تجربة الصنى واللانسر لمدة نص ساعة بس !!!!!!!!

[ahmed_su]

كنت ناويت من حوالى شهرين تغير عربيتى التمبرا وقرايت كل كلمة تقريبا عن السيارات الجديدة فى المنتدى وطلعت بانطباع عن عربيتين هما اللانسر الشكل القديم 1600 اتوماتيك
والنيسان الصنى الاتوماتيك وبالطبع ركزت معاهم مميزات وعيوب ...الخ وبعد اخذ راى العديد من الزملاء والصدقاء والتى تباينات ارائهم بين المؤيد والمعارض للسيارتين على السواء وبقى الوضع ذى المنتدى هنا مافيش اجماع !!! فقررت خوض التجربة بنفسى لان الرؤية مش زى السمع
ونزلت واتفرجت على هذه السيارات بصحبة صديق عزيز (جزاه الله كل خير) وابتدينا بالنيسان صنى وعن طريق احد معارف صديقى توصلنا لاحد الشباب فى نيسان النزهة والذى اتاح لنا ان نتفرج على السيارة (على مزجنا ) واخدنا وقتنا على الاخر اولا اتبهرنا من شكل العربية اللى كانت فى العرض وكانت سوبر صالون فضى ......وتحت اضواء السبوت لايت كل شىء بيلمع ويبدو فى احسن حاال... المهم بسم الله الرحمن الرحيم

وفتحنا الابواب انا باب السائق وصديقى العزيز الباب الاخر وجلسنا اول انطباع الكراسى الجافة جدا التى لم نتصور ان تكون فى سيارة زيرو وتحسسنا تنجيد الكراسى والذى يمتلك كمية قليلة جدا من الفوم لدرجة انه بالضغط عليه بتحس بالشاسيه الصلب بتاع الكرسى والكرسى بالاكياس المعلق عليها تكيت مكتوب عليه موبيكا

التبلوه مصنع من اردء بلاستيك ممكن تشوفه وناشف وبه حروف بلاستيكية اعتقد من اسطمبة التصنيع ولايوجد به اى اجزاء جلد (اجزاء طرية) اما درعات النور والمساحات واكر مفاتيح التكيف ومفاتيح ازرار الزجاج وتوجيه المريات وفتح الشنطة فهى فى غاية الردائة للاسف الشديد وكذلك عجلة القيادة (كل ده فى النسخة السوبر صالون...!!!!!) درج التبلوه برده من نفس نوعية البلاستيك نفسها , المساحة المتبقية للركاب فى الخلف ضيقة من غير ماترجع الكراسى على اخرها والكنبة الخلفية كانت من غير اكياس وده خلنا نحس بمملمس قماش التنجيد والذى كان خشنا ولا يقل ردائة عن بلاستيك التبلوه والمسند الخلفى خطوط خياطة التنجيد متعرجة ومش على استقامة واحدة مما يعطى مظهر سىء , الكاسيت كلاريون بس مظهره ماعجبنيش , قطع الابانوس (هى بلاستيك بمظهر الابانوس) والمقابض الداخلية النيكل هى الوحيدة اللى تقددر تقول عليها جيدة نزلنا من العربية اقفل الباب مابيتقفلش بسهولة لازم رزعة خفيفة كده ولايحدث الصوت الكتوم المحبب لقفل الابواب وخاصة سيارة زيرو وكواتش البواب ومانع تسرب المياه حوالين الابواب من اردء مايكون خشن جدا مش عارف ليه وكذلك الكوتش حوالين البربريز الخلفى والامامى .



