** آخر أخبار المثلث العاكس و حقيبة الإسعافات الأولية بالتفصيل **

[Akram]

انا كنت رحت من شهر التوفيقية و سألت على المثلث العاكس و ملقتش غير في محلين فقط و كانت اسعارهم من 15 الى 27 ج ,
المهم نزلت من يومين التوفيقية لشراء المثلث العاكس و شنطة الإسعافات و لقيت العجب ,
لقيت كل الناس اللي فارشين على الأرض و كل المحلات حاطة المثلث و الشنطة ,
الخامات رديئة جداً و في المثلث لقيت بدلاُ من وجود خوصتين حديد لتثبيته على الأرض لقيت فيه خوص بلاستيك و انواع تانية فيها خوصة واحدة حديد (ضعيفة ملهاش لزمة) و الاسعار مولعة ,

الاسعار للمثلث لقيتها من 8ج الى 70 ج مع اختلاف الخامات و الأشكال , يعني اللي لقيته من شهر و كان خامته متوسطة و كان بـ 27ج لقيته امبارح بـ 55ج ,
المهم بعد ما لفيت التوفيقية كلها لقيت محل عنده 3 أنواع من المثلثات بـ 25ج أو 35ج أو 45ج و كان الخوص الحديد الخاصة بيهم كويسة جداً و تقيلة يعني لما تحطه على الأرض مش هيطير زي الأنواع التانية ,
بس كان المحل خلص كل الموجود عنده و اللي جاي محجوز و إذا كنت عايز يبقى تحجز و تستلم بعد اسبوع ,
و انا كنت اتعاملت مع المحل ده قبل كده و هو محل كبير فقلت مفيش مشكلة و حجزت 5 مثلثات لي و لأصحابي ,
و دي بيانات المحل للي عايز يعدي عليه في التوفيقية:
محل : أبناء درويش بطاح – حامد جوهر – رقم 6 و 7 و 10 ش البورصة التوفيقية ,
ت:25782362-25747235-25753295-25758760 – محمول:0125370372/0103306441

بالنسبة للشنطة :
لقيت شنط بـ 30ج و فيها كام حاجة من المكونات المطلوبة و حجمها 15X20 و خامة رديئة ,
و شنطة بـ 50ج و فيها حاجات اكتر شوية من الاولى و حجمها 20X20 و خامة رديئة ,
و شنطة بـ 80ج و فيها حاجات اكتر شوية من الثانية و حجمها 20X30 و خامة وسط + كتيب اسعافات و مكتوب عليها انها مطابقة للمواصفات بس هي في مش مطابقة ودي كانت أفضل الموجود ,
و شنطة بـ 30ج و فاضية !!!!! و حجمها 20X20 و خامة رديئة (كرتون و مكسي جلد اسكاي),
انا عن نفسي هجيب شنطة فاضية (بس مش زي اللي لقيتها في التوفيقية) و هكتب عليها ((إسعافات أولية)) و هجيب الحاجات المطلوبة من الصيدلية وخلاص ,
بس مش عارف كتيب الإسعافات ده بيتباع فين , يا ريت لو حد يعرف يقولنا و لو حد عنده يعمله سكان (Scan) و يحمله على المنتدى.

*** و للي مش عارف مواصفات و مكونات حقيبة الإسعافات الأولية التي أقرتها وزارة الصحة:
أولاً المواصفات:
1- أن تكون من مادة معدنية غير قابلة للصدأ وان يسهل حملها باليد أو علي الكتف ويمكن غسلها وتطهيرها.
2- ذات حجم كاف لترتيب الأدوية ولوازم الإسعاف و مقسمة من الداخل.
3- ان تكون محكمة الغلق (لضمان عدم تسرب الأتربة إلى داخلها).
4- مكتوب عليها "اسعافات أولية".
5- قائمة مكتوبة باللغة العربية بمحتويات الحقيبة و تلصق داخل الحقيبة مع رقم هاتف الطوارئ والنجدة والإسعاف.
6- كتيب لطرق الإسعافات الأولية.
7- تزن من 2 الى 2.5 كيلو جرام.

ثانياً المحتويات المطلوبة:
1. عدد (4) أربطة شاش عرض 10 سم.
2. عدد (3) أربطة ضغط عرض 10 سم.
3. عدد (5) باكتات شاش معقم للجروح.
4. عدد (5) باكتات شاش فازلين للحروق.
5. عدد (5) بكرة شاش معقم للعين.
6. عدد (5) باكتات "دريسنج" معقم.
7. عدد (2) بكرة شريط لاصق (بلاستر طبي) 5 سم.
8. كيس قطن طبي (100 جرام).
9. مقص صغير.
9. سائل مطهر (بيتادين).
10. عدد (5) أطقم قفازات طبية "لاتكس".
11. عدد (2) رابط مثلث للكسور (لتعليق يد مصابة بكسر إلى الرقبة "في حالة كسور عظمة العضد أوالترقوة").
12. عدد (2) كمادات باردة/أكياس ثلج (تتفاعل كيميائيا عند الضغط/الفرك لتبرد تلقائياً).
13. كشاف ضوئي/بطارية.
14. ملاءة حروق مفزلنة.
* كما يمكن إضافة مرهم مضاد حيوي (لعلاج الجروح والحروق السطحية - مثل فيوسيدين Fucidin), مسكن موضعى (Emla), و غسول للعين (عند التعرض للغبار والأتربة - مثل أوبتركس)
** لا تنسى أن تضع قلماً وورقة قد تحتاجهما عند الضرورة.

