اول شركة للتأمين التكافلى فى مصر.... وهم ام حقيقة

[معاذ الشرباصى]

بيت التأمين المصرى السعودى

دى شركة تأمين بقالها 4 سنين فى مصر

فى كل اعلاناتهم بيقولوا انهم اول شركة تأمين تكافلى فى مصر, طبقا للشريعة الاسلامية

انا مش ملم بموضوع التأمين التكافلى, و كيفية تطبيقه, علشان كده مش عارف احدد هل هما صادقين فى كلامهم و لا لأ,و يبقى اسمهم كده و زيهم زى غيرهم

انا كلمت المسئول عن تأمين العربيات, و قالى ان عندهم لجنة شرعية ماسكها الشيخ نصر فريد واصل

و قعد الصراحة يقولى كلام كتير, بس انا معلوماتى فى الموضوع ده ضحلة جدا

فكنت اتمنى من الناس المتعمقة فى الموضوع ده زى د.احمد سمير و الاستاذ وائل عطية لو تتصل بالشركة او تسال عنهم و يقولوا لنا هل هى فعلا اول شركة للتأمين التكافلى, و لا احمد زى الحاج احمد :?:

البيانات بتاعتهم اهه:

بيت التأمين المصرى السعودى

المركز الرئيسى :15 شارع مصدق - الدقى- الجيزة
تليفون: 33377997 (10 خطوط) فاكس : 37495916
ص.ب. 309 الدقى- الجيزة الرمز البريدى: 12311
الموقع الالكترونى : www.esih.com.eg
البريد الالكترونى : esih@esih.com.eg
اسم المسئول عن تأمين العربيات : أ/خالد سعيد

[khalid_adel]

الف شكر يا معاذ على المعلومات دي
وياريت ياجماعه اللي ملم بالموضوع وشاكك فيه بالحرمانيه يتصل يسئل او يروح عندهم عشان نعرف اذا كان فعلا فيه فرق ولا هو هو والواحد لو كده يلتمس الحلال افضل عشان ربنا يكرمه
وجزاكم الله كل خير

بعد بعض البحث فى جوجل لقيت الوثائق التالية و هى عبارة عن ملخصات محاضرات تم القاؤها فى مؤتمر عن التأمين التكافلى نظمته الهيئة المصرية للرقابة على التامين برعاية وزارة الاستثمار فى القاهرة عام 2005، و شارك فى هذا المؤتمر ممثلون عن شركات التامين وإعادة التامين التى تمارس التامين التكافلى والتعاونى وهيئات الرقابة على التامين ووسطاء التامين وذلك لتبادل الخبرات وعرض التجارب الخاصة بالبلاد التى سبقتنا فى هذه التجربة وحققت فيها نجاحا وتميزا ملحوظا ومنها سوق التامين الماليزى:

http://www.eisa.com.eg/Takaful_day1.pdf
http://www.eisa.com.eg/Takaful_day2.pdf

[معاذ الشرباصى]

هل حضرتك وصلت من كلامهم لمعلومة مفيدة؟

للأسف الملفين مش عاوزين يفتحوا معايا

بس انا كان نفسى اعرف, هل هما فعلا بيطبقوا التأمين التكافلى فى مصر, و لا زيهم زى غيرهم؟

[AhmedElsayed]

على حد معلوماتى القليلة ان التأمين التكافلى (من اسمه حتى) لا يهدف للربح وانما للتكافل
يعنى التأمين نفسه حرام لما فيه من غرر واكل اموال الناس بالباطل (انت ممكن تاخد اكتر من اللى انت دفعه او اقل لو محتجتش التأمين يبقى فى طرف دايما فلوسه بتضيه وطرف بياخد اكتر من حقه)

فجه الناس حبوا يتحايلوا على الأمور وقالك الاسلام يدعو إلى التكافل يعنى ممكن لو واحد وقع فى ازمة اخواته يساعدوه

لكن النقطة دى فيها اختلاف لان اولا: التكافل بيبقى بين ناس عارفة بعضها
ثانيا ودى من وجهة نظرى ان التكافل يكون مع المحتاج وليس مع شخص يملك سيارة بنصف مليون جنيه مثلا

