الحمد لله بعتها وارتحت ( نصيحة لوجه الله)

[khalidsdk]

باختصار سأروي لكم خلاصة تجربتي المريرة ومعاناتي مع اسبيرانزا 516 حتى تم بيعهاوالحمد لله ،هذا ليس للنقد ولكن للاستفادة وأخذ العبرة لمن يريد :
(سيارتي كانت موديل 2007 وعملت بها 20000كم ولونها ،Sky grey- سيارتي السابقة كانت نوبيرا 2003 أوتوماتيك)
1) بداية استلام السيارة المكيف كان لا يعمل ودواسة البنزين بتقطع، تم ضبطهم بصعوبه وبعد عده زيارات للتوكيل وعده خناقات أيضا.
2) العفشة ناشفة جدا وتحس بكل زلطة في الطريق وتسمع أصوات غريبة وانت بتلف يمين أو شمال حتى بعد تعديل العفشة .
3) سحبها ضعيف جدا خاصة عند تشغيل التكييف وياسلام لو كنت محمل معاك ناس في العربية وطالع كبري في عز الظهر (فضيـــــــــــــــحة)، وحتلاقي في الأحوال العادية والله بلا مبالغة الـ 128 بتسبقك في الطلعة وكذلك جميع السيارات الـ 1300 والـ 1600 طبعا ، وموضوع انها 117 حصان وانها 147 نيوتن ده كلام فاضي وكذب عن تجربة وهي من واقع التجارب تقدر تقول انها فعليا 90 حصان ، 130 نيوتن/م
4) في المطبات وما أكثرها تسمع صوت طقطقة قدام ولما المطب ييجي وره تسمع نفس الصوت ورا وهو صوت ثابت في المطبات ومنتظم. (سوف تتعود عليه).
5) صفارة الفرامل وخاصة عندما تسخن الطنابير تحس انك ماشي بصفارة ممتازة تغنيك عن أي كلاكس (أيضا فضيحة)، نوعية التيل سيئ جدا بياكل الطنابير ، وكذلك نوعية الطنابير سيئة جدا .
6) التابلوه بدأ يتقوس ويقب من الشمس ولسة العربية ما كملتش سنة !!
7) الباغة الخاصة بالكلاكس في الدركسيون غير حساسة وأحيانا بتعلق ونوعيتها رديئة .
8) الدوكو الخاص بالسيارة خفيف جدا لو عملتوا بأظافرك حيطلع علطول والاكصدام الأمامي والخلفي بدأوا في التقشير بعد الشهر الأول!!
9) صوت المارشدير عالي جدا (أيضا فضيحة ) الفتيس بيعض في المارشدير حتى بعد ضبطه في التوكيل ( لكن حتتعود عليه)
10) عيب قوي جدا في تصميم الموتور وأنه مقلوب ستجد الهيدرز الخاصة بالشكمان والفرن وضعهم إلى الداخل ناحية السائق والتابلوه وليس إلى الخارج كما هو الحال في جميع السيارات الأخرى المحترمة (فهل هذا اختراع جديد ؟) مما يسبب دخول حرارة الشكمان إلى الداخل ودليل ذلك حط يدك على الكاسيت بعد السير لفترة طويلة حتلاقيه مولع وسخن جدا ، انا كنت مركب صفارة انذار في الموتور ساحت واضطررت لتغييرها من سخونة الموتور ، فحركة قلب الموتور سيئة جدا وفكرة فاشلة تضر بالسيارة على المدى البعيد.
11) سماعات الكاسيت الأمامية كانت لا تعمل وتم ضبطها في توكيل كلاريون (السيارة زيرو !!!)
12) التوكيل وما أدراك ما التوكيل المعاملة الفعلية سيئة جدا جدا جدا ، لا تنخدع بالابتسامة وحضرتك ويا افندم وتحت أمرك ... ، انا عايز واحد يشتمنى بس يصلحلي العيوب اللي رايح عشانها مش بعد ما أحجز قبلها بأسبوعين وأروح وأضيع يوم كامل وأدفع مبلغ لا بأس به أرجع البيت بنفس العيوب !!!! (ضحك على الذقون)
13) أسعار الصيانة غالية صيانة 10000كم 300 جنيه - صيانة 20000كم - 700 جنيه ولدي ايصالات دفع بذلك ،طبعا كتير جدا غير اللي كنت بأدفعه في الزيارات اللي في النص مع المعاناه مع حضرتك وتحت أمرك يا فندم والكلام الفارغ ده والنتيجة ولا حاجة.
14) سنتر الباب الخلفي يمين لا يعمل وذهبت للتوكيل 3 مرات دون جدوى السنتر مش موجود حاليا ياا فندم على مدى شهرين !!!!
15) يوجد حدفة يمين لوجود عيب في الشاسيه باعتراف التوكيل وكثير من مالكيها سواء شعروا بها أو لم يشعروا وليس لها حل .