((( و نقلاً عن جريدة المساء صرح اللواء محمد منصور مدير الادارة العامة للمرور بأن صاحب المركبة من حقه ان يحضر الحقيبة المعدنية أو يقوم بتصميمها بالشكل اللائق به وليس لها لون وشكل معين لكن المهم ان تأتي مواكبة للمواصفات التي وضعتها وزارة الصحة في ان تكون قابلة للغسيل والتطهير وان تسع جميع المستلزمات التي وضعتها الوزارة وان يكتب عليها حقيبة اسعاف. )))


نصيحة يا جماعة ان اللي مجبش المثلث أو الشنطة يتحرك على طول علشان من أول أغسطس هتلاقي المرور شغال على الحاجات دي بس , و هتلاقي أسعارهم بقت أضعاف و كمان هتبقى بالخناق .

*** بصراحة حاجة بقت معتادة ان في الإزمات تلاقي ناس بتستغل , زي ما حصل ايام بدء تطبيق قانون الحزام ...

[MTAK]

جزاك الله على تلك المعلومات
و لكن هل من الممكن التلكيك فى موضوع الشنطه او العاكس
يعنى انت قولت اسعاره متفاوته بخامات متفاوته
يعنى ممكن اجيب واحد رخيص و يقوللى فى اللجنه اصل ده مش استاندرد و لا هوا عاس يوضع على الارض و السلام

[romeeoo]

الظاهر ان وزارة الصحة نست تكتب ان الشنطة لازم يكون فيها 4 كفن للركاب وان السواق لازم يكون معاه دبلومة تمريض والأمين يسالك فى الكمين يقولك رخصتك و ملايتك المفزلنة
طب لو اتوبيس سياحى يجيب على كده شيكارتين
الموضوع قلب بمسخرة

الف شكر ليك يا استاذ اكرم وفعلا المثلثات الي موجودة رديئة جدا والشنط كلها غير مطابقة للمواصفات بس صحيح في حاجة
مقلوش لية ان يكون في اتنين تمرجية في الشنطة كمان

[Akram]

موضوع المثلث و الشنطة مهم طبعاً زي ما انتم عارفين ,
و بما إن الواحد هيجيب المثلث كده كده يبقى يجيبه كويس و أقصد انه يكون من خامة جيدة و الخوص تكون حديد و تكون تقيلة (و على فكرة انا عايز أجيبه من زمان قبل موضوع القانون),
أما بالنسبة للشنطة فأنا شايف انه مبالغ فيها و بعدين ليه معدن و غير قابل للصدأ هل يقصدوا إنه المعدن ده إستانليس , يبقى كده الشنطة لوحدها هتكون بـ 500ج ,
و الكونات المطلوبة كتيرة وانا بقول كده لأن فيه عربيات بتنزل بشنط طبية و بتكون بلاستيك و المكونات اللي فيها أبسط من المكونات اللي أقرتها وزارة الصحة ,
و على فكرة صيدلية سيف منزلة شنطة بلاستيك و فيها معظم المكونات المطلوبة و بـ 120ج ,

انا عن نفسي هجيب المثلث اللي حجزته , هجيب شنطة بلاستيك كويسة و هجيب معظم الحاجت اللي طلبوها ,
و هشوف إيه الأخبار في أول تطبيق للقانون .....

[Sharky]

يا جماعة الحكومة ادت مهلة سنة للناس فى موضوع المثلث و شنطة الإسعاف و الكلام دا كان مكتوب فى الجرايد من يومين

[Akram]

انت متأكد يا أحمد ,
يا ريت نلاقي المسؤلين بيوضحوا الكلام ده و ما يسبوش الموضوع عايم ...

[elrasy]

اولا بشكر اكرم على معلوماتة المفيدة جدا

ثانيا ياريت يا جماعة اللى عندة اى معلومات عن فترة السماح يبلغنا لان دلوقتى السوق هيبقى كلة استغلال

[onsi]

يا جماعة كلكو فكرتوا علطول نجيب اية وبكام ومنين وازاى لكن نفسى حد يفكر لية هما بيعملو فينا كدة ولية احنا ننفذ ونجرى علطول زى اللى طلع شومة شوفناها وجرينا واتكعبلنا من غير هو مايضرب حتى؟؟

الموضوع يا جماعة من الاخر فى سبوبة للناس الكبيرة زى كل مرة يخترعوا ازاى يسرقوا الشعب الغلبان لان يا حرام هما ماعاهمش فلوس خالص واحنا برضة زى كل مرة عارفين انو بيضحكو علينا ونتسرق عينى عينك ونسكت لا ونجرى ونوافق ونعمل اللى هما عايزينة
واللى فاكر موضوع حزام الامان من فترة برضة كانت سبوبة لواحد من الكبار عامل توكيل واتفاق ونسبة بيع تتقسم عليهم وعلى حساب قفا المصريين
يعنى الموضوع كلة كيف تنصب على المصريين
وحسبى الله ونعم الوكيل

[magedfarid]

بالذمه ده اسمه كلام
يعني الشنطه دي هي اللي حتظبط المرور في البلد
لو اي حد اتصل بعربيه اسعاف او حتى وقف عربيه اسعاف وشاف الادوات اللي فيها صدقوني مش حيلاقي نص الحاجات دي
الخلاصه هما عايزين كل العربيات يبقى فيها الحاجات دي بدل عربيات الاسعاف ودي مرحله اولى
المرحله الثانيه كل اصحاب العربيات يدخلوا كليه الطب وطبعا حيتخرجوا وكل واحد يبقى دكتور و معاه سماعه كمان
المرحله الثالثه كلنا نقعد نكشف على بعض ونعالج بعض:biggrinjester:
ويبقى كده ريحنا الناس بتوع وزاره الصحه
معلش سؤال اخير لو في حد عربيته هاتشباك مش حتاخد غير تمرجي واحد هل دي تبقى مخالفه ولا ممكن تعدي