الموضوع: استفسار هام بخصوص الرادارات الثابتة

المشاركة الأصلية كتبت بواسطة karim_monir

باشمهندس محمد شامي قريت الموضوع وبرضه ماوصلتش لحل
الغالق اللي في كاميرا الرادار الثابت بتبقي اكيد مظبوطة انها تصور بعد تخطي سرعة معينة على الدائري اللي هو اقصى سرعة 90
يبقي لو النقل ماشي 90 زيي زيه مش هايتلقط مخالفة

هو ده استفساري
سواقين التريلات والمقطورات هايمشو 90 لان الحساس مش هايشتغل غير بعد كسر السرعة دي

كريم باشا
كل سنة و حضرتك طيب
طبعا عندك حق الموضوع لم يتم حسمه بشكل كامل
بس في فكرة عندي بخصوص تساؤل حضرتك...وهي
طبعا كلنا متفقين ان الكاميرات ثابته و كذلك سرعة العدسة بالنسبة لنفس الكاميرا
يبقى بالتالي الصورة اللي بتتلقط بواسطة الحساس بتأخذ صورة السيارة المخالفة في مكان ثابت داخل الإطار و بوضوح معين نتيجة الفوكس اللي حصل على السيارة المخالفة
وعليه لو في سيارة نقل مخالفة و حضرتك بتعدي من جنبها أكيد صورة سيارتك مش حتكون في لا في وضوح صورة السيارة المخالفة وأغلب الظن في مكان مختلف داخل إطار الصورة..
هذا والله اعلى واعلم

واضح جدا ان اجهزة الرادار المستخدمة علي الطرق حصل فيها تطور مهم جدا و ده من خلال البحث السريع اللي قمت به من شوية و قدرت أوصل لأستنتاج مبدئي مهم جدا ألا وهو :

الرادار اللي كلنا بنشوفه علي المحور و علي الدائري حاليا هو عبارة عن مزيج بين جهازين ..
1- كاميرا ذات حساسية عالية جدا و درجة وضوح شديدة لرصد الطريق و جميع المركبات المارة
2- جهاز لحساب السرعة بين نقطتين و هو جهاز الرادار

و هذا الجهاز الجديد يستخدم منظومة جديدة و حديثة جدا و هي Automatic number plate recognition

أيه بقي حكاية ال ANPR ده

بأختصار دي منظومة يتم أستخدامها للتمييز بين اللوحات المعدنية للمركبات المختلفة و بالتالي من خلالها يمكن معرفة البيانات التالية :
- نوع المركية (ملاكي - اجرة - نقل - .....)
- موديل السيارة
- مالك السيارة أو قائدها المسجل بالمرور

و بدمج الانظمة الثلاثة (الكاميرا - الرادار - ال ANPR) مع امكانية برمجة الجهاز علي السرعات المحددة لكل مركبة أو لوحة يمكن تحديد المركبة المخالفة سواء كانت ملاكي او نقل

الاكثر من ذلك ..
ان بعض هذه الاجهزة تستخدم لتحديد المركبات المخالفة في السير في حارات غير مخصصة لها عن طريق نفس المنظومة بتحديد حارة لكل نوع من اللوحات و بذلك في حالة سير النقل مثلا في الحارة اليسري حتي و أن لم يتخطي السرعة القانونية فأن الجهاز سيلتقط المركبة علي انها مخالفة و يرسل بياناتها الي وحدة المرور التابعة لها

ده بأختصار اللي قدرت أفهمه عن الموضوع ده يارب أكون قدرت اوضح لكم الفكرة

مع خالص تحياتي
م/ سمير الشهاوي

المشاركة الأصلية كتبت بواسطة mshamy

كريم باشا
كل سنة و حضرتك طيب
طبعا عندك حق الموضوع لم يتم حسمه بشكل كامل
بس في فكرة عندي بخصوص تساؤل حضرتك...وهي
طبعا كلنا متفقين ان الكاميرات ثابته و كذلك سرعة العدسة بالنسبة لنفس الكاميرا
يبقى بالتالي الصورة اللي بتتلقط بواسطة الحساس بتأخذ صورة السيارة المخالفة في مكان ثابت داخل الإطار و بوضوح معين نتيجة الفوكس اللي حصل على السيارة المخالفة
وعليه لو في سيارة نقل مخالفة و حضرتك بتعدي من جنبها أكيد صورة سيارتك مش حتكون في لا في وضوح صورة السيارة المخالفة وأغلب الظن في مكان مختلف داخل إطار الصورة..
هذا والله اعلى واعلم

