خواطر..فى كسر الزيرو

[SEATLOVER]

خواطر......فى كسر الزيرو

بسم الله الرحمن الرحيم
السلام عليكم ورحمة الله و بركاتة

النهاردة الجمعة ....
وفى منا اللى نازل يشترى عربية ...زيرو ...او ..مستعملة
طبعاً الزيرو لة مذاقة الخاص ... و المستعمل ايضاً لة مميزاتة الخاصة و خصوصاً فى اهمية السعر ..و جودة الموديل .. ولكن
خاص بنايل موتورز فقط

يا ترى فى اختيار تانى ؟
كلنا نعرف ان العربيات فيها نوعين فقط المستعملة و الزيرو ...ولكن هناك نوعاً آخر قد يكون غير معروف للجميع ولكنة لايقل اهمية فى مدى تأثيرة و قوة ترشيحة لنوعية معينة من مشترى العربيات الا و هو (كسر الزيرو )
يعنى اية عربية كسر زيرو ؟
ببساطة هى اى عربية تم شراءها من مدة بسيطة وقطعت عدد كيلومترات قليلة .... وصاحبها عايز يبيعها
طب يا ترى فى انواع من كسر الزيرو ... اعرفها ازاى ؟
كما يتم تقسيم نوع الضمان للعربيات الزيرو على حسب
1- مدة الضمان للعربية (سنة –اتنين –تلاتة -..)
2- عدد الكيلومترات المقطوعة ( 100 الف -200 الف -300 الف ..كم )

