حد يفيدني optra manual و لا gen2 automatic

[midomtm]

يا جماعة أنا احترت خالص. أنا عايز أشتري عربية بـ 90000 . المقارنة كانت شاملة 4 عربيات لانسر 1300 مانيوال و سيراتو مانيوال و ـبترا مانيوال و جين 2 أوتوماتيك. تم استبعاد لانسر و سيراتو. و محتار جدا جدا بين جين2 و أوبترا. أنا بحب الجين2 جدا بس بيقولوا أنها ضيقة من جوه لكن الأوبترا طبعا من جوه بحر. ممكن حد يساعدني...؟؟؟

[tutankhamoun]

يا جماعة أنا احترت خالص. أنا عايز أشتري عربية بـ 90000 . المقارنة كانت شاملة 4 عربيات لانسر 1300 مانيوال و سيراتو مانيوال و ـبترا مانيوال و جين 2 أوتوماتيك. تم استبعاد لانسر و سيراتو. و محتار جدا جدا بين جين2 و أوبترا. أنا بحب الجين2 جدا بس بيقولوا أنها ضيقة من جوه لكن الأوبترا طبعا من جوه بحر. ممكن حد يساعدني...؟؟؟

واضح أنك حابب الجين 2 و متخوف من موضوع الوسع
على العموم هي مش ضيقة .......... بس السقف من ورا واطي شوية علشان إنسيابية العربية

و الأفضل

تروح تشوف الجين 2 في المعرض أو مع حد
و تشوف الأوبترا
و تقارن وسع الصالون مع أحتياجاتك منه
و كمان تقعد في العربية من ورا و تشوف هل المسافة كافية للأرجل أو لاءة
و تقارن مقارنة شاملة
و في الأخر أنت الوحيد اللي هاتقدر تقرر أحتياجاتك أيه ؟؟؟

[Ahmed_Ezz]

انا راى الشخصى جين 2 انا بحب العربية دى و محدش اعرفة اشتكى منها و الاوبترا عندنا و تحفة بس انا بحب الجين 2 و حاسس انها اقوى بكتيير

[Hosam_Optrawy]

لو مش فارقه معاك تركب اوتوماتيك ولا مانيوال
يبقى اوبترا
عربيه مضمونه فى حاجات كتير
ولو قارنت بالعقل ما بينها وبين الجين تو
الاوبترا تكسب
ضمان - قطع غيار - اسم فى السوق - السعر عند اعادة البيع
وحاجات تانيه
وبرضه روح اتفرج عالاتنين وقارن

اذن الــ optra تكسب

[zizo610]

بص يا ميدو أنا عاجبتني دماغك جدا لأنها ذي دماغي بس أنا عملت المقارنة ديه مابين الأبترا والجين 2

1- بالنسبة للموتور الجين 2 تكسب لأن عزم الموتور أعلى وإستهلاكه أقل وتقدر تشوف ده من خلال عزمه عند سرعة 4000RPM وأقصى سرعة ليه 190
2- بالنسبة لعرض العربية واحد بس الإرتفاع الإبترا أعلى وأطول لكن العرض واحد طبعا والمسافة بين العجل واحدة 2600مم ده تقارنها على حسب إحتياجك
3- الوزن الجين 2 أخف ب 45 كيلو جرام تقريبا
4- الصاج الجين 2 أمتن
5-الشكل من ورا الجين2 هايلة لكن من الإمام الإبترا أحسن ده من وجهة نظري
6- أنا شايف إن كماليات الجين2 أكثر لكن شكل تابلوه الإوبترا أحسن ده من وجهة نظري
7-الفرامل ABS في الجين2 أعتقد أن الإبترا مش كده والله أعلم
8-الجين2 فيها 2 إير باج مش موجودين في الإوبترا
9- Fog light in Gen2
10 Parking Sensor

بص ياسيدي أنا إديتك كل ال عندي أولي إه رأيك أنت ولو عندك حاجة تنية قولي بس أنا عايز أعرف هتعمل أه لأني متردد أنا كمان

مستني رأيكم ياجماعة

حازم

[tutankhamoun]

الموضوع ده مفتوح 3 مرات ............... أنت لخبطني معاك

ده رد في واحد من الثلاثة مواضيع

جين 2 أوتوماتيك أو أوبترا مانوال ؟؟؟
هو أشمعنى المقارنة بين الجين 2 ألأوتو و الأوبترا المانوال
هذا كان أولا ............
أنا هاقولك على عيوب الجين 2 الأول و بعدين المميزات
العيوب
الموتور صوته عالي شوية ............ و أصحاب الموديلات الجديدة 2008 بيقولوا صوته واطي شوية ( العربية أساسا رياضية فلازم صوت الموتور يبقى كدا ) بس صوت قوة و فيه ناس مش بتحب صوت الموتور

