الموضوع: جوله وشراء شويه اكسسوارات

السلام عليكم

ازيكوا؟ انا لسه جايب عربيه من كام يوم وقلت انزل اشوف ايه اللى ممكن اجيبه من اكسسوارات للعربيه وقولت اشاركم النتائج للحاجات اللى جبتها وراى عنها
نبتدى من التوفيقيه
اول حاجه جبت منفاخ العجل اللى بيشتغل على بطاريه العربيه وبصراحه ياجماعه ده هايل بعد تجربته لقيته فعلا مش ح يخلينى اعطل لو الكاوتش نام فى مكان مافيهوش حد بتاع كاوتش . المنفاخ ده انا لقيته فى كارفور ب 55 جنيه وفى التوفيقيه جبته ب 35 بعد شويه فصال وكنت بسال هناك عن سرعه المنفاخ فى نفخ الكاوتش وانه بياخد وقت طويل لحد ما ينفخ فرد ولقيت رد من واحد هناك قاللى لو عايزه يكون اسرع يبقى الاحسن انك ترفه العربيه شويه عن الارض عشان الضغط على الكاوتش يقل وبالتالى سرعه النفخ تكون اسرع

تانى حاجه كانت مشترك لولاعه العربيه بصراحه كنت فاكر انه مالوش لزمه بس لقيت واحد فيه بيخرج 3 عيون ممكن تستعملهم لاى حاجه بس عيبه انك ماتقدرش تحد فيه الولاعه الميزه اللى فيه ان فى نوع من المشتركات دى فيه usb يعنى تقدر تستعمله كشاحن للموبيل او ال iPod مباشره من غير ما تستعمل شاحن يادوب توصل الحاجه اللى عايز تشحنها بالمشترك على طول ده سعره 20 جنيه

ثالت حاجه مكنسه بتشغل من مكان الولاعه برضه وهيه شفط وطرد بس مش عمليه اوى بصراحه يعنى قوه شفطها مش كويس ودى سعرها 40 طبها الاسعار دى كلها بعد شويه فصال

رابع حاجه صدادات اكصدامات اللى بتتلزق على اطراف الاكصادام الامامى والخلفى بس بصراحه زى الزفت عشان ركبتها امبارح والنهارده لقيت واحده مش موجوده واثنين تانيين اللزق بتاعهم فك بصراحه مش كويسسين خالص ودول فى نهم الطويل والقصير الطويل منهم ب 27 والقصير 23

خامس حاجه كونسول اللى بيكون بين الكرسيين وبصراحه ده جميل اوى فيه درج من قدام لما تفتحه بيكون حامل كوبايات وفيه درج تانى من ورا فيه مكانين لكوبيتين وبصراحه شكله جميل بعد ما ركب وده سعره 40 جنيه

وبعد التوفيقيه قلت اركب انذار وسنتر وده ركبته فى الهرم هو نوعه سيمفونى وده بريموت عادى وكمان مفتاح بريموت زى الصوره بصراحه شكله جميل احلى من وولف و السيف جارد وده سعره 190 وبتودى المفتاح لحد بتاع مفاتيح بياخد 10 عشان يعمل المفتاح بس يستحسن تعمل المفتاح والعربيه معاك عشان يجربه ولو محتاج انه يتظبط يعملوا فى ساعتها

معلش لسه فى كمان GPS بس انا مش قادر وعايز انام ف ح قولكوا عليه بكره عشان كمان اكون شغلته وشفت مميزاته وكمان عشان احاول اصوره وابعت لكم صورته

تصبحوا على خير

معلش اتاخرت عليكوا بس على معرفت انزل الصور عشان تحاولوا تكونوا متخيلين الموضوع ومعلش لو الصور مش واضحه اوى عشان متصوره بكاميرا MP5 يعنى مش كاميرا جامده