نقدر بنفس الطريقة نقسم العربيات كسر الزيرو
اقسام كسر الزيرو و تصنيفة لفئات
1- على حسب المدة الزمنية :
أ- شبة الزيرو : هى كل عربية لم يمضى على استلامها اكثر من 6 شهور
ب- قطعت عداد : هى كل سيارة مضى على استلامها اكثر من 6 شهور
ج- اول المستعمل : هى كل عربية لم يتعدى على استلامها اكثر من سنة و بعض شهور
2- على حسب عدد الكيلومترات المقطوعة :
أ- شبة الزيرو : عدد الكيلومترات اقل من 10.000 كم
ب-قطعت عداد : عدد الكيلومترات من 10.000 كم الى 20.000 كم
ج- اول المستعمل : عدد الكيلومترات اكثر من 20.000 كم
خاص بنايل موتورز فقط
كل هذة التقسيمات تندرج تحتها السيارة كسرالزيرو
ولكن انت كامشترى تقدر تصنف السيارة المعروضة عليك و ذلك بأدراجها تحت البند الاقل التى تنتمى الية
مثال : عربية تم استلامها زيرو من 5 شهور و قطعت 15 الف كم
تعتبر هذة السيارة من العربيات التى (قطعت عداد ) وليس (شبة الزيرو ) ... دة هايفرق معاك فى تحديد السعر
و مقارنتها بالعربيات كسر الزيرو الاخرى المعروضة عليك .
ازاى السوق بيحدد سعر كسر الزيرو لعربية ؟
الحقيقة فى عوامل بتحدد مدى هبوط السعر من سعر السيارة الزيرو الى السعر المتعارف علية بأسم سعر كسر الزيرو
فى السوق احياناً بتكون قريبة من سعر السيارة الزيرو ..واحياناً اخرى بيكون هناك فرق كبير جداً بين السعرين و بيكون معدل الهبوط فى السعر عند اعادة البيع للعربية كبير جداً .
وإذا كنت ترغب فى شراء احدى العربيات الكسر زيرو فعليك معرفة هذة العوامل جيداً حتى تعرف ان هذة السيارة
هى مناسبة ليك و هاتحققلك اللى انت عايزة منها و تبقى صفقة ناجحة ليك كامشترى كسر زيرو
خاص بنايل موتورز فقط
الحقيقة فى مجموعة عوامل هى الى بتحدد سعر السيارة الكسر الزيرو فى السوق وهى :
1-احتياج السيارة لنوع خاص من الصيانة الدورية
فى بعض العربيات و خصوصاً بعض الموديلات بتحتاج صيانة دورية و متابعة باستمرار و بالتالى إذا العربية لم تلقى هذة العناية .... بيكون دة سبب فى اهيار سعرها و بتحديد سعر كسر الزيرو لها
- إذا كنت ترغب فى شراء سيارة كسر زيرو ... تحتاج لصيانة دورية ... فعليك ان تلتزم بها او على الاقل تجد حلول اسهل لعمل الصيانة الدورية و تلتزم بمواعيدها و عناية ميكانيكا و كهرباء السيارة .
2- ظهور احدى المشكلات الظاهرة او العيوب الواضحة فى موديل معين و تعدد الشكوى منة من أكثر من مستخدم
العامل دة من اكثر العوامل المسببة فى انهيار سعر العربية عند اعادة البيع و بيشكل فرق كبير جداً بين سعرها الزيرو و سعر كسر الزيرو لها مهما كان هذا العيب او تلك المشكلة مؤثرة او سهلة التعامل و الحل او لا
خاص بنايل موتورز فقط
- إذا كنت ترغب فى شراء سيارة كسر زيرو .... مشهورة بعيب او مشكلة معينة ... فعليك ان تعرف كيفية حل هذا العيب و التغلب على هذة المشكلة سواء كان بتحمل هذا العيب لآنة لا يفرق معك فى احتياجاتك او تتغاضى عنة امام العديد من مزايا العربية و سعرها اللى جبتها بية .. او بعمل تعديل فى العربية بيحل هذة المشكلة و تكون عارف سكة هذا الحل كويس جداً .
3- ارتفاع سعر قطع الغيار لهذة العربية و خصوصاً إذا كان بيقابلة عمر افتراضى قصير او غير معروف مدتة
عدم مناسبة سعر قطع الغيار و ارتفاعة بمثيلات العربية و خصوصاً إذا كان غير معروف مدى تحمل قطعة الغيار و عمرها الافتراضى المتوسط ... سبب مؤثر جداً فى هبوط سعر العربية الزيرو عند اعادة البيع
- إذا كنت ترغب فى شراء سيارة كسر زيرو .... ذات قطع غيار مرتفعة الثمن ... فعليك ان تجد حلول لهذا العامل
منها اما انك تقدر على تكاليف ومصاريف قطع الغيار اللازمة و توقع مدى تحملها و دراسة عمرها الافتراضى أو انك عندك حلول اخرى فى معرفة سكك لقطع غيار استيراد أو نفس النوع ببلد تصنيع اخر ذات اسعار اقل او انك تعرف اماكن متوفر بها نفس قطع غيار العربية وذات اسعار اقل من الاسعار المعروفة لدى الشركة .
خاص بنايل موتورز فقط
4- عدم قدرة التوكيل على احتواء سيارتة
ظهور شكوى عامة من التوكيل سواء بعدم توافر قطع الغيار او عدم جودة الخدمة او عدم قدرتة على حل مشاكل عربيتة مع الناس ..من الممكن ان ينحدر بسعر السيارة فى سوق كسر الزيرو لآرقام كبيرة جداً .
- إذا كنت ترغب فى شراء سيارة كسر زيرو .... ذات سمعة توكيل رديئة ... فعليك ان تتدرس هذا العامل جيداً سواء بالتحقق من السمعة المعروفة عن التوكيل من احد المتردديين علية باستمرار .. وبالتالى يكون لك القرار بأنك سوف تتعامل معة لآنك تعرف الحقيقة ..او .. عليك إيجاد حلول بديلة من اماكن صيانة تكون عارف مسبقأ موجودة فين و تكاليفها قد اية ..و مدى جودة هذة الاماكن و قدرتها على التعامل مع هذة العربية .
خاص بنايل موتورز فقط
5- ضعف الانتشار وقلة عدد العربيات الموجودة فى الشارع من هذا الموديل
عربية مش منتشرة = سعر اعادة بيع ضعيف جداً
قلة انتشار العربية مهما كانت قوتها او جودتها بيضعف كتير جداً من سعر اعادة بيعا و خصوصاً فى المرحلة الاولى من سنوات عمرها و بيرتفع السعر تدريجياً بعد ذلك ليعود إلى اعلى معدلاتة بعد فترة من 3 إلى 5 سنين و ذلك لآن العربية بتكون اثبتت نفسها فى السوق جيداً و بيصبح سعر اعادة بيعها فى التوقيت دة منافس لكتير اوى من العربيات الاقل منها فى الفئة و السعر حتى لو جديدة .
- إذا كنت ترغب فى شراء سيارة كسر زيرو .... غير منتشرة ... فعليك ان تتدرس هذا العامل جيداً
ماهو السبب وراء عدم الانتشار ... هل هو لآن العربية لسة جديدة و المستقبل بيقول انها لسة هاتنتشر اكتر
هل لوجود احد العوامل السابقة ... و لو وصلت للسبب
يجب ان تعرف مدى استمراريتك المتوقعة بهذة السيارة ..يجب ان تكون مدة طويلة لا تقل عن ثلاث سنوات حتى لا تضطر للبيع و تقابل سعر اعادة بيع اقل بكثير مما دفعت عند شراءها و هى كسر زيرو .
وقبل ذلك كلة عليك ان تتعايش بأن هذة السيارة هى غير منتشرة ..و لكنك تعرف لماذا ..وما هو السبب