السقف من ورا أوطى من سقف الأوبترا و ده راجع للتصميم الرياضي الإنسيابي
الصالون الداخلي عادي جدا جدا جدا و ليس به أي تميز غير التابلوه الشيك
إنما خامات الصالون الداخلية عادية مش رديئة زي الناس ما بتقول و مش أكتر من عادية خالص
و في نفس مستوى الفيرنا و الياريس و الأفيو
الكراسي مقدرش أقول عليها مريحة خالص بس مش متعبة

أماكن التخرين قليلة و مش كتيرة
و متنساش إن العربية رياضية في المقام الأول

المميزات
ثبات أكثر من رائع ............... ممتاز بجد بجد بجد
بعد مقارنة ميدانية بسيارات كثيرة و في نفس السعر و حتى أغلى منها ............... بس الجين 2 وحش في الثبات .......... بجد وحش

التسارع بتاع الجين 2 الأوتو على أول غيار مش قوي بس بعد الثالث ..... أنسى العربية ........... بتبقى صاروخ

تسارع العربية على الطرق السريعة أكثر من ممتاز و رائع و بتستجيب بسهولة لضغطة البنزين بعد ما تعدي سرعة 60 كم / س

الدريسكيون متوسط النعومة ( الحمد لله على كدا )
بيديك إحساس بالتحكم في العربية و بعد ما سوقت كام عربية و دريكسيونهم ناعم أقدر أقولك
الدريسكيون الناعم ده ................. نقمة ............ نقمة ............ نقمة و خصوصا لو مش من النوع اللي بيتقل على السرعات العالية

الدريكسيون بيتم تعديله بالإرتفاع أو النزول حسب طول ووضعية السائق .......... بس زاوية التعديل مش كبيرة قوي

كرسي السائق يتم تعديلة إرتفاعا و هبوطا أيضا حسب طول السائق و برضه الزاوية مش كبيرة قوي و مش مفيد قوي الموضوع ده

التكييف كويس جدا جدا و تأثيره على السحب في الأول بس و بعد كدا التأثير على السرعات العالية يكاد لا يذكر

عوامل الأمان
و دي أسباب تفضيل المهندس شريف الجين 2 على الأوبترا
فيها 2 وسادة هوائية ( واحدة للراكب الأمامي و الأخرى للسائق )
فيها فرامل ABS , EBD
الفرامل على الأربعة عجلات فرامل قرصية مما يجعل عملية الفرملة أقوى و أفضل بالإضافة لعوامل الأمان المذكور مسبقا

كاوتش عريض و جنوط مما يساعد على الثبات أيضا مما يزيد الإحساس بالأمان عند القيادة

نظام صوتي رائع و أكثر من رائع و لا يحتاج إلى أي تعديل
مكون من مشغل أسطوانات صوت فقط و أربعة سماعات ممتازة و مشغل الصوت ماركة بلاوبونكت و راديو ذو أستقبال أكثر من ممتاز بيشتغل من غير آريال و بيلقط أشارة قوية كمان

مرايات يتم تعديلها كهربائيا

مصابيح شبورة أمامية و خلفية

أربعة زجاج كهرباء
الأبواب الخلفية لها أزرار حماية ضد الفتح لحماية الأطفال
أموبيليزر لحماية السيارة من السرقة و حماية المحرك من التدوير بدون مفتاح مكود
قفل مركزي و أنذار

الشنطة واسعة و كويسة قوي و الكراسي الخلفية يمكن طيها على مرتين
يعني الكرسي ممكن ينطوي بنصه فقط لإتاحة مكان لشخص للجلوس في الخلف لإستخدام نصف السيارة الخلفي في التخزين مثلا لتكبير الشنطة اللي هي أصلا كبيرة

العربية زي ما قلت في الأول ثباتها رهيب رهيب و مع ذلك مش واطية على الأرض و مش بتحك في أي مطب حتى لو محملة ناس

إستهلاك البنزين رائع رائع رائع على الطرق السريعة و بتوصل ل 15 كم لكل لتر بنزين أوكتان 92 عن تجربة طويلة لمدة 9 شهور

و داخل البلد لا يزيد الإستهلاك عن 10 كم لكل لتر بنزين

يعني الصفيحة 20 لتر تعمل من غير تكييف
طوالي من 300 كم تقريبا
داخل البلد من 200 إلى 220 كم حسب التحميل و الزحمة

