السلام عليكم ورحمة الله وبركاته
اللهم صلى على سيدنا محمد وعلى اله وصحبه وسلم
افضل صلاة وافضل تسليما
عليك يا حبيبى يا رسول الله
صلوا عليه وسلموا تسليما


اخوانى واخواتى الاعزاء ارحب بيكم واحيكم واحب اقولكم كل سنة وانتم طيبين بمناسبة قرب كحك العيد والبيتى فور والبتى بان وكله بالسمن البلدى :) "لسنا الوحيدون ولكننا المتميزون"

واستكمالا لمسيرة العلم و التعاون واعلاء شأن قسم البنوك المصرفيين كمنارة للعلم والعطاء فقررنا نحن رئيس جهاز مخابرات المنتدى اللواء العميد الملازم مصرفى "ب" "خ" "ح" وكل الالقاب عمل الموضوع التالى :)
اكتشف عالم التزوير والتزييف ولو سمحت مخمخ معايا فى الموضوع لانه مش مقتصر بس على موظفين الخزنة ولكن اى حد فى اى مكان لازم يبقى عارف المعلومات دية لاننا كل بنتعامل بالعملات بتاعتنا ولازم يبقى عندنا الوعى الكافى اللى نميز بيه العملات المزيفة من العملات الحقيقة اللى بنتعامل بيها فى حياتنا اليومية
ان شاء الله الموضوع متجدد وهيبقى شامل كل حاجة عملات مصرية كل الفئات وعملات اجنبية اخرى كل الفئات
برجاء التفاعل والتقييم اعلى الموضوع

........................
......
..
.

انهاردة ان شاء الله هناخد فئتين(عملات مصرية) وكل مشاركة ليا هاخد برضو فئتين او على الاقل فئة
مع العلم ان الموضوع هيدرج فيه صور اخدتها بنفسى لعملات مزيفة من اللى اكتشفتهم اثناء عملى على الشباك

اولا ناخد فكرة عن الفئتين 100 و 50 جنية المصرى
بس ياريت تجيب ورقتين "واحدة بخمسين وواحدة بمائة" علشان تطبق عملى معايا

اولا فئة 100
الابعاد :16.5 سم * 7 سم
الواجهه الرئيسية عليها مسجد السلطان حسن ويظهر على والوجه برضو رقم متسلسل "سيريال " مرة على اليمين ومرة على الشمال ودة فائدته انك لما يتقطع منك نصف الورقة ويضيع منك تقدر تروح البنك المركزى وتسترد النص اللى معاك بخمسين جنية علشان لو انت لقيت النص التانى فى اى وقت تقدر ترجعه وتاخد خمسين جنية تانية
هتقولى طب لية مش باخد قيمة الورقة كامله هقولك لو البنك ادالك قيمة الورقة كاملة يبقى كل يوم تقطعلك 100 الف جنية نصين تغير نص انهاردة ونص بكرة و100 الف يبقو 200 الف فى يومين
يا بلاش ربح 100% خلال 14 ساعه ولا تجارة المخدرات :))
علشان كدة نص ورقة العملة = قيمة نص الفئة والقاعدة بتتطبق على كل الفئات

ودية عينة من الورقة فئة 100 جنية الاصدار الاخير
تاريخ العدد 13/11/2000

شوف شكل ابو الهول او توت عنخ امون فى الضوء النافذ عامل ازاى



دية ورقة سليمة
السهم باللون الاخضر بيشير للمكان اللى المفروض يظهر فيه العلامة المائية وبما ان مفيش ضوء نافذ يبقى مش هتظهر ودة الطبيعى
السهم الاصفر بيشير لشريط الهولوجرام ودة شريط متقطع بيمر بوجه الورقة وظهرها لونه بيتغير وبتظهر فيه الوان الطيف
السهم باللون الاحمر بيشير للعلامة "الوردة" اللى باللون البنفسج ولونها بيتغير للون الدهبى لما بتميل الورقة

تعالى نشوف اللون بتعها لما بيتغير ونشوف الفرق بين الوردتين فى الورقة السليمة والمزيفة


لاحظ انا اللون تحت اتغير لما غيرنا زاوية التصويراو لما ميلنا الورقة فا لون الوردة اتغير من البنفسح للدهبى اما الورقة المزيفة فا لونها زى ماهو لم يتغير
الحبر المصنوعه منه الوردة حبر خاص لا يزول مع استخدام الورقة

ودية شكل من مسقط رأسى بيوضح لون الوردة لم يتغير مع تغير زاوية التصوير
الورقة المزيفة


حاول تركز تانى وتطلع الفرق بين الاتنين


لو ركزت فى رقم مائة على اليمين فى الورقتين
هتلاقى ان فى رسم زخرفى خطوطة واضحة ودقيقة جدا ولكن فى العملة امزيفة هيظهر شكله مطمس والوان متداخلة مع بعضها كما لو كان حبر و ووقع عليه شوية ميه دخلوا الخطوط فى بعضها
مش هتظهر قوى فى التصوير دة لان كان لازم تتوضح عن طريق سكانر بس مش ضرورى .....حاول تركز وادهو عرفت المعلومة
صورة توضيحية



الورقة المزيفة من عده زوايا




بالمناسبة الورقة دية ملساء جدا وناعمه لاقصى درجة ولو شديتها تتقطع فى ايدك بسهولة
لو لاحظت هتلاقى الورقة المزيفة متهاكلة جدا

تعالى بقى نشوف تفاصيل الورقة السليمة






السهم الاحمر بيشير لشريط اسمه شريط الفئة ودي شريط بيوضح فئة العمله ومكتوب علية "100 جنية"
السهم الازرق بيشير لشريط الهولو جرام المتقطع مكتوب علية "مائة 100 " بشكل متقطع جزء منه يظهر بالوجه و الشريط يظهر كامل فى الضوء النافذ زى ماهو واضح كدة
السهم الاخضر بيشير الى ابو الهول فى الضوء النافذ



ظهر الورقة
رقم مائة مكتوب بالكتابة الانجليزية على شكل نقاط 100 على الشمال
فى نهاية الروقة من تحت هتلاقى مكتوب مائة جنيه
وفى النقط الصغيرة هتلاقى البنك المركزى المصرى The Central Bank Of Egypt
لازم تستخدم عدسة مكبرة علشان تشوف الكلام دة ودية من ضمن اداوت التللر



ظهر الورقة المزيفة مفيهوش اى حاجة من اللى سبق شرحها و هيظهرلك بس نقط داخلة فى بعضها والوان سايحة



بص كمان وركز




راجع مع نفسك تانى








على الشمال من فوق بعد السيريال نمبر هتلاقى عين حورس غير كاملة باللون اللبنى او السماوى
بمجرد انك ترفعها فى الضوء العين هتظهر كاملة لان ظهر الورقة فيه الشكل المكمل للعين وفى الورقة المزيفة مش بيعرفوا يعملوا العين متطابقة تماما

.................................................. ............

ثانيا
نيجى بقى لفئة 50 جنية

معلومات عن الفئة
الابعاد
16 سم * 7 سم

الوجهه الرئيسية مسجد ابو حريبة
اصدار 29/1/2001




اصدار 17/3/1993

يلا نشوف الفرق بين الورق السليم والمزيف
انا اكتشفت ورقة عالية الاتقان و دقة التزييف "الشخص المزيف" متقن جدا لتقليد الورقة ومستخدم كل حاجة يمنع بيها اكتشاف التزييف حتى كمان ضايف على الورقة المادة القلوية اللى بتمنع جهاز اليو فى من اكتشاف الورقة
ملحوظة : جهاز ال UV هو جهاز متواجد عند كل تيللر والجهاز بيعمل بالاشعه فوق البنفسجية ووظيفته يكتشف العملات المزيفة لان طريقة عمله بتقوم على اظهارالعلامات الفسفورية الموجودة فى كل عملات العالم ماعدا ورقة الدولار والاسترالى وبعض فئات الين اليابانى لانهم مش مزودين بالعلامات الفسفورية ولكن فيهم علامات اخرى ان شاء الله نوضحهم فى مشاركات اخرى
الورقة عالية الاتقان دية كانت ملساء جدا ورقيقة لابعد الحدود
اكتشفت ورقة تانية ردئة التززيف و سميكة جدا " ورقة لحمة يعنى" :) والوانها زفت
يظهر الشخص المزيف دة بخيل ومش صارف على الورقة كويس وكان بيسترخص وبيجب اقل الخامات تكلفة

يلا نشوف مع بعض الورقتين المزيفين وفى وسطهم ورقة سليمة






الورقة على الشمال علية الاتقان و الورقة على اليمين ردئية التزييف والورق اللى فى النص سليمة

الورقة المزيفة رديئة الاتقان مع السليمة



فرق الالوان واضح جدا وملمس الورقة المزيفة خشن وسميكة جدا "ورقة لحمة"







دية ورقة سليمة
السهم الاصفر يمين : هى هى الوردة البنفسج الموجودة فى فئة 100 ومن نفس النوع والخامة ولها نفس الوظيفة ولونها بيتغير للون الدهبى

السهم الاصفر شمال : عين حورس نفس وظيفة اللى موجودة فى فئة 100 وبنفس الخواص

السهم الاحمر : يشير لمكان وجود ابو الهول وطبعا الظهر معتم يبقى مش هيظهر

السهم الازرق بيشير للشريط المغناطيسى المتقطع "الهولوجرام"