حينها فقط تشعر بأنك مميز فى عدم انتشار العربية ...ولست وحيداً بعدم انتشارها .
خاص بنايل موتورز فقط
6- تغير سياسة الشركة المنتجة فى فترات قصيرة
كل سنة بموديل ..كل سنة بشكل .. كل سنة بموتور مختلف ..... يبقى موديلات الشركة دى فريسة سهلة جداً فى سوق كسر الزيرو .. ودة سببة عدم مصداقية الناس فى ان الموديل الحالى سوف يكون قديم السنة اللى جاية و كل حاجة فية هاتتغير ... يبقى لية اجيبة دلوقتى .
- إذا كنت ترغب فى شراء سيارة كسر زيرو .... من شركة معروف عنها تغيير موديلاتها بسرعة ... فعليك ان تتدرس هذا العامل جيداً و تحاول ان تصل الى اى معلومة خفية تنبىء بظهور متوقع لشكل جديد من الموديل اللى انت عايز تجيبة ... لآن لو ظبطت معاك و الموديل ماتغيرش يبقى انت كسبت سنة اضافية فى عمر الموديل تفرق اوى فى سعر اعادة بيعك .
خاص بنايل موتورز فقط
7- توقيت نزول موديل العربية
إذا تصادف توقيت نزول موديل معين ..مع موديلات اخرى منافسة جديدة لشركات اخرى ..فدة يعنى بالتأكيد هبوط حاد فى سعر كسر الزيرو لهذا الموديل ..لوجود العديد من الاختيارات الاخرى التى قد تكون افضل او اسواء و لكن التوقيت لة دور كبير فى تحديد السوق لسعر كسر الزيرو لهذة السيارة من هذا الموديل .
- إذا كنت ترغب فى شراء سيارة كسر زيرو....... توقيت نزول الموديل اللى انت عايزة .... دور مهم جداً فى تحديد سعر كسر الزيرو اللى هاتشترى بية
بمعنى حدد الموديل .. اعرف مين من العربيات بنفس الفئة ممكن ينزل بعدية بكام شهر ... استنى توقيت نزول الموديلات دى للسوق ..(هو دة افضل توقيت تشترى فية الموديل دة كسر زيرو ... بسعر رائع ليك )
خاص بنايل موتورز فقط
8- عدم مناسبة السيارة للظروف المحلية
تأثر العربية من العوامل الطبيعية المحلية فى البلد ..و التى قد تكون غير طبيعية بالمرة فى فكر مصميميها
مثل ( مطبات – حرارة الجو –نمط الاستعمال واهمال الصيانة –عدم وجود الخبرات الكافية للتعامل مع اعطال العربية -...)
بأختصار بتبقى عربية ممكن تكون ناجحة جداً فى بلدها و معظم العالم ..لكنها فاشلة جداً فى البلد هنا
- إذا كنت ترغب فى شراء سيارة كسر زيرو .... معروف عنها عدم مناسبتها للظروف المحلية ... فعليك ان
تتأكد من هذة المقولة على هذا الموديل تأكد تام ... وإذا ثبت لديك انها فعلاً مش بتستحمل ظروف البلد هنا فعليك ان
تبتعد انت ايضاً عن ذلك الموديل ..لآن بأختصار مش هاتقدر انك تغير الظروف المحيطة دى .
خاص بنايل موتورز فقط
دى كانت العوامل و الظروف الى بتحدد
مدى هبوط سعر اعادة البيع للعربية و خصوصاً فى اول فترة ليها و هو سعر كسر الزيرو لها
..............................................
بعد ما عرفنا العوامل اللى بتأثر فى مدى هبوط السعر بالنسبة للعربية الزيرو لما تيجى تتباع كسر زيرو
بيفضل لكل فئة من العربيات ملامح خاصة و ظروف معينة لهذة الفئة عن بقية الفئات الاخرى فى منطقة كسر الزيرو
طب ازاى ...هانشوف..
نمسك كل فئة من فئات السيارت على حسب سعر الزيرو بتاعها و الموديلات المتوفرة فى هذة الفئة السعرية و نشوف سمات كسر الزيرو اخبارها اية فى الفئة دى .
خاص بنايل موتورز فقط
تحليل كسر الزيرو على حسب الفئة السعرية للزيرو
1- فئة سيارات تحت ال 50 الف ج
هذة الفئة ليست جيدة فى منطقة كسر الزيرو ...وذلك لضعف معدل الهبوط فى السعر عن الزيرو لها ..ويكون الفرق فى السعر قليل جداً ولا يستحق الاهتمام و المخاطرة
حيث لا يزيد الفرق فى السعر عن 5 الف ج بحد اقصى لمختلف تقسيمات كسر الزيرو المذكورة سابقاً
ويمكن معرفة سعر كسر الزيرو لهذة الفئة تقريباً من هذة المعادلة
سعر كسر الزيرو = سعر الزيرو-(عدد الشهور بعد الاستلام * 300 ج)-1.000 ج لكل 20 الف كم
2- فئة سيارات من ال 50 الف ج إلى 70 الف ج
هنا بداية الكلام عن كسر الزيرو الحقيقى و مدى اهميتة و جودة ترشيحة فى الاختيار حيث يوجد فرق ملحوظ وواضح بين سعر الزيرو و سعر كسر الزيرو مما يجعل هناك اهمية للتفكير و مدى جدوى و احقية شراء سيارة كسر زيرو من هذة الفئة لن بيكون معدل الهبوط فى السعر من 8 الف ج الى 12 الف ج
ويمكن معرفة سعر كسر الزيرو لهذة الفئة تقريباً من هذة المعادلة
سعر كسر الزيرو = سعر الزيرو-(عدد الشهور بعد الاستلام * 650 ج)-1.250 ج لكل 20 الف كم
خاص بنايل موتورز فقط
3- فئة سيارات من ال 70 الف ج إلى 100 الف ج
تحتوى هذة الفئة على اكثر التغيرات و الاحتمالات فى هبوط السعر و يعتمد تحديد السعر فى هذة الفئة على كل موديل و صفاتة الخاصة بية و التى تحدد من هبوط سعرة فى كسر الزيرو ولها اعتمادية كبيرة على كل عربية على حدى حيث تختلف كل سيارة عن الاخرى اختلافات كبيرة جداً فى سعر كسر الزيرو لها وذلك على حسب العوامل المشروحة سابقاً فى اسباب هبوط السعر .. وتبداء فى هذة الفئة بداية ظهور ظاهرة (فخ كسر الزيرو ) التى سوف يتم شرحها لاحقاً .
ويتراوح معدل الهبوط فى هذة الفئة بمتوسط من 12 الف ج إلى 18 الف ج وقد يصل فى بعض الاحيان الى 20 الف ج
ويمكن معرفة سعر كسر الزيرو لهذة الفئة تقريباً من هذة المعادلة
سعر كسر الزيرو = سعر الزيرو-(عدد الشهور بعد الاستلام * 1.400 ج)-1.500 ج لكل 20 الف كم
خاص بنايل موتورز فقط
4- فئة سيارات من ال 100 الف ج إلى 150 الف ج
هذة الفئة هى من اكثر الفئات فى الهبوط فى السعر فى سعر كسر الزيرو ..وتعتبر من اكثر الفئات المليئة بالترشيحات الممتازة فى فئة كسر الزيرو حيث ترتفع الجودة الى معدلات معقولة جداً مع إمكانية آخذها بمبلغ منافس مع سعرها الاصلى و هى زيرو . ولكن للآسف تنتشر فى هذة الفئة ظاهرة (فخ الزيرو ) بمعدل كبير جداً و انتشار كبير
ويتراوح معدل الهبوط فى هذة الفئة بمتوسط من 20 الف ج إلى 30 الف ج وقد يصل فى بعض الاحيان الى 35 الف ج
ويمكن معرفة سعر كسر الزيرو لهذة الفئة تقريباً من هذة المعادلة
سعر كسر الزيرو = سعر الزيرو-(عدد الشهور بعد الاستلام * 2.250 ج)-2.000 ج لكل 20 الف كم
خاص بنايل موتورز فقط

