سؤال في 128

**mmd3** · 26-12-2009 10:56 PM

السلام عليكم ياجماعة انا معايا فيات 128 مشتريها من حوالي سنة هي 1100 سي سي واول ما اشتريتها كانت ماشاء اللة بتجيب 120 كلم ولكن بعد فترة شهرين بقت اعلي سرعة ليها 80 فذهبت للمدينة الصناعية وغيرت طقم دبرياج (ديسك و اسطوانة وبلية) وفعلا رجعت تمام زي الاول وبقي فيها سحب عالي جدا ولكن بعد شهرين كمان رجعت تجيب 80 الي 90 كلم وذهبت وغيرت طقم بوجيهات وفلاتر وحطيت زيت موبيل وفعلا بقت تجيب 120 تاني ولكن مع الاسف بعد شهر رجعت الي 80 تاني والسحب بقي ضعيف جدا لدرجة ان طلعتها بقت تاخد حوالي 30 ثانية علشان تجيب 80 كلم... مع العلم ان الماتور مش مفوت ...بس ناس بتقولي اعمل عمرة... حد عندة حل تاني غير عمرة الماتور... اعمل لها اية ؟

**Eng_Mostafa_89** · 27-12-2009 03:17 AM

ممكن حضرتك تكتب الموضوع دة فى الورشة وهناك هتلاقى ناس تفيد حضرتك اكتر
طيب حضرتك بقول ان الموتور مش مفوت يبقى كدة حضرتك مش محتاج عمرة طالما ان العربية مش بتدخن سماوى ولا الزيت بينقص
اما بخصوص ضعف السحب دة لية اسباب كتير ممكن فلتر البنزين مسدود اة طلمبة البنزين عيزة تتغير وعندك برضة ممكن تكون الكهرباء والهواء والبنزين عيزين يتظبطوا
اتمنى انى اكون افدت حضرتك

**asaeed** · 28-12-2009 08:55 AM

المشاركة الأصلية كتبت بواسطة eng_mostafa_89

ممكن حضرتك تكتب الموضوع دة فى الورشة وهناك هتلاقى ناس تفيد حضرتك اكتر
طيب حضرتك بقول ان الموتور مش مفوت يبقى كدة حضرتك مش محتاج عمرة طالما ان العربية مش بتدخن سماوى ولا الزيت بينقص
اما بخصوص ضعف السحب دة لية اسباب كتير ممكن فلتر البنزين مسدود اة طلمبة البنزين عيزة تتغير وعندك برضة ممكن تكون الكهرباء والهواء والبنزين عيزين يتظبطوا
اتمنى انى اكون افدت حضرتك

بالإضافة لما سبق ذكرة من الأخ مصطفى
أفحص الكربراتير (ممكن تكون البكات محتاجة تتظبط)

**Eng_Mostafa_89** · 28-12-2009 09:35 PM

ياريت تطمنا عملت اية؟

**bassem.naguib** · 28-12-2009 09:50 PM

قبل أي شيء .. عاوز أسأل حضرتك سؤال .. هل في تقطيع في العربية .. أو عدم انتظام في دوران المحرك (رجرجة .. رعشة .. ترتيل) .
ويا ريت حضرتك بعد ما غيرت بوجيهات وسلك البوجيهات وطقم الدبرياج تراجع على الحاجات التالية :

1) عدم وجود انسداد في دورة البنزين (روح عند حد عنده كمبيروسر هوا .. وفك خرطوم البنزين من ناحية الكربراتير وحط الكمبيروسر في فتحة خرطوم البنزين وأضغط بالهواء علشان لو فيه حاجة سادة دورة البنزين تنزل في التانك .. وأحرص بعد كدة أن مستوى البنزين ميقلش في التانك جامد علشان لو فيه شوائب متمشيش في دورة البنزين) .
2) يفضل تغيير الأبلاتين والكوندنسر .. والأهم من ده كله .. في حاجة أسمها "الفحمة" ودي موجودة في وش الاسبراتير .. ومتركبه على سوسته .. وكمان بالمرة شوف لو وش الاسبراتير فيه شروخ وما شابه .. وكمان متنساش الميكانيكي ينظف الجزء النحاسي في شاكوش الاسبراتير .
3) شوف البكات بتاعة السرعة والسلانسية في الكربراتير .. وبالمرة غير فلتر البنزين .

اسعار الحاجات اللي بقول عليها دي مش حتزيد بأي حال من الأحوال عن 50 أو 75 جنية بالمصنعية بالكتير قوي .. وبعدها حتلاحظ الفرق جامد في السحب .. وأبقى طمنا

**bassem.naguib** · 29-12-2009 10:45 AM

المشاركة الأصلية كتبت بواسطة asaeed

الله ينور عليك يا باشا
انت كدة جبت من الآخر

ربنا يخليك يا باشا .. من بعض ما عندكم

**mmd3** · 30-12-2009 04:08 PM

في الاول اسف جدا لعدم متابعتي للموضوع بسبب سفري المفاجئ وانا كنت في مكان مفيهوش نت
انا عايز اشكر بجد كل اللي قام بالرد علي موضوعي وشكرا لجميع اعضاء النايل موتورز
انا اول حاجة عملتها شوفت فلتر الهوا وعلشان اتاكد فصلت الخرطوم اللي رايح من العمة الي الماتور وقلت اجرب وفعلا العربية بقت بتشد وتسحب شوية لكن سرعتها زي ماهي 80 كلم
اما بخصوص الاسبراتير انا اتاكد ان كل الوصلات شغالة بس مش عارف الكهربا بتاعتة عالية ولا واطية وكمان مش بعرف اظبط كهربتة علشان كل لما بلعب فية سواء بزيادة الكهربا او اقللها العربية تسخن بسرعة
و بالنسبة للبيكات كلها متغيرة من حوالي شهر و منظف الكربيراتير كويس
مع العلم انة مفيش تقطيع في العربية وصوت الماتور عادي
انا فعلا حاسس انة العيب في كهربة العربية علشان لو قرصت عليها شوية بتسمع صوت تكتكة الكهربا بس مش عارف ازاي اعلي او اوطي الكهربا من الاسبراتير
معلش يا جماعة صدعتكو معايا انا وعربيتي الخربانة والف شكر لكل من رد علي الموضوع