الموضوع: تسقيط موتور للابيزا 94

السلام عليكم

ذى ما شرحت لحضرتكم قبل كدة ان الموتور كان جاب جوان ووش سلندر وكان عندى الفتيس فية مشاكل وبعد ما اخذت اراء حضرتكم وبفضل الله تم تسقيط الموتور 1600 ال 75 حصان الانجيكشن سنة الصنع 1998 بتاع البولو
ودى خطوات التسقيط
تم فك الموتور القديم بالفتيس وضفيرة الحوض كاملة وبعض اجزاء العفشة
شراء الاتى
الموتور بدون ماكينة الباور وكمبروسور التكييف (عندى وشغالين تمام والحمد لله) لتقليل التكلفة
الفتيس مانيوال 6 سرعات
ضفيرة الحوض بفضل الله مفيهاش سلكة عريانة من اول الكنترول وحتى علبة الفيوزات
طرمبة البنزين
مشترك وحساس الشكمان
طقم تدوير( الامبليزر والفحمة)

وكان اجمالى المبلغ 2800 جنية بصراحة الراجل عامل معايا واجب (بس للعلم هو اخد الضفيرة القديمة بالكنترول)

وبعد كدة كان شغل الميكانيكى وتم التسقيط وبعد كدة دور الكهربائى فى تركيب الضفيرة وتدوير الموتور الجديد وبيكون التدوير عن طريق الامبليزر والفحمة بيحطهم على بعض ويوصلهم على الكونتاكت

بعد كدة توصيل حساس الشكمان ويتم عند بتاع الشكمان وبيفتح فتحة اعلى ماسورة الشكمان خلف الموتور وبيحط فيها صامولة وبيتركب فيها الحساس

وبعد كدة تم تغيير جميع الزيوت ( باكم و باور وفتيس وموتور )

وتم تجربة الموتور وبفضل الله الموتور ممتاز ممتاز ممتاز

وتم تغير ايضا 2 جنب خلفى استيراد 250 جنية
2 مساعد خلفى استيراد 200 جنية
2 بيض مقص استيراد 60 جنية
2 جلبة مقص امامى 100 جنية
اويل سيل بتاع الفتيس 50 جنية
تزويد الفريون 70 جنية

اما المصناعيات كالاتى

الميكانيكى 650جنية تسقيط الموتور وتظبيط العفشة ورا وتغير الجلب والبيض قدام
الكهربائى 400 جنية ودا كتير قوى المفروض 200 الى 250 جنية لان الضفيرة مفيهاش فيشة ناقصة وبالتالى الاعمى يركبها بس علشان متافقتش معاة
بتاع الشكمان 50 فتح و تظبيط مكان لحساس الشكمان


اجمالى التكلفة والمصناعية فى حدود 5000 جنية موتور بالفتيس بمشتملاتة بدون ماكينة الباور او كمبروسر التكييف

ارجوا ان اكون وفقت فى شرح الموضوع