نيو أكسنت - كيا ريو - بروتون جين 2

[buzzy]

بسم الله الرحمن الرحيم
سلام عليكم يا اجمل ناس
دي أول مشاركة ليا بس انا متابعة المنتدى من فترة
و بجد كنت عايزة اشكر كل الأعضاء المحترمين جداً جداً
على مساعدتهم لكل الناس الجديدة و عدم البخل بأي معلومة.
نيجي بقى لمشكلتي
مبدائياً انا بنت و عندي 23 سنة ودي أول عربية زيرو هأركبها انشاء الله
و بعد بحث و تدقيق و تدوير لقيت ان في 3 عربيات محيرني جداً, و دا طبعاً لتشابهم الفظيع
1. نيو أكسنت (1600cc)
2. ريو (1400cc)
3. جين 2 (1600cc)
>>> كلهم مانيوال موديل 2009

عجبتني اوي الNew accent و هي الأقرب يعني,, بس بعد ما كنت خلاص هدوس
لاقيت الناس هنا كتير بتشتكي من عفشتها الناشفة ودا عيب مش سهل,, يعني لازم تبقي عربية مريحة

قلت طيب مالها الRIO وهي نسخة من الأكسنت و توكيل أنضف طبعاً
بس بصراحة استحرمت ادفع نفس المبلغ في 1400cc

قلت مالها الgen2 شبابي وتحفة في الكماليات,, بس نفس مشكلة التوكيل و قطع الغيار
دا غير انها أغلى .. و اسم مش كبير زي الكيا والهيونداي
بعد الرغي الكتير دا بقى:

- كنت عايزة اعرف مواصفات ال3 عربيات في مصر ايه بالظبط(الكماليات) 2009 طبعاً؟؟

-هل فعلاً الأكسنت عفشتها ناشفة و مش بتلين مع الأستعمال لدرجة ان الى قاعد يبقى حاسس بيها و مش مرتاح؟؟

-رأي الناس في الجين 2 ,, بمعنى ,هل انا ابقى مغفلة لو انا احتياجي للعربية داخل القاهرة و اجبها؟؟

عشان انا سمعت انها حريقة بنزين..
و يا ريت الى يرد عليا يكون فعلاً ركب او عنده خلفية كويسة عن واحدة فيهم.

ان أسفة لو هاتعب حد معايا ,, بس انا حالياً مش موجودة في مصر
و قدامي حوالي شهرين و أشتري,, فعايزة ابقى جاهزة قبل ما الوالد يرجع في كلامه..

- اخر حاجة .. هل في فرق لو اشتريت من معرض عادي او من التوكيل؟؟

هل بيفرق في الضمان و فسعر العربية نفسه (لأن طبعاً انتم عارفين مشكلة الألوان و سرعة التسليم)؟؟

---------------------------------------------
بجد بشكر اي حد فكر حتى يساعدني,, و بجد بشكر نايل موتورز على السايت او المنتدى الرائع الشامل دا

[sarawe511]

انا لو منك اجيب النترا وانا مغمض .علي فكرة منة فضالي معاها النترا

[buzzy]

انا لو منك اجيب النترا وانا مغمض .علي فكرة منة فضالي معاها النترا

للأسف مش معايا فلوسها

هما 80,000 و كاش

انا لو هزود 2000 هيبقى عشان الجين2 (Airbags & Abs)

شكراً جداً لردك..

[NaviGator_13]

انا شايف الريو انسبهم ومش مشكلة ال 1400
اعتقد مش هتفرق كتير واستنى رأى باقى الاعضاء ان شاء الله يفيدوكى

[hani945]

أنا اقترح سكودا مينى فابيا 2009 ذات المحرك 1400 سى سى
غير كده كفاية إنها سيارة ألمانية الصنع وبها كماليات كثيرة

[ezzatfox]

انا رأيى نيو اكسنت احسن اختيار .. و دة بعد البحث و المقارنات :k47:و سؤالى لناس معاهم العربية فعلا .. عشان انا ناوى اجيبها قريب ..

[hotboja]

شايف جين 2 احسن

[buzzy]

و بعدين بقى كدة كل واحد قال حاجة و انا لسة محتارة

بجد بشكركوا جداً على اهتمامكم ...

بالنسبة للميني فابيا فهي عربية تحفة بس للاسف غالية عليا :k30:

[creative]

بصى يابوزى ...
انتى بتقولى من ضمن اختياراتك للسيارة ان معظم قيادتك داخل بلدنا المحروسة
وعلى ذلك يبقا لو بتدورى على توفير بنزين هانستبعد اى سيارة 1600 سىسى مهما كانت لانها فعلا هاتكون بتسحب بنزين كتير واسعار البنزين كل يوم ماحدش يعرف عنها اى حاجة
نرجع لباقى المعطيات اللى حضرتك طرحتيها
مشاوير داخل البلد=سيارة اقل من 1600 سى سى
ميزانية = 80.000 جنيه
فانا هاقول راى تانى ممكن تفكرى فيه بما انك بنوتة وعاوزة سيارة يكون شكلها كويس وتكون متجربة قبل كده وسمعتها كوسيسة جدا
فانا ارشحلك الفيات بونتو كلاسيك
سيارة ايطالية الصنع من الالف الى الياء+عوامل امان (وسائد هوائية)
توفير بنزين محترم
محرك 1300 سى سى يناسب الزحمة داخل البلد والتسارع بتاعه لحد 120 كويس جدا
شكل وانسيابية فى التصميم يناسب بنوتة فى سنك وخصوصا (النبيتى)
وكفاية انك راكبة عربية اوروبية نجحت نجاح باهر فى اختبارات التصادم
والله الموفق

[hani945]

أسعار السيارة اسكودا مينى فابيا 2009
1400 كاملة مانيوال 88900
1600 كاملة تبترونيك 109900
1600 سبورت مانيوال 109900
1600 سبورت تبترونيك 121000
1600 سيدان تبترونيك 118300

برجاء قراءة هذا الموضوع
http://www.nilemotors.net/Nile/showthread.php?t=52097