ملاحظات هامة
* هذة المعادلات تعطى فكرة تقريبية قط عن متوسط سعر كسر الزيرو لكل فئة
* هذة المعادلات تصلح للسيارات التى لم يمضى على استلامها اكثر من سنة و ثلاث فقط شهور بحد اقصى
* تختلف هذة المعادلات باختلاف كل موديل لة ظروف خاصة فى حالة البيع لة

ما يعرف بظاهرة فخ الزيرو
فخ يعنى مطب ...يعنى مصيدة ...يعنى اضحك عليك من الاخر
برضو يعنى اية فخ الزيرو
يعنى بعد دراستك للآسباب المؤدية لهبوط سعر كسر الزيرو ..و معرفتك لسبب هبوط سعر العربية اللى انت عايزها فى كسر الزيرو و تأكدك من تغليك على هذة الاسباب ذى ماشرحنا و بعدين حددت الموديل اللى انت عايزة
وجبت الموديل دة بسعر كسر زيرو هايل و فية فرق كبير وحلو جداً عن الزيرو بتاع الموديل دة
فجأة عرفت انك دفعت فلوسك فى عربية ماتستهلش اللى دفعتة فيها ..يعنى دفعت فلوس فى عربية تانية غير اللى انت جبتها يعنى فى (غش –عيب-مشكلة –حادثة -....حاجة تفرق فى السعر كتير جداً لو كنت عرفتها قبل كدة من الاول )
خاص بنايل موتورز فقط
طب لية الظاهرة دى موجودة فى كسر الزيرو اكتر من اى فئة شراء تانية ؟
الحقيقة عشان نعرف سبب انتشار هذة الظاهرة فى كسر الزيرو لازم نعرف شوية حقائق الا وهى
1- فرق السعر الكبير بين الزيرو و كسر الزيرو ..عنصر بيلعب علية البائع و بيستغل انجذاب المشترى للسعر و خصوصاً فى الفئات العالية فى سعر الزيرو لآن بيكون فرق السعر كبير ذى ماقلنا
2- سهولة انخداع البائع بحالة العربية ..وهو معذور ..لن تقريباً العربية بتبقى زيرو ..وصعب جداً يعرف فين العيب او المشكلة فى العربية اللى قدامة .
3- ظهور نمط جديد من الاستخدام ..وهو استعمال العربية ذى ورق الكلينكس (عربية كلينكس) يعنى استخدام ناسف للعربية فى وقت قياسى
(سفرية شرم على 200 فى اول شهرين من الزيرو – فرحان بالعربية قلبها مرتين على الصحراوى – ركب دى جى افراح فى اول اسبوع من استلامها ..بوظ كهربا العربية كلها – اخد مطبات البلد كلها على 100 اول يوم ..عشان بيجربها -.....وغيرة و غيرة )
خاص بنايل موتورز فقط
المخاطر التى ممكن ان تتعرض لها فى (فخ كسر الزيرو)
1- لعب العداد
العربية ممكن تكون عملت اكتر من 100 الف كم فى شهر او اتنين ..واتلعب فى العداد بتاعها حتى يتم البيع على انها كسر زيرو لم تقطع سوى 8 او 15 الف كم ... ودى موجودة و بتتعمل مهما كان نوع العربية و صعوبة اللعب فى العداد نظراً لوجود تطور كبير كما هو فى تكنولوجى انتاج العربية و تأمينها ..كما حدث تطور رهيب فى ضرب تأمين اى عربية مهما كانت صعوبة ذلك .

