تقييم تويوتا كورولا 2009 مصور -كريم هشام-

[kareemhisham]

السلام عليكم و رحمة الله و بركاته
بسم الله الرحمن الرحيم

بداية انا اخرت التقرير شوية عشان كنت مسافر و اختبرت العربية على طريق الموت الجديد (طريق الساحل الشمالى) ,,, نبدأ التقييم



تويوتا كورولا 2009 مانيوال ادفانسد
مستلمها من التوكيل - السعر 135 الف




ثانيا : المواصفات

1 - مانيوال 5 سرعات
2 - ABS + EBD
3 - عدد 9 وسادة هوائية
4 - عجلة قيادة و الفتيس مكسوين بالجلد
5 - مرآة داخلية ذاتية التعتيم
6 - فوج لايت
7 - جنوط 16 إنش
8 - راديو وسي دي تشانجر 6 اسطوانات مع تحكم في عجلة القيادة
9 - حساسات مطر
10 - مخرج كهربائي 12 فولت
11 - تكييف تتش
12 - عدادات اوبتيترون
13 - الدخول و إدارة المحرك بدون مفتاح (سمارت كى)
14 - ريموت كنترول للفتح و الغلق و فتح الشنطة
15 - حساس لإضاءة الأنوار اوتوماتيكيا
16 - اضاءة زينون
17 - بخاخات لغسل الفوانيس
18 - مثبت سرعة


دلوقتى نيجى للشغل العملى و اداء العربية على الطريق ....

الموتور :



الموتور مزود بتكنولوجيا VVT-i ,, ينتج 122 حصان (صافى)

الموتور مشاء الله قوى و عزمة عالى جدا ,, فعلا ينفع تشد و تجرى و تحرق بيه ,, بصراحة ادهشنى

صوته مش مسموع خااااااالص ,, يا جماعة انا كذا مرة انزل من العربية و اقفلها و هى دايرة هههههههه ,, و لو حد قعد فيها مش هياخد باله اذا كانت دايرة ولا لأ

بالنسبة لتقفيل الموتور فهو فوق الممتاز ,, انا بصراحة مشفتش تقفيل ممتاز كدة قبل كدة


الثبات :

كنت سمعت كلام كتير ان ثبات الكورولا مش قد كدة ,,

بس بصراحة انا اكتشفت ان الثبات راااائع ,, انا جربت مرة و طلعت بالسرعة لغاية 170 ,, و العربية كانت ثابتة تماما و كنت واثق فيها جدا ,,

بعد كدة لما زودت السرعة كمان شوية ابتدى تركيزى يزيد ,,

و لكن فى المجمل الثبات ممتاز و لا يقل عن اى عربية فى نفس الفئة ,,


الفتيس :



الفتيس مانيوال 5 سرعات ,, استجابته ممتازة و سهل فى النقل

فى موديلات 2010 الفتيس 6 سرعات ,, و دة بيريح الموتور على السرعات العالية ,,

فى المقابل الفتيس ال 5 سرعات بيدى عزم عالى و دة اليهمنى ,,

الفتيس مزين بالكروم و البيدى شكل تحفة للفتيس ,,


عجلة القيادة :

طبعا دى من احد المميزات التشتهر بيها الكورولا ,, و هى النعومة

الدريكسيون ناعم اوى على السرعات المنخفضة ,, و احلى ما فيه انه صغير و دة بيساعد جامد فى المناورات ,,

و بذات فى الركن ,, الموضوع دة ملحوظ جدا ,, و فعلا العربية سهل تركنها فى اى حتة

الدريكسيون بيتقل على السرعات العالية مما يعزز الثبات ,,

الدريكسيون ثابت و مش بيأثر فيه الحاجات الطالعة و نازلة فى الطريق ,,


الفرامل :

من الحاجات العجبتنى و مش موجودة فى اللانسر ,, هى ان الفرامل ورا ديسكات ,, و دة تأثيره باين و ملحوظ



العربية مزودة بABS و EBD ,, طبعا ممتازين و تأثيرهم فارق جامد و دى حاجة معروفة ,,

الفرامل مسعفة فعلا و بتفع فى مواقف كتير ,, و انقذت العربية كذا مرة من طيش العيال الصغيرة الراكبة "بيتش باجى"


الايرباجز :

