عاوز ميكانيكى للماروتى ؟

[خالد]

ياريت ياجماعة اللى يعرف ميكانيكى كويس للماروتى أعمل عنده الصيانة الدورية للعربية يقولنا فين مكانه
لحسن أنا أتعقدت خلاص من التوكيل ومش هاروحه تانى للسرقة العلنى والطلسئة فى الصيانة والفهلوة

[m7nsh]

والله يااستاذ خالد انا المفروض اروحلهم صيانه الألف و شايل هم المشوار ده وحاسس انه تقيل على قلبى اوى من كتر ما سمعت كلام زى الفل عن اللى بيحصل هناك

ياريت حضرتك تقولنا انت عملت كام صيانه معاهم و انهو واحده اللى جبت اخر منهم و خلتك تبعد عن سكتهم خالص كده ؟؟ و كان فرع ايه ؟

و ربنا يهدى

*******

سؤال على بالى يا استاذ خالد و معلش عارف انه ملوش اى علاقه من قريب او بعيد بالموضوع ,, ارجو حضرتك متضايقش ,, :o

الكريسيين اللى ورا فى الماروتى بنزل الضهر بتاعهم ازاى عشان لوهشيل فيها حاجه ؟؟!!! انا لما قريت الكتالوج مفهمتش من الرسمه فين الدراع بالظبط ,, ياريت حضرتك تقولى مكانه اكون شاااااااااااااكر جدااااا

[maak333]

السلام عليكم
مكان الدراع فوق في طرف الكرسي من ناحية الباب هتشده لفوق وبعدين تسحب الكرسي لقدام هاتلاقيه نزل معاك...وبالنسبة لموضوع الصيانة الدورية انا عملت صيانة الالف غند مركز الصيانة اللي في الدقي وكانو كويسين بس التاخير هو كان المشكلة مع اني كنت حاجز قبلها باسبوع
وشكرا...
أبو مريم.

[m7nsh]

متشكر جدا ياابو مريم على ردك عليا

و بعد اذن استاذ خالد صاحب الموضوع

معلش سؤال تانى , قصدك ع التاخير انك فضلت مستنى العربيه تخلص فى الصيانه كتير ولا تاخير فى انهم بيدوك معاد بعد مده طويله عشان تروح اصلا ؟؟

ومعلش تااااااااااانى دفعت حضرتك كام عندهم فى صيانه الألف ؟ و كنت معاك ضمان ولا لأ ؟؟

و شكرااااا يا باشا عارف انى دوشتك ,,

[خالد]

الأخ الفاضل / معلهش أنا اللى اسف لأنى أتأخرت عليك جداً جداً فى الرد لأنى كنت مشغول جداً
وتقريباً مكنتش بفتح النت نهائى
على العموم أنا عملت 3 مرات صيانة معاهم ( ألف كم ، 5 الاف ، 10 ألاف)
طبعاً فى البداية كانت الأنطباعات عنهم جيدة فى الألف وهى مجانية ولكن بتدفع طبعاً ثمن الزيت والفلتر
دفعت 75 تمن 3 لتر زيت ( مكتوب فى الكتالوج أنها بتاخد 2.7 لتر فقط!) + 35 تمن الفلتر يبقى المجموع 110 جنيه+ 10% ضريبة (11ج) يبقى الأجمالى 121 جنيه بالتمام والكمال ( ودى أسعار ديسمبر 2007)

صيانة الــ 5000 ماحستش بأى فرق فى العربية نهائئئئئئئئئئئئئئئئئئئئئئ ئئئئئئئئئئئئئئى وطبعاً دفعت تمن الزيت 75 جنيه والفلتر غلى بقى بـ 45 جنيه + مصنعية 65 جنيه + الضريبة 18.5 يبقى الأجمالى = 203.5

وصيانه الـ 10000 كيلو ( 3 نوفمبر 2008)
تغيير زيت 90 ج
فلتر 45 ج
3 بوجيهات 30 ج
أبلاتين 30 ج
كوندنسر 25 ج
مصنعية 100 ج
ضريبة 32 ج
الإجمالى 352 جنيه بالتمام والكمال

وركبت عندهم أنذار وسنتلوك بــ 600 جنيه شامل التركيب والضريبة

وأنطباعاتى عنهم زى الزفت لأنى مبحسش بأى فرق بعد أستلام العربية ( الفرق الوحيد كان عند صيانة الــ 1000 المجانية)
مواعيد الحجز غالباً بعد أسبوع
الأنتظار لتسليم العربية فى نفس يوم الصيانة بتقعد كتير قوى ( ولاحظت أنهم فى ناس معرفة كتييير بيروحوا وبيمشوا بدرى جداً وعلى طول تقريباً والله أعلم بيظبطوهم حلو !!!!) أنا روحت الساعة 11 ص قاللى المهندس هاتستلم الساعة واحدة ونص طبعاً أستلمت الساعة 5 المغرب لما كنت هاتجنن!! ومفيش فرق فى العربية خالص

المتابعة بتاعتهم بعد الأستلام الانسة تقريباً مكبرة دماغها ، أتصلت بيا بعدها بحوالى 4 أيام وأ،ا كنت فى المحاضرة ومبحبش أرد على حد وأنا جوة المحاضرة
كنسلت المكالمة ، بعد كده بحوالى نص ساعة فقط حاولت أنا الأتصال بيها الهانم مبتردش على الموبايل

