الموضوع: ارجو من الاخوه الخبراء مساعدتي

السلام عليكم شباب المنتدي المحترمين

عندي مشكله بالعربيه وعايز اعرف أرائكم لاني مش بفهم في الميكانيكا اوي ومش عايز الميكانيكي يشتغلني

هقولكم علي الاعراض ومش عارف اذا كانت كلها متعلقه بمشكله واحده ولا كل واحده مشكله منفصله وعلي فكره كلها اعراض جديده ومش عارف بدأوا مع بعض او لأ

- لما بتكون العربيه بارده صباحا وأدور بيكون الموتور عالي علشان تسخن لمدة دقيقه مثلا وبعدين يوطي والمشكله انه لما يوطي بحس ان العربيه بترجف او بتتنهد بطريقه لو قافل الأزاز هتحس ان العربيه بترج في تتابع منتظم واول ماتسخن يروح الكلام ده كله

- لو انا ممور العربيه ودوست بنزين الار بي ام بيعلي بسرعه و بانتظام ولما اسيب البنزين فجأه المؤشر مش بيرجع بأنتظام لأ بيرجع ببطء وساعات يقف لحظه مره هو مرتين في سكة الرجوع

- صوت الموتور اصبح عالي عموما وخصوصا صوت الشكمان يعني لو طالع مطلعايه عالتاني مثلا بسمع صوت بكبكه كده زي العربيات القديمه كمان لاحظت مؤخرا ان العادم ليه ريحه عادم قويه زي بتاعت المشاريع ...

المهم اني هكتب شويه ملاحظات يمكن تفيدكم في الرد

. السياره سيتروين اكسارا مو 2001 انجكشن عامله 240 الف كم
. مافيش اي دخان خارج من الشكمان باي لون
. لسه مغير زيت شل 5000 وماشي بيه 800 كم
. السياره سحب موتورها تمام بس مش بتجيب اكتر من 160 -170
. البوجيهات ماغيرتهاش قبل كده السياره معايا من 4 شهور ولما كنت بكشف عليها ساعة الشراء الميكانيكي قاللي مش محتاجين تغيير

وألف شكر مقدما للجميع و ارجو اني ماكنش طولت عليكم وفي انتظار ردودكم القيمه