الموضوع: تنضيف فلتر بنزين البومة

بسم الله الرحمن الرحيم
الموضوع ده عن محاولة تنضيف فلتر البنزين بتاع البومة وهاقول على المشاكل اللى ظهرت معايا فى الموضوع ده وطبعا هاحكيلكم عنها وازاى نتجنبها
طبعا احنا عارفين ان البنزين اللى بنحطو فى العربية بيكون فيه شوائب وده سبب وجود فلتر البنزين فى العربية والفلتر لما بيتملى بالشوائب دى بيتخنق ومش بيخلى البنزين يمر فيه بسهولة او بمعنى تانى سريان البنزين بيقل وبالتالى سحب العربية بيقل وساعات بتنتش فانا فكرت احاول
انضف الفلتر عشان العربية تفوق شوية والسحب يتحسن وهاشرح لكم طريقة الفك و التنضيف .

ملحوظة للأمانة بعد ماجربت الموضوع ده بنفسى لا انصح به لأن مشاكله كتير وأى خطأ تمنه كبير لأنه من الاجزاء الحساسة فى العربية.

اولا من الافضل ان يكون التانك مش مليان يعنى يكون المؤشر على الفارغ (e)

مكان الفلتر هو فى تانك البنزين تحت الكنبة الخلفية فى غطاء معدنى له اربع مسامير بيتفك وتحته على طول طلمبة البنزين وهى والفلتر تقريبا جزء واحد .

ثانيا فيه خرطومين للبنزين لونهم اسود وفيه سوكت غالبا بيكون لونها ازرق فاتح بتفصل السوكيت اللى بتوصل كهربا للطلمبة والخرطوم الاول بيتفك عن طريق ضغط السوكت من الجانبين وسحبها للخارج والخرطوم التانى عليه كوليه ضاغط بيترخا بالبنسة ويتسحب للخارج .

فك الصواميل اللى رابطة مسامير الجاويط عن طريق بيبة او لقمة عشان المفتاح العادى هيكون استخدامه صعب نظرا لضيق المكان واول مشكلة قابلتنى هنا انى اتعفيت على صامولة منهم واتقطم الجاويط (اتكسر) فيراعى الحذر اثناء الفك لأن المسامير ضعيفة. وبعدين فك الحلق الحديد اللى بيمسك الفلتر بالصواميل .

سحب الفلتر لأعلى بحذر ومراعاة الجوان الكاوتش مايقعش جوة التانك .

انا ماصورتش وانا بفك الفلتر من العربية بس بيكون منظر تقريبا زى كده :

الفلتر لما بيتفك من التانك بيكون جواه طلمبة البنزين وبيتفك الفيشة بتاعتها وتتسحب لبرة ودى صورة للفلتر والطلمبة بعد ماتفكو من بعض :

انا استخدمت سبراى بتاع تنضيف الكربراتير ودى صورة للعبوة وتمنها 20 جنيه

فيه فتحتين فى الفلتر الاولى اللى بيركب فيها الطلبمة وفاتحة تانية بيركب فيها صمام بلاستيك صغير لونه ابيض انا كنت بكتم بصباعى الفتحة الاولى وارش بالسبراى فى الفتحة التانية لحد مايتملى الفلتر بالسبراى وبعدين انفخ فى المكان اللى كان راكب فيه الخرطوم ويخرج السائل تانى بتاع السبراى لونه اسود من الشوائب اللى جوة الفلتر وكررت الموضوع ده مرات كتير لحد مابتدى لونه يفتح وماينزلش السواد ده .

ده السواد اللى نزل من الفلتر مع السبراى

مشكلة تالتة قابلتنى وانا بركب الطلمبة مكانها وباقى اجزاء الفلتر هى انى ماركبتش الطلمبة مكانها للاخر عشان تحشر الجوان او الجلبة بمعنى اخر فى مكانها وده خلى ضغط البنزين يقل جدا اكتشفت الموضوع ده بعد مارجعت كل شى مكانه وبعد ماغيرت طلمبة البنزين لأنى شكيت تكون باظت منى واتضح فى الاخر ان الطلمبة الفابريكة سليمة . فيراعى تثبيت كل جزأ فى مكانه والتأكيد عليه انه ركب كويس ومافيش فيه اى تسريب او يكون بالبلدى مهوى .