الموضوع: اجازة خمس أيام و يا ريت اعرف المشكلة فيين....

السلام عليكم و رحمة الله و بركاته

عندى مشكلة مدوخانى و مش عارف لها حل
ابتدت المشكلة بعد ما عملت صيانة ال 80000 و غيروا السيور و اللزى منه المهم سافرت
و انا نازل اجازة " 82000 كم " لقيت مرة واحدة مؤشر الحرارة وصل قبل الـ h بشرطة قمت واقف على طول بفتح الكبوت لقيت الميه بتغلى فى القربة سبت العربية تبرد و زودت الريداتير "كان فاضى خالص و القربة مليانه على الأخر؟؟؟" المهم كملت لحد القاهرة و عينى على مؤشر الحرارة لحد الحمد لله ما وصلت البيت و كان المفروض أسافر تانى يوم لفايد المهم قولت أعدى على توكيل السبع علشان يشوفوا المشكلة فين .
رحت السبع و كان يوم خميس و زحمة جداً المهم سألت كبير المهندسين و قال لى ده وش سلندر من غير ما يبص على حاجة قمت رايح للمهندس محمد غالى و حكيت له المشكلة و بص معايا على العربية و كنت لسه حاطط ميه فى القربة و الريداتير قدامه لقى الميه عمالة تزيد فى القربة قالى اطفى العربية بسرعة علشان الدورة بتاعت الميه مسدوده علشان كده الميه بتزيد فى القربة .
فبكل زوق دخل العربية للورشة من غير حجز أو اى حاجة و كشف عليها و النتيجة أن فى سنسور أو بوابه عند طرمبة الميه كانت مبتفتحش أو مش شغالة فقام مغيرها بواحدة مستعملة من عنده مؤقتاً لحد الصيانة اللى بعدها و غير غطاء الريداتير بواحد مستعمل مؤقتاً لحد ميعاد الصيانة .
المهم سافرت فايد الحمد لله من غير مشاكل و رجعت و بعدها قبل ما أسافر حجزت صيانة 85000 علشان أطمن على العربية و نغير غطاء الريداتير و سنسور أو ترموستات الطرمبة .
رحت الصيانة بس للأسف المهندس محمد غالى كان أجازة و قعدت العربية عندهم حوالى 3 ساعات كشف و النتيجة المهندس قالى العربية زى الفل و زيادة تأكيد حنغير غطاء الريداتير.
المهم بعد يومين سافرت دهب "600 كيلو" و الحمد لله من غير مشاكل .
لحد امبارح لقيت الريداتير رجع ينقص تانى و القربة الميه فيها زى ما هيا ؟؟؟؟؟
ياريت لو حد عنده حل لحسن أنا نازل أجازة من 1-8 لحد 5-8 و بصراحة خايف أروح التوكيل لأن المهندس اللى هناك مصر على أنى أغير جوان وش السلندر مع العلم أنى حسب معلوماتى المتواضعة انه لو جوان وش السلندر المفروض يكون فى دخان أبيض أو سحب العربية يتغير أو مينفعش المشكلة تروح و ترجع بمزاجها.....
يا ريت لو يكون فى حل أو حتى أعرف العيب منين ....
لو حد عنده فكرة ياريت يقولى علشان انا مش فى القاهرة يعنى الأجازة على القد و فى رمضان....
و شاكر حسن التعاون.