الموبايل إتسرق 000 أعمل إيه ؟؟؟؟؟؟؟؟؟؟؟؟؟؟؟؟؟؟

[ahit]

السلام عليكم و رحمة الله و بركاته

موبايلى إتسرق النهاردة فى بنزينة كالتكس عباس العقاد اللى كنت رايحها عشان أظبط زوايا لعربيتى و عربية واحد صاحبى , و فى لمح البصر الموبايل إتسرق من جوا العربية مع إن وصلة الصوت كانت راكبة فيه و كنت سايبها أمام الناس بتوع ظبط الزوايا و لكن للأسف مش قادر أتهم حد معين.
المهم إنى إتصلت بالشركة و وقفت الخط عشان هو بيزنس و لكن مش عارف دلوقتى أعمل إيه و دمى محروق قوى و متغاظ , فلو سمحتو دلونى أعمل إيه بعد كدا يعنى محضر مثلاً و لا إيه و أنا معايا طبعاً فاتورة الشراء و الضمان و الكرتونة و كل مشتملاته , هو نوكيا 6280 و كان عليه أرقام مهمة و كتيرة جداً و كمان ملفات و صور شغل.
طبعاً قدر الله و ما شاء فعل
بس يا ريت تدلونى أعمل إيه و هل ممكن يرجع و لا خلاص كدا حتى لو عملت محضر
و شكراً

[bee]

للاسف أملك الوحيد ان يكون ليك حد في الشركة ويكون الحرامي معفل ويكون عمل اتصال وتمسك بداية الخيط (الرقم الي اتصل بيه) ..

غير كده على حسب معلوماتي المحضر ملوش قيمة لان النائب العام الغى خاصية التتبع على حسب علمي بردو ..

عوضك على الله .. وشوف رأي الزملاء

تحياتي وربنا يعوضك خير

[Busquets]

اللى اعرفو ان زمان كان اى موبايل بيتجاب بالserial number !

مش عارف دلوقتى ايه النظام

اعمل محضر او اسأل و لكن صعب جدا يرجع لو فعلا لغوا نظام التتبع دا!

[ahit]

للاسف أملك الوحيد ان يكون ليك حد في الشركة ويكون الحرامي معفل ويكون عمل اتصال وتمسك بداية الخيط (الرقم الي اتصل بيه) ..

غير كده على حسب معلوماتي المحضر ملوش قيمة لان النائب العام الغى خاصية التتبع على حسب علمي بردو ..

عوضك على الله .. وشوف رأي الزملاء

تحياتي وربنا يعوضك خير

جزاك الله خيرا على الرد السريع
بس هو للأسف قفل الموبايل بعد ما خدو تقريباً على طول لأنى طبعاً إتصلت عليه لقيته مقفول .
ربنا يعوض عليا و حسبى الله و نعم الوكيل فى الناس اللى ماعندهاش أمانه ولا ضمير

[sendrella]

ال serial number بيجيبه
و انا شبه متأكدة من الموضوع ده
جرب كده تعمل محضر و تديهم السيريال و ان شاء الله اول ما الحرامي
يركب اي خط في الجهاز هيتقفش على طول
بس طبعا الموضوع ممكن ياخد منك شوية وقت
و ربنا المستعان

[ahit]

ال serial number بيجيبه
و انا شبه متأكدة من الموضوع ده
جرب كده تعمل محضر و تديهم السيريال و ان شاء الله اول ما الحرامي
يركب اي خط في الجهاز هيتقفش على طول
بس طبعا الموضوع ممكن ياخد منك شوية وقت
و ربنا المستعان

السلام عليكم و رحمة الله و بركاته

جزاكم الله خيرا جميعاً
بي هل متأكدة إن موضوع التتبع دا شغال؟
و شكراً مره ثانية

[sendrella]

السلام عليكم و رحمة الله و بركاته

جزاكم الله خيرا جميعاً
بي هل متأكدة إن موضوع التتبع دا شغال؟
و شكراً مره ثانية

و عليكم السلام ورحمة الله و بركاته
مرة سمعت واحدة في مكان عام بتحكي لواحد ان موبايل صاحبتها اتسرق و بلغت عنه بالسيريال و فعلا جابوه بعد 3 شهور من اسكندريه مع ان هي في الهرم
و الكلام ده كان من حوالى شهر
يعني كدة موضوع التتبع ده شغال ان شاء الله
و ربنا معاك ان شاء الله
و لا شكر على واجب احنا كلنا اخوات

[A.Saad]

عن تجربة لواحد زميلى موبايله اتسرق
بس الكلام دة قبل ما يتقال ان نظام التتبع اتلغى ، هوة غالبا مش اتلغى ، س الاول النيابة الجزئية هى كانت بتدى الجواب لشركة المحمول ، النظام اتعدل وبقى الجواب من النيابة الكلية
بتعمل المحضر ، بتثبت فيه السيريال من الكرتونة ، قدم صورة الفاتورة فى المحضر لو موجودة
المحضر يروح النيابة
تابع فى النيابة
تاخد جواب لشركة المحمول
يتعمل تتبع
لو حد اتكلم بيعرفوا هوة مين ويجيبوه
لو ليك حد معرفة فى المباجث او شركة المحمول الدنيا تبقى اسهل

قدر الله ما شاء فعل

بص ياسيدى نصيحه من اخ انت هتروح تعمل محضر فالقسم اللى انت تابع لى بسرقة الموبيل
من البنزينه من المكان الفلانى واليوم التريخ بعد كدة هيدك ورقة برقم المحضر هتروح بيها النيابة عشان يستخرجلك اذن تتبع موجهه لشركة فودافون وموبنيل واتصلات وهتروح بيهم الورقة دى بس من رأى بعد متاخد اذن التتبع اصبر شوية متروحش على طول يعنى تأخر شوية اسبوع او اتنين قبل متروح
شركات المحمول عشان الحرامى يطمن ويبدا بيع الموبيل ويكون اتفتح وبأذن الله هيرجعلك وانا اتسرق منى تلفون ورجعته ومش انا بس لأ انا وصحابى كمان حصل معانا نفس الموضوع ورجع على فكرة تلفونى رجع بعد سنه كاملة وبعد مجبت الاحسن منه بس برضة فضلت ورا لغايط مجبته ........واتمنى اكون افدتك

ولو لقدر الله ملقتش الموبيل متيأس لوح النيابة تانى وأستخرج اذن تانى بس سعتها اصبر شوية اكتر

[ahit]

السلام عليكم و رحمة الله و بركاته

جزاكم الله خيرا جميعا , و الله يا جماعه انت هونتو عليا الموضوع و ريحتونى بردكو الجميل و الراقى جداً
و فعلاً كلنا إخوات زى ما قالت أختنا الفاضلة سندريلا
و إن شاء الله هاروح للقسم بكره و أعمل محضر و بعدين أستنى شوية و أعمل زى ما الأستاذ/ beautiful0mind و الأستاذ/ asaadte ما قالو و ربنا يقدم ما فيه الخير.