عموما هذا ما أذكره وهذه تجربتي الشخصية لمن يريد أن يستفيد ، والحمد لله بعت العربية وخلصت منها واشتريت الآن دايو ليجانزا مو 2001 أوتوماتيك وهي الحمد لله زي الفل وربنا يبارك فيها .

وتقييم نهائي للسيارة أعطيها 60% وقد تكون جيده لمن كان لديه قبلها 128 - سيات 133 - 127- 125 أو شي من هذا القبيل مع احترامي الكامل لجميع السيارات السابقة ، وهي تصلح أكثر للسيدات وللاستخدام الخفيف غير كده للأسف مش حتنفع واللي حياخدها حيفكر يبيعها بعد أسبوع من شرائها .

اللهم قد بلغت اللهم فاشهد - نصيحة خالصة لوجه الله

أي استفسار انا جاهز 0123498224 م/ خالد جمال -
ملاحظة السيارة اتباعت بـ 60000جنيه ولو جابت أقل من كده كنت حأبيعها برضه.

[PRO-DRIVE]

ربنا يعينك :?

دا انا كنت ببكي و انا بقرا المشاكل

[fahd_628]

ربنا يعينك فعلا

و الحمد لله انك اتخلصت منها

[sokasoon]

• لا حول ولا قوة الا بالله
  
  الحمدلله انك بعتها

[TAREK ZIAD]

بالتأكيد لو كل المشاكل دى فعليا كانت عندك يبقى كان لازم تقدم شكوى رسمية لجهاز حماية المستهلك و معاك كل الحق.... عموما الحمدلله اللى خلصت منها و مبروك عليك اللليجانزا..... كنت أتمنى لو أطلعت اللى إشترى على المشاكل دى كلها لأنه صعب جدا لأى شخص توقع أن تتجمع كل المشاكل فى عربية واحدة و بالتالى هو كدة إدبس فيها وربنا يكون فى عونه هو كمان.....علشان ربنا يباركلك فى ثمنها......ألف مبروك و خيرها فى غيرها..........
تحياتى
م/طارق زياد

[sh_masry]

طب ليه مابتقولوش الله يمسيك يا شريف بالخير ....... مش انا اتنبح صوتى فى الموضوع ده ؟؟؟؟؟؟

عموما مبروك .....

[Karim_Monir]

ها ها ها
لسه رادد هناك عشان استاذ خالد فاتح موضوعين هنا وفي العام

الحمد لله ربنا كرمك وخلصت منها
بس عاوز اسالك بأمانة
هل العيوب دى اللى حصلت عندك عامة ولا خاصة
ولا لازم يكون فى العربية عيوب تعكنن على صاحبها وان اختلفت من سيارة للتانية؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟
وربنا يباركلك فى السيارة والله انا كان نفسى تطلع الاسبيرانزا عربية كويسة ومحترمة لانها سعرها فى متناولب ناس كتير
ولو كانت كويسة كانت هتهز السوق جامد لان ناس اكتر من اللى اشتروها بكتير كانت اشتريتها
بس الحمد لله على كل حال

[sh_masry]

ها ها ها
لسه رادد هناك عشان استاذ خالد فاتح موضوعين هنا وفي العام

:D

[meza]

دى كده متبقاش عربية
دى قطعة خردة ......... طبعاً متستاهلش أى مليم يدفع فيها

ناس كتيير إتخدعت فى شكلها من بره ....... رغم إنه مش حلو قوى..... لكن كلها بلاوى من جوه ....... كفايه صوت الموتور و هيا ماشية فى الشارع ...على رأى حضرتك فضيـــــــــحة .....ربنا يعينهم عليها :D

مبروك إنك إتخلصت منها ..ألف مبروك :mrgreen: