نصيحة عن السواقة الاوتوماتيك

**samar13** · 04-08-2011 05:48 PM

انا كمان يومين هاستلم عربيتي الجديدة النترا اتوماتيك ,,,, و ما عنديش فكرة عن السواقة الاوتوماتيك ماعرفش غير المانيوال فممكن بس اي حد يقولي الخطوات الاساسية ,,,, عشان سمعت حكايات و كلام كتيييييييير جدا مفهمتش حاجة ,,

**alaa7sh** · 04-08-2011 06:03 PM

+1 +1
متاااااااابع

**Screenplays** · 04-08-2011 06:43 PM

يتم وضع عصا الفتيس علي d و بندوس بنزين واحده واحده و ملوش لازمه نجيب الدواسه الارض و لما العربيه تقف في اشاره مثلا يتم وضع عصا الفتيس علي n و مينفعش التبديل بين d و n في حاله حركه العربيه حتي لا يتم قصف عمر الفتيس و في حاله الركن يتم وضع عصا الفتيس علي p و اخراج المفاتيح من الكونتاكت بعد ذلك

**dr_radioooooo** · 04-08-2011 06:46 PM

دور العربية
هاتها على ال d امشى عادى بنزين و فرامل
و لما تقف هاتها على ال n
شد فرامل اليد
هاتها على ال p
بس كده لحد متبص فى الكاتالوج
ومبروك عالعربية

**samar13** · 04-08-2011 07:06 PM

شكرا جدا ,,,, والله يبارك فيكم

**Screenplays** · 04-08-2011 07:07 PM

لا شكر علي واجب يا فندم و 1000 مبروك و ان شاء الله تستلمي علي خير

**Nanona2011** · 05-08-2011 03:39 AM

قعدت اكتب موضوع طويل عريض وفي الاخر اتمسح ههههههه
بس يالا مش خسارة اني اعيدهولك
اولا مبروك على العربية
ثانيا الاوتو سهلة سهلة جدا انا اتعلمت في مدرسة قيادة مينوال بعدين اخدت 4 حصص اوتو وفيهم روحت لحد البيت بعربية المدرسة ههههههههه
يعني سهلة جدا
حاجة مهمة انك تعرفيها برضو الاوتو عربية بتفهم وبتتجاوب اسرع من منيوال لانها احدث طبعا اما المنيوال الى حد ما خشنه شوية وقاسية مقايسة مع الاوتو
طبعا هتسمي الله
اول فرق بين ال 2 هو الدواسات معاكي بنزين و فرامل بس وحركة الرجل بتكون رجلك اليمين بس الشمال هترتاح خالص ومش هنستخدمها ودي ملحوظة مهمة اوي عشان الارتباك وتركيز المخ بيكون في رجل واخدة في الاوتو وطبعا دواساتك واحدة واحدة

ثانيا الفتيس بتاعك فيه d,r دول بسميهم حروف الحركة d الحركة للامام driving
r reverse motion يعني حركة عكسية مارشدير

حروف السكون بقا
p parking هتركني خالص وتسحبي مفتاح الكونتاكت
n normal يعني هتقفي في اشارة طويلة شوية هتقفي مؤقت تجيبي حاجة تبصي على كاوتش تفتحي شنطة الخ الخ الخ استخدام طول اليوم يعني لو مش ركنه نهائية ودي مهمة اوي

ثالثا الدريكسيون بتاعك غالبا باور ستيرنج
يعني السايكل كاملة بتاعته 3 لفات ونص السايكل لفة ونص
لما بتحبي تحودي سنه بسيطة يدوب حركة براحة يدك العربية هتستجيب معاكي طب لو هتلفي عجلك اقصي حاجة هيبقو 3 لفات ومش بقساوة لا بمنتهى الليونة والبساطة وعدي في الدركسيون غالبا في حتة في المركز بارزة على شكل رأس مثلث دي لما تكون لتحت بيبقا العجل مستقيم بتعدي 3 لفات لحد ما تخلي رأس المثلث تحت تاني وبعد ما العجل اتلف لفة كاملة هتحتاجي ترجعي تظبطي عربيتك بسرعة فتلفي لفة ونص في العكس وبعدين تعدلي كله عللا طول ويرجع العجل مستقيم زي ما قولنا بنخليه مستقيم ازاي

نتوكل على الله وحطيتي المفتاح في الكونتاكت بتجيبي الفتيس على d و انتي بتنقليه بتدوسي على زرار موجود في الفتيس ده بيعمل كانه دبرياج هتلاقي الزارار جنب ايديك في مقدمة الفتيس
بتدوسي سنة بنزين صغيرة والكعب ثابت في الارض ووجه القدم هو الي بيتحرك علشان لو في عربية معدية وانتي طالعة تعرفي تفرملي بسرعة

اتحركتي طبعا بتسخدمي الدركسيون عادي جدا
وانتي ماشية في الشارع قابلتك اشارة او عربيات وزحمة رجلك بالتبادل بين الفرامل وبنزين عشان تلحقي نفسك وكله بالراحة جدا مش زي منيوال خااااااالص لالا بالترديج جدا لانها عربية حساسة ومستجيبة سريعاً
لما تركني هتنقلي من ال d لل n العربية هتقف بس مش ركنه وبعد n بتجيبي p وبتسحبي مفتاحك من الكونتاكت طبعا

يارب مكونش نسيت حاجة
ودايما رحلاتك بيها امان ان شاء الله