السلام عليكم,
كنت قرأت من زمان عن فكرة عمل الرادارات ده و إللي ساعدني فيه عمي بصفته دكتور مهندس فنيه عسكرية سلاح رادار ... ماحدش يقلق ولا يتلفت حواليه :)) ... رادارات الجيش مختلفة طبعا بس المباديء مشتركة في المجال ده...
ماعليش هاطلع برة الموضوع و أبدأ بالرادارات العسكرية ... رادارات بدون كاميرا ... بتقوم ببث موجة بتردد معين لمسح مساحة دائرية معلومة ... الرادار ده بيقدر يحدد إحداثيات أي هدف داخل منطقة المسح وتنسيبها لمركز بث الرادار ومن ثم التعامل معها بطريقتين ... إما التعامل بالدفاعات الموجودة في نفس المنطقة (سلاح الدفاع الجوي) أو يتم ربطها بإحداثيات الأقمار الصناعية للتعامل معها من خالال أسلحة بعيدة ممكن تكون في المحيط حتى.
الرادارات دي بتقدر كمان تحدد حجم الأهداف الملتقطة عن طريق حساب مساحة الموجة المنعكسة على شاشة الإستقبال للموجة (الشاشة إللي بتبقى بتلف 360 درجة حول نفسها)

بالنسبة لرادارات الطرق بتشتغل بنفس الفكرة ولكن بتقوم ببث موجة على شكل مخروط في إتجاه واحد (مش دائري) ...
موضوع إختلاف السرعات للمركبات على الطرق (ملاكي 90 - نقل خفيف 80 - أوتوبيس 70 ... إلخ) ده كله ولا ليه أي لازمة في الرادارات الثابتة ... لأن بيتم ضبطها على سرعة واحدة هي السرعة القصوى ... بالنسبة للرادارات المتحركة (إللي بيكون واقف على تشغيلها فرد أمن) دي برضه بتكون مضبوطة على أقصى سرعة للطريق 90 مثلا بس بيزيد عليها إن بيكون فرد الأمن شايف نوع المركبة بعينيه و يقدر يطلع طلقة تسجيل صورة المركبة manual يعني لو عايز يصور عربية ماشية على 20 يقدر و سرعة المركبة لحظة إلتقاط الصورة بتكون متسجلة و مطبوعة على الصورة (علشان ماحدش يقلق)

نيجي لقصة عربيتين ماشيين جنب بعض ولحظة إلتقاط الصورة كانت واحدة 150كم/س والتانية 70كم/س (مثلا) والرادار ثابت ... مين هايطلع في الصورة؟ ... طبعا كلهم ولو عشرين عربية كلهم هايطلعو في الصورة ... بس الظريف إن كل عربية بيبقى معروف كانت ماشية على كام لحظة التصوير ... لأن الرادارات الثابتة تقدر تحسب سرعة أكثر من هدف في نفس الوقت ... مش بنشوف الرادارات العسكرية في أفلام ستيفن سيجال بتبقى جايبة أكتر من طائرة وكل طائرة مكتوب بسهم جنبيها إحداثياتها و سرعتها؟ ... نفس الكلام في الرادارات بتاعت الطرق.

طبعا أنا ماعرفش دلوقتي الرادارات تقدر تحسب سرعة كام هدف في نفس الوقت لأن التطور في الحاجات دي مش سهل إننا نعرفه وحتى لو عرفت إنهم عملو رادار بيحسب 50 هدف مثلا هل هو ده إللي بيستخدم في مصر؟ ... شركات وموديلات وتطوير وكل يوم فيه جديد ... آسف جدا للإطالة

كل سنة و حضراتكم بخير ورمضان كريم.

المشاركة الأصلية كتبت بواسطة karim_monir

يااااه
اشكركم كثيرا افدتوني والله بمعلوماتكم القيمة
وكدة فعلا محتاجين راي ظابط مرور يدينا رايه نهائي في نوع الرادار
عشان اكون مطمئن لما الاقي جنبي رادرا على الدائري وبيصورني وانا ماشي قانوني اعرف انه بيصور النقل مش انا

أستاذ/ كريم
الاخوة الاعضاء الكرام ..

بصراحة بعد موضوع حضرتك ده فضلت طول الليل قلقان و عمال أقلب في أوراقي القديمة و الكتب اللي عندي و كمان قعدت ساعات ادور علي النت و في مختلف المنتديات علي أصل لأي معلومة عن جهاز الرادار الثابت و كيفية عمله
و اخيرا توصلت لكم هائل من المعلومات قدرت ألخصه في موضوع طرحته هنا علي المنتدي
http://www.nilemotors.net/Nile/169973-a.html

لعله يحوز علي أعجابكم و يرضي فضولكم .
كمان هأستأذن حضرتك و الاخوة الكرام اللي هايشرفونا في لقاء المنتدي في شهر رمضان أني ألقي الضوء علي هذا الموضوح من خلال محاضرة صغيرة أستعرض فيها فكرة عمل هذا النوع من الرادارات و أنواعها و طريقة عمل كل نوع

مع خالص تحياتي
م/ سمير الشهاوي