الموضوع: فولكس جيتا 2012 - هذا ما حدث - بالصور

صباح الفل يا رجاله ...

كل سنه وأنتم كلكم طيبين .. الحقيقه انا اول مره أكتب في قسم فولكس ، بالرغم من أني من الناس القديمه قوي في المنتدي ، ومكنتش أتمني ان أول مره كده أدخل عليكم بحادثه ، بس معلش :) اللي حصل بقي، والحمد لله على كل شي.

أنا بشتغل في عمان - الأردن ، و من حوالي 10 أيام كنت رايح المطار هنا أجيب واحد صاحبي، و طبيعه الطريق انه كان نازل و لافف شمال ... سرعتي بالضبط كانت 84 كم/س

فجأه و بدون أي سابق انذار .. العربيه عامت مني و لفت حوالين نفسها لفه كامله و رشقت في عمود نور علي جنب الطريق ، العربيه دخلت في العمود بباب السواق ، الأير باجز الجانبيه فتحت و عموما الحمد لله ان العربيه وقفت.

العربيه جيتا 2012 بيزك 2000 سي سي، و عامله 900 كم بس ، يعني لسه جديده تماما ... لكن الحمد لله .. قدر الله وما شاء فعل.

المهم .. انا عامل الموضوع ده اصلا عشان اقيم النقط التاليه :

1- الأمان : عالي جدا بصراحه .. العربيه اخدت صدمه شديده فى عمود النور وفي تصوري ان الصدمه كانت اقوي بكتير من حجم الضرر اللي جه في العربيه ، الأير باج الجانبيه كان ليها دور كبير فى حمايه جسمي من عمود النور (بعد ربنا سبحانه وتعالي)

2- الأتزان : وده الأهم ، أنا مش عاوز افتي ، ومش عاوز اسوأ سمعه العربيه ، لكن انا بسوق من أكتر من 10 سنين .. وبسافر كتير جدا جدا .. وسافرت من مصر للأردن بالعربيه أكتر من مره ، وعندي أسبابي اللى تخليني أقول أن في احتمال كبير جدا أن العربيه دي تكون فيها مشكله ما في الأتزان ، وعلشان كده حبيت أقولكوا جميعا ، خدوا بالكوا من العربيه دي .. ان مش قادر أوكد حاجه ... بس اللي حصل مش طبيعي اطلاقا.

* نظام ESC الموجود في العربيه .. و ممكن تراجعوا اللينك ده :
Euro NCAP | Volkswagen Jetta | 2011 | ESC test - YouTube

كان شغال في العربيه .. و عاوز أقول انه في الحقيقه مفيش أي حاجه من اللي شفتوها في للينك ده حصلت .... العربيه لفت حوالين نفسها علي سرعه حوالي 80 و علي الأسفلت و الطريق ناشف تماما مفيش مياه علي الأرض أو اي حاجه تأثر علي ثبات العربيه و في ملف مش قوي للدرجه.

أنا عارف أنكوا مستغربين .. ازاي ده يحصل مع عربيه ألماني محترمه جدا جدا زي الجيتا .. وكل الناس بتشكر فيها ... والله أنا كمان مستغرب أكتر منكوا و كل اللى أقدر أقوله ان اللي حصل ده مش طبيعي .. و العربيه لسه جديده .. ولو في احتمال ان العربيه دي يكون فيها عيب زي ما كان فيها عيب ال DSG قبل كده ... فأنا كتبت الموضوع ده عشان الناس تاخد بالها.

أنا حاولت ادور علي الأنترنت ، عشان أعرف لو فيه أي مشاكل ظهرت في أتزان العربيه أو حاجه تكون ليها علاقه باللي حصل معايا .... لكن الحقيقه ملقتش غير مشكله تم أكتشافها ودي ليها علاقه بشكمان العربيه :
Volkswagen recalls 2011-2012 Jetta sedans for excessively long tailpipes

علي أي حال .. أنا بعت ميل للشركه الأم في ألمانيا .. و طلبت منهم توضيح عن اللي حصل .. وطلبت توضيح عن الأتزان دون المستوي واللي تسبب ان العربيه تلف حوالين نفسها بالشكل ده وعلي سرعه قليله نسبيا زي دي ... , أنا مستني ردهم

ودي صور العربيه :

لا حول ولا قوة الا بالله

حاجة غريبه فعلا والف حمدلله علي سلامتك اهم حاجة