الموضوع: استفسار عن المرور

المشاركة الأصلية كتبت بواسطة aboulojain

لعن الله الراشي
واللعن : الطرد من رحمة الله
وده عشان ايه ؟
و المجاهرة بالذنب حرام

اولا انا مارشتش انا كنت ماسك فايدي 15 جنيه باقي نموذج الفحص والله ماكان في بالي اني اديهمله لقيته خدهم

ثانيا : لما تبقى البلد اللى انت عايش فيها مش بتمشي الا كدة هتعمل ايه؟

ثالثا : لما ادخل امتحان عشان اطلع رخصة خاصة واسقط 3 مرات في الاشارات وانتظر 3 شهور مابين المرة والتانية وكل مرة اسقط ومش عارف اطلع الرخصة اعمل ايه ؟

رابعا : لما يبقى الرخص في مرور فيصل مش بتطلع الا بالواسيط او بالفلوس هعمل ايه ؟

خامسا : لما تبقى واقف متبهدل في طابور وطالع عينيك بقالك تلت ساعات وتلاقي واحد جيه زي الباشا عشان معاه واسطة او دافع فلوس كل حاجة خلصت في ساعتها هتعمل ايه ؟

سادسا : ...

سابعا : ...... هنقعد نعد لحد مليون

لعلم حضرتك انا يومها كنت راشش الكبوت يعني ماشي تبع القوانين مش مخالف ولا حاجة

يعني من حقي اني اثبت لون تاني على الرخصة طالما انا راشش !

لكن هي البلد كدة

لو البلد مظبوطة انا همشي مظبوط لكن انت في بلد مش بتمشي الا كدة

اسافر ولا ارشي ؟ ولا اقعد في بيتنا واقضيها مواصلات عشان مش عارف اطلع الرخصة او حتى اجددها ؟