استطلاع : كيفية معالجة تقل ونشفية الفليشيا والصوت العالي

[madvoodoo]

السلام عليكم اخواني في الله
انا كنت عايز اقترح ان احنا نتكلم في الموضوع ده لعل وعسي انه يفدنا عن طريق تجربة كل واحد فينا واننا نقدر في النهاية نوصل لاحسن اداء للعربية
انا عن نفسي صوت العربية كان عالى روحت للمكانيكي بيتاعى ظبطلي التيكيهات وبصراحة الصوت وطي عن الاول خالص.
مستني ارئكم وجزاكم الله كل خير

[MOHAMED ABD EL SHAFY]

السلام عليكم
اولا احب اوضح حاجة مهمة لو انت راكب بى ام او مرسيدس ومش مظبط موتورها وعفشتها هتبقى وكانك راكب فيات والعكس صحيح اكيد دا مبدا الناس كلها متفقة عليه
ثانيا انا عمال اسمع الناس تقول الدريكسيون بتاع الفليشيا ناشف وصوت الموتور عالى ومحسسينى انى مش راكب فليشيا وحاسس ان ممكن تكون عربيتى شاذه فى الموضوع دا ولكن مع كثرة الركوب والتجربة خلصت للاتى:
بالنسبة للدريكسيون اولا : 1- لازم تكون عفشة العربية مظبوطة ومفيهاش مشكلة
2- الاطارات لازم تكون بالمقاس الصحيح بتاع العربية يعنى مش تركب اطار اعرض وتشتكى ان الدريكسيو تقيل
3 ودا بقى من تجربة عمليه فعلية لو الاطارات مش مظبوط الهوا بتاعها هتلاقيها متقلة الدريكسيون انا مرة عرفت ان الاطارات عاوزة تتزود لما لقيت الدريكسيون تقل
4- الدريكسون كش تقيل لو اللى فات كان معمول صح وانا فى معظم الاوقات بسوق بايد واحدة بس طبعا هوا مش ميه زى العربيات اللى فيها باور يعنى مش وحش ومش ممتاز بس عادى وعمرى ماشتكيت منالموضوع دا

بالنسبة لصوت الموتور فدا اما تكون العربية كهربتها مش مظبوطة (بوجيهات اسبراتير وخلافة) او تكون عاوزة تغيير سير الكاتينة الجنزير لو كان مهوى ودا تمنه 120 جنية الاصلى بالتروس ويتكلف 100 جنية تركيب فى 3 ساعات تقريبا وتاكد بالمرة من رمان بلى العجل والدينامو عشان سعات يختلط الحابل بالنابل
بعد اللى فات تاكد من زيت الموتور كويس والبنزين 90 مش 80 ساعتها معلش محدش يقول صوته عالى
بالعكس صوتة معقول ومناسب وياخد ويدى معاك على فكرة صوت موتور الفليشيا (المظبوط)اقل من صوت الفيرنا وعن تجربة ومقارب شوية لصوت الانوس بس الانوس انعم شوية

[madvoodoo]

اخيرا لقيت حد يرد عليه
بجد شكرا ليك على ردك المفيد جدا وعلى فكرة انا كانت العربية عندي ابتدت تخرف شوية بطنط وتفط المهم سمعت كلام استاذ امير معانا هنا في المنتدي ورحت للميكانيكي بتاعه على الزفتاوي عند الوفاء والامل
هو صنيعي سكودا فقط متخرج من توكيل سكودا بعد 10 سنين
غيري البوجيهات ب njk 16 ب 45 جنيه وسير الدينامو ب 10 جنيه و طقم سلوك البوجيهات ب 80 جنيه وظبطلي التكيهات 100/100 وغيرلي الثرموستات العربية بقت حاجه تانية بصراحة بس هو حراق شوية اخد مني 50 جنيه بالعافية بس احسن حاجه انه هو اللى بيشتغل بنفسة و كمان بيخليك انت اللى تشتري الحاجة هو اقنعني اني اخلي العربية معايا وقلي متبعاش بس وتبخلش عليها المهم هو كان بيقولي ان العافشة عيزة تتظبط عندي ومحتاج جوان وش السلندر يتغير بس بصراحة هو قلي انه مش لازم دلوقتي علشان ديه تكاليف المهم هو كان بيقولي ان المسعدين وره عايزين يتظبطوا والبيض والجلب قدام المهم انا مش عارف الموضوع ده يتكلف كام بس اكيد نفسي اعملة علشان انا بحب اكون مطمن وانا بالعربية وعلشان كمان انا بسافر بيها كتير
مستني نصيحك الجميلة وبجد شكرا لردك

[MOHAMED ABD EL SHAFY]

