الموضوع: تعديل فانوس البومة امامى

الموضوع بسيط جدا وهو انى رشيت الفانوس من جوة اسود زى اللى بينزل فى البومة السبور
ده شكل الفانوس العادى :


وده شكل الفانوس السبور :


وبالنسبة للاسبراى انا جبت اسبراى اسود لامع وانبوبة سليكون زى اللى فى الصورة والاتنين ب18 جنيه



طريقة فك الفانوس من العربية هى كالاتى :



1- اولا فيه مسمارين ظاهرين فوق الفانوس دول بيتفكو عادى مافهمش حاجة (المسمار رقم 1 ورقم 2)
2- فى مسمار تالت وده مستخبى ورا الشبكه الامامية وعشان يتفك لازم الجزء اليمين من الشبكه يتفك الاول (المسمارين رقم3)
3-فك المسمار المستخبى ورا الشبكة وبعتذر انه مش باين فى الصورة (مسمار رقم 4)
4-بعد ماتفك ال3 مسامير اللى بيثبتو الفانوس مش هايطلع من مكانه غير لما ناحية من الاكصدام تتفك اللى هى مربوطة بالرفرف (مسمار رقم 5) وده بيمسك الكارتيرة وبيربط الكصدام مع الرفرف
5- بعد ما اخر مسمار يتفك الاكصدام بينزل لتحت شوية ويسمح للفانوس انه يخرج من مكانه

نيجى بعد كده لمرحة فتح الفانوس نفسه ودى شرحها فى الفيديو ده:

[youtube]http://www.youtube.com/watch?v=HI4ErrG3DO4[/youtube]

بالنسبة لوش الفانوس الازاز انا غسلته بالماية كويس وبعدين جربت بواقى معجون سنان كان مرة اتقالت فى موضوع هنا فى المنتدى وفعلا له تأثير قوى وخلاه يلمع وبعدين سبته ينشف كويس



انا عايز اوضح ان الفانوس بعد ماتفتح هو مكون من 3 اجزاء : الوش الخارجى الازاز والوش الفضى اللى اترش اسود والفانوس نفسه او القاعدة بتاعته يعنى

وده الجزء اللى بتكلم عنه بعد ماترش بالاسبراى وطبعا خدته فى البلكونة وحطيت تحته ورق جرايد والرش فى اكتر من اتجاه رايح جاى عشان كل حته فيه تتغطى كويس باللون الاسود



بعد الفانوس مانشف كويس وطبعا انا سبته من بالليل لتانى يوم الصبح التقفيل مهم جدا عشان مايدخلش تراب او مياه جوة الفانوس وبيتملى الحواف او الحروف يعنى بتاعت الفانوس بالسيليكون كويس ويتركب الوش الازاز عليها ويتضغط عليه ويفضل يتلف بشريط لزق عشان يمسك فى بعضه كويس.

واى سؤال تحت امركم