العربية من جوة مشاء الله مليانة ايرباجز :) ,, 8 منهم باينين و فى واحد مش باين


التكييف :



التكييف تتش شكله تحفة ,, بتتحكم فيه تحكم كامل ,, من درجة الحرارة بظبط لسرعة المروحة ,,

طبعا التكيف قوى و دى حاجة معروفة ,, انا فعلا عرفت يعنى ايه تكييف تلاجة :)

التكييف صوته فى بدايته مزعج و عالى بس بعد شوية صوته بيقل خالص و مبيعلاش تانى ,,

التكييف ملوش اى تأثير على اداء العربية خااالص عكس اللانسر التكييف بيأثر فيها جامد ,,


استهلاك الوقود :



طبعا تويوتا معروفين باستهلاك الوقود الممتاز فى كل عربياتهم ,,

التانك كامل عمل معايا حوالى 650 ,, و انا لسه فى التليين (التانك سعته 55 لتر)

استهلاك الوقود 7.9 لتر لكل 100 كيلو ب46 كيلو متر فى الساعة كمتوسط سرعة ,, (دة استهلاك الوقود طول الفترة الفاتت)



ارتفاع السيارة عن الارض :

العربية مش عالية من على الارض بالقدر الكافى اليخليها تعدى فوق طرقنا الجبلية ,, يعنى اى مطب غلس شوية ... لازم تسايسه هههههه

مع التحميل العربية بتوطى شوية طبعا بس بطريقة عادية مش زاى الالنترا مثلا و الموضوع مش مؤثر تماما ,,


وحدة الصوت :



بالنسبة للسى دى فهو ممتاز و الصوت نقى و مع وجود 6 سماعات الموضوع بيبقى جميل ,, و هى 6 سى دى تشانجر و mp3 كمان ,, يعنى كل الاغانى التتمناها هتكون معاك

اما الراديو ,, مش بيلقط كويس ,, يعنى و انا راجع لغاية واحة عمر و الصوت كان لسة مش كويس قوى


الشنطة :



الشنطة واسعة جداا و تشيل حاجات كتير قوى مع انها 460 لتر يعنى فى عربيات كتير اوسع منها ,,

عشان تطبق الكنبة الورا ممكن تطبقها من الشنطة ورا او من جوا


المقصورة الداخلية:



المقصورة رحبة و كبيرة و واسعة ,, و القاعد ورا بيبقى مستريح قوى ,,

بس لو الكرسى القدام رجع ورا شوية ,, يبقى الورا مش هيبقى مستريح اوى

المقصورة كلها فخمة و تحس بجودة الخامات و التقفيل و انا مشفتش اى عيب تقفيل و الحمد لله

و من مميزات تصميم الشبابيك المقصورة هو ان لما تفتح الشباك مش يببقى فى ازعاج من الهوا خاااالص ,,

المقصورة بردو معزولة بشكل ممتاز ,, زاى ما قلت قبل كدة صوت الموتور جوا معدوم ,, و حرارة الشمس ملهاش اى تأثير

لوحة العدادات شكلها فخم و جميل جدا و بذات العدادات الاوبتيترون ,, و بتفضل منورة على طول



اما مرآة الصالون فهى مريحة و موضوع الauto dimming دة ممتاز ,, و للميعرفوش هو ان مرآة صالون بتغير لونها لما يضرب فيها نور جامد ,,




قوة صاج و تقفيل العربية من الخارج :

الصاج مش ورق و مش قوى اوى ,, يعنى لا يقارن بقوة بالاوكتافيا ,, بس يستحمل كتير

تقفيل العربية الخارجى ممتاز و مفيهوش غلطة


[COLOR="rgb(255, 0, 0)"]الكروز كنترول :[/COLOR]



"البتاع" دة :) .... من اجمل الحاجات فى العربية دى ,,

مكنتش متخيل انه ممكن يكون حلو كدة و مؤثر كدة ,,

فعلا بنصح بيه ,,


[COLOR="rgb(255, 0, 0)"]و دى بعض التفاصيل الزيادة :[/COLOR]

مكان لوضع النظارة ( يكفى اتنين )



البخاخات لغسل الفوانيس ,, حلوة اوى على فكرة و فيها سائل منظف



arm rest هنا جميل و مريح و بيطلع لقدام و يرجع لورا




و المارت كى ,, دة بقى حكاااية :) .... المفتاح عبارة عن ريموت بس ..