الشنطة فتحناها من الزرار بداخل العربية والتى فتحت بصوت معدنى مرتفع هى واسعة جدا يعنى تشيل كتير مفروشة بموكيت مش جيد وتجد قطعة السيوليتكس اللى مغطية الاستبن ضعيفة جدا ويبان من تحتها صاج العربية اللى مرشوش بلون العربية بعدم عناية – ويوجد فى سقف الشنط السى دى تشنجير ومربوط بشمبر صلب مش حلو وغطاء الشنطة مش متغطى وباين منه اسلاك نور النمر وسلك تانى ماخدتش بالى بتاع ايه وقفلنا الشنطة ماا استجابتش الا بالقوة



فتحنا الكبوت من الداخل والذى فتح بصوت مرتفع والذى اظهر تحته المحرك العملاق الرائع والذى عجبنى جدا مظهره الذى يوحى بالقوة ومن حواليه معدات كتيرة (علبة البور ومواسير الفريون و....الخ) والتى كانت تملىء حوض السيارة مع انه كبير جدا يعنى تحس ان الدنيا زحمة بس مرتبة اما الردياتير شكله كده مش بنفس جودة باقى المعدات غطاء الكبوت والغطاء غير معزول وعضمه باين ومرشوش بغير عناية ولما جينا نقفله متفلش لاننا كنا بنقفله بالراحة وهنا تدخل الشاب اللى فى المعرض علشان يقفله (يبدو انه زهق مننا ) وسابه من ارتفاع حوالى 50سم او اكتر وطراااااخ راح قافل



طبعا ان جالى زهول من ردائة التقفيل رغم انى سمعت انه مش حلو بس فعلا الرؤية غير السمع وسئلناه مافيش تجربة قيادة فقال طبعا لاء طيب ياباشا هوالتقفيل ليه مش حلو كده فقال ياجماعة عربية بالسعر ده وفيها كل الكماليات دى عاوزيين ايه .... طيب ماتبصو على التيدا واللى كانت وقفة جنب الصنى واتفرجنا عليها فعلا فعلا فعلا حاجة تانية خالص كراسى تغوص بك وتاخد شكل جسمك تقفيل غاية فى العناية والفخامة فرش وخامة تابلوه ومفاتيح ومقابض ابواب ومساند زراع فعلا حاجة تانية خالص خالص خالص (بس التيدا مش موضوعنا)

بس خلتينى اعرف اد ايه ان الصنى اتظلمت فى مصر ياخسارة لانى كنت حابب العربية دى جدا

خرجنا من المعرض وصحبى قالى انس العربية دى خالص وكنت زعلان الحقيقة وقلتله امال يبقى ايه قالى اللانسر كفاية انها يابانى 100% واديك شفت تقفيل التيدا اليابانى !!!!



فقلتله انت مش قلتلى ان فيه واحد صحبك عنده نيسان صنى طيب مانسئله عليها فقلى يسيدى انسها بائه قلتله خلاص احنا خسرانين حاجة وبالفعل كلمناه وقعد يشكر فى العربية وانها احسن من اللانسر ...الخ وعرض علينا ننا نروح نشوفها ونجربها كمان مكدبتش خبر ومسكت فى العرض ده واتفقنا على ميعاد وكان 12 بعد نص الليل



وفعلا رحنا فى الميعاد وبعد السلامات والذى منه.... اتفرجنا على العربية وهى كانت زيتى موديل 2700 اى اكس اتوماتيك وعملة 28000كم وكان تقفيلها اقل ردائة من اللى شفنها 2008 فى المعرض وسوبر صالون بس الفرش الداخلى بيج بعكس اللى فى المعرض كانت رمادى ويمكن ده كان ظاهر ردائته بصورة اكبر (مش قادر احكم على النقطة دى اوى)

قعدنا الكراسى اكثر راحة وطرية عن اللى كانت فى المعرض (يظهر بيقللوا فى الخامات كل سنة )

المفتاح فى الكونتاكت دور..... فرووووم صوت هدير عميق مش عالى بس تحس بالقوة شغلنا التكيف على 1 واحنا وقفين فى اقل من 30 ثانية كان الهواء المثلج (مش البارد) خارج من فتحات التكيف ويمكن علشان كنا 12 بالليل والجو شبه معقول , هات الفتيس على الدى واطلع .... صوت الموتور على والاربى ام يرتفع مع الاضاءة البرتقالية (انا مابحبهاش) بس كانت جميلة فعلا فى العربية ولايقة مع الفرش البيج , العربية بتكتسب السرعة ببطىء لحد ماجبنا 100 كيلو بس كان الاربى ام على 4 وصوت الموتور عالى جدا ومسموع بالرغم من الشبابيك المقفولة, وخدانا اكتر من مطب وكانت العربية ماسكة نفسها وبتتحرك قطعة واحدة محسيناش بتعب وكذلك لما عدينا على شريط المترو اللى فى شارع يوسف عباس كان عادى برضه