العربية فيها حساسات للركن و دي مفيدة قوي و لكنها لا تغنيك عن النظر خلفك و التأكد من المكان الذي تركن فيه

العربية تصلح للشباب حتى 40 سنة أو أكتر قليلا و لا تصلح لأسرة كبيرة أو أسرة طوال القامة أكتر من 190 سم تقريبا

العربية الأوتو فيها مثبت سرعة ( ميزة رائعة )
الموتور 110 حصان عند 6000 لفة / دقيقة
العزم 148 نيوتن / متر عند 4000 لفة / دقيقة

و كل ده .......................................... المانوال ب 85 ألف
.................................................. ......... الأوتو ب 90 ألف




بالنسبة للأوبترا
اللي أعرفه عنها
محدش بيشتكي منها كتير غير في موضوع علبة الدركسيون و التوكيل المحترم بيغيرها ببلاش و الله أعلم
العربية شكلها عائلي و وقور
الصالون حلو و أحسن من بتاع الجين 2
أطول من الجين 2
السقف أعلى من سقف الجين 2
الناس بتشكر في الموتور
بس مفيهاش عوامل أمان و معرفش تفاصيل الكماليات
و يا سلام لو الأستاذ أحمد إبرهيم يدخل يقول تقييمه للعربية

في الأخر
الجين 2 شكل شبابي و اداء رياضي
الأوبترا عربية وقورة و عائلية

في الآخر
أنت لازم تشوف أنت محتاج أيه من العربية و على أساسه تقدر تحدد أنت هاتشتري أي واحدة فيهم بعد ما تقارن المميزات اللي هنا و هنا
و تقارن العيوب اللي هنا و هنا
و تشوف أي واحدة مناسبة أكتر بعد ما توازن أحتياجاتك مع المميزات و العيوب الموجودة في كل عربية



ملحوظة صغيرة لوجه الله

عايز أضيف حاجة مهمة قوي و نصيحة أخوية

لو أغلب سواقتك جوا البلد و بتسوق على الطرق السريعة قليل
يبقى بلاش أي عربية 1600
خليك في 1300 للتوفير أدام مش محتاج موتور قوي لو معظم سواقتك جوا البلد

[zizo610]

شكرا ياباشا والله ينورعليك
أنا رحت سألت عند واحد بيبيع قطع غيار الجين2 في شارع دمشق قالي أن قطع غيارها موجودة وسعرها معقول بالنسبة للإوبترا ده قالي بالعكس منصور شفورليه بيغلي دلوقتي لأنه محتكر إستيراد قطع الغيار الشفورليه على فكره المحل ده بيبيع الشفورليه كامان

معلش عندي سؤالين بما إنك معاك العربية إه أخبار التوكيل بتاع الجي2 (عز العرب )الناس بتشتم فيه ليه؟
أنت العربية معاك بقلها 9 شهور دي مفهمت عملت بيها أد أه كم وأه اكتر حاجه ديقتك في المدة ديه؟
وشكرا لإهتمامك

[tutankhamoun]

شكرا ياباشا والله ينورعليك
أنا رحت سألت عند واحد بيبيع قطع غيار الجين2 في شارع دمشق قالي أن قطع غيارها موجودة وسعرها معقول بالنسبة للإوبترا ده قالي بالعكس منصور شفورليه بيغلي دلوقتي لأنه محتكر إستيراد قطع الغيار الشفورليه على فكره المحل ده بيبيع الشفورليه كامان

معلش عندي سؤالين بما إنك معاك العربية إه أخبار التوكيل بتاع الجي2 (عز العرب )الناس بتشتم فيه ليه؟
أنت العربية معاك بقلها 9 شهور دي مفهمت عملت بيها أد أه كم وأه اكتر حاجه ديقتك في المدة ديه؟
وشكرا لإهتمامك

السلام عليكم
بالنسبة للتوكيل
مش ممتازين .................. و فيه ناس بتقول أنها راحت بمشاكل و ما أتحلتش
بس معايا مفيش أي مشاكل
و بالنسبة للسؤال الثاني
العربية عامل بيها دلوقتي فوق 7000 كم
و الحمد لله .............. مفيش أي مشاكل من أي نوع بتاتا و ربنا يديمها نعمة
و العربية عاجباني جدا و مبهور بيها جدا
و زي ما وصفت من قبل

[zizo610]

ربنا يباركلك فيها ويديك خيرها ويكفيك شرها ويحفظها ويحفظك من كل سوء

من الواضح إنك بتحب الفراعنة كمان أه السر يمكن عشان التابوت بتاع توت لسه عايش لحد دلوقتي ولا إه يعم طمني احسن تكون حاجة مرتبطة بالجين 2 كمان:)