الموضوع: تجربة برنامج السكانر الخاص بالعضو alexcdx

الموضوع دة انا عاملة عشان احكى تجربتى مع البرنامج اللى حكى علية العضو alexcdx و الكابلات بتاعت السكانر و الحاجات دى... انا عادتا بحب التجربة العملية تبقى قدام عينى عشان احكم على الحاجة و افتكر ناس كتيرة فاكرة الاخ اللى عرض المغناطيس اللى بيتحط على خط البنزين عشان يوفر الاستهلاك و لما قولتلة هات اجربة طنش و عمل انة مش سامع و دة دليل على انه......

انا قلت اجرب نفس الحوار مع الزميل alexcdx و اشوف الدنيا فيها ايه و بالفعل قابلت الراجل و هو شخصية محترمة جدا و بدانا نجرب البرنامج على عربيتة النوبيرا

اولا البرنامج ببساطة هو برناج كمبيوتر صغير بيقراء الdata stream اللى بيعدى على الكونترول و بيطلعة فى صورة قيم مفهومة او فى صورة رسم بيانى او فى صورة عدادات digital اضافة الى تحديد كود الاعطل لو متجل حاجة على الكونترول و اهم حاجة فيه امكانية اجراء اختبارات لتحديد حالة المكونات المختلفة... دة بالاضافة الى كابل ALDL الى USB عشان توصيل اللابتوب بالكونترول بدون الحاجة الى لوحة PCB و الكلام دة

اول صفحة فى البرنامج هى صفحة الاوامر و من خلالها بتبداء تقراء البيانات اللى طالعة و داخلة للكونترول لترجمتها لبيانات مفهومة و من نفس الصفحة بتدى امر للكونترول لعمل اختبار معين من عدة اختبارات زى مثلا تشغيل مراوح التبريد او تشغيل التكييف او تقديم و تاخر الشرارة و تشغل لمبة التشك لاختبار اللمبة نفسها و مسح بيانات الايدل لاعادة الايدل ليرن بدون الحاجة لفك البطارية و تشغيل الEGR وتعديل نسبة الهواء و البنزين و مسح اكواد الاعطال المخزنة... التعديلات فى المزيج و الشرارة لا يمكن حفظها على الكونترول... كل اختبار من دول بيستمر 5 ثوانى و يرجع الوضع لطبيعتة بالتالى البرنامج مينفعش يستخدم لتعديل القيم الاساسية اللى متخزنة فى الكونترول



الصفحة التانية و دى اللى انا شايف انها الاهم بالنسبة ليا و هى القيم الحقيقية لقرائة الحساسات و معطيات الكونترول... الشاشاة الاولى كان كلها طلاسم و محدش حيفهم منها حاجة... الشاشة التانية بتحول الطلاسم دى لقيم حقيقية نقدر نفهمها زى حرارة مية التبريد و الهوا اللى داخل للمكنة و الRPM و سرعة العربية و زمن فتح الرشاشات و الفاكيم فى المنافولد و الشرارة متقدمة كام درجة و الايدل كونترولر واقف عند انهى step و قراية حساس الشكمان و نسبة فتح قرص البوابة هكذا بالتالى الصفحة دى اللى بتحدد فعلا كل حساس شايف اية بقيم مفهومة لينا نقدر على اساسها نقيم اداء الحساسات و نشوف بعنينا الوضع الحالى للمكنة و هى شغالة



الشاشة التالتة حتعجب اوى الناس اللى بتحب شغل الجرافيك و بتحب العدادات و الالعاب دى.... الشاشة دى عبارة عن ترجمة للقيم اللى فى الشاشة رقم 2 فى شكل عدادات شغالة على شاشة الكمبيوتر... بالنسبة ليا انا مش بحبها اوى لان هى مش بدقة الشاشاة التانية فى القيم و المعطيات بس انا بفكر من وجهة نظر اللى بيحلل حالة المكنة... ممكن واحد تانى حابب يعمل شكل فى عربيتة فا يوصل اللابتوب بLCD و يطلع العدادات دى قدامة على الطابلوة و حيبقى شكلها حلو جدا و هى شغالة (ممكن تغير الوان العدادات و الخلفيات زى ما انت عايز بس انا مش غاوى الحوارات دى)