سئلت صاحب العربية على الاوفر درايف قال انا من ساعة ماجبتها ما استخدمتوش فاستئذنته ممكن نجربه فرحب وقال برحتك وجربته ضوئه نور فى التبلوه وزودنا السرعة ماحستش باختلاف كتير (مش عارف ده طبيعى فى الصنى ولا هى فيها مشكلة وصاحب العربية كمان مش عارف لانه مجربهوش قبل كده)



وبعد كده شكرنا الراجل بكل حرارة – جزاه الله كل خير خلانا نعمل تيست دريف , بس كده انا قلت خلاص الصنى بره الحسابات لانها مزعجة جدا فى صوت الموتور داخل السيارة بس مسمعناش صوت الطريق والعجلات بس اعتقد علشان صوت الموتور مغطى عليهم .



ارجو انى ماكونش مطول عليكم بس حبيت اشرككم معيا يمكن حد يستفاد من تجربتى





نيجى بقى للانسر روحنا شوفنها فى احد المعارض وكانت اردنى هاف اسبورت طبعا التقفيل اكثر روعة من الصنى بكل تاكيد والخامات المستخدمة ارقى بمراحل المقاعد ومريحة جدا بالمقارنة بالصنى (بس مش اريح من التيدا)المقاعد الخلفية مش مزنوقة ومريحة مع ترجيع الكرس على الاخر , الشنطة صغيرة حجم وارتفاع واغطاء الشنطة مش متبطن زى الصنى : فتحنا الكبوت بصوت معدنى مسموع برضه الموتور شكله اصغر من الصنى وحواليه حاجات كتيرة مش مترتب زى الصنى وفيه اسلاك هنا وهناك مش مريح للعين تحس انه زحمة .



وقلت لصحبى مافيش واحد صاحبك كمان معاه لانسر نجربها ...هاهاهاهاها فقلى لاء للاسف قلتله طيب مانروح نأجر واحدة وتبقى معنا طول اليوم وندرسها برحتنا ومن غير حرج فقلى فكرة كويسة بس للاسف فى اكتر من مكتب تأجير سيارات مافيش لانسر 1600 اتوماتيك كله 1300 اتو ومانيول والمكتب الوحيد اللى لقينا فيه 1600 كانت مانيول .



وبعد كام يوم لقيته بيطلبنى قالى لقتليك عربية زيرو عند مستورد( صديق لوالد صحبى) للانسر هنحط عليها نمر تجارية بس هانجربها لمدة نص ساعة مش اكتر قلتله رضا يارب حتى ربع ساعة المهم رحنا خدنا العربية من مخازن الراجل وكانت لمبة البنزين منورة دور ...فروووووم .صوت ناعم وهادى شغلنا التكيف برد بسرعة اقل من االصنى بس احنا كنا الساعة 6 مساء والجو حر عكس الصنى كنا بالليل طلعنا على محطة البنزين حطيت 5 لتر 92(بحالهم) اللمبة طفت وابتدينا التجربة العربية تسارعها اعلى من الصنى بس صوت الموتور مزعج وكل مانزود صوته يزداد ازعاج ملحوظ جدا طلبت من صاحبى يسوق وجلست فى الخلف التكيف مش جايب ورا قوى وكان على 1 علاه على 3 ابتدى يجيب ورا ,صوت الطريق واضح جدا (العجلات) عالى ومزعج جدا وكانت السرعة 100 ولما وصلنا ل130 كم كان مزعج جدا والعربية كنت حاسس انها خفيفة بترقص بعكس الصنى بس احنا مجريناش كتير بالصنى المهم جرينا ودينا العربية لمخزن الراجل وشكرنا الناس هناك وكانت لمبة البنزين نورت تانى يعنى وانت قدام صوت الموتور مزعج جدا وانت ورا صوت العجلات عالى ومزعج جدا (صدقت كلام الناس عن العزل الضعيف) بس صاحبى زهق منى وانا زهقت من نفسى بس هى دية التجربة



