الموضوع: رابطة مالكي وعشاق التمبرا (الجزء الرابع)

المشاركة الأصلية كتبت بواسطة zago

يا تيفا ياحبيبي الكلام اللي نقوله بره ما يتكتبش جوه .... انت عايزهم يضربونا ولا ايه يا اكسلانس ؟ ههههههههه
لو حد سألني فأنا مقولتش حاجه


انا عايز الجيب بتاعتي :copy of majd(4):

قولي ليه
يابني قولي ليه
طيب اي حد يقول ليييييييييييه ؟؟؟

كويس انك سألت حلو السؤال ده
اقولك ليه
الجيب قعدت معايا 3 سنين عصرتها فيهم والموتور معملتلوش لا عمره ولا نيله بس غيرت سير الكاتينه مره والكربراتير عملي قلق شويه واتعمل
مش زي التمبرا بقالها معايا 6 شهور والموتور انتحر
الباور بتاعها كان مش طبيعي ممتاز بشكل مستفز لدرجه ان اي حد يسوقها يبقى عايز باور زيه ( مش زي ناس )
قوه العربيه مفيش كلام يتقال غير انها جباااااااااااااره
طبعا مش بتسخن نهائي ولا تعرف يعني ايه سخونه
المساحه من جوه ( أوضتين وصاله ومطبخ وحمام ) عايز اقول اني كنت بخرج فيها انا و5 صحابي يعني 6 راكبين في عربيه واحده بشنطهم وحاجتهم واكلهم وفيه مكان نمد رجلينا كمان
السرعه بتاعتها برضو كانت حلوه قوي لدرجه اني كنت بشد مع لانسر والنترا والفيرنا دي كنت كل يوم اكل اتنين تلاته ههههههههه
تقدرو تقولو علمت على عربيات مصر كلها وكل ما انزل بيها ييجي واحد جنبي ويديني كلاكسات ويقول الجمله الخالده .... تبيع يا باشمهندس ؟؟؟؟

من ناحيه قطع الغيار يؤسفني اقول ان تيل الفرامل الامريكي الأصلي كان ب 90 جنيه
سره العجل اللي ورا ب 80 جنيه روماني
سير الاتينه بتركيبه كان بيعمل 120 جنيه
الفانوس اللي ورا بالكامل ب 15 جنيه ( صيني بس نضيف جدا )
الفانوس الامامي بالكامل جديد ب 25 جنيه
والفانوس الصغير اللي قدام ب 5 جنيه ( اه والله )
الاشارات اللي في الجنب بتتباع في اي محل اكسسوار ب 2 ونص الصغيره والكبيره 3 ونص
بابين قدام كاملين بسلطاتهم ببابا غنوجهم وكيس بطاطس وبيبسي ب 1500 جنيه
الهارد توب بتاعها من اول 500 جنيه لحااااااااد 5000 لو امريكي اوريجينال بتاع موديل حديث
صاج العربيه كله ممكن تعمله عند السمكري يعني لوح صاج ممكن تطلع منه جنب كامل للعربيه
المساعد الاستيراد غيرته مره واحده علشان اتكسر كان غالي حبتين ....ب 100 جنيه
السوست اللي ورا اتكسرت برضو ( لاني كنت شايل فيها جرانيت ) واتعملت ب 150 جنيه بالمصنعيه ( سوست مصري )
تابلوه كامل بالعدادات والدركسيون والقطمه والكونتاك والدراعات والزراير ب 2000 جنيه
الكراسي والكنبه اللي ورا جيب اوريجينال استيراد ب 1200 جنيه
مرايه الجنب الاتنين من اول 90 جنيه حديد لحاااااااد 350 بلاستيك امريكي موديل بعد 95
موتور المساحه بالمساحات 80 جنيه ( وانا اللي ركبتهم )
ايه تاني ؟؟؟ ده اللي انا فاكره

عيوب العربيه بالظبط حاجتين
1 استهلاك البنزين عاااااااااااالي
2 العافشه ناشفه طحن بس طبعا وانت ماشي لا ليك دعوه بمطب ولا بحفره ولا بلاعه مفتوحه ولا مطلع ولا منزل ولا اي حاجه
يعني انت ممكن تمشي على 120 في اي طريق يخطر على بالك


بس كده
ياريت متحدفوش طوب هههههههههههههههه

السلام عليكم
ازيك يا زاجو يا عفريت
طيب ما هو كل الكلام اللى انت بتقوله ده معناه ان التمبرا احسن بكتير
المشكله مش فى التمبرا المشكله فى الجن المصور اللى سايقها يابنى حرام عليك انت جننتنى انا والميكانيكى وبتاع العفشه ووالدك والمنتدى واللى فيه وادارته يعنى هى التمبرا اللى هتقدر عليك
روح ربنا يحفظك ويحافظ عليك ويهدينى ويهديك قول امين
يا ناس يا عسل زاجو وصل
خبوا عيالكو