ورقة سليمة


السهم الاحمر بيشير للشكل المكمل لعين حورس
السهم الاصفر يشير لشريط الفئة "50جنية"
الدائرة الصفراء بتشير لفرق اللون الواضح بين الورقة المزيفة والسليمة



شوف الفرق بين لون المكان اللى علية دايرة ولون الورقة المزيفة

السهم الاخضر : بيشير للوردة البنفسج الى لونها مش بيتغير هنا
السهم الاحمر بيشير للوضوح الكامل لشكل توت عنخ امون ى ظل عدم وجود ضوء نافذ



السهم الاورنج : عين حورس غير واضحة نهائى ومتداخلة جدا والخطوط فوق بعضها والشكل غير مكمل لما بالخلف
السهم الاصفر : وضوح توت عنج امون المزيف والمرسوم برشم عادى



الورقة المزيفة مع ميل الورقة وتصوير من زاوية مختلفة اللون لا يتغير





الورقة السليمة بتوضح
عين حوس كاملة ومتطابقة مع المكمل الخلفى للعين



فرق اللون من الامام





فرق اللون بالخلف



عين حورس واضحة جدا اسفل الصورة فى الورقة السليمة
عين حورس غير موجودة من الاساس


ورقة سليمة

السهم الاخضر :رقم خمسين بنفس تقنية العلامة المائية واللى بيظهر فى الضوء النافذ "صعب التزييف"



الشريط المغناطيسى "الهولوجرام" غير موجود اساسا فى الورقة على اليمين "الغير متقنه"
الشريط المغناطيسى واضح جدا فى الروقة السليمة "الوسطى" والروقة عالية الاتقان على الشمال



نميز بقى بين الورقة السليمة والورقة عالية الاتقان
الشريط المغناطيسى فى السليمة اعرض مرتين من المتواجد فى المزيفة "عالية الاتقان"
السليمة " هتلاقى الشريط مكنوب عليه50 خمسون اما المزيفة فممكن ما تلاقيش او تلاقى بس يكون الكتابة غير متوازية او الحروف متقطعه يعنى شكلها غير واضح المعالم



السهم الاحمر شريط الفئة
السهم الاصفر شريط الهلوجرام " المغناطيسى المتلون"
السهم الازرق العلامة المائية "ابو الهول"


الورقة السليمة



المصيبة ان شريط الهولوجرام فى الورقة عالية التزيف برضو متغير الالوان وبيظهر بكل الوان الطيف
وعندك نفس الخاصية موجودة فى الهولجرم الاصلى والصورة السابقة بتوضح ان الهولوجرام اخد لون ازرق من جهه معينه اثناءء التصوير فى حين لما بيتغير لوضع تانى ممكن يبقى احمر او اى لون من الوان الطيف وبيبقى بلون فضى لامع من بعيد زى الاصلى بالظبط
ونشوف صور توضيحية كمان



ركز وشوف الفرق
هتلاقى السليمة على اليمين باللون الفضى والشمال باللون الازرق




شوف دية بقى

السليمة على اليمين من زاوية تانية اخدت لون ازرق زى المزورة فى الصورة السابقة و الهولوجرام فى الصورة هنا على الشمال واخد لون احمر كما لو كان الهولوجرام فى الورقة الزيفة اصلى بس هو مزور او مزيف طبعا
اذن الورقة مقنه جدا جدا جدا
للعلم الورقة عالية التزيف مكلفة جدا على المزور او المزييف وبتبقى صعبة الاكتشاف بالنسبة للعامة






شوف فرق الاوان بين التلاته
حتى عالية التزييف فيها فرق الوان بس مش هيبقى مميز فى حين ان الورقة متهاكلة او استخدمت كتير وتداولت بين الناس

صورة اخيرة






فى حالة نقله لمنتدى اخر او موقع اخر
يجب ذكر المصدر لانها حقوق فكرية
وهى نتاج مجهودى البحت فاقل تقديرللمنتدى هو ذكر المصدر
افضل تحياتى وتمنياتى بالتوفيق دائما الى اخوتى فى الله باذن الله
واتمنى اكون افدتكم بالموضوع دة
وكل سنة وحضرتكم طيبين وعيد سعيد عليكم جميعا باذن الله
ولا نسألكم غير الدعاء
.......
...
.



منقول

موضوع مهم قوي فحبيت انقلهلكم

جزاك الله خيرا

موضوع كويس الحقيقه..........بس اعتقد المشكله ان الورق المزيف ده ساعات بيبقى في وسط رزمة .........بس معلومات كويسه جدا

شكرا على المعلومات فعلا قيمة

تسلم ايدك
موضوع مفيد جدا والله
جزاك الله خير

جزاك الله خيرا

طيب انا معايا 100 جنيه كلها سليمة ما عدا 100 الصغيرة اللى هيا زى العلامة الماية جنب رسمة 100 على الشمال ده اصدار قديم ولا ايه