وكنت فكرت اريح نفسى من عربيتى القديمة المانيول واللى عمرها 15 سنة ومازال فرشها وجودة مكونات التبلوه افضل من الصنى بمراحل ولما بقفل الزجاج لااسمع ازعاج الطريق ويدوب صوت ضعيف للموتور بعكس الصنى واللانسر والتسارع الجميل بس يمكن علشان دى مانيول مش عارف



المهم رحت انا وصحبى عند اتو سمير ريان مكنتش رحتلوه قابل كده وماشاء الله عليه شوارع مليانة بكل المركات والموديلات وهناك جزء كبير من العربيات مفتوحة قلنا نجرب الصنى وجمبيها اللانسر ونعمل مقارنة اخيرة قالى انس الصنى بقى المهم صحبى بيحاول يقنعنى باليارس قلتلوه لاء انا مش مقتنع بيها خالص سمعنا موظف هناك فقالى انت بتسوء سمعة العربية ولا ايه يابش مهندس وكان راجل ظريف وخدوم مابيزهقش بعكس البياعين الاخرين واخدنا الحوار فى التجربة اللى خضنها فى النيسان واللانسر فقلى بص انا هفرجك على عربية انا متأكد انها هتعجبك......



ورحنا عند عربية كيا سيراتو فأنا قلتلوه لاء كورى لاء قالى بس شوف فتحلنا الموديل اللى ب102 اتوماتيك كاملة ماعدا فتحة السقف وفعلا صالون واسع ومريح خامت معقولة جدا فى رأى افضل من اللانسر تابلوه مميز وتكيف تاتش وفتيس تيترونيك المساحة الخلفية حلوة جدا مقارنة باللانسر حتى والكرسى على اخره العربية مافيهاش لا ايه بى اس ولا ايرباج الشنطة واسعه جدا تقريبا زى الصنى غطاء الشنطة متبطن فى الموديل ده وطبعا الراجل اعد يعدد فى مميزات التوكيل الجديد والضمان 5 سنين ...الخ وان الموتور بتاع الالنترا الجديدة 121 حصان وهادية ونعمة يعنى عربية مريحة ...المهم شكرناه ومشينا بس للاسف نسيت افتح الكبوت واشوف الموتور

وشوفت اراء مالكيها فى منتدى كيا وهى عجباهم بس انا بقيت محتار محتار ومش عارف اعمل ايه



يارب ما اكنش تقلت عليكو بس حبيت اشرككم معايا وفعلا تجربة العربية قبل شرئها مهم جدا جدا


وشكرا لمصطفى صديقى العزيز على وقته وجهده الذى بذله معى

حضرتك ممكن تجيب لانسر وتغيير الكاوتشات ومثلا تجيب بريدجستون super silent GR- 80وانسى صوت العجلات وطبعا ثبات احسن بكتير من كاوتشات المصنع .ملحوظه فيه لانسر بتنزل ببريدجستون بس فعلا مزعج .انما فى توكيل بريدجستون هتلاقى البريدجستون سوبر سيلنت كاوتش تحفه فى كل حاجة وانسى الصوت وانعم للعفشه واثبت على الطريق بس طبعا هو غالى من 550 -ال 600 للفرده الواحده ونقشته رياضيه rotation .باقى عيوب اللانسر اعتقد ممكن تتعود عليها وتعوضها مميزاتها الكثيره جدا من قوة توكيل واسعار وتوافر قطع الغيار واعاده البيع الممتازة جدا. معلومه لحضرتك رادياتير الصنى صناعه مصرى لذلك حضرتك وجدت انه اردئ من باقى مكونات المحرك

[Fouad Ezz]

