الموضوع: هل من حل ؟؟؟

المشكلة عندى إن العربية لما اجى ابطلها بتفضل تنتش ومبترضاش تفصل وبلاقى المكنة بتتهز جامد فبأضطر انى ادورها تانى واقوم جايب غيار واشيل رجلى من عالدبرياش عشان ابطلها

كنت عرضت المشكلة دى قبل كده وخرجت بحلين

اما انها كهرباء زيادة او المكنة عالية
وطيت الكهرباء وقللت المكنة ووطى rpm وامشى من عند الميكانيكى واعمل اى مشوار وابطلها تعمل نفس الحركة دى

المشكلة التانية انى بلاحظ ان لما الموضوع دا بيحصل بلاقى ان العربية بتتأخر شوية فى الدوارة

واخر مرة كنت عند الميكانيكى عشان يظبط الكهرباء والموتور فكنت ابطل واشغل كذا مرة مع كل تعديلة بيعملها عشان نعالج المشكلة الاولانية لغاية ملاقيت العربية مش راضية تدور نهائى والبطارية نامت واضطرينا نعمل وصلة ببطارية تانية عشان تدور

كشفت على الدينامو - وكنت عامله صيانة من قبلها بفترة والكهربائى غيرلى السليكونات - قال مفيهوش مشاكل

واخر مرة البطارية نامت نهائى وجبت وصلة لبطارية تانية ودرتها وسافرت بيها وكنت مشغل الانوار وعادى تماما ومفيش مشكلة ودورتها تانى يوم وعملت كذا مشوار وبعدين سبتها يومين وجيت ادورها لقيت البطارية نايمة تماما

الكهربائى قاللى يبقى داعيب بطارية ومتحافظش على الشحنة بتاعتها غيرنا البطارية بواحدة تانية من عنده حصلت نفس المشكلة برضه والعربية دلوقتى واقفة ومتدورش الا بوصلة ببطارية عربية تانية

الميكانيكى قاللى خاللى الكهربائى يبصللى على الكتاوت

هى كانت داخلى والكهربائى لغاهالى وعملها خارجى عشان لو حصلت فيه اى مشاكل يقدر يشوفه من غير ميطلع الدينامو ويفتحه

وقاس شحن الدينامو وقاللى عليه كويس

تبقى المشكلة فين بالظبط

وهل المشكلة الاولى لها تاثير على شحن البطارية ولا لأ


اخر حاجة بقى من اللى بشوفه من العربية الهباب دى

امبارح مشيت بيها على الدايرى علشان اشحن البطارية شوية وبعد فترة لقيت الناس حواليه بتنبهنى ان العربية ماسكة فيها نار من تحت وقفت وطفيتها وفتحت الكبوت لقيت نار صغيرة ماسكة فى فرن الشكمان طفوها ولستر ربنا ان الدينامو كان جنبها والاسلاك بتاعاته متاثرتش بحاجة ولسه سليمة وبعدين دورتها ومشيت بيها وعادى تماما ومفيش اى مشاكل والحرارة بتاعتها رجعت للحد الطبيعى تانى - لما النار كانت موجودة كانت مخليه الحرارة عند تسعين ومكانتش راضية تقل وكنت مستغرب ان الهواء اللى كان بيقابلها مكانش بيقللها بس مشكتش فى حاجة لان الطبيعى عندى ان لما بتسخن عند 90 المراوح بتكون شغالة بس النار دى هى اللى كانت مخلياها على 90 لغاية موقفت وطفيتها

ايه اللى موجود فى فرن الشكمان اللى يخليه يمسك نار فيه

طولت عليكم بس كنت عاوز اشرح الموضوع بالتفصيل عشان تقدروا تساعدونى

وشكرا

معلش انا عاوز امشي معاك في سكة تانية بعيد عن موضوع الكهرباء خالص
اول حاجة انت وطيت الكهرباء على الاخر و رغم كدة المشكلة موجودة يبقي بلاها كهرباء
دور العربية و افتح غطاء الريدياتير و زود بنزين كذا مرة ورا بعض لو لقيت فيه نطر خارج الريدياتير يبقي انت كدة بتتكلم في مشكلة في جوان وش السلندر طيب لو مفيش مشكلة هنا خالص يبقي ممكن تكون المشكلة من سير الكاتينة فيه سنة غلط و التقسيمة مش مظبوطة و ده يعمل كدة
طيب لو العربية عندك كاتينة جنزير يبقي سيبك من موضوع الكاتينة ده خالص
و برده لو فيه مشكلة في التكيهات العربية ممكن تعمل نفس الاعراض ديه