تعتبر عفشة الاسكودا من امتن العفشات واطولها عمرا بالمقارنة بعفشة الفيات والهونداى وغيرها طبعا فى مقابل غلو تمنها شوية على العموم تظبيط العفشة ممكن يكون كامل او نصف تظبيط بمعنى اخر حسب فلوسك
لو المساعدين مش ضايعة يعنى ممكن تمشى الحال شوية
فمثلا لو الجوز الخلفى خفيف شوية وانت مش بتركب او نتحمل اوزان خلفية فممكن تستنى عليهم شوية
لكن الجوز الامامى اهم لانه لو ضايع خالص ممكن يؤثر على الكارتيرة ودا غلط
لو انت فى المطبات الصغيرة والبسيطة والمدقات فى الشوارع الغير مرصوفة بتحس بخبط جامد فى الصاج وبتحس بالظلط والطوب بياثر على السيارة فلازم تلحق تغيير الجوز الامامى ولو دا مبيحصلش تقدر تستنى شوية
وطبعا موضوع تانى لو شفت ان المساعدين بيجيبو زيت دا دليل انهم ضايعين ول مفيش زيت ومفيش خبط فى العفشة ممكن تستنى شوية عليهم
وبكدا توفر مبلغ يقارب ال 600 جنية تقريبا للجوز الامامى و 450 جنية تقريبا للجوز الخلفى
ممكن تلاقيهم فى التوفيقية عند محل مشهور بيبيع ماركة اسمها مونرو دى مجربة وكويسة ومع المحافظة عليهم ممكن يعيشوا من سنتين ل ثلاثة او اربعة حسب نوع قيادتك
ثانيا المهم والاكثر اهمية هوا جلب المقصات والبيض بتاعها
ودا تظبيطة يتكلف مصنعية فى حدود 30 او 50 جنية
اللى يقدر يفيدك فى المشوار دا مش ميكانيكى اللى يقولك عليه واحد بتاع عفشة
عدى على واحد كويس يكسف على العفشة وهوا هيقولك ايه المطلوب

[dr.hany]

يا جماااعه ايه الحلاوه ديه.بجد افاده جامده اوى.بس انا عندى تعليق عن عيوب

السكودا.وهى انى شايفها عربيه نضيفه ومش ناشفه بالمره وكمان صوتها ناااعم.مش

عارف ليه العربيه ديه بيقولوا عليها كده

[amir]

المهم سمعت كلام استاذ امير معانا هنا في المنتدي ورحت للميكانيكي بتاعه على الزفتاوي عند الوفاء والامل
هو صنيعي سكودا فقط متخرج من توكيل سكودا بعد 10 سنين

مستني نصيحك الجميلة وبجد شكرا لردك

باشا انا جيتلك مخصوص
انت مسمعتش كلامي لاني منبه بلاش فصال مع الراجل ده نهائي و صدقني بجد في النقطه ديه سيبه يطلب اللي عايزه و متفاصلش و هو من نفسه بعد كده هيديك سعر معقول( و لو انه برده عالي سنه) بس انت بتاخد العربيه علي الشعره و ممكن تصرف اكتر من كده عند الميكانيكيه النص لبه
MOHAMED ABD EL SHAFY
goldenfish7
كلامكو ميه ميه و مفيش زيادات عليه, العربيه دي بجد برقبه عربيات تانيه كتير و معظم اللي بيدور في رينج 30-40 بيبقي غافل عنها و بيروح لحاجات تانيه مع ان العربيه دي و الله بجد لو متظبطه بتخليك مبسوط
هيا مفهاش فتي كتير
1-ميكانيكا
2-عفشه و علبه دريكسيون
3-كهرباء
الثلاثه نقاط دول و الاهتمام بيهم عند ناس نضيفه= عربيه رائعه
غير كده لاء
madvoodoo كمل الشغل اللي باقي في العربيه بلاش كسل و ان شاء الله تنبسط قوي منها و متنساش تقوله ان دكتور امير باعتله السلام

امير باشا
شكرا على النصيحة انا من غير متقول قلته اني زميلك وبتبعتلو السلام وبجد انا مبسوط من اداء العربية من بعد ماختها من عندو وان شاء الله ناوي اظبطها بس باشا انا لسه ربنا رزقنا بيوسف ومنفض كل جيوبي بس ناوي ان شاء الله على الشهر الجاي عارف انا والله لو كان معايا بقيت مبلغ عربيتك كنت بعت عربيتي واشترتها منك
وشكرا يا غالى

[amir]

امير باشا
شكرا على النصيحة انا من غير متقول قلته اني زميلك وبتبعتلو السلام وبجد انا مبسوط من اداء العربية من بعد ماختها من عندو وان شاء الله ناوي اظبطها بس باشا انا لسه ربنا رزقنا بيوسف ومنفض كل جيوبي بس ناوي ان شاء الله على الشهر الجاي عارف انا والله لو كان معايا بقيت مبلغ عربيتك كنت بعت عربيتي واشترتها منك
وشكرا يا غالى

ربنا يخلهولك و تفرح بيه كده و هو متخرج و راكب اوكتافيا 2022 ,
و بعدين يا باشا لو عايز عربيتي متغلاش عليك شوف عايز تدفع كام لأني فعلا ببيع!!

بعد اذنكم يا جماعة انا عارف ان اللى هقولة دة ما لوش علاقة بالموضوع ، بس فين ميكانيكي على الزفتاوي دة ممكن حد يوصفهولي ؟

[MOHAMED ABD EL SHAFY]

امام باب مستشفى الوفاء والامل هتلاقى شارع احدخل فيه اول شمال على طول هتلاقى كشك هوا بعد الكشك وراسم علامة اسكودا على الورشة سهل جدا توصلوا