PEUGEOT 505 اخر السيارات المحترمه

[hazem_khidr]

البدايه احب ان القي الضوء عن ارقام بيجو و علي ما تدل هذه الارقام (بيجو تعمد في تسميتها علي تلات ارقام رقم صفر في الوسط ثابت و الرقم اليسار يدل علي فئه السياره كل ما كبرت السياره زاد الرقم و الرقم اليمين يدل علي جيل السياره مثلا 205 و خليفتها 206 و خليفتها 207 و هكذاو 504 و خليفتها 505 )

و نرجع نتكلم في موضوعنا
مع تقديري لكل السيارات البيجو لكن بعتبر ال 505 احسن عربيه بيجو عملتها في تاريخها كله و د لعده اسباب
1.عربيه واسعه جدا
2.ثابته علي الطريق جدا بعكس ال504 مثلا
3.شكل جميل و جذاب
4.سهوله في المناوره و راحه في القياده
5.اخر سيارات بيجو جر خلفي
تطل علينا بيجو في عام 1979 بسياره من الحجم المتوسط لتحل محل ال 504 الطيبه الذكر و تلك الاوقات كانت مرسيدس تقدم الفئه 230 (التمساحه كما يطلق عليها في مصر) و قد قامت بيجو بمحاوله مجاراه للمرسيدس ان لم يكن تقليد في بعض الاشياء و اخرجت ال505 الجميله التي تعتبر اول موديلات البيجو جاذبيه و رشاقه بعكس الموديلات السابقه(304 104 504) و قد اقتبست بيجو بعض الخطوط من المرسيدس (نلاحظ ترتيب العدادات بالتابلوه مثل مرسيدس فيوجد ثلاث دوائر اكبرهم الوسطي .عداد سرعه كبير في المنتصف و العدادات الاخري صغيره الحجم بالدوائر الاخر و وضعيه الكاسيت المنخفضه في الكونسول الوسطي و ترتيب الهوايات بالتابلوه ) و الاهم من زلك و التي اصبحت نقطه قوه للبيجو هو انها استوحت نظام التعليق ايضا من المرسيدس فخرجت السياره بثبات و موزونه و اصبحت من اجمل سيارات عصرها بالنسبه للقوه و المتانه و الشكل الانسيابي.
بالنسبه للمحرك فقد استعانت بيجو بمحرك ال 504 سعه 2000 سي سي بقوه 110 حصان في اولي الموديلات و الحقته بمحرك اخر دو سته اسطوانات سعه 2200 سي سي بقوه 130 حصان في اواسط الثمانينات و قامت باجراء تعديلات بسيطه علي السياره في عام 1987 و توقف انتاج اخر سياره جر خلفي للشركه اوائل التسعينات .
موديلات الساره كانت كعاده بيجو تحمل رموز GR بدون اي كماليات اطلاقان و SR بجميع الكماليات و فتحه سقف ماعدا التكييف او بدون فتحه سقف لكن بها تكييف ثم بعد ذلك في اواسط الثمانينات تغيرت الاسما الي GL و SL بالترتيب مع تغيير وضعيه تانك البنزين من الشمال الي اليمين
اخيرا اود ان اشير ان ال 505 اخر سياره لبيجو استقدمتها الولايات المتحده و لا زال هناك في اوربا سيارت منها تستخدمها الشرطه و الاسعاف.
توقف الانتاج عام 1992 لتترك الفئه 500 خاليه حتي الان و عوضت بيجو هذا النقص بموديلات الفئه 400 مثل 405 و 406 و 407 و موديلات الفئه 600 امثال 605 و 607

[Abdallah]

انا احترم هذه السيارة جدا جدا وبيسموها فى مصر الطيارة ولكن يعيبها ارتفاع اسعارها المبالغ فيها يعنى انا كنت بشترى واحدة موديل 80 ولقيت صاحبها طالب فيها 50 الف جنيه قال ايه عشان فابريكة دواخل وشوف انت بقة 50 الف دول ممكن يركبونى جولف 4 منطفة حرة :D

[hazem_khidr]

و الله يا عبد الله مش عارف اقولك ايه زوقنا دايما زي بعض
هيا فعلا العربيه جات فتره علت فيها اول بس برضه اسعارها بالنسبه لل504 مش مبالغ فيها دي ارخص منها يا راجل تخيل و موديل 80 اللي بتقول عليها ما تزيدش عن 35 الف انما 50 الف دي موديل تسعينات اللي بيسموها تابلوه طياره فعلا

