الموضوع: اسطورة التحرش ! (أسف للعنوان .. استحملونى)

أعتذر لجميع رواد المنتدى علي العنوان البايخ للموضوع ولكن لما تقروه هاتفهموا .. قد يبدو الموضوع ساخر أو تهكمى زي ماتعودتوا علي مواضيعى .. لكن المرة دي الموضوع يحمل في طياته ماهو اخطر بمراحل من التهكم .. انا صيدلى محترم .. والله العظيم صيدلى محترم .. دي قناعتى الشخصية عن نفسى .. عمرى ما شتمت مريض ولا عمري أخدت حاجه اكتر من حقى .. عمرى مابعت قرص مخدر .. ولا عمرى استخدمت علمى ف شر .. عمرى ما أذيت حد ف شغلى ولا بصيت بصه وحشه لحد .. ناهيك عن البصبصة للنساء .. بإختصار يا سادة انا مراعي أكل عيشى و متقى ربنا ف المرضى عشان ربنا يكرمنى ف مستقبلى .. ولما بالاقي مريض محتار ف دوا مش موجود باجتهد انى أوفره أو انصحه يرجع للدكتور يكتبله غيره عشان أوفر عليه عناء البحث .. انا ماتشرفتش بمقابله حد من المنتدى بس اعتقد انكم كونتوا فكرة عن شخصيتى .. حد هايسألنى طيب ايه لزوم الديباجه دى ؟ ادخل ف الموضوع .. حاضر يا اخى صبرك عليا ..

الموضوع بأختصار انى رجعت البيت الساعه 4 عصرا اتغدى و اريح ساعة .. و لقيت والدتى و هى بتحط الغدا عادى خالص بتقولى : " على فكرة متقدم فيك شكوى ف نقابه الصيادلة ان العامل اللى عندك ف الصيدلية بيتحرش بالبنات !!!! " .. لسة ماستوعبتش الكلام و لقيتها بتكمل نص الشكوى .. " و إن ده هايؤدى لفتنة طائفية !!!! " .. تحرش ؟! .. بتقولوا مين ياولاد ؟ تحرش .. ميييين ؟ .. تحرررش !! .. لا و تؤدى لفتنة طائفية !! .. عشان تضمن انك خدت الكومبو (ده كارفور نفسه مايقدرش ينزل ال offer ده .. تحرش وعليه فتنة طائفية هدية) .. المهم ان الاتهام موجه للعامل مش ليا .. والعامل نفسه راجل غلبان 53 سنة عنده 6 عيال منهم 4 بنات جوز منهم واحدة السنة اللي فاتت و واحدة الشهر ده .. يعنى أب بسيط مكافح عنده جوز بهايم بيسمنهم و يبيعهم ..
طبعا السؤال اللى رمى نفسه تحت عجلات تفكيرى " طب وانتى عرفتى منين يا ستى إذا كنت انا نفسى ماعرفش " .. قالتلى " واحد صيدلى اخو جارتنا كان ف النقابة بيرخص صيدلية و شاف الشكوى ولقى شكوى تانية زيها مرسلة لصيدلى تانى " .. قلت اسألها ع الصيدلى التانى جايز يكون قمرتى ولا صاحب كوباية .. قالتلى " الدكتور فلان" .. طب انا شاب صغير وجديد بقالى 8 سنين ف صيدلة .. إنما الدكتور فلان ده راجل قديم و بقاله 20 سنة فى المجال ده و راجل متدين ومحترم بشهادة كل الناس وراجل متجوز وعنده اطفال و زوجته دكتورة ف منتهى الادب والاخلاق !!! .. هنا ابتديت احس ان الحكاية مقصودة .. خصوصا ان الشكاوى على حسب ماعرفت غير مكتوب فيها اسم الشاكى يعنى من مجهول (لسه ماعرفتش طرف ثالث ولا ايادى خفية) .. انا عارف كام صيدلى بالاسم وظيفتهم ف الحياه يقدموا شكاوى ف الصيدليات عشان يسقطوا رخصتها .. بس ماكنتش اعرف ان الفجر و الافترا وصل للدرجة دى !! .. انا الحمدلله انسان محترم بشهادة جيرانى و اصحابى والصيادلة و المرضى اللي بتجيلى مخصوص من اخر الدنيا .. و كفاية انى هاقف قدام ربنا الديان العادل وانا مش خايف من حاجه .. انما صعبان عليا احساسى بالظلم و انى باتعب عشان اخدم الناس و يكون ده جزائى .. فى النهاية باقول لنفسى ربنا موجود ومطلع .. ايه رأيكم أطال الله عمركم ؟