نبتدى

اولا دى صور الانذار عشان مش عارف ليه ماظهرتش قبل كده ليه

ودى العلبه بتاعته


====================

ندخل بقى على GPS

هو شاشته 5.5 بوصه طبعا بيجى مع الجهاز شاحن منزل وعربيه ووصله USB عشان التحميل من الكمبيوتر وكمان بيجى معاه سماعات هيدفون عشان لو عايز تسمع لوحدك

فيه امكانيه ان الصوت يكون من الجهاز على طول او انه يخرج من سماعات العربيه

كمان الجهاز بيجى معاه كارت 2 جيجا

نيجى بقى للقوائم بتاعه الجهاز

من الشمال اول صف
GPS - مشغل ملتيميديا

ادوات ( مفكره -اله حاسبه - نتيجه) - راديو FM
ثانى صف
النظام للجهاز( تظبيط الصوت - مستوى شحن البطاريه - الاضائه للشاشه - التاريخ والوقت - اللغه - معلومات عن النظام ) - شعار DIY ده فيه المجلدات اللى على الميمورى - الشاشه - الالعاب

وبعدين فيه اخر ايقون هيه الاعدادات ودى اللى بتحدد فيها ملف الخريطه اللى ح تستعملها


الجهاز فيه امكانيه انك تغير الخلفيه بتاعته يعنى تحط اى صوره انت عايزها كمان ممكن تغير الثيمات فيه حوالى 8 تختار من بينهم

نيجى لقائمه ال GPS


دى قائمه البحث
بتحدد فيها اسم الشارع اللى عايزه ورقم المبنى

ودى اللوحه اللى بتكتب منها


وطبعا عشان فى مصر فيه شوارع كتير ليها نفس الاسم ف حتلاقى بيديك كذا اختيار زى مثلا شارع كذا ى الهرم او وسط البلد او مصر الجديده وانت بتحدده ز كمان ممكن تسجل المكان بخط السير فى المفاضله لو انت بتستعمل الطريق ده على طول يعنى بيغنيك عن كل مره تسجله وتبحث
كمان البحث ممكن يكون عن طريق احداثيات يعنى خط طول وعرض







اهم حاجه لقيتها انه الخريطه اللى فيه مظبوطه انا جربت كذا مكان فى القاهره والاسكندريه والاثنين تمام وكمان فيه امكانيه الدليل يعنى وانت مشغله ح تلاقى حد بيقولك ادخل شمال بعد كذا متر او يمين وكده يعنى وممكن تتحكم فى صوت الدليل ده سواء بالعربى او الانجليزى او اى لغه انت عايزها وبصوت راجل او ست

كمان انت بتحدد المكان اللى انت عايز تروحه وممكن انك تعمل معاينه للطريق قبل ماتمشى يعنى هو بيتحرك فى خط السير للمكان اللى ح تروحه وانت تعاين لو فى منطقه انت عارف مثلا انها زحمه او مش عايز تمشى فيها ممكن تعمل تعديل خط سير

نيجى لشويه صور للGPS




ودى صوره بيقولك ان المسافه الباقيه اد ايه على ماتوصل المكان اللى انت عايزه على الشمال من فوق مكتوب 5.5KM


كمان الجهاز فيه حاجه كده زى كمبيوتر للرحله بيسجل كل حاجه عن الرحله وفيه عداد سرعه ديجيتال يعنى السرعه اللى انت ماشى بيها كام زى عداد العربيه بالظبط

كمان فيه حاجه ان انت ممكن تضبط سرعه معينه فى وسط البلد وليك مثلا 60 وعلى طرق السفر 100 وهو بيديلك انذار لو تخطيت السرعه دى

معلش طولت عليكوا بس انا حاولت انقل لكم الجهاز بكل امكانياته اللى عرفتها لحد دلوقتى طبعا لو لقيت حاجه فيه زياده عن كده ح اقولكم على طول
ودى صوره للعلبه بتاعه ال GPS