ربنا يوفقك للأصلح إن شاء الله ....
وبرافو عليك إنك بتعرف تعمل تيست درايف في بلد مش معترفة بالموضوع ده ...
بس فرحتني ... قولت ده هايشتري في الأخر ويبيع التمبرا وأشتريها منه ... ماشتريتش !!!!!!!!!!!!! بالتوفيق إن شاء الله

[SEATLOVER]

ابقى افتكر بقى يا احمد وقول
الله يرحمك يا سيات لافر
اللى قالك ماتبعش ...عشان هاتتعب

[Ahmed Anwer]

بص أنا مش من المعجبين بالصني ،،

و يمكن بهاجمها علي طول الخط ،، و السبب الأساسي شكلها و ديه اذواق

بس اعتقد حضرتك مبالغ شوية في وصف تقفيلها السئ

مش للدرجة دي يعني ،،

انا شخصيا اعتقد انه احساس نفسي يعني الواحد بيبقي بيتفرج علي العربية عشان يطلع عيوب تقفيلها

[ams]

ممكن اسأل حضرتك , هو انت هتبيع التمبرا عشان عيب فيها و لا للتغيير ؟ و هل من الممكن تعمل مقارنه سريعه بينها و بين الصنى واللانسر ؟

[emadno1]

ممكن اسأل حضرتك , هو انت هتبيع التمبرا عشان عيب فيها و لا للتغيير ؟ و هل من الممكن تعمل مقارنه سريعه بينها و بين الصنى واللانسر ؟

يا ريت فعلا

[Abdo_Eldesokey]

على فكرة أنا استمتعت بالموضوع جدا ً ... حسيت إني كنت معاكوا ...
وأنا معاك في كل كلمة قلتها ...
بس حكاية صوت الماتور العالي الي في اللانسر دي مقابلتنيش ... شايف إن صوته عادي

يا ريت يا باشا تصلي صلاة استخارة وإن شاء الله هتوصل لأحسن حل

[ahmed_su]

ابقى افتكر بقى يا احمد وقول
الله يرحمك يا سيات لافر
اللى قالك ماتبعش ...عشان هاتتعب

عمرو بك ...
والله انا فاكر كل كلمة قلتها ياباشا
بس الموضع بيلح على اوى لانى تعبت جدا من سواقة المانويل كل يوم فى زحام القاهرة رايح جاي
بس يظهر ان عذاب المانيول افضل من عذاب التدوير على عربية جديدة وخصوصا اذا كنت راكب حاجة محترمة والواحد محصور قى فئة سعرية محدودة وانا كنت فاكر انى هاجيب الديب من ديله ب 100 الف ونصهم قسط ....هاهاهاهاهاها

[ahmed_su]

حضرتك ممكن تجيب لانسر وتغيير الكاوتشات ومثلا تجيب بريدجستون super silent GR- 80وانسى صوت العجلات وطبعا ثبات احسن بكتير من كاوتشات المصنع .ملحوظه فيه لانسر بتنزل ببريدجستون بس فعلا مزعج .انما فى توكيل بريدجستون هتلاقى البريدجستون سوبر سيلنت كاوتش تحفه فى كل حاجة وانسى الصوت وانعم للعفشه واثبت على الطريق بس طبعا هو غالى من 550 -ال 600 للفرده الواحده ونقشته رياضيه rotation .باقى عيوب اللانسر اعتقد ممكن تتعود عليها وتعوضها مميزاتها الكثيره جدا من قوة توكيل واسعار وتوافر قطع الغيار واعاده البيع الممتازة جدا. معلومه لحضرتك رادياتير الصنى صناعه مصرى لذلك حضرتك وجدت انه اردئ من باقى مكونات المحرك

رامى باشا

والله هى وجهة نظر بس انت مش معايا انى هاجيب عربية معدية 100 الف (وده بالنسبة لى مبلغ مجعلص) ولسه هاروح اغير كاوتش معرفش يكام الف

انا قلت هاشترى زيرو وادور وانسى!!!!!!

لسه ربنا ما اردش (فرجه قريب ان شاء الله)