيادة يسفر عن حوادث مريعة .. حاول دائماً ضبط أعصابك قدر الإمكان .
2. توقع الخطأ دائماً ..
3. حافظ على مسافة مهمة بينك وبين من أمامك حتى عند التوقف ، حتى تحتفظ لنفسك بمجال للمناورة لو كبست عليك سيارة من الخلف .
4. قم بدور القائد لمن خلفك وحذرهم دائماً عبر استخدام إشاراتك الضوئية الخلفية ، يعني تدوس فرامل مرتين على الخفيف قبل ما تحتاج لها بالفعل حتى تشعر من خلفك إنك هتتوقف .
5. إشارات الانتظار الخلفية مهمة جداً مع التوقف سبه المفاجئ على الكباري والطرق السريعة ، لا تنساها ابداً ، واطفئها بعد وقوف سيارتين على الأقل خلفك حتى لا تضايقهم .
6. أهم حاجة .. الغرزة أحياناً تكون ضرورية جداً لتفادي موقف مفاجئ وللغرز قواعد يتجاهلها الكثيرون : أهم قاعدتين هما :

• لا تأخذ الغرزة أبداً من اليمين فالغرزة تؤخذ من الشمال دائماً .
• لا تأخذ الغرزة إلا بعد الالتصاق تقريباً بالسيارة التي أمامك حتى توسع الفارق بينك وبين من خلفك مع إشارة بالاتجاه يساراً حتى يفهم ذلك دون أن يكبس عليك أو تتسبب في إفزاعه أو تعريض سياراتيكما للخطر

[sherif80]

موضوع ممتاز بصراحة
الف شكر