2- وجود عيب صناعة
وجود احدى عيوب الصناعة سواء كان فى التقفيل او الموتور او الفتيس او الكهربا او كمبيونر العربية ...او اى من عناصر و مكونات العربية و عدم وصول المشترى الاول لحل فيها او التغلب على هذة المشكلة بالرغم من وجودة فى الضمان تجعل من محاولتة التخلص من العربية.... هى محاولة لوقوعك انت فيها .
خاص بنايل موتورز فقط
3- خدعة الموديل
كل الكلام كان على موديل 2008 (الاعلان-العرض-الكلام-الاتفاق -.....) وبيؤيد الكلام دة كلة ان الشكل لم يتغير و الكماليات واحدة ولا يوجد اى فروق جوهرية بين موديلات هذة العربية خلال السنوات القليلة الماضية .........
بس للآسف عند التخليص و بعد انتهاء الاجراءات ....تفاجىء بأن العربية هى موديل 2007 وليست موديل 2008 ودة كان نتيجة ان العربية موديل 2007 والمشترى استلم و رخص فى 2008 .
خاص بنايل موتورز فقط
4- العربية عاملة حادثة مروعة أو مقلوبة
لو العربية عملت حادثة جامدة او اتقلبت ..خلال الفترة الاولى بعد الاستلام ..بيبقى هناك اكبر و اكثر فخ كسر زيرو فى انتظارك
بيساعد على كدة الاتى :
حالة العربية العامة الاجمالية = 100 %
حالة العربية فى جزء معين (شاسية –جنب-شنطة-سدر امامى –زاوية-....) = 0 %
و بالتالى صعب جداً معرفة الفخ دة و كشفة دة لآن حالة العربية العامة بتصرف النظر تماماً عن وجود فروق بسيطة جداً فى جزء معين تم لموة و تظبيطة بغرض البيع .

