الموضوع: رابطة مالكي وعشاق التمبرا (الجزء الرابع)

المشاركة الأصلية كتبت بواسطة eng_tefa

مساء الفل يا رجاله
بمناسبه الجزء الرابع عايز اسال سؤال بس الاجابه بصراحه من غير تحيز بعد اذنكوا ..ولا كلام الناعم اللى مبياكلش عيش
بصراحــــــــــــــــــــ ـــــــــــه
ايه رايكو فى التمـــــبرا؟؟؟
-------
انا هقول راى
اكتر عربيه شوفتها فيها مشاكل
فعلا عربيه كلها مشاكل
بقالنا 4 اجزاء ب 12 الف مشاركه على الاقل 5 الاف منها مشاكل فعلا
انا عمرى مشوفت عربيه كدا كل حاجه عايز تتصلح فيها وتتغير وبردو بتبوط تانى
ودا مع كل الناااااااااااااااااااس اللى هنا ..ومحدش يقولى انه لا
مفيش حد مغيرش الاتى ( علبه دركسيون -بارات داخليه وخارجيه - كبالن - مساعدين - تلت تربع الماتور - قربه ميه - قربه مساحات - موتور مساحات - مساحات نفسها - - كاوتشه مساحات - تابلوه وعدادات ودا اعرب حاجه فى العالم عمرى مشوفت كدا - لوحه تكييف -عوامه بنزبن - طرمبه بنزين - شويه حشكله مكلفه فى الصاج -........................... الخ)
وبعد كل دا مفيش حد بيستمر معاه الحاجات دى اكتر من سنتين فى احسن الحالاااااااااااااااات
فى حين ان اى عربيه تانيه مفيش الكلام الفاااااااااااضى دا ..الصمت الرهيب
انا بقيت عامل زى المكانيكى وسط اصحابي بمختلف الاشكال والانواع فى العربيات
ونبي تفكروا قبل متردوا والله هتلاقى كلامى مقنع والعربيه فعلا اكتر عربيه بتاعت مشاكل
استاذ هشام والمجهود الرائع اللى عامله فى العربيه ربنا يقويه -- يعنى بس متقولش انا بحبطك والله ولا حاجه بس والله كونت جبت لانسر احسن من الكلام دا فعلا مش عايزك تزعل منى بس والله عربيه مشاكل بس

السلام عليكم
ازيك يا هندسه ايه يا عم النظرة التشاؤميه اوى دى اعتقد ده من تجربتك مع عربيتك بس ما اظنش ان الموضوع عام
اولا انا عاوزك تفهم انك طبعا عندى احسن من ميت عربيه وانى مش مختلف معاك لمجرد الاختلاف بس انا هقولك تجربتى مع العربيه من وقت ما اشتريتها حتى الان وانت احكم
بص ياسيدى انا اشتريت عربيتى من شهر 3 - 2010 يعنى من حوالى سنه بالتمام والكمال
وعملت فيه الاتى اول ما جبتها
1- غيرت علبه الدركسيون
2- غيرت السيور
3- غيرت الزيوت
5- تيل فرامل
6- فلتر الهواء
7- بوجيه واحد فقط كان قاطع غيرته
واستمريت بالعربيه بدون مشاكل وكل شويه اروح اعمل حاجه مش اساسيه فى العربيه بس بعملها لنفسى
يعنى لما اقولك غيرت المرايات يبقى ده مش عيب فى العربيه
او الكاوتش اشتريت فردتين اماميتين ده مش عيب فى العربيه
غيرت المقصات من شهر تقريبا بعد استخدام سنه وانا كنت مبهدل العربيه لانى ما كنتش بسوق قبل كده واساسا اول ما جبت العربيه بتاع العفشه قالى المقصات عاوزة تتغير
غيرت الاكصدام الامامى لانه كان مكسر من صاحب العربيه الاصلى وكمان كنت عاوز اكصدام بالفوجات
غيرت الاكصدام الخلفى لانى عملت حادثه لو اى عربيه تانيه عملتاها كانت اترمت فى الشارع انا كل اللى حصل عندى ان كورنر العربيه الشمال الخلفى حصل فيه انبعاج والاكصدام شكله ما باقاش عاجبنى بس العربيه اللى دخلت فيه عربيه بيجو اللى كانت بتنزل للشرطه دى مش فاكر رقمها تقريبا 405 باظت خالص
غيرت كالون باب السواق كان فيه مشكله من وقت ما اشتريت العربيه
ان شاء الله ناوى اغير فبرة التابلوة لانها مشروخه من ساعه ما اشتريت العربيه

طيب تعالى كده نراجع مع بعض انا عملت ايه فى العربيه من اساسياتها
1- عليه الدركسيون ودى كانت بايظه من صاحبها الاولانى اللى كان خابطها فى مطب وكانت بتجيب زيت
2- المقصات الى برضه كانت مش كويسه من بدايه ما اشتريت العربيه
3- كالون باب السواق
ماعدا ذلك ما عملتش حاجه فى العربيه
انا تقريبا ما بعملش حاجه غير انى اغير الزيت واحط بنزين فقط لا غير
انا سعيد جدا بالعربيه
ها ايه رايك بقى يمكن عشان انا ماركبتش عربيات غيرها ما سوقتش يعنى عربيات تانيه مش عارف بس العربيه مريحانى جدا
بسبب الاتى
واسعه جدا بركب فيها انا وولادى وزوجتى ووالدى ووالدتى وبسافر بيها ما بتقولش لا
ناعمه على قدر معرفتى بالعربيات كل ما تقف جنبى فى اى اشارة او زحمه عربيه ابقى سامع صوت موتورها وعربيتى لا
ثبات رائع والحمد لله بمشى بيها لحد 140 وانا حاسس انى ماشى على 60 وجربت اجيب 160 بس ما حاولتش اكررها تانى
مريحه فى القياده يعنى ما بنزلش عظمى مكسر زى ما الناس بتقول
سعرها معقول بالنسبه للامكانيات
تكييف باور سنتر زجاج كهرباء موتور 1600
اعتقد ان مشكلتك شخصيه يعنى فيها بعض سوء الحظ مع العربيه بتاعتك ممكن كان ملعوب فيها قبل كده وهو ده اللى تاعبك او يكون صاحبها اللى قبلك كان هاينها شويتين او مش مهتم بيها
ان شاء الله ربنا يوفقك لواحده من اثنين اما يصلح لك حال عربيتك او يوفقك لبيعها وشراء العربيه اللى تريحك باذن الله