اكتشاف: لوجى طلعت دكـــر

**Egyzizo** · 11-11-2011 04:18 AM

العربية مشيت 1650 كيلو فى 6 أيام ..
من وإلى الغردقة ومجاهل البحر الأحمر مثل الجونة ، مكادى ، سهل حشيش ، وشرم الناقة ..
استهلكت فيهم 130 لتر بنزين ..
بمعدل استهلاك 7.8 لتر لكل 100 كيلومتر ..

متوسط السرعة على الطرق المفتوحة كان 140 كم/ساعة.
سعدت جدا لما وجدته من استقرار للعربية وعدم الاحساس بالسرعة وأنا ماشى على 150 و 160 ك/ساعة.

أقصى سرعة جابتها لوجى كانت 175 ك/ساعة (العربية كان بها 4 أفراد + شنط)، مشيت على السرعة دى كام دقيقة للتجربة فقط، وكان الآداء معقول جداً.

التسارع (السحب) مرضى جداً مقارنة بالسيارات المجاورة لكن لاحظت أن يقل بصورة ملحوظة جداً بعد سرعة 150 ك/ساعة ، فبتاخد وقت على ما تجمع السرعات الأعلى. أنا مش عارف باقى العربيات المماثلة عاملة ازاى فى الظروف دى ، بس أنا متأكد ان النيسان صنى متفوقة فى النقطة دى لأنها كانت بتجرى معايا وكانت بتجمع أحسن بعد 150.

المحصلة : لوجى طلعت دكــــــــر يا رجالة، ومش عايز منها أكتر من كده لأنى لا أعتقد انها ممكن تمر معايا تانى بظروف أقسى من اللى شافته فى مشوار البحر الأحمر لأنى فعلاً افتريت عليها.

**Ahmed A Rahman** · 11-11-2011 04:37 AM

حمدا لله على السلامة يا باشا

وفعلا كل كلامك بيحصل معايا

انا عامل 58000 الف ولسه حاسس ان العربية جديدة الحمد لله

**minicooper20** · 11-11-2011 06:32 AM

الف مبروك يا معلم ربنا يحفظهالك

**MOUSTAFA_SAAD** · 11-11-2011 08:18 AM

فعلا اهم حاجه انك تعرف حدودها وامكانياتها علشان ماتطلبشى منها اكتر من كده
فيه ناس دافع 60 الف وعاوزين يركبوا عربيه بقدرات 160 الف

**MaZaGAngeE** · 11-11-2011 08:33 AM

عربية جديدة لازم تمشي مشوار زي ده بدون أي مشاكل طبعا .
أنا رحت من اسكندرية لمرسى علم رايح جاي بالعربية البيتلز 1964 و رجعت نفس المشوار بعد 10 ايام بدون اي مشاكل
و رحت من المنيا لأسوان 1700 كيلو رايح جاي في 24 ساعة بالبطة 1993 و التكييف شغال طول الوقت و مع الجري برضه بدون مشاكل
أهم حاجة انك تعمل الصيانات على طول لأي عربية جديدة أو قديمة و مش هتقصر معاك ابدا .
و ربنا يسترها معانا كلنا

**lion98** · 11-11-2011 12:07 PM

ألف حمد الله على سلامتك و سعيد جدا بتجربتك مع لوجي و اسمحلي أشاركك نفس التجربة من حوالي شهرين مضوا و بنفس السرعة تقريبا و الحمد لله العربية فاتحة ما شاء الله زي الرعد 140 و 150 بمنتهى الاتزان و الثبات خصوصا في المنطقة بتاعة راس غارب و منحنياتها و واخدة سكة من الكل ما عدا ال4*4 و السيراتو و أتذكر واحد معاه تويوتا ياريس حاول مجرد محاولة يشد مع العبد لله بس على مين ؟ بمنتهى الصراحة و الأمانة عربية ممتازة جدا و مناسبة جدا في حدود سعرها و استخدام الأسرة المصرية و الواحد مكانش متخيلها بكل هذه القوة و الثبات و الأهم المشوار مريح جدا و متحسش بأي معاناة و انت سايق و لا تحس بهدة حيل لجودة العفشة و جودة تصميم و تنجيد الكراسي . ربنا يبارك لنا فيها و يكفينا شر الطرق و ما عليها

**magid1010** · 11-11-2011 12:34 PM

المشاركة الأصلية كتبت بواسطة mazagangee

أهم حاجة انك تعمل الصيانات على طول لأي عربية جديدة أو قديمة و مش هتقصر معاك ابدا .
و ربنا يسترها معانا كلنا

فعلا أنا معاك جدا في النقطة دي +11111111111111

**hamottos** · 12-11-2011 11:50 PM

الف مبروك لانضمامك لعشاق اللوجان
وهي فعلا عربيه قيمتها اغلى من سعرها بكثير وصفقه رابحه بكل تأكيد
انا جربت اخذ الملفات في طريق مصر اسكندريه الصحراوي على 150 والله واللي كان بيعمل كده معايا البي ام دبليو والمرسيديس بلامبالغه وبسيب الدريكسيون على السرعه دي عشان اشوف الثبات العربيه تحفه فنيه
انا مش بحب السرعه بس العربيه والطريق بيشجع على كده
انت لو صفرت العداد قبل ما تطلع مشوارك ده على طول هتلاقي الاستهلاك ثابت 7.5 لتر لكل 100 كيلو
العربيه وحش كاسر ثابت على الطريق بلا مبالغه واعتقد احنا بنأخذ اعلى امكانيات في حدود المبلغ اللي دفعنا ه فيها عن اي عربيات تانيه في السوق

**karimnet** · 13-11-2011 08:05 PM

ياريس العربية دى ما شاء الله طلعت شرم و رجعت تانى يوم

-

الموضوع: اكتشاف: لوجى طلعت دكـــر

LinkBack

أدوات الموضوع

عرض

اكتشاف: لوجى طلعت دكـــر - انشر الموضوع فى :

-

-

-

-

المواضيع المتشابهه

الوافى فى شرح لوجى

فرش لوجى من عند جينز كار

لوجى بقت ناشفة أوى ؟؟

صوت فى ابواب لوجى

اكتشاف غريب العربية طلعت مواصفات خليجى !!!!!!!!!!!!!!!!!!!!!!!!!

الكلمات الدلالية لهذا الموضوع

المفضلات

المفضلات

ضوابط المشاركة