صيانة ال 25 الف للسريون

[معاذ الشرباصى]

السلام عليكم و رحمة الله و بركاته

أمس الثلاثاء 17 مارس, عملت صيانة ال 25 الف

دى تفاصيل الفاتورة

عمالة 75 جنيه
فلتر زيت 48.4 جنيه
موبيل 1 (4 لتر) 260 جنيه
شحومات 10 جنيه

الاجمالى 393.49 جنيه

بعد خصم 3% (لأنى دفعت بالفيزا)

الاجمالى بالضريبة: 403 جنيه

بالنسبة للتفاصيل:

وصلت على الساعة 10 تقريبا, كان فى زحام فى المركز .... استلم منى المهندس عمرو العربية على الساعة 10 و نص, و قلت له على ملاحظاتى و كانت كألاتى:

1- تزييق بالابواب الخلفية
2- نفس صوت الزنة بتاع السماعة اليمين (بتختفى لما تروح مركز الصيانة )
3- صوت كأن مياه ماشية تحت الدركسيون كده

قالى العربية هتخلص على الساعة 2 ظهرا

العربية خلصت تقريبا فى الميعاد, التزييق فى الابواب اختفى, صوت المسعاة مش موجود, لأنه اختفى قبل اما اوصل مركز الصيانة, فمش هقدر احكم (هما قالوا عملوه).

أما بخصوص صوت المياه, لما قلته لمهندس احمد عبدالوهاب فى الأول, قالى نكشف على سربنتينة السخن, و دى اعراضها ان يبقى في مياه بتنزل فى الدواسة, او خارج العربية حسب مكان السربنتينة, و العرضين دول مش عندى... مهندس احمد طلب منه يعمل لها اختبار ضغط, و لو فى حاجة غلط هتبان لأن لو محتاجة تغيير لابد من فك التابلوه بالكامل. هو المهندس فى الورشة الصراحة كان مصمم انه صوت عادى, و متواجد فى موديلات الدايهاتسو من سنة 99, وهو تشبيهه له كأنه "خرير ماء" و بيظهر لما العربية تبقى واقفة فترة مركونة, و كل اما تزيد الفترة دى, الوصت يبقى اوضح. الاأعراض دى فعلا عندى, لكن الصوت جديد, يعنى بقاله معايا بس 3 الاف كم, مكنش بيظهر قبل كده خالص!!

العربية اتغسلت كويس و كل تمام

بعض الاخبار الجديدة:

1- كنت ناوى اركب الانذار المرة دى, لكن القديم خلاص بطلوا يركبوه و حاليا الاصلى فقط, و ده تمنه 890 جنيه بالضريبة و التركيب, و الخواص بتاعته اقل من الحالى (مبيعملش lock لما تدوس فرامل اول اما تتحرك, و مبيشغلش السرينة الا لو حد حاول يدور العربية, مش يفتح بابها) يعنى خواصه اقل من القديم

دى صوره التقطتها له:




2- ابو رواش الميعاد اللى اتقالى 15 يونيو 2009 .... اتمنى طبعا

3- قلت لمهندس احمد على حكاية الزيت الباقى, و قالى حقك طبعا تاخده, و اطلبه عادى, بس انا قلت له الافضل انك تحط لكل واحد باقى الزيت بتاعه فى العربية, هيبقى افضل ان المبادرة تبقى من جانب التوكيل

4- فى تجديدات هتحصل فى مركز العبور مع بداية العمل فى ابو رواش, استراحة العملاء فوق هيكبروها, و تدخل على مكان السكرتارية, علشان تستوعب عدد عملاء اكبر, و فى تجديدات تانية كمان. و قلت له على حالة الحمامات كمان. ده بالاضافة ان النت كان شغال و اتحلت المشكلة بتاعته.

5- بخصوص صندوق الاقتراحات و الشكاوى, و قالى انه وقع على الارض و اتكسر, و اتعمل واحد جديد, و هيتم وضعه قريبا جدا, و ان الورق الخاص بالاقتراحات و الشكاوى موجود بالاسفل.

6- قطع الغيار اللى مكنتش موجودة فى الفترة الاخيرة فى منها موجود حاليا, خصوصا المرايات اليمين للتريوس و السريون. أنا سألت على كذا حاجة و انا هناك و كانوا موجودين.

7- قابلت ا/ايهاب ثابت مدير قطع الغيار, و قالى انه حاليا فى دراسة بتتم فى السوق لأسعار قطع الغيار, و وعد ان هيبقى فى تغيير فى الفترة القادمة بخصوص الاسعار و توافر قطع الغيار.

خليت مهندس احمد يشوف موضوع هيثم الخاص بصيانة ال 40 الف, و هكتب التفاصيل الخاصة بها هناك.

