يعني ايه ترصيص الكاوتش

**mah_almasry** · 02-03-2010 02:18 PM

اخوكم جديد في السواقة وبشوف الكلمة دي علي محلات الكاوتش . معرفش هي ايه . وهل بتتعمل كل فترة ولا ايه نظامها . انا عربيتي ميتسوبيشي لانسر موديل 90 . جزاكم اللي خير علي اي افادة

**mrwho1982** · 02-03-2010 04:26 PM

اهلا بيك
بص ياسيدي الترصيص ده عبار عن الكاوتشه فيها رفة

ودي بتبان لما تكون ماشي مثلا من 90 : 100 او 120 بتعمل رجة في الدريكسيكون ولكن لو العربية بترمي او بتعوم تبقي زوايا

الترصيص فيه نوعين فيه لزق وفيه اللي بيدق في الجنط
اللي بيدق في الكاوتش ده بالنسبة للكاوتشات العادية
واللزق ده بيكون في الجنوط الاسبور

والجنوط الاسبور ممكن يتحطلها دق برضو ومن الافضل يتحط لزق

والمفروض ترصص كل شهرين مرة

والترصيص بياخد علي الكاوتشة 5 جنيه وحاول تبقي واقف جنب الصنايعي وهو واقف علي الجهاز علشان ممكن يدق الرصاص غلط يهويللك الكاوتش وكمان لازم العداد اللي قدامو يبقي صفر يمين وصفر شمال
لو كده يبقي انت رصصت صح

يارب اكون وفقت في مساعدتك ولو في حاجة مش واضحة قول الناس هنا جدعان اوي وبتحب تخدم

:10d5c8~1107::10d5c8~1107::10d5c8~1107:

**Maged_Samy** · 02-03-2010 04:32 PM

الترصيص ملوش دعوة بعجله فيها رفه الترصيص هو اتزان العجله يعنى العجله بيبقى الجنط فيه حته وزنها تقيل اكتر من حته تانيه ومع الدوران السريع الحته دى بتشد العجله لبره . عايز تفهم الفكرة هات طوبه واربطها فى حبل ولفها بشكل دائرى بسرعة هتلاقى ايدك بتتشد ناحية الطوبه . نفس الفكرة . وفى ناس كتير فاكرة ان الترصيص بيظبط الجنط اللى فيه رفه وده طبعاً غلط هو بس بيظبط الوزن بتاع الجنط .

**kmhbravo** · 02-03-2010 04:37 PM

أي جنط تركبه سواء جديد او مستعمل لازم ترصصه عشان تضبط الوزن

والعربيات الجديدة ما بتطلعش من المصنع الا بترصيص

وممكن الجنط الاسبور يترصص بالنوعين مع بعض (اللزق واللي بيتدق في الجنط من الناحية الداخلية) على حسب مكان الزيادة المطلوبه أنا معموله عندى بالطريقة دي

**Maged_Samy** · 02-03-2010 04:54 PM

المشاركة الأصلية كتبت بواسطة kmhbravo

أي جنط تركبه سواء جديد او مستعمل لازم ترصصه عشان تضبط الوزن

والعربيات الجديدة ما بتطلعش من المصنع الا بترصيص

وممكن الجنط الاسبور يترصص بالنوعين مع بعض (اللزق واللي بيتدق في الجنط من الناحية الداخلية) على حسب مكان الزيادة المطلوبه أنا معموله عندى بالطريقة دي

+111111111

**kmhbravo** · 02-03-2010 04:56 PM

نصائح قبل الترصيص:

1. التأكد جيدا من ضغط الهواء المناسب للكاوتش مثلاً على 30 او 32 لأن الترصيص مش هايتظبط إذا كان ضغط الهواء ناقص أو زايد ، ولذلك ينصح بالترصيص بعد التوقف بربع ساعة وخصوصاً أيام إرتفاع الحرارة لتمدد الهواء داخل الكاوتش .

2. إستعدال الجنط من أى انعواج لأن لو فى إنعواج لن يفيد الترصيص معاك فى حاجه وهاتفضل الهزة إلى مالا نهاية .

3. لو الميزانية مخرمة معاك العجلات الأمامية أهم 100 مره من الخلفية .

بالنسبة لفوائد الترصيص :

1. المحافظه على الكاوتش وزياده عمره الإفتراضى .

2. حمايه المقصات الاماميه والجلب وزياده عمرها الإفتراضى وخصوصاً سيارات الدفع الامامي .

3. عدم انحراف العربية يمين او شمال وإختلال ميزان الدركسيون (الزوايا) مع الوقت .

4. الشعور بالراحه التامة اثناء السواقة وانعدام الإهتزازات نهائيا وخصوصاً فى السرعات العالية

**د.محمود صلاح** · 02-03-2010 05:41 PM

الترصيص - وضع قطع رصاص للمحافظة على اتزان العجل -
يوجد نوعين شائعين في مصر

النوع الاول بيفك العجلة تماماً ويحطها على جهاز الترصيص ويدور العجلة بسرعة عالية ويضع قطع الرصاص حسب الكمبيوتر

النوع الثاني بيرفع العربية بكوريك ويحط جهاز الترصيص يشبه الموتوسيكل الصغير تحت العجلة ويدور وده اللى انا بأفضله