الموضوع: مطلوب تقييم محترف للتيريوس من الساده الملاك

المشاركة الأصلية كتبت بواسطة mahora

ننتقل بقى للتقييم اللى انتوا عاوزينه- و معلش اسمحولى مش هيكون بمستوى التقارير الموجودة فى اقسام اخرى انما تقييم صغير على قدى و انطباعات بعد استخدام سنة للعربية:
# الانطباع العام عن السيارة: احساس متميز جدا انك تسوق عربية عالية يختلف تماما عن احساس قيادة السيدان..... احساس بامتلاك كامل لكل مفردات الطريق حولك..... رؤية بانوراما سواء امامية او خلفية...... مرايات جانبية مربعة و كبيرة تتيح رؤية ممتازة لما خلفك...... احساس عالى بالقوة نظرا لقوة جسم و عفشة السيارة يجعلك لا تخشى المطبات و ما اكثرها فى طرقنا الجميلة..... شكل السيارة جميل و انسيابى و كومباكت فى نفس الوقت..... المساحة الداخلية جيدة جدا لاسرة من 5 افراد مثلا.... مقعد السائق و الراكب بجواره مريحين جدا ووضعية القيادة ممتازة.....مساحة شنطة جيدة جدا يمكن زيادتها بالطى الكامل للكنبة الخلفية و ساعتها هيكون عندك مساحة تخزين خلفية توازى مساحة سيارة ربع نقل :).... فقط الملاحظة الوحيدة على الصالون ان الجالس بالخلف لن يحس بمثل راحة الركاب الاماميون نظرا لكون السيارة دفع خلفى و ايضا بسبب ان العفشة عموما ناشفة شوية..... من كام يوم جيت اسوق عربية حمايا النوبيرا..... حسيت- بلا مبالغة- انى قاعد على الارض :b4_592:

# الاداء: انا هتكلم عن العربية ال 4*4 فول اوبشن اوتوماتيك لان هى دى اللى معايا (2009). اداء السيارة بشكل عام جيد. بس الملاحظة الاساسية على الاداء هى ان التيريوس تميل الى ان تكون سيارة عائلية اكثر من كونها سيارة شبابية. يعنى اللى بيحب الشد والحرق و الغرز و الكلام ده بلاش التيريوس احسن..... اداء الموتور بشكل عام جيد و بيلبى احتياجات السائق العادى جيدا سواء فى التسارع العادى او المفاجئ.... لكن هنا فى ملاحظة ان تجميع السرعة فى التيريوس من صفر ال 60 مش جامد قوى..... مش لدرجة انها تكون بطة لكنها ليست الافضل فى هذه النقطة..... و ده طبعا لسببين الاول هو فاقد العزم الكبير بسبب نقل الحركة الاوتوماتيكى و ثانيا بسبب جسم العربية العالى اللى بيخلى مقاومة الهواء ليها بتكون اكبر..... اداء الموتور مع استخدام زرار الاوفردرايف فى حالات الطوارئ ممتاز و عن طريقه بتطلع من مواقف صعبة بسهولة كبيرة زى فى حالات الاحتياج الى تخطى عربية نقل كبيرة او مواقف الطوارئ بشكل عام و فى هذه الحالة بيكون تجميع السرعة ممتاز و قوة السحب تظهر بشدة و تلاقى نفسك بتقزح بعيد عن من حولك بكل سهولة.....

# الثبات: التيريوس مثلها مثل اى عربية عالية ثباتها ليس ممتازا بعد ال 120 خاصة اثناء القيادة فى جو هواء شديد زى على طريق العين السخنة اثناء الشتاء مثلا.... و ده طبعا ناتج من ارتفاع جسم العربية و مقاومة الهواء التى تتعاظم مع زيادة السرعة...... لكن فى الحالات العادية و الجو العادى اعرف ناس جابوا بيها 160 و ماشتكوش من اى حاجة بل بالعكس كانت ملاحظتهم الاساسية هى انك و انت ماشى على 160 متحسش ان العربية ماشية على السرعة دى خالص.... انا شخصيا اعلى سرعة جبتها بالعربية كانت 140 لانى مبحبش السرعة بس فعلا ملاحظة عدم الاحساس بالسرعة الكبيرة دى حقيقية.....