م/احمد له رجاء منكم: إن اى حد واجه مشكلة و هو هناك فى مركز الصيانة يطلب يقابله على طول, و هو بيؤكد ان مش هيخلى حد يمشى الا و مشكلته محلولة و ميمشيش و هو زعلان او متضايق

دى معظم الحاجات اللى فاكرها, لو حد عنده اسئلة تحت امركم

[عمرو عمارة]

مبارك الصيانة يا معاذ.....ما شاء الله أخبار مطمئنة

هو مفروض يرجعلك زيت أد إيه ؟؟

[معاذ الشرباصى]

مبارك الصيانة يا معاذ.....ما شاء الله أخبار مطمئنة

هو مفروض يرجعلك زيت أد إيه ؟؟

الله يبارك فيك يا باشا

حسب الكتالوج, العربية بتغير بالفلتر 3.6 لتر

يعنى يرجع لك 0.4 لتر

[معاذ الشرباصى]

كان فى خبر صاعق عرفته و انا هناك:

سعر فلتر البنزبن : 1300 جنيه (الف و ثلاثمائة جنيه!!!)

الفلتر موصى انه يتغير عند ال 60 الف كم

تفسيرهم للسعر المرتفع ده, انه بيبقى معاه العوامة كمان!

معلش على العكننة دى

[عمرو عمارة]

يا الله !!!!!....ليه كده ؟؟

الله يمسيكي بالخير يا كليو.....فلتر كل 40الف بـ65جم

بس جدول الصيانة مش ذاكر تغير فلتر البنزين عند الـ60ألف ؟

[MoToRiZeR]

مبروك عالصيانة يا معاذ .
يا رب أبو رواش يفتح بقي لحسن انا خلاص بقيت أحس إني مسافر فعلاَ و انا رايح التوكيل .. بس خسارة إن باشمهندس أحمد مش هيبقي فيه .

الإنذار الجديد شكله ظريف بس خواصه الحقيقة مش شايفلها فايدة! أصل هنا مخدش بيحاول يدور العربية هنا بيكسروا الإزاز ويقلبوها ! فا الإنذار كدة يبقي زي قلته .. طب لو حد حب يجيب الإنذار اللي كان معتمد منهم و بيركبوه زي اللي انا ركبته (إسمه أونو) .. هل هيركبوه ؟

و يا ريت تغييرات أسعار قطع الغيار تبقي لتحت مش لفوق .. و شكراَ يا جميل عالتقرير .

[NaderNabil]

كان فى خبر صاعق عرفته و انا هناك:

سعر فلتر البنزبن : 1300 جنيه (الف و ثلاثمائة جنيه!!!)

الفلتر موصى انه يتغير عند ال 60 الف كم

تفسيرهم للسعر المرتفع ده, انه بيبقى معاه العوامة كمان!

معلش على العكننة دى

لولا إني محترم...كان زماني قولت لفظ مش كويس و اتوقفت من المنتدي

عموماً شكراً يا ميزو علي التغطية

[MoToRiZeR]

كان فى خبر صاعق عرفته و انا هناك:

سعر فلتر البنزبن : 1300 جنيه (الف و ثلاثمائة جنيه!!!)

الفلتر موصى انه يتغير عند ال 60 الف كم

تفسيرهم للسعر المرتفع ده, انه بيبقى معاه العوامة كمان!

معلش على العكننة دى

يا نهار أسود !!!!
عوامة مين .. ده الألف و 300 جنيه دول أروح أأجر بيهم يخت في العين السخنة مش عوامة !!!!!!

لالالالالالالا مينفعش الكلام ده .. يعني فلتر البنزين لوحده أغلي من صيانة ال 60 ألف كلها في البيكانتو علي سبيل المثال !؟

ليييييييييييييييييييييييي ييه
بتاااااااااااااااع ايييييييييييييييييييييييي ييييييييييه

طب بجد ليه ؟!
إزاي ؟؟؟؟

انا هشوف سعره عالنت في إنجلترا و ماليزيا و سنغافورة كام

يعني الواحد هيبقي مكتئب أصلاَ من صيانة ال 40 .. يقوم يجيله هبل ربيعي في صيانة ال 60 !!؟؟

علي كدة صيانة ال 60 بكام ؟؟؟

[MoToRiZeR]

الشعب السنغافوري السيريوني يبدي تعاطفه مع الشعب المصري السيريوني بخصوص سعر فلتر البنزين .

انا سألت الراجل السنغافوري اللي أعرفه و كان تعليقه :

damn ! that's a cut throat price !!

و قاللي إنه ميعرفش سعره كام بس هيسأل عليه .

[aliabutaleb]

م/احمد له رجاء منكم: إن اى حد واجه مشكلة و هو هناك فى مركز الصيانة يطلب يقابله على طول, و هو بيؤكد ان مش هيخلى حد يمشى الا و مشكلته محلولة و ميمشيش و هو زعلان او متضايق

دى معظم الحاجات اللى فاكرها, لو حد عنده اسئلة تحت امركم

مبادرة محترمة وغير مستغربة من التوكيل ومن م. أحمد عبد الوهاب لا بد من شكره عليها

مبروك الصيانة يا معاذ
بالنسبة لسعر فلتر البنزين والعوامة ف لا تعليق زيه زي حاجات كتير هي جت عليه