الشاشة الرابعة هى شاشة تحليلية اكتر منها عرض يبانات... هى عبارة عن رسم بيانى لعدة معطيات الغرض منها توضيح اذا كان فيه خلل بيحصل مرتبط مع الزمن... يعنى لو فيه نتشة بتحصل كل فترة زمنية معينة او رعشاة او صوت و خلافة تقدر تبين اذا كان الظاهرة دى بتحصل بارتباط مع مرور الوقت ولا بتحصل بشكل عشوائى... معلش الشاشة مفيهاش اى بيانات لان مود الtest بتاع البرنامج مبيطلعش فيها داتا (انا ماخدتش صور من التجربة الفعلية لانى بصراحة كنت رايح و مش فى الدماغ ان البرنامج دة بيشتغل او بيعمل حاجة مفيدة )



الشاشة الخامسة و دى مهمة بضة و هى شاشة الاعطال... اى حد نورت عندة لمبة التشك الكونترول بيحفظ كود العطل... فى الشاشة دى تقدر تطلع العطل دة تفسيرة ايه... و لو عندك اكتر من عطل برضة بيبان فى الشاشة و العطل بيبقى منور قدامة ايكون الموتور باللون الاحمر (فيه كذا واحد احمر بس دة اختبار)

انا جربت الموضوع دة شخصيا و فكيت حساس العمة و العربية دايرة فا اللمبة نورت و كتبت العطل IAC maulfuntion و انا شايف ان الشاشة دى من الشاشات المهمة جدا و يمكن هى السبب الرئيسى اللى عشانة معظمنا بيحط العربية على السكانر



اخر شاشة انا مفهمتهاش اوى و مش شايف ليها اهمية كبيرة و هى بتوضح حالة الموتور اذا كان فى open ولا closed loop و اذا كان المزيج rich ولا lean... انا شايف ان المعلومات دى ممكن الحصول عليها من الشاشات السابقة بس اهى مش حتخصر



اللى فعلا اضافة و تعديل كبير عملة الزميل alexcdx هو تعريب البرنامج... هو فتحلى الفايل بتاع النوبيرا العربي و لقيت البيانات المكتوبة كلها عربى... يمكن مش حاجة مفيدة اوى بالنسبة ليا بس اكيد حتسهل على ناس كتير التعامل مع البرنامج خصوصا لو هما مش ملمين بكل المصطلحات الميكانيكية اللى باللغة الانجليزية... و دى صور للشاشات بالعربى







الشاشات 3 و 4 و 6 مفرقتش اوى بين العربى و الانجليزى فا ماخدتش ليها صور

اخر حاجة انا عامل الموضوع دة لانى بصراحة كنت رايح و حاطت فى دماغى ان دى اشتغالة زى معظم الاشتغالات اللى شوفتها سواء هنا او فى اماكن تانية و كنت ناوى اكتب كل اللى شوفتة بالفعل عشان اجيب اخر الموضوع و نفضها سيرة عشان الواحد زهق من الفتى و الاشتغالات... او بمعنى اخر كنت رايح عشان....

بس الصراحة الراجل كل كلمة قالها طلعت مضبوطة و مقصرش فا كان لازم اديلة حقة... طالما بقول على الحاجة الوحشة وحشة يبقى لازم اقول على الحلوة حلوة... و عذرا للزميل alexcdx اذا كنت متشكك فى كلامك فى البداية بس المثل بيقول... حرص ولا تخون و الحمد لله طلعت محل ثقة و كلامك مضبوط تمام و فرصة سعيدة انى اتعرفت عليك

MMamdouh