# استهلاك البنزين: استهلاك البنزين جيد جدا بالنسبة لسيارة 4*4 اوتوماتك awd اى ذات دفع رباعى مستديم..... النسبة فى المتوسط 10:1 على الطوالى و 8:1 داخل البلد..... وهو فى رأيى الشخصى معدل ممتاز بالنسبة لسيارة فى هذه الفئة

# التوكيل: لو على مقياس من واحد الى عشرة توكيل دايهاتسو ياخد 8.5 من عشرة.... مركزين صيانة ممتازين فى امكانياتهم سواء صالات الاستقبال او معاملة المهندسين او النظام و الانتظام فى المواعيد او العدد الكبير لل slots بتاعة خدمة السيارات..... تركيز التوكيل الاول هو فى توفير اقل وقت ممكن تتخدم فيه عربيتك و تستنى فيه داخل المركز و هدفهم ان الوقت ده يوصل ل 60 دقيقة فقط لاغير و ده عن طريق تكنيك علمهولهم اليابانيين وهو ال two-man operation..... بمعنى ان اتنيين فنيين يشتغلوا فى العربية فى نفس الوقت طالما شغلهم لا يتقاطع مع بعضه و كل واحد بيعمل حاجة مختلفة فى حتة مختلفة فى العربية..... انا اتعاملت مع مركز العبور مرتين قبل افتتاح مركز ابو رواش..... و كان الانطباع جيد..... و عند افتتاح مركز ابو رواش انتقلت اليه و كان الانطباع ايضا جيد جدا..... مساحته الكلية كبيرة جدا...... صالة انتظار و اسعة للغاية عمرى ماشفتها مليانة..... واى فاى و تليفزيون و حتى بلاى استيشن ..... ولانى عامل بالعربية عشرين الف بس فلسة مجربتش احتاجهم فى قطعة غيار و لا حاجة (لا قدر الله :) بس من تجارب اخوة اخرين هم مش زى توكيلات الكعب الداير اللى كلنا عارفنها...... على فكرة اخر مرة فى صيانة العشرين و رغم انها من الصيانات الرئيسية الا انى مقعدتش فى المركز اكتر من ساعة و نص فقط لاغير.....

دى انطباعات اولية و مستنى اى تساؤلات اخرى منكم و انا تحت امركم.....

المشاركة الأصلية كتبت بواسطة mahora

كل العناصر اللى ذكرتها انا غطتها فى ردى السابق يبقى موضوعى التقفيل و العفشة..... التقفيل حدث و لا حرج تقفيل يابانى جيد جدا ممكن يوصل لدرجة ممتاز و لا توجد ملاحظات فى هذه النقطة سوى ان السيارة متماسكة و ذات خامات جيدة و لا توجد فيها عيوب فى هذه النقطة..... هنا ممكن نقول بثقة ان اليابانى يابانى.....

بالنسبة للعفشة هى بتحس بنشوفيتها بوضوح فى اول 10 الاف كيلو لكن بعد كده بتحس انها بتبقى اطرى بكتير من الاول و بتاخد و تدى مع المطبات و التعاريج و الطرق المكسرة براحة اكبر..... بس و الحق يقال احساسك بقوة العفشة و نظام التعليق القوى بيبان بوضوح لما تاكل غصب عنك مطب ممكن لو عربية سيدان تجيب فيه مقصات لكن انت بيبقى عادى جدا..... و دى حصلت معايا مرة واحدة بس انى كلت مطب بلون الاسفلت يعنى مش متلون ابيض عشان يبقى واضح على سرعة 90 فى حتة كحل و خفت العربية يكون حصلها حاجة بس و لا الهوا فى الصيانة اللى بعدها ماكانش فى اى مشاكل..... الغريب برضه انى رغم انى حسيت ان العربية طارت فوق المطب الا انى حسيت برضه بقوة العربية و كل الحكاية كانت خضة الهبدة اللى كانت قوة العربية السبب فى انها عدت عادى خالص..... الملاحظة التانية هى اللى قلتها قبل كده من ان الراكب الخلفى مش هيحس بنفس راحة الراكب الامامى..... و حاجة اخيرة.... لما بتمشى فى طريق مكسر بتحس بتكسير الطريق تحتيك فى الدركسيون فى ايدك الى حد كبير...... غير كده مفيش مشاكل......

تسلم ايدك تقرير اكتر من ممتاز
بس ممكن توضيح لاستهلاك البنزين
يعنى 8 لتر لكل 100 كم غلى الطريق و 10 لتر لكل 100 كم داخل البلد ولا انا فهمت غلط

المشاركة الأصلية كتبت بواسطة mahora

شكرا جزيلا....معلش لو ما كانتش النقطة دى واضحة و سببت لبس ولا حاجة..... فعلا اللى انت فهمته صح..... فى طرق السفر النسبة 8 لتر لكل 100 كم...... و داخل البلد 10 لتر لكل 100 كم...... النسب دى بتقل طبعا شوية مع استخدام التكييف فى الصيف

الف شكر مرة تانية...لا النسب دى هتزيد مع استخدام التكييف اكيد..لكن بصراحة هى عربية شكلها محترمة و ربنا يبارك لك فيها
و الف شكر مرة تانية على التقرير