الموضوع: نتيجه زيارتي مركز خدمة ابواليزيد - الملك الصالح

السلام عليكم

النهارده روحت اغيير العلبه الخلفيه للشكمان لانها كانت بدأت تعمل صوت عالى , فـ توكلت على الله وروحت مركز خدمه الملك الصالح (ابو اليزيد) - بدل ما اخبط المشوار لغايه 6 اكتوبر بكره

اول لما دخلت رفعنا العربيه والفنيين بدأو يكشفوا على حاله الشكمان بالكامل , وكان التقرير كالأتى :-

- السوسته الأماميه (اللي بعد الفرن) : واخده خبطه وتعتبر هلكانه
- علبه البيئه - سليمه ومفهاش اي مشكله (بالرغم من ارتفاع حراره منطقه فرامل اليد)
- العلبه الوسطى : سليمه ومفهاش اي حاجه غير ان في شبه تشقق في لحام العلبه مع الماسوره
- العلبه الخلفيه : تالفه بكل ما تحمل الكلمه من معنى , فيها ثقب بالإضافه لتلف الحشوه الداخليه , لدرجه ان الفني وهو بيهزها كان جواها صوت زي رمل او حاجات مفتته

بالنسبه للاسعار :-
- سعر العلبه الرنانه (بديل علبه البيئه) 350 جنيه , واللي جواها مش فحم , تقريبا قالى جواها الياف حراريه او حاجه زي كده وفكرتها انها بتهدي صوت الشكمان شويه , ليس اكثر ولا اقل
- سعر علبه البيئه 800 جنيه (طبعا مش مجنون عشان اشتريها)
- سعر العلبه الوسطى : متكلمناش فيه بصراحه لاني معنديش مشكله فيها
- سعر العلبه الخلفيه : 352 جنيه (الصاج التقيل) , و 195 جنيه (الصاج العادي) , وحسب كلام مدير المكان ان العلبتين جواهم نفس الحشو الداخلي ومفيش اي فرق غير ان الغاليه صاجها اتقل شويه من العاديه
- سعر الوصله اللي بتيجي من فرن الشكمان لغايه العلبه الوسطى وبتلغي علبه البيئه : 205 جنيه (صاج عادي) و 390 جنيه (الصاج التقيل)
- سعر الشكمان بالكامل بعلبه البيئه : 1800 جنيه (من اول فرن الشكمان لغايه العلبه الخلفيه وما بينهم)

الإجراءات اللي تمت بالظبط :-

- تم تركيب وصله اماميه (الصاج العادي) من عند فرن الشكمان لغايه العلبه الوسطى (ولغيت علبه البيئه) تماماً , وطبعا السوسته من ضمن الوصله
- تم عمل لحام بسيط في العلبه الوسطى (كان فيها جزء مفكوك من لحام الماسوره في العلبه)
- تم تركيب العلبه الخلفيه (الصاج الخفيف - مش بخل والله , بس انا شايف ان الاتنين واحد والصاج مش فارق كتير )

الأسعار النهائيه عند الدفع وبعد التخفيض والخصومات :- لان كان معايا زي بطاقه تخفيض

- 145.50 جنيه سعر الوصله الاماميه لغايه العلبه الوسطى
- 133.64 جنيه سعر العلبه الخلفيه
- 81.82 جنيه مصنعيه التركيب
- 36.09 جنيه ضريبه مبيعات
----------------------------------------------------------------
397.05 جنيه (400 جنيه) , اجمالى المبلغ المدفوع بدون الإكراميات :-)

الأداء بعد التغييرات :-
- الاصوات اللي كنت بسمعها بسبب العلبه الخلفيه اكيد راحت والحمد لله
- العربيه فاقت بعد الغاء علبه البيئه , والسحب اتحسن اكيد
- سخونه منطقه فرامل اليد اختفت
- صوت العربيه مختلفش كتير من حيث الهدوء , ودي كانت اكتر نقطه مخوفاني من الوصله كبديل لعلبه البيئه
يعمي الحمد لله بشكل عام العربيه ارتاحت واخدت نفسها

حبيت اقولكم تفاصيل المغامره لعلها تفيد حد يكون بيفكر يعمل نفس العمله :-)

بالتوفيق ان شاء الله للجميع

عنوان المقر الرئيسي لإداره مجموعة ابو اليزيد :-

العباسيه : 71 ب شارع احمد سعيد , تليفون وفاكس : 226834562 - 26821814

عنوان مراكز خدمه ومعارض ابو اليزيد:-

مدينه 6 اكتوبر - المنطقه الصناعيه الثانيه - قطعه 117 , 118 - تليفون 38333962 - 38331091

عنوان مركز خدمه الملك الصالح :-

14 شارع قيس ابو السعود بجوار كشري ابو حنفى , تليفون 0127475440 - 0102707170

عنوان معرض الحرفيين :-

19 شارع جمال عبدالناصر - مدينه الحرفيين , تليفون 2697145