[hazem_khidr]

انت بقي كده شجعتني احكي شويه مواقف عن الخبطات و ايام الشباب(ليت الشباب يعود يوما)
مره من المرات ايام ما كنت باخد العربيه و انا صغير من ورا بابا برضه هو عرف و بقي بيخبي المفتاح تحت المخده و هو نايم بس دماغي يا عبد الله ما وصلتنيش للي انت بتعمله .انا بقي كنت عامل حساب اليوم دا و عامل نسخه مفاتيح ليا و مخبيها:)
المهم مره اخدت العربيه و نزلت و بعدين و انا ماشي عربيه نقل رجعت عليا خبطتني في الكبود و الرفرف خبطه بسيطه المهم رجعت سيبت العربيه تحت البيت في مكانها بالضبط و بعدين ما قولتش اي حاجه خالص لحد ما قبل ما يقوم من النوم بربع ساعه دخلت و قولتله الحق يا بابا واحد بعربيه نص نقل بيحمل من الجراج اللي قدامنا حاجات و خبط في العربيه و هو راجع و مالحقتش اوقفه و طلعت اجري وراه ما لحقتوي:)
المهم نزل الشارع يشوف العربيه واحد جه و قاله (مش مشكله حازم لسه صغير برضه و قدامه كتير علي ما يتعلم!!!!) ف بابا فهم اني انا اللي كنت واخدها ما اتخبطتش مني ولا حاجه
طلع بقي و عينكم ما تشوف الا النور و من يوميها ما عدتش بكلم اتلراجل دا لمده سنه او اتنين بس برضه باخد العربيه من وراه:)

[alaaaboelata]

بصراحة هيا عربية جامدة جدا جدا
شكرا

[alaaaboelata]

واضح ياستاذ حازم انك بتحب البيجو زى حالاتى ؟؟؟؟

[hazem_khidr]

و الله يا استاذ علاء انا مش حكايه بحبها انا بحب العربيه الكويسه
انا عشقي الاول و الاخير 132 2000!!!!! تخيل بقي

[alaaaboelata]

و الله يا استاذ علاء انا مش حكايه بحبها انا بحب العربيه الكويسه
انا عشقي الاول و الاخير 132 2000!!!!! تخيل بقي

هى فعلا العربية دى كويسة جدا
وال 132 2000 جميلة بردة وبصراحة انا بحب كل العربيات القديمة اللى اثبتت جودتها لأن الزيرو بردة لسة فى ماركات مش ضامن هى هتفضل وتعيش زى البيجو و132 ولا لأ ، يعنى مثلا تيجى تبص على البيجو مثلا تلاقى عربية ماشية من السبعينيات ولسة كوديسة ومستحملة زى مابيقولو كدة بلغة السوق ( اتومبيل دكر )
هههههههههههههههههههههه
شكرا

[yousef]

شكرا استاذ علاء شكرا استاذ حازم فكرتونى بالذى مضى
كانت ايام ما فيش احلى منها
انا فضلت راكبها لغاية 1998 و يا ريتنى كنت سيبتها واقفه بس قدام البيت
كنت بحس بالامان و انا راكبها
انما خفت عليها لانها كانت بدات تتقمص منى لما تشوفنى سايبها و راكب الدوجان او اللانسر
و لذلك قلت حد تانى اولى بخيرها
و بعتها رخيص علشان ما تتعذبشى معايا بعتها ب24 الف
بس كرامه ليها برضه بعت العربيتين التانيين وراها على طول و اشتريت نيسان صنى98
الله يرحم ايامها كانت ايام جميله جميله جميله

[alaaaboelata]

شكرا استاذ علاء شكرا استاذ حازم فكرتونى بالذى مضى
كانت ايام ما فيش احلى منها

الشكر لله وحدة
هى فعلا ايام جميلة ومش عايز اقولك انى بحس فى العربيات دى بأصالة محستهاش فى أى عربية حديثة ( ولو ان بعض الناس هتزعل من كلامى دة ) بس هى دى الحقيقة

و بعتها رخيص علشان ما تتعذبشى معايا بعتها ب24 الف

بس دى كدة انت بعتها ببلاش هى العربية كانت عايزت تتشد ولا اية ؟
شكرا