5- موتور مفوت
حالة موتور تعبانة جداً و الموتور فقد اكثر من 40% من قوتة
نتيجة ان بعد استلام العربية من اول يد حصل فيها الاتى :
أ.- عدم الالتزام بفترة التليين
ب- يحرق و قرص و شد بالعربية خلال الفترة الاولى من الاستخدام
ج.- استعمال شركات او مكاتب تأجير
د.- عمل تعديل خاطىء للعربية
خاص بنايل موتورز فقط
6- ورق العربية مش مظبوط
أ- عربية جاية قسط و عليها حظر بيع
ب- كتاب الضمان مش بتاع العربية
ج- العربية خرجت من الضمان اصلاً (لعب فى العداد-تركيب حاجة برة التوكيل -....)
د- العربية جاية استيراد ... وملهاش ضمان مع التوكيل المصرى
ه- متباعة توكيلات و صاحب العربية الاصلى قاصر
و- اوراق التأمين مضروبة ..والتأمين مش مدفوع
ى- متأجرة لشركة وعليها عقد ايجار
7- موديل سوف يكون قديم شكلاً و مضموناً بعد كام شهر
الموديل المعروض فى كسر الزيرو لة موديل اخر قادم خلال شهور قليلة و بالتالى سوف يصبح الموديل الحالى فى طى الكتمان و خسارة سعرة سوف تصبح الضعف العام القادم ... البائع يعرف ..انت ماتعرفش
خاص بنايل موتورز فقط
.................................................. ...............................
ملحوظة هامة فى كسر الزيرو
- ليس بالضرورة كل عربية هبط سعرها بوجود فرق كبير بينها و بين الزيرو لها هى عربية ليست جيدة و لكن دة حصل لآحد الاسباب اللى قولنا عليها و اللى ممكن جداً تكون انت تقدر تتغلب عليها او تكون غير مؤثرة ليك و دى ميزة العربية كسر الزيرو فى الاختيار .