ولكن فى النهاية ستبقى نقطة انه لو وجد هذا النوع من التكافل فلابد الا يكون بهدف الربح يعنى الجهة القائمة عليه تكون لا تهدف للربح لان الموضوع كله تكافل بين اخوة فى الوطن او فى الاسلام

لكن طبعا الشركات اللى بتقول انها بتعمل تكافل دى بتهدف للربح وبتكسب وبتكسب كتير كمان
يبقى معتقدتش ان ده تكافل
ايه الحل؟ للاسف مش عارف
لان الاقتصاد الاسلامى اتطور فوق منتخيل فى كل الدول الاسلامية زى ماليزيا والدول العربية الخليجية وحتى فى الدول الاجنبية لخدمة الجاليات الاسلامية لكن للاسف فى مصر منعرفش عنه حاجة خالص غير اوهام بنك فيصل (اللى لو كان غلط يبقى مش معناه ان البنوك الاسلامية كلها زيه)
بس رغم التطور ده كله الا ان التأمين بالذات مازلت قضية شائكة مش عارفين يحلوها بطريقة اسلامية

والله اعلم

[goodwave]

اعتقد ان دة حاجة زي P & I CLUBS

دي عندنا في الملاحة اسمها نوادي الحماية protection والتعويض Indemnity وهي عبارة عن مؤسسات يشترك فيها ملاك السفن ويدفعوا اقساط شهرية تكفل لهم الحماية والتعويض ضد اي حوادث او قضايا مع الغير. هذة المؤسسات من المفروض انها ليست مؤسسات ربح لانها لا تستسمر اموالها الخاصة ولكنها تنفق من اموال الاعضاء ولذلك من اهم مبادئها
1- Mutual Trust
&
No profit no loss

اعتقد ان المبدأ ممكن يكون واحد مع بعض التعديلات لتتماشى مع الشريعة الاسلامية! او لا تتماشى ويبقى زي الاستاذ معاذ ما قال احمد زي الحاج احمد!

[أبو عبدالله]

يا جماعه التأمين التكافلي انك بتدفع للشركة الفلوس وغريك بيدفع وغيرك بيدفع وبعدين اي واحد يحدث له ضرر يتم تمويله بما يناسبه
ولكن اذا لم يحدث لأحد شئ يتم استرجاع الفلوس للمشتركين مع خصم المبالغ الادارية التي تعمل على ادارة هذه المنظمة

وبذلك لا يكون هناك اكل اموال الناس بالباطل وانت متاكد ان الناس اللي معاك هتستفاد حتى لو انت مستفدتش لأنك بتكون داخل بنية أفادة الناس وافادتك

[AhmedElsayed]

طيب ومين بيطبقها فى مصر من غير متكون الشركة عملاها استثمار وخاصة متكونش طبعا بتستثمر اموالها فى استثمارات ربوية زى شركات التأمين العادية ومتكونش بتدفع فايدة للمشتركين والا نبقى زى شركات التأمين العادية مفيش فرق

[جندى مجند]

هل حضرتك وصلت من كلامهم لمعلومة مفيدة؟

للأسف الملفين مش عاوزين يفتحوا معايا

بس انا كان نفسى اعرف, هل هما فعلا بيطبقوا التأمين التكافلى فى مصر, و لا زيهم زى غيرهم؟

بصراحة لم أقرأ الملفات و لكن مريت عليها مرور عابر سريع ... فمش حأقدر أفيدك للأسف لكن احنا فعلاً فى مصر الاقتصاد الاسلامى عندنا ضعيف جداً رغم ان دول تانية كتير المجال دة قوى جداً فيها ... دة حتى البنوك الغربية بتفتح فروع للمعاملات الاسلامية فى انجلترا و أمريكا! و احنا هنا فى أمس الحاجة لمثل هذا النشاط فى مجالات البنوك و التأمين و التمويل العقارى بس الحكومة لا توفر أى دعم أو تشجيع أو تشريع مناسب فى المجال دة للأسف

[معاذ الشرباصى]

دلوقت انا اتصلت بدار الافتاء المصرية, و سالتهم على الشركة دى و قالوا لى التأمين بتاعهم حلال

فأظن ده خبر كويس للناس اللى عاوزة تتحرى الحلال و تأمن على عربيتها بطريقة شرعية سليمة