وعلى فكرة ده فرع الدقى
وأنا تحت أمرك لأى أستفسار

[m7nsh]

يا استاذ خالد ولا يهمك و متشكر جدا جدا لمتابعه حضرتك

طيب فى سؤال ,, انا شايف ان الواحد ينفض للتوكيل ده خالص بقى و يتعامل من بره بره و العربيه صغيره و مكشوفه للمكانيكيه و سهل التظبيط و التربيط فيها ,, يعنى الواحد ممكن يعمل صياناته مع نفسه عند اى مكانيكى شاطر و سمعه و خلاص

كمان المشكله اللى عندى انى ساكن فى ميت غمر (الدقهليه ) ودى حوار عشان اوصل القاهره او فرع للتوكيل ( اكتر من 100 كيلو ) و انا اصلا مش فاضى خالص الفتره دى كلها امتحانات و بتاع فى الكليه (هندسه مش بتاعت هزار ) و خصوصا ان العداد عملله بتاع 1600 1700 كيلو و لسه معملتش اى صيانه بس غيرت الزيت و الفلتر بره عند واحد

السؤال بيقول ,, انفض للتوكيل و اخلينى بره و ابعد عن القرف و ضيعان الوقت وقلبه الدماغ و الأسعار النار ؟ ولا اروحلهم و استحمل ؟
كمان ايه الفرق بين التأمين و الضمان ؟ لأنى فاكر ان العربيه عليها تأمين بس مش عارف معاها ضمان ولا لا

فانت ايه راى حضرتك ؟ و ياريت اى حد يدخل الموضوع يقولنا رايه برده

و شكراااا ليكو

[خالد]

والله أنا عن نفسى مش هاروح التوكيل تانى وزى ماحضرتك قلت العربية صغيرة وكاربرتير وسهل جداً أى ميكانيكى يشتغل فيها بس عيبها أن الحوض ضيق شوية وبيتعب الميكانيكى
ثانياً بالنسبة للضمان فده حضرتك بتاخده من المعرض لما بشترى العربية وهو مكتوب عليه سجل الصيانة والضمان وفيه بيضمن الوكيل السيارة مدة 36 شهر أو 60000 كم أيهما أقرب ( أى أيهما ييجى الأول يعنى لصالح الوكيل على طول الخط ) ضد عيوب الصناعة ، وطبعاً عندنا فى مصر المحروسة أثبت بقى أن ده عيب صناعة لو حصل لاقدر الله للعربية أى حاجة ، كل الوكلاء الغير محترمين يقولك لأ ده عيب أستخدام ويرفض يغيرلك حاجة تبع الضمان ، يعنى فى بلدنا الضمان زى قلته!!!
وطبعاً علشان الضمان يفضل سارى على العربية لازم تكون منتظم فى الصيانة عندهم وممنوع تعمل أى حاجة برة ولا حتى تركب كاسيت أو تشترى واحد ماركة محترمة وهما اللى يركبوه برضه رفضوا وبيجبرك أنك تاخد من عندهم ماركة زبالة !!!!
وعلى فكرة الصيانة الــــ 1000 المجانية مسموحلك بس بــ 200 كم زيادة عن الألف يعنى حد أقصى العربية تكون عاملة 1200 كم وألا ياخد منك مصنعية!!!

أما بالنسبة للتأمين فده موضوع تانى خلاصته أنك مأمن على العربية فى أحد الشركات التأمينية ضد الحوادث والسرقة لاقدر الله وبيدفعولك تعويض عن أى حاجة تحصل فى العربية ، وغالباً بيشترط أنك تصلحها فى أماكن معينة وهما اللى بيدفعوا
وربنا يسترها معاك ويكرمك فى الأمتحانات ياباشمهندس

[m7nsh]

بجد الف الف شكر يا استاذ خالد ,, متشكر جدااااا ع الرد الوافى ده

بس ده معناه ان الواحد زى ما جاب العربيه يحطا فى بيته فى الصالون بقى او فى الدولاب و يقفل عليها و ميلمسهاش حتى عشان الضمان ميروحش !!

بصراحه حاجه تحرق الدم ,, بس ماعلينا واضح ان سكه التوكيلات دى سكه مش ولا بد

هو الواحد يستنى شويه فلوس ييجو كده و يعملها سنتر و انذار بره و يتحرق الضمان ع التوكيل ,, و الحمد لله ان العربيه سهله للميكانيكيه

والف شكر يا استاذ خالد مره تانيه ,, تعبتك معايا

[خالد]

أى خدمة ياباشمهندس وتحت أمرك فى أى أستفسار
وربنا يباركلك فى العربية ودايماً يديك خيرها ويبعد عنك شرها:k10:

[freespoken]

ياريت ياجماعة اللى يعرف ميكانيكى كويس للماروتى أعمل عنده الصيانة الدورية للعربية يقولنا فين مكانه
لحسن أنا أتعقدت خلاص من التوكيل ومش هاروحه تانى للسرقة العلنى والطلسئة فى الصيانة والفهلوة

100 100
وانا كمان عاوز واحد بس في الاسكندريه لو تكرمتو