- ليس بالضرورة كل عربية كسر زيرو هى اختيار امثل ليك لو ماخدتش بالك من وجود احد العوامل المؤثرة فى السعر.. هى احد العوامل التى سوف تأثر عليك انت كمان أو تكون فريسة للوقوع فى فخ كسر الزيرو ويبقى ساعنها شراء اى عربية مستعملة اخرى او ..حتى الزيرو لها هو الافضل بالنسبة ليك .
.................................................. ..

دة كان بالتفصيل نوع من العربيات موجود امامنا فى الاختيارات وهو (كسر الزيرو)
عربية شبة جديدة تعتبر زيرو ...بتاخدها بفرق سعر عن الجديدة يستحق الدراسة و لكنها يحوطها الكثير من المغامرة و المخاطر و ممكن تكون فريسة للوقوع فى (فخ كسر الزيرو )
خاص بنايل موتورز فقط

وبكدة نكون عرفنا سوى يعنى اية كسر زيرو وانواعة و العوامل اللى بتحدد مدى الهبوط فى معدل سعرة و بيكون فى حدود كام تقريباً لكل فئة سعرية و كمان اية المخاطر فية ....
و اللى سميناها (فخ كسر الزيرو )
فا إذا عرفت الحاجات دى كلها وبدأت تفكر فى ان كسر الزيرو هو نوع من العربيات قد يكون مناسب لآحتياجاتك و ميزانيتك .. أو كنت ناوى على عربية كسر زيرو ولسة مصمم على النوع دة من العربيات بالرغم من احتمال وجود كل هذة المخاطر و الفخ الذى ممكن يكون منصوب ليك
كدة يبقى انت عايز تعرف (( ازاى تشترى عربية كسر زيرو ))
خاص بنايل موتورز فقط
ودة إن شاء الله اللى هانتكلم عنة المرة الجاية .. إن شاء الله .

سعدت بكم و ارجو ان اكون قد افدتكم .
والسلام عليكم ورحمة الله .


تم تثبيت الموضوع
مشرف عام 1

[محمد ابراهيم 1]

الله ينور عليك
مجهود كبير و عظيم
لك جزيل الشكر عليه

[kamalantivirus]

انجزت فاوجزت

[OlaOsman]

مررررررررررررجع.. الموضوع مرجع هام جدددددددددا و يستحق التثبيت.

ايوه كده يا سيات.. كنت مخبي كل ده فين؟

[Walidghali]

ممتاااااااااااااااااااااا ااااااااااز جدا جدا
على فكرة انا مريت بخبرة شراء كسر الزيرو دي قبل كدة واكتشفت انها مش فعالة لاسيما في الاسعار العجيبة القريبة من سعر الزيرو
شكرا على المجهود الطيب
على فكرة انا طبقت أحد المعادلات على حالتي ولقيت الفرق في السعر 15 الف جنيه يعني كان هيتنصب عليا

[محمد عبد العزيز]

تسلم ايدك كلام مهم جدا جدا
الله ينور عليك

[معاذ الشرباصى]

عمرو باشا

الف شكر على الموضوع الجامد جدا ده

ربنا يجعله فى ميزان حسناتك, و يبارك لك

[masryxt]

جزاك الله خيرا

وفي انتظار البقية