لما تقرب من العربية و المفتاح فى جيبك بتلمس المربع الاسود العلى الاوكرة و ممكن كمان و انت ماشى تدوس على المربع دة لمدة ثانيتين العربية تقفل



و طبعا و انت جوا العربية ممكن تدورها من غير المفتاح بردو (لازم المفتاح يبقى فى نطاق 1 متر)

ممكن كتير منكم يلاحظ انى مذكرتش عيوب بعنها
و لكن فعلا العربية مفيهاش عيوب قوية خااالص
انما مش كل حاجة ممتازة
يعنى العربية بتديك كل حاجة بس مش بامتياز

انا ادى العربية 8.5 من 10
و كقيمة مقابل سعر اديها 10 من 10

و بكدة يكون الموضوع انتهى و اتمنى يكون عجبكم

_____________
تمت إضافة الصور
مشرف عام.2

تم تثبيت الموضوع
مشرف عام الياباني

[asa2005eg]

very Nice Topic , i can't see any picture try to upload them correctly

[Sharky]

تقييم ممتاز يا كريم
بس للأسف الصور مش باينه :(

الف ميروك و ربنا يبارك لك فيها

[محمد محمد]

مبارك عليك يا استاذ كريم بس فين الصور وكل سنة وانت طيب.

[LanCeLoT]

الف مبروك يا كريم
و ربنا يديك خيرها و يكفيك شرها
كان نفسي اسألك .. انت ليه ما فكلرتش تجيبها mmt البروفشنال
وكمان لما بتستلم العربية بتشيك على ايه فيها ؟ وهيا بتيجي مع ايه ؟
وكنا عاوزين نشوف الصور

[egyptianmafia]

no pictures

try TinyPic - Free Image Hosting, Photo Sharing & Video Hosting

or ImageShack® - Image Hosting

[sa3dawy]

اية المواضيع الجامدة دى ... تحفة ..
بس الصور مش باينة بس .. حاول ترفعهم وحد من الادارة يدمجهم مع الموضوع

[kareemhisham]

تقييم ممتاز يا كريم
بس للأسف الصور مش باينه :(

الف ميروك و ربنا يبارك لك فيها

الف شكر يا شاركى باشا ,,

وانا اضفت الصور و بلغت المشرف و منتظره يضف الصور

مبارك عليك يا استاذ كريم بس فين الصور وكل سنة وانت طيب.

الله يبارك فيك يا ابو وليد ,, و بانتظار المشرف عشان الصور :)

الف مبروك يا كريم
و ربنا يديك خيرها و يكفيك شرها
كان نفسي اسألك .. انت ليه ما فكلرتش تجيبها mmt البروفشنال
وكمان لما بتستلم العربية بتشيك على ايه فيها ؟ وهيا بتيجي مع ايه ؟
وكنا عاوزين نشوف الصور

الله يبارك فيك ,,,

انا الحقيقة مفكرتش فى الmmt لسببين :
1-الاوبشنز الزيادة اغرتنى بصراحة
2-معجبنيش موضوع ان هما منزلوش ال2010 mmt

no pictures

try TinyPic - Free Image Hosting, Photo Sharing & Video Hosting

or ImageShack® - Image Hosting

شكرا ,, مانا جربت موقع تانى و نفع بس ملحقتش عشان ال10 دقايق خلصوا :)

اية المواضيع الجامدة دى ... تحفة ..
بس الصور مش باينة بس .. حاول ترفعهم وحد من الادارة يدمجهم مع الموضوع

الف شكر ,, دة كل دة عشان خاطر حبايبى فى نايل موتورز :)

و انا فعلن حطتهم و مستنى المشرف :))

[kareemhisham]

و طبعا العندو اى استفسارات انا جاهز طبعا :)

[blazer]

موضوع ممتاز
و تقييم 10/10
الكرولا من اكتر الحاجات اللى عجبانى فيها انهم منزلينها بكل مواصفات الامان "الايرباج اللى انت مش عارف مكانها دى غالبا هتكون الايرباج بتاعه الركبه للسائق knee airbag
سؤال كدا
ايه الفرق بين البروفيشنال والادفانسد وفرق السعر اد ايه