تقرير صيانة ال 20,000 كم لـ جين 2 (2010)

**Raul_7** · 16-05-2011 02:59 AM

السلام عليكم ورحمة الله...

انهارده تم بحمد الله تم عمل صيانة ال 20,000 لعربيتي في مركز عصام صفا في النزهة.

طبعا بما إني ساكن في الشيخ زايد كان مشوار زي العسل رايح جاي.

بس خلونا نتكلم ليه المشوار يستاهل.

طبعا أنا رحت بناء على تجارب ناس كتير راحوا المركز قبل كده, وبصراحة أنا ناوي بعد كده أعمل صياناتي كلها هناك.

ليه؟

1- المركز حلو كده وصغير وإنت شايف كل حاجة بتحصل في العربية ومفيش حاجة اسمها اسأل مهندس الاستقبال اللي مابيوصلكش حاجة من اللي بتحصل بالضبط في العربية, هنا إنت ممكن تبقى واقف جنب الفني وتسأله بيعمل ايه وعادي جدا لو عايز تقوله أي ملاحظة.

2- باشمهندس عصام صاحب المركز محترم جدا جدا وهو اللي بيجرب العربية بنفسه وبيتأكد إن كل حاجة من اللي مكتوبة في الملاحظات اتحلت, انهارده جرب العربية بتاع 3 مرات بسبب عيب وقال لي في الآخر إن فيه قطعة محتاجة تتغير بس هي مش عنده, طبعا أنا كنت رحت التوكيل في الصيانتين اللي فاتوا قلتلهم عالعيب ده ومتحليش واليوم كان بيخلص ويقولك تعالى يوم تاني وطبعا كنت بكسل لأني عارف إني هرُوح أقعد اليوم بطوله.

3- العربية استلموها الساعة 12:45 خلصوها الساعة 2:15 تقريبا بس فضلنا قاعدين بتاع ساعتين زيادة مستنيين فلتر البنزين ييجي من التوكيل عشان كان ناقص وده أعتقد نقطة الضعف الوحيدة اللي شفتها, إن قطع الغيار مش متوفرة هناك زي التوكيل.

كمان قابلت هناك أيمن باشا وبدران pedro وطارق جين 2 و أستاذ مصطفى صديق وطبعا طبعا مصطفى فاروق البروتوني اللي معهوش بروتون.

بالنسبة لأداء العربية بعد الصيانة, فيه تحسن بسيط لكن مفيش فرق ملحوظ, وده يمكن لإن أدائها قبل الصيانة كان كويس برضه الحمد لله.

تكلفة الصيانة كانت 500 جنيه بالضبط من غير الزيت.

بس كده, إن شاء الله ناوي أعمل صياناتي كلها هناك عشان بجد الاهتمام بتاع باشمهندس عصام يفرق كتييييييير عن التوكيل.

تحياتي

**midosalah** · 16-05-2011 03:18 AM

مبرووك الصيانة يا حودة ربنا يباركللك فى عربيتك

**Tarek Gen 2** · 16-05-2011 03:24 AM

مبرووووك يا برنزيز :)

**mido_soliman** · 16-05-2011 04:03 AM

مبروك يا حودة يا ترى العيب اية اللى قلولك علية ليكون عندى انا كمان
وانت غيرت فلتر بنزين وبوجيهات وفلتر الهوا اتنضف ؟؟
والسعر جامد جدا والزيت اخبار صوت المكنة اية ؟؟
عادى ولا هدى عن الاول

**Raul_7** · 16-05-2011 04:11 AM

المشاركة الأصلية كتبت بواسطة midosalah

مبرووك الصيانة يا حودة ربنا يباركللك فى عربيتك

الله يبارك فيك يا ميدو ربنا يخليك.

المشاركة الأصلية كتبت بواسطة Tarek Gen 2

مبرووووك يا برنزيز :)

الله يبارك فيك يا طاروق, معلش عاستفتك معايا.

المشاركة الأصلية كتبت بواسطة mido_soliman

مبروك يا حودة يا ترى العيب اية اللى قلولك علية ليكون عندى انا كمان
وانت غيرت فلتر بنزين وبوجيهات وفلتر الهوا اتنضف ؟؟
والسعر جامد جدا والزيت اخبار صوت المكنة اية ؟؟
عادى ولا هدى عن الاول

الله يبارك فيك يابو حميد.

عيب خبطة علبة الدركسيون في الملفات المكسرة.

آه كل ده اتعمل.

بالنسبة للزيت محستش بفرق برضه, بس بكرة إن شاء الله أشوف والعربية باردة واقولك.

**Nistelrooy** · 16-05-2011 04:17 AM

مبروك يا باشا ..

وانا كمان ناوي اعمل كلهم هناك ان شاء الله

شد حيلك بقي انا دلوقتي 11 الف :)

ده كفاية انك بيطلع لك فاتورة كمبيوتر وخصم وحركات :)

-------------

بس انتا اخدت وسط البلد ولا دائري ؟

**أبومعاذ** · 16-05-2011 08:38 AM

ألف مبروووووووك وعقبال ال 2 مليون كم

**Tarek Gen 2** · 16-05-2011 12:39 PM

المشاركة الأصلية كتبت بواسطة Mustafa_Farouk

السلام عليكم،

1000 مبروك يا محمود بس الغريب في الموضوع إن كل الجن 2 اللي كانت بتعمل صيانة امبارح كانو لون أزرق، المركز كلو كان أزرق

متنكدش علينا يا عم مصطفى بقى

**Raul_7** · 16-05-2011 03:12 PM

المشاركة الأصلية كتبت بواسطة Nistelrooy

مبروك يا باشا ..

وانا كمان ناوي اعمل كلهم هناك ان شاء الله

شد حيلك بقي انا دلوقتي 11 الف :)

ده كفاية انك بيطلع لك فاتورة كمبيوتر وخصم وحركات :)

-------------

بس انتا اخدت وسط البلد ولا دائري ؟

الله يبارك فيك يا سامح, آه شفت صباح النضافة. هههههههههههه.

وأنا رحت من وسط البلد, كبري أكتوبر - صلاح سالم.

المشاركة الأصلية كتبت بواسطة أبومعاذ

ألف مبروووووووك وعقبال ال 2 مليون كم

الله يخليك يابو مريم, بس مش ده رقم مبالغ فيه شوية؟ هههههههههه.

المشاركة الأصلية كتبت بواسطة Mustafa_Farouk

السلام عليكم،

1000 مبروك يا محمود بس الغريب في الموضوع إن كل الجن 2 اللي كانت بتعمل صيانة امبارح كانو لون أزرق، المركز كلو كان أزرق

المشاركة الأصلية كتبت بواسطة Tarek Gen 2

متنكدش علينا يا عم مصطفى بقى

ماتقوله حاجة يا عم ده جاي يضايقنا, ده الواحد مصدق نسي .

-

الموضوع: تقرير صيانة ال 20,000 كم لـ جين 2 (2010)

LinkBack

أدوات الموضوع

عرض

-

-

-

-

-

-

المواضيع المتشابهه

تقرير صيانة 10000 لصني 2010

تقرير عن صيانة 5000 لصني 2010

تقرير عن صيانة الالف لصني 2010

تقرير صيانة ال15000 لجينا 2010

تقرير صيانة ال 1000 كم و الانطباعات -- بروتون جين 2 (2010)

الكلمات الدلالية لهذا الموضوع

المفضلات

المفضلات

ضوابط المشاركة